«Ӕцӕг дзул уӕлӕрвтӕй»

УЫЙ размӕ бон ӕцӕгдӕр бирӕ хабӕрттӕ ӕрцыд. Йесо диссаджы хуызы бафсӕста минты ӕмӕ йӕ уый фӕстӕ паддзахӕй сӕвӕрынмӕ чи хъавыд, уыдонӕй алыгъд. Ӕхсӕвы бацыд Галилейы абухгӕ денджызыл; стӕй фынккалгӕ уылӕнтыл чи рацыд ӕмӕ чи фӕцӕйдӕлдон кодта, уыцы Петры фервӕзын кодта; уый фӕстӕ, цӕмӕй йӕ ахуыргӕнинӕгтӕ ма фӕдӕлдон уыдаиккой, уый тыххӕй уылӕнтӕ ныссабыр кодта.

Ныр ӕй, Галилейы денджызы цӕгат-хурыскӕсӕнварс диссаджы хуызы кӕй бафсӕста, уыцы адӕм Капернауммӕ хӕстӕг ссардтой ӕмӕ йӕ фӕрсынц: «Ды кӕд ӕрбацыдтӕ ардӕм?» Лӕвар бахӕрыны ныфс та сӕ кӕй ис, ӕрмӕстдӕр ӕй уый тыххӕй кӕй агурынц, уымӕ гӕсгӕ сын Йесо бауайдзӕф кодта ӕмӕ сӕ сразӕнгард кодта, цӕмӕй хъуыды кӕной ӕмбийгӕ хӕринагыл нӕ, фӕлӕ ӕнусон цардмӕ кӕнӕг хӕринагыл. Ӕмӕ йӕ уӕд адӕм фӕрсынц: «Цы кӕнын хъӕуы мах, цӕмӕй кӕнӕм Хуыцауы хъуыддӕгтӕ?»

Йесо сын дзуры уыцы хъуыддӕгтӕй ӕппӕты ахсджиагдӕры тыххӕй. «Мӕнӕ Хуыцауы хъуыддаг,— дзуры Йесо,— цӕмӕй сымах ӕууӕндат Ууыл, Кӕцыйы Уый рарвыста».

Кӕд Йесо бирӕ диссӕгтӕ сарӕзта, уӕддӕр ыл адӕм не ’ууӕндынц. Зын бауырнӕн у, фӕлӕ йӕ уыйбӕрц диссӕгты фӕстӕ адӕм фӕрсынц: «Цавӕр нысан ратдзынӕ Ды, цӕмӕй мах фенӕм ӕмӕ баууӕндӕм Дӕуыл? цы кусыс Ды? Нӕ фыдӕлтӕ хордтой маннӕ ӕдзӕрӕг ран, фыст куыд у: „дзул арвӕй ратта уыдонӕн хӕрынӕн“».

Ногӕй та йӕм диссаг равдисынмӕ кӕй ӕнхъӕлмӕ кӕсынц, уый тыххӕй сын комкоммӕ бацамыдта, диссӕгтӕ кӕмӕй цӕуынц, Уымӕ. Уый дзуры: «Моисей уын нӕ ратта дзул арвӕй, фӕлӕ Мӕ Фыд дӕтты сымахӕн ӕцӕг дзул уӕлӕрвтӕй; уымӕн ӕмӕ Хуыцауы дзул Уый у, Кӕцы ӕрцӕуы уӕлӕрвтӕй ӕмӕ дӕтты цард дунейӕн».

«Хицау! — дзурынц адӕм,— дӕтт нын ӕдзухдӕр ахӕм дзул».

«Ӕз дӕн царды дзул,— ӕмбарын кӕны Йесо,— Мӕнмӕ ӕрцӕуӕг нӕ кӕндзӕн ӕххормаг, ӕмӕ Мӕныл ӕууӕндӕг дойны никуы кӕндзӕн. Фӕлӕ Ӕз загътон сымахӕн, сымах Мӕн уынгӕ дӕр кӕй фӕкодтат, ӕмӕ не ’ууӕндут. Ӕппӕт, цы дӕтты Фыд Мӕнӕн, Мӕнмӕ ӕрцӕудзӕн ӕмӕ Мӕнмӕ ӕрцӕуӕджы нӕ асурдзынӕн ӕддӕмӕ; уымӕн ӕмӕ Ӕз ӕрцыдтӕн уӕлӕрвтӕй уый тыххӕй нӕ, цӕмӕй Мӕхи фӕндон кӕнон, фӕлӕ Мӕн рарвитӕг Фыды фӕндон. Мӕн рарвитӕг Фыды фӕндон та у, цӕмӕй Уый Мӕнӕн кӕй ратта, уыдонӕй макӕйы фесафон, фӕлӕ уыдон ӕппӕты райгас кӕнон фӕстаг бон; Мӕн Рарвитӕджы фӕндон та у, цӕмӕй алкӕцы Фырты уынӕг ӕмӕ Ууыл ӕууӕндӕгӕн уа мыггагмӕйы цард».

Уый фӕстӕ иудейтӕ хъуыр-хъуыр кӕнын райдыдтой Йесойыл, уымӕн ӕмӕ сын уый загъта: «Ӕз дӕн уӕларвӕй ӕрцӕуӕг дзул». Ӕрмӕстдӕр ӕй зӕххон адӕймагыл кӕй нымайынц, уымӕ гӕсгӕ уыдон дӕр назаретӕгтау дзурынц: «Йесо нӕу Уый, Иосифы фырт, Кӕцыйы фыды ӕмӕ Мады мах зонӕм? куыд зӕгъы Уый: „Ӕз ӕрцыдтӕн уӕларвӕй“?»

«Ма хъуыр-хъуыр кӕнут уӕ кӕрӕдзиимӕ,— дзуры сын Йесо. — Никӕйы бон у ӕрцӕуын Мӕнмӕ, Мӕн рарвитӕг Фыд ӕй куы нӕ ӕрбакӕна, уӕд; ӕмӕ Ӕз райгас кӕндзынӕн уый фӕстаг бон. Пехуымпартӕм фыст ис: „ӕмӕ иуылдӕр ахуыргонд уыдзысты Хуыцауӕй“. Алкӕцы, Фыдӕй фехъусӕг ӕмӕ сахуыр уӕвӕг, ӕрцӕуы Мӕнмӕ. Уый нӕ амоны, цыма Фыды исчи федта, Уый йеддӕмӕ, Хуыцауӕй чи у: Уый федта Фыды. Ӕцӕг, ӕцӕг зӕгъын сымахӕн: Мӕныл ӕууӕндӕгӕн ис мыггагмӕйы цард».

Йӕ ныхас адарддӕргӕнгӕйӕ, Йесо фӕлхат кӕны: «Ӕз дӕн царды дзул. Уӕ фыдӕлтӕ хордтой маннӕ ӕдзӕрӕг ран ӕмӕ амардысты; арвӕй цы дзул ӕрцӕуы, уый та ахӕм у, ӕмӕ уый чи хӕра, уый нӕ амӕлдзӕн. Ӕз — ӕгас дзул, уӕларвӕй ӕрцӕуӕг: ацы дзул чи хӕра, цӕрдзӕн мыггагмӕ». Ӕцӕгдӕр, адӕм Хуыцауӕй ӕрвыст Чырыстийыл куы ӕууӕндой, уӕд сӕ бон суыдзӕн ӕнусон цард райсын. Уый раттын нӕдӕр маннӕйӕн у йӕ бон, нӕдӕр ӕндӕр исты дзулӕн.

Куыд зыны, афтӕмӕй уӕларвӕй ӕрцӕуӕг дзулы тыххӕй быцӕу райдыдта, адӕм Йесойы Капернауммӕ хӕстӕг куы ссардтой, уӕд. Фӕлӕ быцӕу адарддӕр, ӕмӕ Йесо Капернаумы ӕмбырдгӕнӕны куы ахуыр кодта, уӕд стынг ис. Иоанны 6:25—51, 59; Псалом 77:24; Исай 54:13; Матфейы 13:55—57.

▪ Йесо уӕларвӕй ӕрцӕуӕг дзулы тыххӕй куы райдыдта дзурын, уый размӕ цавӕр цаутӕ ӕрцыд?

▪ Йесомӕ диссаг равдисынмӕ куы бахатыдысты, уый размӕ цы сарӕзта, уый зӕрдыл даргӕйӕ, уыцы курдиат афтӕ ӕнӕбындур цӕмӕн уыд?

▪ Йесо йӕхи уӕларвӕй ӕрцӕуӕг дзул кӕй схуыдта, ууыл иудейтӕ цӕуылнӕ уыдысты разы?

▪ Кӕм быцӕу кодтой уӕларвӕй ӕрцӕуӕг дзулыл?