Цӕмӕн дӕ хъӕуы Библи дарддӕр ахуыр кӕнын?

1. Библи дарддӕр куы ахуыр кӕнай, уӕд дын уый цы пайда уыдзӕн?

Ацы брошюрӕйӕ ды базыдтай Библийы сӕйраг ахуырӕдтӕ, ӕмӕ уый фӕрцы Йегъовӕйы бауарзтай. Фӕлӕ цӕмӕй дӕ уарзт тыхджындӕр кӕна, уый тыххӕй, нырмӕ цы базыдтай, ууыл хъуамӕ ма ӕрлӕууай (1 Петры 2:2). Дарддӕр дӕр ахуыр кӕн Библи ӕмӕ афтӕмӕй Хуыцаумӕ ӕввахсдӕр кӕн. Уымӕй кӕнгӕ у, ӕнустӕм цӕрдзынӕ ӕви нӕ. Бакӕс Иоанны 17:3; Иудӕйы 21.

Хуыцауы тыххӕй цас фылдӕр зонай, уыйас дӕ уырнындзинад кӕндзӕн фидардӕр. Ӕмӕ дын дӕ уырнындзинад ӕххуыс кӕндзӕн Хуыцауы зӕрдӕ рухс кӕнынӕн (Дзуттӕгтӕм 11:1, 6). Уырнындзинад дӕ баразӕнгард кӕндзӕн, цӕмӕй дӕ раздӕры хъуыддӕгтыл ӕрфӕсмон кӕнай ӕмӕ дӕ цард хуыздӕрырдӕм фӕивай. Бакӕс Хъуыддӕгтӕ 3:19.

2. Хуыцауы тыххӕй цы базыдтай, уымӕй дӕ бон куыд у иннӕтӕн баххуыс кӕнын?

Адӕймаг исты хорз хабар куы фехъусы, уӕд ӕй фӕфӕнды, цӕмӕй йӕ иннӕтӕн дӕр радзура. Ӕмӕ, ӕвӕццӕгӕн, дӕу дӕр фӕнддзӕн, цы базыдтай, уый иннӕтӕн радзурын. Библи цас фылдӕр ахуыр кӕнай, уыйас дын ӕнцондӕр уыдзӕн, Йегъовӕйыл ӕмӕ йӕ зӕрдӕвӕрдтыл цӕмӕн ӕууӕндыс, уый иннӕтӕн Библийӕ ӕмбарын кӕнын. Бакӕс Ромӕгтӕм 10:13–15.

Бирӕтӕ хорз хабар фыццаг радзурынц се ’мбӕлттӕн кӕнӕ сӕ хиуӕттӕн. Ды дӕр искӕимӕ Библийыл куы ныхас кӕнай, уӕд-иу фӕлмӕнӕй дзур. Адӕймагӕн афтӕ дзурын нӕ хъӕуы, Хуыцауӕн раст нӕ кувыс, зӕгъгӕ. Уый бӕсты йын радзур, Хуыцау нын зӕрдӕ цы диссаджы цардӕй бавӕрдта, уый тыххӕй. Стӕй дӕ зӕрдыл дар уый дӕр, ӕмӕ арӕх адӕм тынгдӕр бахъуыды кӕнынц, цы сын дзырдтой, уый нӕ, фӕлӕ, семӕ куыд ныхас кодтой, уый. Бакӕс 2 Тимофеймӕ 2:24, 25.

3. Хуыцау дын цавӕр диссаджы фадат дӕтты?

Библи ахуыр кӕнгӕйӕ Хуыцаумӕ ӕввахсӕй-ӕввахсдӕр кӕндзынӕ. Ӕмӕ афтӕмӕй йемӕ, фыд ӕмӕ хъӕбул куыд ӕнгом вӕййынц, афтӕ ӕнгом бауыдзынӕ. Ды суыдзынӕ Йегъовӕйӕн йӕ бинонтӕй. Бакӕс 2 Коринфӕгтӕм 6:18.

4. Дӕ уырнындзинад цӕй фӕрцы фидардӕр кӕндзӕн?

Хуыцауы Ныхас дарддӕр куы ахуыр кӕнай, уӕд дӕ уырнындзинад фидарӕй-фидардӕр кӕндзӕн (Дзуттӕгтӕм 5:13, 14). Йегъовӕйы Ӕвдисӕнтӕй искӕмӕн зӕгъ, цӕмӕй демӕ Библи дарддӕр ахуыр кӕна чиныг «Библи бӕлвырдӕй цы дзуры?»-йы ӕххуысӕй. Хуыцауы Ныхас цас хуыздӕр зонай, уыйас уыдзынӕ амондджындӕр. Бакӕс Псалом 1:1–3; 73:27, 28.

Хорз хабар цӕуы Йегъовӕйӕ, амондджын Хуыцауӕй. Ӕмӕ йӕ адӕмыл дӕхи куы бӕттай, уӕд уымӕ дӕр ӕввахсдӕр кӕндзынӕ (Дзуттӕгтӕм 10:24, 25). Дарддӕр дӕр Йегъовӕйы зӕрдӕ рухс кӕныныл куы архайай, уӕд «фидар ныххӕцдзынӕ» ӕцӕг цардыл – ӕнусон цардыл. Ӕцӕгдӕр, царды уымӕй хуыздӕр ницы ис, ӕмӕ Хуыцаумӕ ӕввахс кӕнай! Бакӕс 1 Тимофеймӕ 1:11; 6:19.