Сабаты цы ’мбӕлы аразын?

Иу сабаты та Йесо ӕмбырдгӕнӕнмӕ бацыд. Уый, ӕвӕццӕгӕн, уыд Галилейӕйы. Ӕмӕ уым федта, йӕ рахиз къух хуыскъ кӕмӕн уыд, иу ахӕм лӕджы (Лукайы 6:6). Чиныджыдӕснытӕ ӕмӕ фарисейтӕ Йесомӕ лӕмбынӕг кастысты. Цымӕ цӕмӕн? Сӕ зӕрдӕйы цы уыд, уый рабӕрӕг, Йесойы цӕмӕй бафарстой, уымӕй: «Сабаты рынчынты дзӕбӕх кӕнын ӕмбӕлы?» (Матфейы 12:10).

Дзуттаг дины разамонджытӕ ахӕм хъуыдыйыл хӕст уыдысты, ӕмӕ, дам, адӕймаджы сабаты сдзӕбӕх кӕнӕн ис, йӕ цардӕн тӕссаг куы уа, ӕрмӕстдӕр уӕд. Зӕгъӕм, адӕймагӕн йӕ къух кӕнӕ йӕ къах куы фелвӕстаид, уӕд ын ӕй сабатбон бабӕттын не ’мбӕлди, уымӕн ӕмӕ уымӕй мӕлгӕ нӕ акодтаид. Бӕлвырд у, чиныджыдӕснытӕ ӕмӕ фарисейты уыцы мӕгуыр адӕймаджы мӕт кӕй нӕ уыди. Уыдон Йесойы уый тыххӕй бафарстой, цӕмӕй йӕ исты хъуыддаджы фӕаххосджын кодтаиккой.

Фӕлӕ сын Йесо сӕ зыгъуыммӕ хъуыдытӕ зыдта. Закъоны фыст уыди, сабаты мацы кус, зӕгъгӕ, фӕлӕ уыдон уыцы закъон бынтондӕр сзыгъуыммӕ кодтой, ӕмӕ адӕмӕн фезмӕлӕн дӕр нал уыд (Рацыд 20:8–10). Йесо хорз хъуыддӕгтӕ кӕй арӕзта, уый тыххӕй ма йӕ уый размӕ дӕр ӕнаххосӕй ӕфхӕрдтой. Ӕмӕ ныр Йесо цы загъта, уымӕй, зӕгъӕн ис, ӕмӕ фарисейты ӕмӕ чиныджыдӕсныты йӕхӕдӕг йӕхи ныхмӕ скодта. Йӕ къух хуыскъ кӕмӕн уыд, уыцы лӕгмӕ бадзырдта: «Сыст ӕмӕ размӕ рацу» (Марчы 3:3).

Уый фӕстӕ йе ’ргом чиныджыдӕснытӕм ӕмӕ фарисейтӕм аздӕхта ӕмӕ загъта: «Искӕмӕ уӕ иу фыс куы уа ӕмӕ йын сабаты дзыхъхъы куы ныххауа, уӕд ӕй нӕ сисдзӕн?» (Матфейы 12:11). Куыннӕ! Фыс ӕхца у, ӕмӕ йӕ дыккаг бонмӕ дзыхъхъы куыд хъуамӕ ныууагътаиккой?! Уӕдмӕ мӕлгӕ дӕр акодтаид, ӕмӕ цӕттӕ ӕхца фесӕфтаиккой. Стӕй Фыстад дӕр афтӕ зӕгъы: «Рӕстгӕнӕг тыхсы йӕ фосыл дӕр» (Ӕмбисӕндтӕ 12:10).

Йесо сын фысы тыххӕй цӕвиттон куы ’рхаста, уӕд загъта: «Ӕмӕ уӕд адӕймаг та цас зынаргъдӕр у фысӕй! Афтӕ уӕдӕ, сабаты хорздзинад аразӕн ис» (Матфейы 12:12). Уӕдӕ Йесо уыцы адӕймаджы куы сдзӕбӕх кодтаид, уӕд сабатбоны закъоны сӕрты нӕ ахызтаид. Уый дзурӕг уыдаид, тӕригъӕдгӕнаг кӕй у, ууыл. Дины разамонджытӕ ма йӕ ныхмӕ цы хъуамӕ загътаиккой? Се ’ппӕт дӕр хъусӕй лӕууыдысты.

Ахӕм зыгъуыммӕ зондыл хӕст кӕй уыдысты, уый тыххӕй Йесойӕн йӕ зӕрдӕ фӕрыст. Гъемӕ сыл мӕстыйӕ йӕ цӕст ахаста ӕмӕ стӕй сахъат лӕгӕн загъта: «Дӕ къух-ма мӕм ӕрбадар» (Матфейы 12:13). Уый дӕр ӕм йӕ хуыскъ къух бадардта, ӕмӕ йын адзӕбӕх. Лӕджы цинӕн ма кӕрон кӕм уыди! Фӕлӕ, Йесойы ныхасӕй ӕрцахсынмӕ чи хъавыд, уыдон та куыд кодтой?

Лӕгӕн йӕ къух кӕй адзӕбӕх, ууыл фарисейтӕ цин нӕ кодтой, фӕлӕ уайтагъд уырдыгӕй рацыдысты ӕмӕ, «Ироды фарс чи уыди, уыдонимӕ уынаффӕ кӕнын райдыдтой, куыд ӕй [ома Йесойы] амарой, ууыл» (Марчы 3:6). Ироды фарс чи уыд, уыдоны ’хсӕн, ӕвӕццӕгӕн, уыдысты саддукейтӕ дӕр. Ӕмӕ саддукейтӕ ӕмӕ фарисейтӕ та ӕнӕуи знӕгтӕ уыдысты, фӕлӕ ныр балымӕн сты, уымӕн ӕмӕ Йесо сӕ иуты дӕр ӕмӕ иннӕты дӕр тынг хъыгдардта.