Бонзонгӕ у, уый ӕнцон куы нӕ уа, уӕд дӕр

1–3. Иудӕйӕ чи уыд, уыцы пехуымпар цӕмӕй фӕрӕдыд ӕмӕ йыл уый тыххӕй цы ’рцыд? (Кӕс нывмӕ статьяйы райдианы.)

ИЗРАИЛЫ паддзах Йеровоам адӕмы мӕнг хуыцӕуттӕн кувыныл бафтыдта. Ӕмӕ йӕм Йегъовӕ уый тыххӕй Иудӕйӕ иу пехуымпары арвыста, цӕмӕй йын тӕрхоны хабар фехъусын кодтаид. Уыцы сӕрныллӕг пехуымпар Хуыцаумӕ байхъуыста, ӕмӕ йын куыддӕриддӕр загъта, афтӕ бакодта. Уый тыххӕй йӕм Йеровоам мӕстӕй рафыхт, фӕлӕ йӕ Йегъовӕ бахъахъхъӕдта (1 Пад. 13:1–10).

² Уыцы пехуымпарӕн Йегъовӕ ныффӕдзӕхста, цӕмӕй Израилы къӕбӕр дӕр ма бахордтаид ӕмӕ дзы дон дӕр ма банызтаид, стӕй, цы фӕндагыл ӕрцыд, фӕстӕмӕ ууыл ма аздӕхтаид. Гъемӕ фӕстӕмӕ куы цыди, уӕд ыл фӕндагыл амбӕлд иу зӕронд лӕг. Царди Вефилы. Зӕронд лӕг йӕхи схуыдта Йегъовӕйы пехуымпар, ӕмӕ, Иудӕйӕ чи уыд, уыцы пехуымпарыл сайдӕй рацыд, зӕгъгӕ мӕ Йегъовӕ рарвыста. Пехуымпар Йегъовӕйы ныхасы сӕрты ахызт ӕмӕ зӕронд лӕгимӕ ацыд. Йегъовӕ йӕм уый тыххӕй смӕсты. Уырдыгӕй дарддӕр куы ацыд, уӕд йӕ размӕ домбай фӕци ӕмӕ йӕ аскъуыдтӕ кодта (1 Пад. 13:11–24).

³ Уыцы пехуымпар зӕронд лӕджы гӕдыныхӕстӕм цӕмӕн байхъуыста? Библийы уый тыххӕй ницы ис фыст. Фӕлӕ зӕгъӕн ис, кӕй ферох кодта «Хуыцауимӕ бонзонгӕйӕ цӕуын». (Бакӕс Михейы 6:8.) Библимӕ гӕсгӕ Йегъовӕимӕ цӕуын нысан кӕны ӕууӕндын ыл, йӕ коммӕ кӕсын ӕмӕ йӕ разамындмӕ хъусын. Бонзонгӕ адӕймаг хорз ӕмбары, ӕдзухдӕр йӕ уарзӕгой ӕмӕ хъомысджын Фыдмӕ кӕй хъуамӕ кува. Уыцы пехуымпарӕн йӕ бон уыди Йегъовӕйы бафӕрсын, зӕгъгӕ, хабар ӕцӕгдӕр афтӕ у ӕви нӕ. Фӕлӕ афтӕ цӕуылнӕ бакодта, уый тыххӕй Фыстад ницы зӕгъы. Хатт нӕ фӕхъӕуы цыдӕр ахсджиаг уынаффӕ рахӕссын, фӕлӕ йӕ нӕ фӕзонӕм, хуыздӕр куыд уыдзӕн, уый. Бонзонгӕйӕ Йегъовӕйӕ разамынд куы курӕм, уӕд фӕсмойнаг никуы фӕуыдзыстӕм.

4. Ацы статьяйӕ цы базондзыстӕм?

⁴ Айразмӕйы статьяйӕ базыдтам, чырыстӕттӕ бонзонгӕдзинад ахсджиаг миниуӕгыл цӕмӕн нымайынц ӕмӕ йӕ хъуыддагӕй куыд ӕвдисынц, уый. Фӕлӕ цавӕр уавӕрты вӕййы зын бонзонгӕдзинад равдисын? Стӕй нӕ бон куыд у ацы миниуӕг нӕ удыхъӕды фидар кӕнын, цӕмӕй бонзонгӕйӕ архайӕм, уый нын зын куы уа, уӕд дӕр? Цӕмӕй ацы фарстатӕн дзуаппытӕ раттӕм, уый тыххӕй ӕркӕсӕм, нӕ бонзонгӕдзинад арӕхдӕр цавӕр ӕртӕ уавӕры ӕрцӕуы фӕлвӕрд ӕмӕ уыцы уавӕрты нӕ бон куыд у зондӕй архайын (Ӕмб. 11:2).

НӔ УАВӔРТӔ КУЫ ФӔИВЫНЦ

5, 6. Верзели бонзонгӕ кӕй уыд, уый куыд рабӕрӕг?

⁵ Нӕ царды уавӕртӕ кӕнӕ ӕмбырды нӕ хӕстӕ куы фӕивынц, уӕд рабӕрӕг вӕййы, бонзонгӕ стӕм ӕви нӕ. Паддзах Давид 80-аздзыд Верзелийӕн куы загъта, цӕмӕй паддзахы галуаны цардаид, уӕд ын уый ӕхсызгон куыннӕ уыдаид. Верзели Давидмӕ куы байхъуыстаид, уӕд ӕдзух уыдаид паддзахы фарсмӕ. Фӕлӕ цӕуылнӕ сразы? Уымӕн ӕмӕ тынг зӕронд уыди. Ӕмӕ паддзахӕн загъта, зӕгъгӕ дын уаргъ йеддӕмӕ ницы уыдзынӕн ӕмӕ, дам, мӕ бӕсты Кимгамы акӕн. Кимгам, ӕвӕццӕгӕн, йӕ фырт уыди (2 Сам. 19:31–37).

⁶ Верзели бонзонгӕ кӕй уыди, уый йын баххуыс кодта раст уынаффӕ рахӕссынӕн. Давиды ныхасыл цӕуылнӕ сразы? Мыййаг, йӕхиуыл ӕгӕр ауӕрста кӕнӕ йӕ зӕрондӕй йӕ сабыр цард ныууадзын нӕ фӕндыд? Нӕ. Верзели ӕмбӕрста, азтӕ йыл сӕ уӕз кӕй ӕруагътой ӕмӕ йӕ царды уавӕртӕ кӕй фӕивтой. (Бакӕс Галатӕгтӕм 6:4, 5.) Ӕрмӕстдӕр исты хӕстӕ райсыныл кӕнӕ нӕхицӕн ном скӕныныл куы хъуыды кӕнӕм, уӕд нӕхицӕй дарддӕр никӕйуал уындзыстӕм, нӕхи иннӕтимӕ бардзыстӕм ӕмӕ фӕстагмӕ фӕфыдӕнхъӕл уыдзыстӕм (Гал. 5:26). Бонзонгӕ куы уӕм, уӕд нӕ хотӕ ӕмӕ не ’фсымӕртимӕ иумӕ Йегъовӕйы кадджын кӕндзыстӕм ӕмӕ иннӕтӕн фылдӕр ӕххуыс уыдзыстӕм (1 Кор. 10:31).

7, 8. Бонзонгӕдзинад нын куыд баххуыс кӕндзӕн, цӕмӕй нӕ ныфс нӕхиуыл ма дарӕм?

⁷ Адӕймагӕн йӕ бар фылдӕр хӕстӕ куы бакӕнынц, уӕд йӕ бонзонгӕдзинад фӕлвӕрд ӕрцӕуы. Нееми куы фехъуыста Иерусалимы цӕрджыты тыхст уавӕры тыххӕй, уӕд Йегъовӕмӕ зӕрдӕбынӕй кувын райдыдта (Неем. 1:4, 11). Ӕмӕ йын Йегъовӕ йӕ куывд фехъуыста – паддзах Артаксеркс ӕй хицауӕй сӕвӕрдта. Нееми кӕд стыр бынат ахста ӕмӕ хъӕздыг адӕймаг уыди, уӕддӕр йӕхиуыл йӕ ныфс никуы дардта. Алкӕддӕр Хуыцауимӕ цыди, ӕдзухдӕр Закъон касти ӕмӕ Йегъовӕйӕ разамынд куырдта (Неем. 8:1, 8, 9). Нееми адӕммӕ уӕлейӕ дӕлӕмӕ никуы каст, фӕлӕ сын йӕхи уды хардзӕй ӕххуыс кодта (Неем. 5:14–19).

⁸ Неемийы хабар нын баххуыс кӕндзӕн, цӕмӕй бонзонгӕ уӕм. Ног хӕстӕ нын нӕ бар куы бакӕной кӕнӕ нын сӕ куы фӕивой, уӕд нӕхиуыл нӕ ныфс нӕ дардзыстӕм. Зӕгъӕм, хистӕр нӕлгоймаг Йегъовӕмӕ не скуывта, афтӕмӕй ӕмбырды хъуыддӕгтӕм бавнӕлдта. Йе та хо кӕнӕ ӕфсымӕр уынаффӕ рахаста, ӕмӕ уый фӕстӕ Йегъовӕмӕ кувы, цӕмӕй йын раарфӕ кӕна. Уый бонзонгӕдзинадыл дзурӕг уыдзӕн? Бонзонгӕ адӕймаг нӕ рох кӕны, Хуыцауы раз ӕмӕ Хуыцауы организацийы цы бынат ахсы, уый. Кӕд исты зонӕм ӕмӕ нӕм фӕлтӕрддзинад дӕр ис, уӕддӕр уый ницӕуыл дзурӕг у. Ӕмӕ кӕд кӕцыдӕр уавӕры фыццаг хатт нӕ бахаудыстӕм, уӕддӕр нӕхиуыл нӕ ныфс нӕ дардзыстӕм. (Бакӕс Ӕмбисӕндтӕ 3:5, 6.) Мах иууылдӕр стӕм Хуыцауы стыр бинонтӕй, ӕмӕ стыр бынат бацахсынмӕ нӕ тырнӕм, фӕлӕ ныл нӕ бинонты ’хсӕн дӕр ӕмӕ ӕмбырды дӕр цы хӕстӕ ис, уыдон ӕххӕст кӕныныл архайӕм (1 Тим. 3:15).

ИННӔТӔ НӔ КУЫ ФЕФХӔРЫНЦ КӔНӔ НӔ КУЫ ФЕППӔЛЫНЦ

9, 10. Ӕнӕхъуаджы нӕ куы бафхӕрой, уӕд нын бонзонгӕдзинад куыд баххуыс кӕндзӕн?

⁹ Исчи нӕ ӕнӕхъуаджы куы бафхӕры, уӕд нын тынг зын вӕййы. Ахӕм хабар ӕрцыд Аннӕйыл дӕр. Йӕ лӕджы иннӕ ус Феннанӕ йын ӕдзух фидистӕ кӕй кодта, уый тыххӕй-иу йӕхи кӕуынӕй мардта. Аннӕйы йӕ сӕрыхицау бирӕ уарзта, фӕлӕ уӕддӕр Аннӕ маст кодта, уымӕн ӕмӕ йын цот нӕ цыди. Афтӕ иу бон Аннӕ кувӕндоны куывта ӕмӕ Хуыцауӕн йӕ зӕрдӕйы сагъӕстӕ дзырдта. Уым ӕй хистӕр сауджын Илий федта ӕмӕ фенхъӕлдта, ӕмӕ расыг у, ӕмӕ йӕм тызмӕгӕй сдзырдта. Аннӕ йӕм не смӕсты, фӕлӕ, цӕуыл тыхст, уый йын фӕлмӕнӕй бамбарын кодта. Аннӕйы зӕрдӕмӕхъаргӕ куывд фыст ӕрцыд Библийы, ӕмӕ бӕрӕг у, Йегъовӕйы бирӕ кӕй уарзта ӕмӕ йыл йӕ зӕрдӕ тынг кӕй дардта (1 Сам. 1:5–7, 12–16; 2:1–10).

¹⁰ Бонзонгӕдзинад нын баххуыс кӕндзӕн, цӕмӕй «ӕвзӕрдзинадыл хорздзинадӕй уӕлахиз кӕнӕм» (Ром. 12:21). Хӕйрӕджы дунейы рӕстдзинад нӕй. Ӕмӕ, ницӕй тыххӕй ӕфхӕрд куы баййафӕм, уӕд смӕсты вӕййӕм. Фӕлӕ-иу хъуамӕ нӕ маст бауромӕм (Пс. 37:1). Уӕлдай зындӕр та нын вӕййы, ӕмбырдӕй нӕ исчи куы фӕхъыг кӕны, уӕд. Ахӕм рӕстӕг бонзонгӕ адӕймаг фӕзмдзӕн Чырыстийы. Библи зӕгъы: «Алы ӕфхӕрӕн ныхӕстӕ йын куы кодтой, уӕд сӕ уый не ’фхӕрдта... фӕлӕ йӕхи бакодта, раст тӕрхон чи кӕны, уый бар» (1 Пет. 2:23). Йесо зыдта, мастисӕг Йегъовӕ кӕй у (Ром. 12:19). Мах дӕр хъуамӕ бонзонгӕ уӕм ӕмӕ «ӕвзӕр ӕвзӕрӕй ма фидӕм» (1 Пет. 3:8, 9).

11, 12. а) Нӕ бон куыд у бонзонгӕдзинад равдисын, исчи нӕ куы ’ппӕла кӕнӕ нын зӕрдӕлхӕнӕн ныхӕстӕ куы кӕна, уӕд? б) Бонзонгӕ куы уӕм, уӕд уый нӕ дарӕсӕй ӕмӕ не ’ддаг бакастӕй, стӕй, нӕхи куыд дарӕм, уымӕй бӕрӕг куыд уыдзӕн?

¹¹ Нӕ бонзонгӕдзинад ма фӕлвӕрд ӕрцӕуы, исчи нын зӕрдӕлхӕнӕн ныхӕстӕ куы фӕкӕны кӕнӕ нӕ арӕх куы феппӕлы, уӕд. Ӕркӕсӕм-ма, Есфиры цард цӕхгӕр куы фӕивта, уӕд дӕр йӕхи куыд уӕзданӕй дардта, уымӕ. Есфир уыди тынг рӕсугъд чызг. Уымӕй уӕлдай ма йӕ иу азы бӕрц зынаргъ хӕрздӕф сойтӕй дӕр сӕрстой. Цӕргӕ та кодта, ӕгас Персы паддзахадӕй кӕй ӕрӕмбырд кодтой, уыцы чызджытимӕ. Уыдон иууылдӕр сӕ былыцъӕрттӕ хордтой, цӕмӕй дзы паддзах искӕуыл йӕ цӕст ӕрӕвӕрдтаид. Фӕлӕ Есфир та уыдонимӕ абаргӕйӕ уыди ӕгъдауджын ӕмӕ хиуылхӕцгӕ. Ӕмӕ, паддзахы ус куы сси, уӕд дӕр бонзонгӕ адӕймагӕй баззади ӕмӕ йӕ сӕр бӕрзӕндты хӕссын нӕ райдыдта (Есф. 2:9, 12, 15, 17).

¹² Бонзонгӕ куы уӕм, уӕд нӕ конд ӕмӕ нӕ уындӕй бӕрӕг уыдзӕн, нӕхицӕн дӕр ӕмӕ иннӕтӕн дӕр кӕй аргъ кӕнӕм. Хъуамӕ ӕмбарӕм, иннӕты ’ргом нӕхимӕ ӕгӕр куы здахӕм ӕмӕ нӕхицӕй куы ’ппӕлӕм, уӕд адӕмӕн нӕхи нӕ бауарзын кӕндзыстӕм. Хъуамӕ нын уа «сабыр ӕмӕ фӕлмӕн удыхъӕд». (Бакӕс 1 Петры 3:3, 4; Йер. 9:23, 24.) Кадуарзаг куы уӕм, уӕд уый нӕ ныхӕстӕй ӕмӕ нӕ хъуыддӕгтӕй рабӕрӕг уыдзӕн. Зӕгъӕм, искӕимӕ ныхас кӕнгӕйӕ ской кодтам, цыдӕр ахсджиаг хъуыддаг нын кӕй бабар кодтой йе та, иннӕтӕ цы нӕ зонынц, ахӕм цыдӕр кӕй зонӕм кӕнӕ та бӕрнон ӕфсымӕртимӕ лымӕн кӕй стӕм, уый тыххӕй. Кӕнӕ та нӕ бон у хабар афтӕ равдисын, цыма кӕцыдӕр хорз хъуыды кӕнӕ хъуыддаг махӕй цӕуы, кӕд афтӕ нӕу, уӕддӕр. Ацы ран дӕр нӕ хъӕуы Чырыстийы бафӕзмын. Уый-иу арӕх пайда кодта Дзуттаг Фыстытӕй. Уымӕ гӕсгӕ адӕм ӕмбӕрстой, цы дзырдта, уый йӕхицӕй кӕй нӕ цӕуы, фӕлӕ Йегъовӕйӕ (Иоан. 8:28).

УЫНАФФӔТӔ КУЫ ФӔХӔССӔМ

13, 14. Бонзонгӕдзинад нын куыд баххуыс кӕндзӕн, цӕмӕй хорз уынаффӕтӕ хӕссӕм?

¹³ Нӕ бонзонгӕдзинад ма фӕлвӕрд фӕцӕуы, уынаффӕтӕ куы фӕхӕссӕм, уӕд дӕр. Апостол Павел Кесарийы куы уыди, уӕд ын пехуымпар Агав загъта, зӕгъгӕ, дам, Иерусалиммӕ куы ацӕуай, уӕд дӕ ӕрцахсдзысты ӕмӕ дӕ амардзысты. Ӕфсымӕртӕ уый куы фехъуыстой, уӕд Павелӕн лӕгъстӕ кӕнын райдыдтой, уырдӕм ма ацу, зӕгъгӕ. Фӕлӕ йӕ уӕддӕр нӕ баурӕдтой. Мыййаг, йӕхицӕй ӕгӕр ныфсджын уыди? Нӕ. Павел йӕ зӕрдӕ ӕгасӕй дӕр дардта Йегъовӕйыл ӕмӕ цӕттӕ уыд, Йегъовӕ йын цы бахӕс кодта, уый сӕххӕст кӕнынмӕ, кӕдӕмфӕнды йӕ ацӕуын ма бахъуыдаид, уӕддӕр. Ӕфсымӕртӕ уый куы фехъуыстой, уӕд бонзонгӕдзинад равдыстой, ӕмӕ Павелӕн ницыуал загътой (Хъуыд. 21:10–14).

¹⁴ Бонзонгӕдзинад ма нын баххуыс кӕндзӕн ноджыдӕр иу хъуыддаджы. Зӕгъӕм, хъӕуы нӕ цыдӕр уынаффӕ рахӕссын, фӕлӕ дарддӕр цы ӕмӕ куыд уыдзӕн, уый нӕ зонӕм кӕнӕ нӕ бар алцӕуыл нӕ цӕуы. Ӕрхӕссӕм ахӕм цӕвиттон. Фӕнды нӕ ӕххӕстрӕстӕг лӕггад кӕнын, фӕлӕ хъуыды кӕнӕм: уӕд та фӕрынчын дӕн? Кӕнӕ мӕ ацӕргӕ ныййарджыты ме ’ххуыс куы бахъӕуа? Зӕрондӕй мын мӕхимӕ та чи кӕсдзӕн? Адӕтты тыххӕй цасфӕнды ма кувӕм кӕнӕ цасфӕнды ӕрмӕг ма иртасӕм, уӕддӕр сын бӕлвырд дзуаппытӕ не ссардзыстӕм (Еккл. 8:16, 17). Йегъовӕйыл нӕ зӕрдӕ куы дарӕм, уӕд ӕй ӕмбардзыстӕм, нӕ бар алцӕуыл кӕй нӕ цӕуы. Ацы фарстаты фӕдыл фаг ӕрмӕг куы бацагурӕм, стӕй иннӕтимӕ дӕр куы аныхас кӕнӕм ӕмӕ Хуыцауӕй разамынд куы ракурӕм, уӕд нӕ хъӕудзӕн бакӕнын, Хуыцауы сыгъдӕг тых нын куыд амоны, афтӕ. (Бакӕс Екклесиаст 11:4–6.) Афтӕмӕй нын Йегъовӕ нӕ уынаффӕтӕн раарфӕ кӕндзӕн кӕнӕ нын баххуыс кӕндзӕн, цӕмӕй нӕ нысӕнттӕ фӕивӕм (Ӕмб. 16:3, 9).

БОНЗОНГӔДЗИНАД НӔ УДЫХЪӔДЫ ФИДАР КӔНӔМ

15. Йегъовӕйы миниуджытыл куы хъуыды кӕнӕм, уӕд нын уый куыд баххуыс кӕндзӕн, цӕмӕй бонзонгӕ уӕм?

¹⁵ Куыд ӕй базыдтам, афтӕмӕй бонзонгӕдзинад ахсджиаг миниуӕг у. Фӕлӕ йӕ нӕ бон куыд у дарддӕр нӕ удыхъӕды фидар кӕнын? Ӕркӕсӕм цыппар уынаффӕмӕ. Фыццаг: цӕмӕй бонзонгӕ уӕм ӕмӕ Йегъовӕйӕн кад кӕнӕм, уый тыххӕй йын хъуамӕ йӕ диссаджы миниуджытыл ӕмӕ, цы стыр бынат ахсы, ууыл хъуыды кӕнӕм (Ис. 8:13). Рох нӕ ма уӕд, мах зӕдтимӕ кӕнӕ адӕмимӕ кӕй нӕ «цӕуӕм», фӕлӕ Ӕппӕтхъомысджын Хуыцауимӕ. Уый куы ’мбарӕм, уӕд нӕхи «хъомысджын Хуыцауы раз ӕрныллӕг кӕндзыстӕм» (1 Пет. 5:6).

16. Йегъовӕйы уарзондзинадыл куы хъуыды кӕнӕм, уӕд нын уый куыд баххуыс кӕндзӕн?

¹⁶ Дыккаг: Йегъовӕйы уарзондзинадыл куы хъуыды кӕнӕм, уӕд нын уый дӕр баххуыс кӕндзӕн бонзонгӕдзинад нӕ удыхъӕды фидар кӕнынӕн. Апостол Павел ныффыста, зӕгъгӕ, Хуыцау буар афтӕ скодта, ӕмӕ нӕм нӕ буары уӕнгтӕй ӕгуыдзӕгдӕр кӕцытӕ кӕсынц, уыдон «ноджы буцдӕр дарӕм» (1 Кор. 12:23, 24). Йегъовӕ махӕй дӕр алкӕуыл дӕр афтӕ тыхсы. Хуыцау нӕ никӕимӕ бары ӕмӕ, куы фӕрӕдийӕм, уӕддӕр нӕ йӕхицӕй нӕ аппары. Йегъовӕ нӕ афтӕ тынг кӕй уарзы, уымӕ гӕсгӕ нӕ зӕрдӕ у сабыр, кӕмфӕнды ӕмӕ йын цасфӕнды ма лӕггад кӕнӕм, уӕддӕр.

17. Иннӕты хорз миниуджытӕ цӕмӕн хъуамӕ уынӕм?

¹⁷ Ӕртыккаг: Хуыцауы куы фӕзмӕм ӕмӕ иннӕты хорз миниуджытӕ куы уынӕм, уӕд нын Йегъовӕйы организацийы цы бынат ис, уымӕн фылдӕр аргъ кӕндзыстӕм. Стӕй адӕмы ӕргом нӕхимӕ не здахдзыстӕм кӕнӕ иннӕтӕн зӕндтӕ нӕ амондзыстӕм, фӕлӕ сӕ сӕрныллӕгӕй уынаффӕтӕ курдзыстӕм, ӕмӕ уыдонмӕ гӕсгӕ архайдзыстӕм (Ӕмб. 13:10). Нӕ хотӕй кӕнӕ не ’фсымӕртӕй искӕмӕн исты хӕстӕ сӕ бар куы бакӕной, уӕд сын сӕ циныл цин кӕндзыстӕм. Ӕмӕ Йегъовӕйӕн бузныг дзурдзыстӕм, «ӕгас дунейы дӕр» не ’фсымӕртӕн кӕй арфӕ кӕны, уый тыххӕй (1 Пет. 5:9).

18. Не ’фсарм куы ахуыр кӕнӕм, уӕд ноджы бонзонгӕдӕр куыд суыдзыстӕм?

¹⁸ Цыппӕрӕм: не ’фсарм Библимӕ гӕсгӕ куы ахуыр кӕнӕм, уӕд ноджы бонзонгӕдӕр уыдзыстӕм. Ӕмӕ базондзыстӕм, Йегъовӕ алыхуызон хъуыддӕгтӕм цы цӕстӕй кӕсы, уый. Алы бон дӕр Библи куы кӕсӕм, куы кувӕм ӕмӕ, цы базыдтам, уымӕ гӕсгӕ куы архайӕм, уӕд не ’фсарм ноджы хуыздӕр ахуыр кӕндзыстӕм (1 Тим. 1:5). Стӕй иннӕты нӕхицӕй уӕлдӕр ӕвӕрдзыстӕм. Афтӕ куы кӕнӕм, уӕд нӕ Йегъовӕ «кӕронмӕ сахуыр кӕндзӕн» бонзонгӕдзинад ӕмӕ чырыстон миниуджытӕ ӕвдисын (1 Пет. 5:10).

19. Ӕнустӕм бонзонгӕ цӕй фӕрцы уыдзыстӕм?

¹⁹ Хъуыды ма кӕныс, статьяйы райдианы цы иудейаг пехуымпары кой кодтам? Уыцы пехуымпар бонзонгӕ кӕй нал уыд, уый тыххӕй Хуыцауы йӕхимӕ фӕфыдӕх кодта ӕмӕ йӕ цард фесӕфта. Фӕлӕ уӕддӕр адӕймагӕн йӕ бон у бонзонгӕйӕ архайын, уый йын зын куы уа, уӕд дӕр. Уый бӕрӕг у Хуыцауы иузӕрдион ӕмӕ сӕрныллӕг лӕггадгӕнджыты цардӕй. Ӕмӕ Йегъовӕимӕ цас фылдӕр цӕуӕм, уыйас тынгдӕр нӕ бон уыдзӕн бонзонгӕдзинад нӕ удыхъӕды фидар кӕнын (Ӕмб. 8:13). Хуыцауы организацийы цыфӕнды бынат ма ахсӕм, уӕддӕр хъуамӕ Йегъовӕимӕ цӕуӕм, уымӕн ӕмӕ уымӕй хуыздӕр ницы ис ӕмӕ уымӕй стырдӕр кад нӕй. Уӕдӕ уыцы стыр кадӕн аргъ кӕнӕм ӕмӕ нӕ бон цы у, уый аразӕм, цӕмӕй Йегъовӕимӕ бонзонгӕйӕ ӕнустӕм цӕуӕм.