Ног программӕ Паддзахады Залтӕ аразынӕн
1 Иегъовӕ зӕрдӕ бавӕрдта, йӕ хӕдзаронты кӕй ахуыр кӕндзӕн ӕмӕ сӕ йӕ фӕндӕгтыл кӕй кӕндзӕн, уымӕй, ӕмӕ йӕ зӕрдӕвӕрд ӕцӕгӕйдӕр ӕххӕст кӕны (Ис. 54:13). Суанг рагзамантӕй Хуыцау тыхсы, цӕмӕй йӕ адӕмӕн иумӕ кувынӕн фадат уа, ӕмӕ уымӕ хауынц йӕ ахсджиаг амындтӕ дӕр (Дык. з. 31:12, 13; Неем. 8:1—8; Пс. 121:1). Уый йӕ иузӕрдион адӕмӕн уыдис стыр ӕххуыс. Хуыцауы уынаффӕмӕ хъусгӕйӕ, сӕ бон уыд хӕлд адӕмтӕй сӕхи хизын ӕмӕ се ’мкувджытимӕ ӕнгом ахастыты уын (Рац. 34:11—16; 2 Кор. 6:14—18). Уӕлдайдӕр та нӕ ацы фӕстаг бонты фӕдзӕхсынц, ӕдзухдӕр нӕ ӕмбырд кӕнын кӕй хъӕуы, цӕмӕй нӕ Иегъовӕ ахуыр кӕна, ӕмӕ ма уымӕй уӕлдай цӕмӕй нӕ кӕрӕдзийы рӕвдауӕм ӕмӕ уарзондзинадмӕ ӕмӕ хорз хъуыддӕгтӕм разӕнгард кӕнӕм (Ром. 1:11, 12; Дзут. 10:23—25).
2 Суанг фыццаг ӕнусӕй абоны онг чырыстӕттӕ кувынмӕ ӕмбырд кӕнынц хӕдзӕртты ӕмӕ ма ӕхсӕнадон агъуыстыты дӕр (Ап. к. 2:42, 46; 12:12). Фӕлӕ 1935 азы Гавайты фембӕлдтӕн ног бынат куы арӕзтой ӕмӕ куы загътой, уый Паддзахады Зал хуыйндзӕн, зӕгъгӕ, уыцы рӕстӕгӕй алы ран Иегъовӕйы Ӕвдисӕнты ӕмбырдтӕ райдыдтой тырнын, цӕмӕй сӕхицӕн кувынады бынӕттӕ уыдаид, ӕмӕ сӕ уӕдӕй нырмӕ хонынц Паддзахады Залтӕ. Абон уынӕм: ӕгас дунейы дӕр ис Паддзахады Залтӕ, ӕмӕ ма алы аз дӕр, цӕмӕй ӕмбырдты фембӕлдтӕн ӕдзухдӕр бынат уа, уый тыххӕй аразынц ног залтӕ кӕнӕ ӕлхӕнынц агъуыстытӕ.
3 Алы ран дӕр Иегъовӕйы Ӕвдисӕнтӕн ӕппӕты ахсджиагдӕр агъуыст у Паддзахады Зал. Гӕнӕн ис, рӕсугъд арӕзт уа, фӕлӕ хуымӕтӕг куы уа, уӕддӕр ын ис стыр аргъ, уымӕн ӕмӕ цы ран уа, уым уый у раст кувынады ӕмӕ теократон архайды артдзӕст. Уый бӕлвырд кӕны, уыцы бынаты Паддзахады тыххӕй хорз уацхъуыд хъуыстгонд кӕй цӕуы, уый. Уым ма, Хуыцауы базонынмӕ чи тырны, уыцы адӕм ӕцӕгӕйдӕр сӕ уырнындзинад фидар кӕнынц ӕмӕ сын амындтӕ лӕвӕрд цӕуы (Мтф. 5:3, НД).
4 Ӕмбырдтӕ тагъд рӕзынц — хъӕуы фылдӕр Паддзахады Залтӕ. Ацы фыддунейы цардӕвӕрды кӕрон тагъд кӕй ӕрбахӕццӕ кӕны, уымӕ гӕсгӕ Иегъовӕ «тагъд кӕны», цӕмӕй ӕмбырд кӕныны хъуыддаг ма бафӕстиат уа, ӕмӕ уый бӕрӕг у уацамынды хыгъдтӕй. Пехуымпар Исайы уылты куыд загъта, афтӕ ӕцӕгдӕр «армыдзагӕй равзӕрд мин, ӕмӕ ӕппӕты лӕмӕгъдӕрӕй — тыхджын адӕм» (Ис. 60:22, НД). Зӕгъӕм, ӕрмӕстдӕр Уӕрӕсейы фӕстаг ӕртӕ азмӕ аргъуыд райстой 41 000 адӕймагӕй фылдӕр. Уыцы диссаджы рӕзты тыххӕй бахъуыд 412 ног ӕмбырды саразын. Фӕлӕ ӕмбырдтӕн сӕ бон нӕу, цал Паддзахады Залы хъӕуы, уыйбӕрц саразын. Ӕмбырд кӕныны хъуыддаг размӕ куыд цӕуы, афтӕ хъӕуы фылдӕр Паддзахады Залтӕ дӕр. Разамонӕг советы тынг фӕнды, цӕмӕй ӕмбырдтӕн Паддзахады Залтӕ уа, ӕмӕ уымӕ гӕсгӕ сарӕзтой ног программӕ, Паддзахады Залтӕ уӕлдай зындӕр кӕм у саразын, уым баххуыс кӕнынӕн. Уыцы программӕ схуыдтой «Программӕ Паддзахады Залтӕ аразынӕн, царды уавӕртӕ уӕззау кӕм сты, уыцы бӕстӕты».
5 Ацы статьяйы ӕвзӕрст цӕуынц иуӕй-иу лыстӕгдзинӕдтӕ, ӕмӕ уыдоны фӕрцы бамбардзынӕ, ацы хъуыддаг куыд цӕудзӕн ӕмӕ махӕй алкӕй бон дӕр куыд уыдзӕн Хуыцауы адӕмы иудзинадӕн баххуыс кӕнын, уый.
6 Цӕмӕ хъӕуынц Паддзахады Залтӕ. Чиныджы «Цӕттӕ стӕм нӕ лӕггаддзинадмӕ», зӕгъгӕ, (уыр.) 61-ӕм фарсыл ис фыст: «Паддзахады Залтӕ кувынады бынӕттӕ кӕй сты, уымӕ гӕсгӕ хъуамӕ ма уой галуанты хуызӕн, адӕмы цӕстмӕ арӕзт. Гӕнӕн ис, алы ран иухуызон ма уой, фӕлӕ сӕ нысан у, цӕмӕй сӕ пайдагӕнӕн уа. (Абар Куыстытӕ 17:24.) Уый хъуамӕ уа ӕнцойуат зал ӕмӕ, нӕ уырнындзинад фидардӕр кӕнынӕн ӕмӕ нын Иегъовӕйы хуыздӕр базонынӕн чи ӕххуыс кӕны, стӕй ма нӕ йӕ паддзахадон лӕггаддзинады хайад исынмӕ чи разӕнгард кӕны, уыцы чырыстон фембӕлдтӕн ӕмбӕлон». Паддзахады Зал кӕм ис, уыцы районы библион ахуырады артдзӕст кӕй у, уымӕ гӕсгӕ ма уый ӕххуыс кӕны ӕмбырды территорийы хорз уацхъуыд хъусын кӕныны хъуыддагӕн дӕр.
7 Статистикон бӕрӕггӕнӕнтӕм гӕсгӕ Уӕрӕсейы ис ӕрмӕстдӕр 38 Паддзахады Залы ӕмӕ 32 та цӕуынц арӕзт. Уыцы Паддзахады Залты фембӕлдтӕ вӕййы иу-100 ӕмбырдӕн, кӕд ӕмӕ Уӕрӕсейы иу мин ӕмбырдӕй фылдӕр ис, уӕд. Уымӕ гӕсгӕ Паддзахады Залтӕ бирӕ кӕнӕ ӕппындӕр кӕм нӕй, уым фӕзыны зындзинӕдтӕ. Иуӕй-иу рӕтты зын вӕййы, Паддзахады Залӕн чи сбӕзза, ахӕм агъуыстытӕ баххуырсын, ӕмӕ уый тыххӕй бирӕ ӕмбырдты бахъӕуы сӕ фембӕлдтӕ ӕвзӕр, ӕнӕзылд агъуыстыты кӕнӕ та ӕфсымӕрты хӕдзӕртты уадзын. Фембӕлдты бынат нӕ кувынадӕн ӕмбӕлон куы нӕ вӕййы, уӕд иуӕй-иутӕн, уӕлдайдӕр та цымыдисгӕнӕг адӕмӕн, уый свӕййы цӕлхдур ӕмӕ фембӕлдтӕм ӕдзух нӕ фӕцӕуынц. Хатт хистӕр нӕлгоймӕгтӕ ног ӕмбырд скӕныныл курдиат бадӕттынмӕ сӕ ныфс нӕ фӕхӕссынц, уымӕн ӕмӕ ног ӕмбырдӕн фембӕлдтӕн бынат нӕ вӕййы. Уӕдӕ иуӕй-иу ӕмбырдтӕ сӕ фембӕлдтӕ кӕм фӕуадзынц, уырдӕм бирӕ цӕуын кӕй фӕхъӕуы, уый тыххӕй фӕзыны зындзинӕдтӕ, уӕлдайдӕр та ӕхцайы тыххӕй, ӕмӕ уый къуылымпы кӕны рӕзт. Ис ахӕм горӕттӕ, милуан адӕймагӕй фылдӕр кӕм цӕры, ӕмӕ дзы ӕфсымӕртӕн иу Паддзахады Зал дӕр нӕй.
8 Иннӕрдыгӕй та, сӕхи Паддзахады Залтӕ цы ӕмбырдтӕ сарӕзтой, уыдон аразынӕн бынат куы агуырдтой кӕнӕ сӕ фидӕны Паддзахады Залӕн барлӕвӕрдтӕ куы хъуыд, уӕд сын бынӕттон хицӕуттӕ ӕвӕрдтой цӕлхдуртӕ.
9 Цы нын бантыст? 1983 азы Иугонд Штатты фехъусын кодтой Паддзахады Залты фонды тыххӕй, ӕмӕ уӕдӕй нырмӕ уый ӕппӕт дунейыл баххуыс кодта мингай ӕмбырдтӕн. Абон Паддзахады Залты фонд архайы, зӕгъӕн ис, алы филиалы дӕр, ӕмӕ Уӕрӕсейы бирӕ ӕмбырдтӕ уый руаджы райстой ӕххуыс. Фӕстӕдӕр, 1987 азы, фӕзынд Регионалон арӕзтадон комитеттӕ. Сӕхицӕн Паддзахады Залтӕ цы ӕмбырдтӕ аразынц, уыдонӕн уыцы комитетты руаджы сӕ уаргъ фӕрогдӕр, уымӕн ӕмӕ сын ӕххуыс лӕвӕрд цӕуы зӕхх ӕмӕ аразӕн ӕрмӕг балхӕнынӕн, стӕй Паддзахады Залы проект скӕнынӕн ӕмӕ уыцы регионӕй бархи кусджыты куыст спълан кӕнынӕн. Ныртӕккӕ ӕрмӕст Уӕрӕсейы ис 10 регионалон арӕзтадон комитеты; иу ис Гуырдзыстоны ӕмӕ иу та — Хъазахстаны. Уыцы комитетты цы ӕфсымӕртӕ ис, уыдон кӕнынц диссаджы куыст, бынӕттон ӕмбырдтӕн кӕй ӕххуыс кӕнынц, уымӕй.
10 Бӕрӕггӕнӕнтӕм гӕсгӕ ма ӕппӕт дунейы хъӕуы 9 000 ног Паддзахады Залы, уыдонӕй 400 — Уӕрӕсейы. Ӕмӕ уыцы нымӕцтӕ ӕдзухдӕр рӕзынц. Разамонӕг совет хорз ӕмбары, хъуыддӕгтӕ фӕтагъддӕр кӕнын кӕй хъӕуы, уый. Растдӕр уый тыххӕй хъусдард фылдӕр здӕхт ӕрцыд, ӕмбырдты домӕнтӕм, ӕмӕ уымӕ гӕсгӕ ӕрцыд арӕзт ацы ног программӕ, цӕмӕй, уӕлдай тынгдӕр Паддзахады Залтӕ цы бӕстӕты хъӕуы, уым ӕфсымӕртӕн ӕххуыс лӕвӕрд цӕуа. Уыцы программӕйыл архайгӕйӕ, хъуыды кодтой, апостол Павел 2 Коринфӕгтӕм 8:14, 15-ӕм стихты цы принцип ныффыста, ууыл. Уый тыхст, Палестинӕйы цӕрӕг ӕфсымӕртӕ ӕххуысхъуаг кӕй уыдысты, ууыл ӕмӕ Къаннӕг Азийы ӕмбырдтӕм бахатыд, цӕмӕй сын баххуыс кодтаиккой.
11 Апостол сын сӕ зӕрдыл ӕрлӕууын кодта, израилӕгтӕ цыппор азы дӕргъы ӕдзӕрӕг бӕстӕйы куы уыдысты, уӕд сыл Иегъовӕ куыд аудыдта, уый. Уый загъта: «Ныр сымах бӕркад уыдоны хъуаг баххӕст кӕнынӕн; уый фӕстӕ та, уыдоны бӕркад сымах хъуаг баххӕст кӕнынӕн, цӕмӕй уа ӕмбӕрц, фыст куыд у: „чи ӕрӕмбырд кодта бирӕ, уымӕ нӕ уыд уӕлдай; ӕмӕ гыццыл чи ӕрӕмбырд кодта, уый хъуаг нӕ уыд“». (Абар Рацыд 16:18.) Уӕдӕ абон та Паддзахады Залтӕ аразын кӕй хъӕуы, уый куыд ис аскъуыддзаггӕнӕн?
12 Программӕ Паддзахады Залтӕ аразынӕн, царды уавӕртӕ уӕззау кӕм сты, уыцы бӕстӕты. Фыццаджыдӕр, Уӕрӕсейы Паддзахады Залтӕ аразыны программӕйы ӕрцыд хаст ахӕм ивындзинад, ӕмӕ чырыстон ӕфсымӕртӕ нысангонд цӕудзысты Паддзахады Залтӕ аразыны Стъолы бынӕттон юридикон минӕвӕрттӕй. Ныридӕгӕн цалдӕр раны лӕггад кӕнынӕн снысан кодтой авд ӕфсымӕры. Уыцы ӕфсымӕртӕ ӕххуыс кӕндзысты ӕмбырдтӕн ахӕм фарстаты: куыд ис зӕхх ӕмӕ агъуыст балхӕнӕн, аразынӕн барлӕвӕрдтӕ райсӕн ӕмӕ аргъыл баныхас кӕнӕн. Уыцы ӕфсымӕртӕ нысангонд цы районты сты, цӕргӕ дӕр уым кӕнынц; уыдон сты ӕххӕстрӕстӕг лӕггадгӕнджытӕ ӕмӕ ӕвзарынц, ӕрмӕстдӕр Паддзахады Залты арӕзтадимӕ цы фарстатӕ сты баст, уыдон. Бынӕттон ӕфсымӕртӕ сӕ ӕнцонтӕй ссардзысты, ӕмӕ уыдонӕн сӕ бон уыдзӕн ӕмбырдтӕн тагъд баххуыс кӕнын.
13 Дыккаг та уый у, ӕмӕ ацы ног программӕмӕ гӕсгӕ Паддзахады Залтӕ араздзысты ӕххӕстрӕстӕг аразджыты къордтӕ, ӕмӕ уыдон кӕндзысты ӕрмӕстдӕр уыцы куыст. Уыцы къордтӕ, иууыл тынгдӕр Паддзахады Залтӕ цы ӕмбырдты хъӕуы, уыдонӕн ӕххуыс кӕндзысты арӕзтадон куыстытӕ спълан кӕнынӕн ӕмӕ сӕ бакӕнынӕн. Иу къорды ис 6—10 адӕймаджы; иутӕ дзы сты ӕппӕтдунеон арӕзтадон программӕйы хайадисджытӕ ӕмӕ иннӕтӕ та Уӕрӕсейӕ. Уыцы къордтӕ арӕзтадон куыст кӕндзысты бынӕттон ӕфсымӕртимӕ. Фылдӕр Паддзахады Залтӕ аразын куы хъӕуа ӕмӕ сын барлӕвӕрдтӕ куы уа, уӕд уыцы къордтӕ фылдӕр кӕндзысты. Цӕмӕй уыцы къордтӕ дарын ӕмбырдтӕн уаргъ ма суа, уымӕ гӕсгӕ сын ӕххуыс кӕндзӕн филиал.
14 Ацы ног программӕ, Регионалон арӕзтадон комитетмӕ раздӕр Паддзахады Залтӕ аразынӕн цы программӕтӕ уыд, уыдоны бӕсты нӕу, фӕлӕ сын рӕстӕгмӕ ӕххуыс кӕндзӕн, цалынмӕ сӕйраг арӕзтадон куыст нӕ фӕуа ӕмӕ ӕфсымӕртӕ ног ӕмбырдтӕн сӕхӕдӕг ӕххуыскӕнынхъом нӕ уой, уӕдмӕ.
15 Конгресты Залты арӕзтад. Абон организаци тынгдӕр кӕй рӕзы, уымӕ гӕсгӕ районон конгрестӕн бахъуыд стырдӕр агъуыстытӕ аразын, ӕмӕ ма уый хорз дӕр у. Иегъовӕйы Ӕвдисӕнтӕ сӕ хонынц конгресты Залтӕ. Ахӕм залтӕ аразынӕн хъӕуы Ӕхсӕнады барлӕвӕрд. Иуӕй-иу рӕтты хъӕуы ахӕм залтӕ, фӕлӕ уал нӕ фыццаджыдӕр фӕнды фылдӕр Паддзахады Залтӕ саразын, уымӕн ӕмӕ нырма уыдон тынгдӕр хъӕуынц.
16 Ацы ног программӕйӕн дӕ бон цӕмӕй у баххуыс кӕнын? Ацы программӕмӕ гӕсгӕ фыццаджыдӕр Паддзахады Залтӕ арӕзт цӕудзысты, бирӕ Ӕвдисӕнтӕ кӕм ис ӕмӕ Паддзахады Залтӕ фылдӕр кӕм хъӕуы, уым, ӕмӕ уый нысан кӕны, райдианы уал залтӕ стыр горӕтты кӕй араздзысты. Уӕдӕ уӕд алы ӕмбырдӕн дӕр йӕ бон куыд у ацы ног программӕйы хайад исын? Алчидӕр ӕппӕтдунеон хъуыддагӕн, йӕ бон цӕмӕй у, уымӕй куы ӕххуыс кӕна, уӕд ӕрмӕст йӕхи ӕмбырдӕн нӕ баххуыс кӕндзӕн, фӕлӕ иннӕ ӕмбырдтӕн дӕр.
17 Кӕй зӕгъын ӕй хъӕуы, ахӕм стыр арӕзтадон программӕйӕн бахъӕудзӕн бирӕ кусджытӕ. Цӕмӕй фидӕны ацы программӕйы хайад райсынӕн кусджытӕ уа, уый тыххӕй ӕмбырдтӕм ӕрвыст ӕрцыдысты бланктӕ, аразыны куыст чи зоны ӕмӕ, Паддзахады Залтӕ чи аразы, уыцы ӕххӕстрӕстӕг лӕггадгӕнджытимӕ кусыны фадат кӕмӕн уыдзӕн, уыдон сбӕрӕг кӕнынӕн. Уыдоны, гӕнӕн ис, бахъӕуа лӕггад кӕнынмӕ ӕндӕр ранмӕ ӕппынкъаддӕр ӕртӕ мӕймӕ ацӕуын. Уыцы агъуыстытӕ мах нӕ Хуыцау Иегъовӕйӕн кувынӕн кӕй аразӕм, уымӕ гӕсгӕ ӕфсымӕртӕн ӕмӕ хотӕн хъуамӕ уа фидар уырнындзинад. Уыдонӕн сӕ бон у байдзаг кӕнын «Заявление добровольца на участие в программе строительства Залов Царства» (A-25-U). Ӕххуыс куы бахъӕуа, уӕд Паддзахады Залтӕ аразыны Стъолы цы ӕфсымӕртӕ кусынц, уыдонӕн сӕ бон уыдзӕн уыцы бархи кусджытӕй искӕй фӕхонын. Ацы программӕмӕ гӕсгӕ арӕзтад дарддӕр куы цӕуа, уӕд уыцы бархи кусджытӕй иуӕй-иутӕ, гӕнӕн ис, суой Паддзахады Залты арӕзтады лӕггадгӕнджытӕ, уый та нысан кӕны, ӕххӕстрӕстӕг лӕггадгӕнджытӕ кӕй суыдзысты ӕмӕ уыцы программӕйы дарддӕр дӕр хайад кӕй исдзысты, уый.
18 Хуыцауы адӕмы иудзинады бӕлвырдгӕнӕнтӕ. Бирӕ азты дӕргъы не ’фсымӕртӕ Паддзахады Залты арӕзтады хайад кӕй исынц, уый тыххӕй сты раппӕлинаг. Районты ӕмӕ регионты ӕфсымӕртӕ иумӕ кӕй архайдтой, уымӕ гӕсгӕ Уӕрӕсейы арӕзт ӕрцыд дӕсгай Паддзахады Залтӕ. Санкт-Петербурджы та арӕзт ӕрцыд иу конгресты Зал. Ацы агъуыстытӕ кӕм сты, уым канд ӕмбырдтӕ ӕмӕ районтӕн диссаджы хуызы не ’ххуыс кӕнынц, фӕлӕ сӕ чи уыны, уыдонӕн ӕвдисӕн лӕууынц, уыцы ран, Иегъовӕйы ном чи хӕссы, уыцы адӕм зӕрдиагӕй кӕй архайынц, уымӕн. Уыцы агъуыстытӕ аразынӕн ӕмӕ сӕм зилынӕн цы ӕхца бахардз, уыдон ӕфсымӕртӕ кӕй фыстой, уымӕй уӕлдай ма ӕдзухдӕр лӕвӕрдтой мысайнӕгтӕ Паддзахады ӕппӕтдунеон хъуыддагӕн дӕр. Мах фидарӕй уырны, ӕфсымӕртӕ та ацы хатт дӕр баххуыс кӕнынмӕ цӕттӕ кӕй уыдзысты, уый.
19 Уыцы ног программӕйы фӕрцы нын ис фадат, мах ӕцӕгдӕр иу адӕм кӕй стӕм ӕмӕ Иегъовӕйӕн йӕ Паддзахады разамындӕй иу организацийы кӕй лӕггад кӕнӕм, уый хъуыддагӕй равдисынӕн. Хъуамӕ канд не ’мбырдты домӕнтыл ма хъуыды кӕнӕм, фӕлӕ ма, нӕ филиалмӕ цы регионтӕ хауы, уыдонӕй Паддзахады Залтӕ аразынӕн ӕххуыс тынгдӕр кӕм хъӕуы, ууыл дӕр. «Ӕппӕт дунейы не ’фсымӕртӕ» цӕуыл тыхсынц, уый куы ӕмбарӕм ӕмӕ нӕхи ӕмӕ не ’мбырды бон уымӕн куыд у баххуыс кӕнын, ууыл куы хъуыды кӕнӕм, уӕд Паддзахады разамындӕй нӕ иудзинад фидардӕр кӕндзӕн (1 Пет. 5:9, НД).
20 Кӕронбӕттӕн. Цӕй уӕдӕ уыцы хъуыддаджы тыххӕй ӕдзухдӕр зӕрдӕбынӕй кувӕм. Ӕмӕ нӕ алчидӕр агурӕд фадӕттӕ йӕ куывтытӕм гӕсгӕ архайынӕн, цӕмӕй абон Паддзахады Залтӕ кӕм хъӕуы, уым арӕзт ӕрцӕуой. Иегъовӕ нырма «ӕндӕр фысты» йӕ кувджыты «иу дзугмӕ» кӕй ӕмбырд кӕны, уымӕ гӕсгӕ йӕм кувӕм, цӕмӕй нын ӕмбӕлон агъуыстытӕ уа ӕмӕ уыцы ног ӕрбацӕуджытӕн баххуыс кӕнӕм, цӕмӕй сӕ уырнындзинад бафидар уа ӕмӕ фӕлтӕрдджын суой. Уӕдӕ ацы ног программӕ не стыр бӕстӕйы ӕфсымӕртӕн ахъаз фӕуӕд, цӕмӕй сӕ кӕрӕдзийы «уарзондзинад ӕмӕ хорз хъуыддӕгтӕм разӕнгард кӕной», Иегъовӕйы номӕн кад чи хӕсса, уыцы бынӕтты (Дзут. 10:23—25). Ӕцӕгӕйдӕр, абон нӕ зӕрдӕтӕ фырцинӕй райынц ӕмӕ фидӕны дӕр нӕ циндзинад фылдӕр кӕндзӕн, Иегъовӕйӕн, иунӕг ӕцӕг Хуыцауӕн, фӕрсӕй-фӕрстӕм куы кувӕм ӕмӕ нын нӕ лӕггаддзинадӕн куы арфӕ кӕна, уӕд.