Журналтӕ цас фылдӕр парахат кӕнӕм, уыйас нӕ циндзинад фылдӕр кӕндзӕн
1 Иегъовӕйӕн уӕларвыл дӕр ӕмӕ зӕххыл дӕр цы стыр организаци ис, уый зындгонд у, йӕ къухы стыр ӕнтыстытӕ кӕй ӕфты, уымӕй. Йесо Чырыстийы ӕххуысӕй Иегъовӕ сарӕзта зӕххон организаци, ӕмӕ уымӕн дӕр бирӕ ӕнтысы, уымӕн ӕмӕ йӕ кусджытӕ зӕрдӕбынӕй кусынц (Пс. 109:3; Матф. 9:37, 38). Куыд лӕггад кӕнӕм ӕмӕ цас лӕггад кӕнӕм, уымӕ нӕ хъус куы дарӕм, уӕд, ӕнӕмӕнг, банкъардзыстӕм стырдӕр циндзинад (Лук. 10:17). Уый хауы журналтӕ «Хъахъхъӕнӕг мӕсыг» ӕмӕ «Райхъал ут!» парахат кӕныны хъуыддагмӕ дӕр.
2 Паддзахады уацхъуыд алыран дӕр хъуыстгонд цӕй руаджы цӕуы, уыцы сӕйраг мадзӕлттӕй иу у журналтӕ парахат кӕнын. Фӕлӕ кӕд хъусын кӕныны хъуыддаг размӕ цӕуы, уӕддӕр рабӕрӕг, иуӕй-иу рӕтты къаддӕр журналтӕ парахатгонд кӕй цӕуынц, уый. Уый куыд ис срастгӕнӕн? Цӕмӕй фылдӕр журналтӕ парахат кӕнӕм, уый тыххӕй нӕ зӕрдыл цы хъуамӕ дарӕм?
3 Сабаты лӕггад кӕнӕм журналтимӕ. Ӕхсӕнад алкӕйдӕр разӕнгард кӕны алы сабат дӕр журналтӕ парахат кӕнынмӕ. Хуыздӕр уаид, ӕрмӕстдӕр иу темӕйыл куы нӕ ныхас кӕниккам, фӕлӕ-иу иу статьяйы тыххӕй цалдӕр ныхасы 30—60 секундмӕ куы зӕгъиккам ӕмӕ-иу стӕй дыууӕ журналы дӕр куы радтиккам, уӕд. Хӕдзары хицау нӕ истӕмӕй куы фӕрса кӕнӕ бӕрӕг куы уа, цы дзурӕм, уый йӕ тынг кӕй цымыдис кӕны, уӕд иннӕ хӕдзармӕ хъуамӕ ма тагъд кӕнӕм.
4 Журналтӕ «Хъахъхъӕнӕг мӕсыг» ӕмӕ «Райхъал ут!»-ы вӕййы алыхуызон статьятӕ. Лӕггаддзинады фембӕлды фыццаг хайыл цы ӕфсымӕр фӕныхас кӕны, уый арӕх фӕдзуры, цы журналтӕ фӕпарахат кӕнӕм, уыдон адӕмӕн куыд ис дӕттӕн, ууыл. Цы хъуыдытӕй спайда кӕнис, уыдонмӕ дӕ хъус дар ӕмӕ сӕ цыбыртӕй ныффысс. Лӕггаддзинады фембӕлды куы уа, цавӕрдӕр журнал дӕттӕн куыд ис, уый равдыст, уӕд ӕй бахъуыды кӕн, уый фӕстӕ йӕ искӕимӕ бафӕлвар ӕмӕ стӕй сабаты хъусын кӕнынмӕ куы ацӕуай, уӕд дзы спайда кӕн. Адӕм дӕм куы нӕ хъусой, уӕд ныхас райдайынӕн ӕндӕр статья равзар. Алы номыры дӕр вӕййы алыхуызон темӕтӕ ӕмӕ, гӕнӕн ис, бирӕты бацымыдис кӕной. Дыууӕ журналы статьятӕ дӕр куы бакӕсай, уӕд дын ӕнцондӕр уыдзӕн, хӕдзары хицауы цы цымыдис кӕны, ууыл ныхас кӕнын.
5 Раст ахаст. Фыццаг уынаффӕ фылдӕр журналтӕ парахат кӕнынӕн — ма сӕ рох кӕн. Уыцы нысан нын ӕнцондӕр сӕххӕст кӕнӕн уыдзӕн, нӕхӕдӕг «Хъахъхъӕнӕг мӕсыг» ӕмӕ «Райхъал ут!» иудадзыг куы кӕсӕм, уӕд. Иугӕр сӕ бакастыстӕм, уӕд та сӕ хъуамӕ, гӕнӕн уӕвгӕйӕ, адӕмӕн дӕттӕм. Нӕ фылдӕрӕн алы сабаты дӕр вӕййы хорз фадат хӕдзарӕй-хӕдзармӕ журналтӕ парахат кӕнынӕн. Бирӕ ӕмбырдты къуырийы астӕу снысан кӕнынц бон журналтӕ парахат кӕнынӕн, цӕмӕй, сабаты хъусын кӕнынӕн амал кӕмӕн нӕй, уыцы хъусынгӕнджытӕ уыцы хъуыддаджы хайад исой. Иуӕй-иутӕн та, чи зоны, изӕрыгӕтты вӕййы хорз фадӕттӕ хӕдзарӕй-хӕдзармӕ журналтӕ парахат кӕнынӕн. Журналтӕ парахат кӕнынӕн ма хорз фадӕттӕ вӕййы уынгты, дуканиты хъусынгӕнгӕйӕ, ӕнӕуи искӕуыл фембӕлгӕйӕ ӕмӕ ма искӕмӕн иудадзыг журналтӕ хӕсгӕйӕ. Хӕдзарӕй-хӕдзармӕ куы хъусын кӕнӕм ӕмӕ уыцы мӕй цы литературӕ парахат кӕнӕм, уый адӕм куы нӕ исой, уӕд ис дӕттӕн ног журналтӕ. Ацы уынаффӕтӕм куы хъусӕм, уӕд нын уый ӕрхӕсдзӕн стыр циндзинад.
6 Дыккаг уынаффӕ фылдӕр журналтӕ парахат кӕнынӕн — хуымӕтӕгӕй дзур. Зӕгъӕн ис, ӕмӕ хъусынгӕнджытӕй иуӕй-иутӕ дӕрдтыл кӕй фӕдзурынц, уый тыххӕй сын нӕ бантысы журналтӕ радтын. Иннӕ хъусынгӕнджытӕ та журналтӕ парахат кӕнгӕйӕ фӕдзурынц, журналты цы темӕтӕ ис, уыдоныл нӕ, фӕлӕ ӕндӕр цӕуылдӕртыл. Афтӕ раст нӕу. 1956 азы 1 декабры номыры «Хъахъхъӕнӕг мӕсыджы» (англ.) фылдӕр журналтӕ парахат кӕныны тыххӕй дзырдӕуыд: «Журналтӕ дӕтгӕйӕ иууыл хуыздӕр у цыбыртӕй ӕмӕ комкоммӕ дзурын. Нӕ нысан у фылдӕр журналтӕ апарахат кӕнын. Уый фӕстӕ уыдон сӕхӕдӕг сӕхи тыххӕй „дзурдзысты“. Ӕхсӕнад уынаффӕ кӕны, цӕмӕй равзарӕм, цы журнал радтынмӕ хъавӕм, уымӕй иу статья, ӕмӕ нӕ разныхас статьяйы тыххӕй хъуамӕ уа 30—60 секунды бӕрц».
7 Ӕртыккаг уынаффӕ — цӕттӕ у алыхуызон темӕтыл ныхас кӕнынмӕ. Ныхас райдайынӕн бацӕттӕ кӕн цалдӕр алыхуызон хъуыдыйы. Афтӕмӕй алыхуызон уавӕрты дӕ бон суыдзӕн алыхуызон адӕймӕгтимӕ ныхас кӕнын. Рагацау куы цӕттӕ кӕнай, уӕд фылдӕр журналтӕ апарахат кӕндзынӕ ӕмӕ дын уый ӕрхӕсдзӕн стырдӕр циндзинад.
8 Ӕмӕ ма ноджыдӕр иу уынаффӕ — дӕ разы ӕвӕр нысан. Кӕд ма хъуыды кӕныс, уӕд уый тыххӕй цалдӕр хатты дзырдӕуыд «Нӕ паддзахадон лӕггаддзинад»-ы. Дӕ бон у бацархайай, цӕмӕй, куы хъусын кӕнай, уӕд алы сахатӕн дӕр иу журнал апарахат кӕнай. Дӕ разы хъуамӕ ӕвӕрай, дӕ бон сӕххӕст кӕнын кӕй уыдзӕн, ахӕм нысан, рох дӕ ма уӕнт дӕ уавӕртӕ ӕмӕ дӕ бон уацамындӕн цас рӕстӕг у хицӕн кӕнын, уый дӕр.
9 Иегъовӕ нын йӕ зӕххон организацийы уылты дарддӕр дӕр дӕтты, лӕггаддзинады нӕ фылдӕр хайад исынӕн цыдӕриддӕр хъӕуы, уый. Махмӕ ис, адӕймаг кӕсынӕй кӕмӕй не ’фсӕды, ахӕм хуызджын журналтӕ. Гъеныр та хъуамӕ нӕхӕдӕг бацархайӕм, цӕмӕй, ӕмбырд журналтӕ парахат кӕныны хъуыддагӕн цы аразы, уым хайад исӕм. Уыцы хъуыддаг Иегъовӕйы кӕй кадджын кӕны, уымӕ гӕсгӕ фылдӕр журналтӕ парахат кӕнгӕйӕ банкъардзыстӕм стыр циндзинад (Иоан. 15:8).