«Куыд ӕй бамбарон, исчи мын ӕй куы нӕ бамбарын кӕна, уӕд?»
1 Хорз уацхъуыд хъусынгӕнӕг Филипп ефиопийаг евнухы куы бафарста, Хуыцауы Ныхасӕй цы кӕсыс, уый ӕмбарыс, зӕгъгӕ, уӕд ын лӕг дзуапп радта: «Куыд ӕй бамбарон, исчи мын ӕй куы нӕ бамбарын кӕна, уӕд?» Филипп ын ӕхсызгонӕй баххуыс кодта Йесойы тыххӕй хорз уацхъуыд бамбарынӕн, ӕмӕ лӕг уыцы сахат донаргъуыд райста (Ап. к. 8:26—38). Филипп ӕххӕст кодта Чырыстийы фӕдзӕхст, зӕгъгӕ, «сахуыр кӕнут ӕппӕт адӕмты [«ахуыргӕнинӕгтӕ цӕттӕ кӕнут ӕппӕт адӕмты минӕвӕрттӕй», НД], аргъаугӕйӕ уыдоныл» (Мтф. 28:19, 20).
2 Мах дӕр Филиппау хъуамӕ ӕххӕст кӕнӕм уыцы фӕдзӕхст ӕмӕ ахуыргӕнинӕгтӕ цӕттӕ кӕнӕм. Фӕлӕ ефиопийаг евнухӕй уӕлдай, Библи кӕимӕ фӕахуыр кӕнӕм, уыдон арӕх чырыстон фӕндагыл афтӕ тагъд не слӕууынц. Уыцы лӕг, иудейаг прозелит, хорз зыдта Фыстад, уыд сыгъдӕгзӕрдӕ адӕймаг ӕмӕ ма йӕ ӕрмӕст хъуыд баууӕндын, Йесо зӕрдӕвӕрд Мессиа кӕй уыд, ууыл. Кӕй зӕгъын ӕй хъӕуы, ӕнцон нӕ вӕййы, кӕимӕ фӕахуыр кӕнӕм, уыдон Библиимӕ зонгӕ куы нӕ вӕййынц, мӕнг дины ахуырӕдтӕ сыл куы фендавынц кӕнӕ зындзинӕдтӕ куы февзарынц, уӕд. Цы нӕ хъӕуы аразын, цӕмӕй Библи кӕимӕ ахуыр кӕнӕм, уыдонӕн бамбарын кӕнӕм, нывонддзырд радтын ӕмӕ донаргъуыд райсын ахсджиаг кӕй у, уый?
3 Библи кӕимӕ ахуыр кӕныс, уыцы адӕймаджы уырнындзинад бафидар кӕнынӕн цы хъӕуы, уый сбӕлвырд кӕн. 1998 азы августы мӕйы «Нӕ паддзахадон лӕггаддзинад»-ы уӕлӕмхасӕн сыфы (уыр.) дзырд цыд, брошюрӕ «Цы домы»-йы ӕмӕ чиныг «Базонынад»-ы ӕххуысӕй адӕмимӕ цас рӕстӕг ис ахуыргӕнӕн, ууыл. Уым лӕвӕрд цыд ахӕм амынд: «Адӕймагимӕ цас рӕстӕг ахуыр кӕндзыстут, уый хъӕуы сбӕлвырд кӕнын йӕ уавӕртӕм ӕмӕ йӕ курдиӕттӕм гӕсгӕ. [...] Цӕмӕй адӕймаг ӕрмӕг хорз бамбара, уый тыххӕй тагъд кӕнын нӕ хъӕуы. Чи ахуыр кӕны, уыдонӕй алкӕй дӕр Хуыцауы Ныхасыл ӕууӕндынӕн хъӕуы фидар бындур». Уымӕ гӕсгӕ хуыздӕр уаид, чиныг «Базонынад»-ы ӕрмӕг тагъд, ӕхсӕз мӕймӕ рацӕуыныл куы нӕ архаис. Иуӕй-иуты, гӕнӕн ис, ӕхсӕз мӕйӕ бирӕ фылдӕр бахъӕуа, цӕмӕй донаргъуыд райсынмӕ цӕттӕ уой. Ахуыргӕнгӕйӕ, алыхатт дӕр адӕймагӕн фаг рӕстӕг хицӕн кӕн, цӕмӕй йын баххуыс кӕнай, Хуыцауы Ныхасӕй цы базоны, уый бамбарынӕн ӕмӕ йыл баууӕндынӕн. Иуӕй-иу хатт «Базонынад»-ӕй иу сӕр рацӕуынӕн, чи зоны, бахъӕуа дыууӕ кӕнӕ ӕртӕ къуырийы. Афтӕмӕй уыдзӕн фадат, цы стихтӕ дзы ис, уыдонӕй бирӕтӕ бакӕсынӕн ӕмӕ сӕ бамбарын кӕнынӕн (Ром. 12:2).
4 Зӕгъӕм, «Базонынад» кӕронмӕ сахуыр кодтат ӕмӕ, кӕимӕ ахуыр кӕныс, уый ӕцӕгад хорз нӕма ӕмбары кӕнӕ та йӕ нырма ӕцӕгады фӕндагыл фидарӕй слӕууын нӕ фӕнды ӕмӕ нӕма хъавы йӕ цард Хуыцауӕн снывонд кӕнынмӕ, уӕд та куыд? (1 Кор. 14:20). Цы ма у дӕ бон саразын, цӕмӕй йын цардмӕ кӕнӕг фӕндагыл слӕууынӕн баххуыс кӕнай? (Мтф. 7:14).
5 Библи кӕимӕ ахуыр кӕныс, уымӕн йӕ уырнындзинад бафидар кӕнынӕн баххуыс кӕн. Адӕймаджы уырнындзинад куы фидардӕр кӕна, кӕд сабыргай, уӕддӕр, ӕмӕ цы ахуыр кӕны, уымӕн куы аргъ кӕна, уӕд брошюрӕ «Цы домы»-йы ӕмӕ чиныг «Базонынад»-ы фӕстӕ ахуыр кӕнын райдайӕн ис ӕндӕр чиныг. Алы адӕймагимӕ дӕр афтӕ ахуыр кӕнын нӕ хъӕудзӕн, фӕлӕ куы хъӕуа, уӕд ис спайдагӕнӕн чингуытӕй «Иугондӕй кувынц иунӕг ӕцӕг Хуыцауӕн» (уыр.) кӕнӕ «Библи Хуыцауы ныхас у ӕви адӕймаджы?» (уыр.). Ӕмбырды уыцы чингуытӕ куы нӕ уа, уӕддӕр дзы хъусынгӕнджытӕн сӕ фылдӕрмӕ ис сӕхи экземпляртӕ. Заказ радтӕн ис ӕрмӕстдӕр чиныг «Хуыцауы ныхас»-ӕн. Куыдфӕнды ма уа, уӕддӕр иууыл фыццаг ахуыр кӕнын хъӕуы брошюрӕ «Цы домы» ӕмӕ чиныг «Базонынад». Адӕймаг дыккаг чиныг куы нӕ фӕуа ӕмӕ афтӕмӕй донаргъуыд куы райса, уӕддӕр цалынмӕ чиныг нӕ сахуыр кӕнат, уӕдмӕ Библи ахуыр кӕныны ӕмӕ дыккаг бацыды рӕстӕг хъӕуы хынцын ӕмӕ йӕ хыгъдмӕ хӕссын.
6 Уӕдӕ уый нысан кӕны, ӕрӕджы аргъуыд чи райста, фӕлӕ ӕрмӕстдӕр иу чиныг чи рацыд, уыдонимӕ дыккаг чиныг кӕй хъӕуы ахуыр кӕнын? Ӕнӕмӕнг нӕ. Фӕлӕ адӕймаг аргъуыды фӕстӕ рагӕй куы нал хъусын кӕна кӕнӕ ӕцӕгады фӕндагыл фидар куы нӕ лӕууа, уӕд ӕй хъӕудзӕн ӕххуыс, цӕмӕй ӕцӕгадмӕ гӕсгӕ цӕра. Аргъуыд хъусынгӕнӕгимӕ ахуыр кӕнын райдайыны размӕ уал хъӕудзӕн службӕйон цӕстдарӕгимӕ аныхас кӕнын. Фӕлӕ раздӕр «Базонынад» чи ахуыр кодта ӕмӕ нывонддзырд радтынмӕ ӕмӕ донаргъуыд райсынмӕ цӕттӕ чи нӕ уыд, ахӕм искӕй куы зонай, уӕд ӕй дӕ бон у бафӕрсын, Библи ахуыр кӕнын ӕй ногӕй фӕнды ӕви нӕ.
7 Кӕимӕ ахуыр кӕнӕм, уыцы цымыдисгӕнаг адӕмыл зӕрдиагӕй куы тыхсӕм, уӕд уымӕй ӕвдисдзыстӕм нӕ чырыстон уарзондзинад. Нӕ хӕс у адӕймагӕн баххуыс кӕнын, цӕмӕй Хуыцауы Ныхасы ӕцӕгад хуыздӕр ӕмбарын райдайа. Уӕд фидарӕй райсдзӕн ӕцӕгад, йӕ цард Иегъовӕйӕн снывонд кӕндзӕн ӕмӕ йӕ донаргъуыдӕй равдисдзӕн (Пс. 39:9; Еф. 3:17—19).
8 Хъуыды ма кӕныс, ефиопийаг евнух донаргъуыд куы райста, уӕд цы ’рцыд, уый? Уый сси Йесо Чырыстийы ахуыргӕнинаг ӕмӕ «йӕ фӕндагыл дарддӕр цингӕнгӕйӕ цыд» (Ап. к. 8:39, 40). Уӕдӕ махӕн дӕр ӕмӕ ӕцӕгады фӕндагыл цӕуынӕн ӕнтыстджынӕй кӕмӕн ӕххуыс кӕнӕм, уыдонӕн дӕр, Иегъовӕ Хуыцауӕн кӕй лӕггад кӕнӕм, уый хӕссӕд стыр циндзинад — куыд абон, афтӕ ӕнустӕм дӕр!