Цы цаутӕ цӕуы, уыдоны ӕххуысӕй адӕмы цымыдис кӕн
1 Фӕнды дӕ, цӕмӕй уацамынды ӕдзухдӕр хорз ӕмӕ ног хъуыдытӕй пайда кӕнай ӕмӕ цӕмӕй афтӕмӕй адӕмы Библийы уацхъуыдӕй бацымыдис кӕнай? Уӕд ныхас райдайынӕн пайда кӕн, ӕгас дунейы ӕмӕ кӕм цӕрыс, уым цы цаутӕ цӕуы, уыдонӕй. Дӕ бон у бынӕттон ӕмӕ ӕппӕтдунеон хабӕртты тыххӕй зӕгъын. Алыбон дӕр ӕрцӕуы исты хабар (1 Кор. 7:31). Ӕркӕс ма дӕлдӕр лӕвӕрд цӕвиттонтӕм.
2 Экономикон зындзинӕдтӕ ӕмӕ уӕззау цард тыхсын кӕнынц адӕмы. Уымӕ гӕсгӕ дӕ бон у зӕгъын:
◼ «Ног хабӕртты фехъуыстай [зӕгъ, кӕм ӕй фехъуыстай], ӕргътӕ та кӕй схызтысты, уый?» Кӕд искӕцы стыр организацийы бирӕ кусджыты сӕ куыстӕй систой, уӕд дӕ бон у зӕгъын, адӕмӕн куыст кӕй нӕй, уый тыххӕй. Дарддӕр цӕуыл дзурдзынӕ, уымӕ гӕсгӕ дӕ бон у бафӕрсын: «Искуы хъуыды кодтай, адӕймагӕн йӕ бон йӕхи дарын цӕуылнӕ у, ууыл?» кӕнӕ та «Куыд дӕм кӕсы, адӕм алкӕддӕр афтӕ фыдӕбон кӕндзысты?»
3 Хъусинӕгтӕ тыхмийы тыххӕй, зӕгъӕм, ӕнамонд цаутӕ бинонты ’хсӕн кӕнӕ скъолаты ахуыргӕнинӕгты ’хсӕн. Бацӕттӕ кӕн бындур иннӕ хатт аныхас кӕнынӕн. Дӕ бон у бафӕрсын:
◼ «Газеты бакастӕ [зӕгъ, кӕм цӕрыс, уым цы бӕллӕх ӕрцыд, уый тыххӕй]?» Уый фӕстӕ бафӕрс: «Куыд дӕм кӕсы, зӕххыл афтӕ бирӕ тыхми цӕмӕ ис?» кӕнӕ «Куыд дӕм кӕсы, адӕм искуы ӕдасӕй цӕрдзысты?»
4 Стыр донивылдтӕ, зӕххӕнкъуыстытӕ кӕнӕ зӕххыл алы рӕтты адӕм кӕй змӕнтынц, уый тыххӕй хъусинӕгтӕ баххуыс кӕндзысты адӕймаджы бацымыдис кӕнынӕн. Зӕгъӕм, ис бафӕрсӕн:
◼ «Хуыцау аххосджын у [зӕгъ искӕцы ӕрдзытыхон азары тыххӕй]?» Кӕнӕ дӕ бон у зӕгъын, фӕстаг хатт цы змӕстытӕ уыд, уыдоны тыххӕй ӕмӕ фарст радтын: «Кӕд алкӕйдӕр фӕнды, цӕмӕй зӕххыл сабырдзинад уа, уӕд адӕмӕн цӕуылнӕ у сӕ бон сабырӕй цӕрын?»
5 Ныхасгӕнгӕйӕ цавӕр цауты тыххӕй ис зӕгъӕн, уыдонмӕ дӕ хъус дар. Хорз хъуыдытӕ ссарӕн ис брошюрӕйы «Куыд райдайӕм ӕмӕ куыд адарддӕр кӕнӕм нӕ ныхас Библийыл» (уыр.), 6-ӕм фарс, сӕргонд «Цы цаутӕ цӕуы, уыдон». Фӕлӕ политикӕ ӕмӕ ӕхсӕнадыл дзургӕйӕ макӕй фарс хӕц. Уый бӕсты адӕмы хъусдард здах Фыстадмӕ ӕмӕ Хуыцауы Паддзахадмӕ — адӕмӕн сӕ зындзинӕдтӕ чи аиуварс кӕндзӕн, уыцы иунӕг фӕрӕзмӕ.