Хъусын кӕнӕм ацы фӕлдурӕджджын дунейы
1 Цард куыд тагъд ивы! Ӕнӕнхъӕлӕджы ӕрцӕуы ӕрдзон бӕллӕх, фӕфыддӕр вӕййы экономикон уавӕр, иу хицауад иннӕйы раппары кӕнӕ та ӕрцӕуы ӕвирхъау хабар, ӕмӕ ӕхсӕнад ӕгасӕйдӕр йӕ хъусдард уымӕ скӕны, уымӕй дарддӕр ӕндӕр ницӕуыл уал фӕдзурынц. Бирӕ нӕ рацӕуы, ӕмӕ та адӕм ӕндӕр цӕмӕдӕр аздахынц се ’ргом (Ап. к. 17:21; 1 Кор. 7:31). Уӕдӕ ацы фӕлдурӕджджын дунейы адӕмы хъусдард Паддзахады хабармӕ куыд скӕнӕм?
2 Бамбар, адӕмы мӕты цы ӕфтауы. Цӕмӕй нӕм адӕм байхъусой, уымӕн нын цы хъуыддӕгтӕ ӕххуыс кӕнынц, уыдонӕй иу у, ныртӕккӕ цы цаутӕ цӕуы, уыдоныл дзурын. Иухатт, Йесо йӕ хъусджыты куы разӕнгард кодта, Хуыцауы раз сын цы ном ис, ууыл лӕмбынӕг ахъуыды кӕнынмӕ, уӕд ской кодта, уыдон хорз кӕй зыдтой ӕмӕ ӕрӕджы чи ӕрцыд, уыцы ӕвирхъау хабӕртты тыххӕй (Лук. 13:1—5). Афтӕ махӕн дӕр хорз хабар хъусынгӕнгӕйӕ хорз уаид дзурын, нӕ территорийы цӕрӕг адӕмы мӕты чи ӕфтауы, уыцы фӕстаг хабӕрттӕ кӕнӕ кӕм цӕрыс, уым цы цаутӕ ӕрцыд, уыдон тыххӕй. Фӕлӕ ахӕм хъуыддӕгты фӕдыл дзургӕйӕ хъуыды кӕнӕм, цӕуыл дзурӕм, ууыл, цӕмӕй политикон кӕнӕ социалон фарстаты искӕй фарс ма рахӕцӕм (Иоан. 17:16).
3 Куыд базонӕм, адӕмӕн ацы тӕккӕ сӕ хъуыдытӕ цӕуыл сты? Ӕвӕццӕгӕн, ӕппӕты хуыздӕр у адӕймагмӕ фарст раттын ӕмӕ йӕм стӕй байхъусын (Матф. 12:34). Адӕмыл куы хъуыды кӕнӕм, уӕд архайдзыстӕм, цӕмӕй сын сӕ цӕстӕнгас бамбарӕм ӕмӕ сӕ дарддӕр уӕзданӕй фӕрсдзыстӕм. Ныхасы рӕстӕджы адӕймаг, гӕнӕн ис, ской кӕна, уыцы ран адӕмы цы тыхсын кӕны, уый тыххӕй, ӕмӕ уый зонгӕйӕ та мах хуыздӕр хъусын кӕндзыстӕм.
4 Дӕ ныхас цӕмӕй райдайдзынӕ, уый цӕттӕ кӕн. Ацы фӕлдурӕджджын дунейы нын уацамындмӕ цӕттӕ кӕнынӕн баххуыс кӕндзӕн брошюрӕ «Куыд райдайӕм ӕмӕ куыд адарддӕр кӕнӕм нӕ ныхас Библийыл» (уыр.). Цы цаутӕ цӕуы, уыдонӕй куыд ис ныхас райдайӕн, уый тыххӕй хорз цӕвиттонтӕ ис 5, 6 фӕрстыл, сӕргонд «Фыдракӕндтӕ/Ӕдасдзинад» («Преступность/Безопасность») ӕмӕ «Цы цаутӕ цӕуы, уыдон» («Текущие события»). Уӕлӕмхасӕн ӕрмӕг ма ссарӕн ис 2000 азы сентябры «Нӕ паддзахадон лӕггаддзинад»-ы, 4 ф. Дӕ цӕвиттон куы цӕттӕ кӕнай, уӕд дзы ӕнӕмӕнгдӕр спайда кӕн, дӕ ныхӕстӕ дын чи бӕлвырд кӕна, ахӕм стихӕй.
5 Нӕ участокыл адӕмы мӕты цы ӕфтауы, уый кӕд базыдтам, уӕд нӕ нӕ ныхӕстӕ дӕр уымӕ гӕсгӕ хъӕуы фӕивын. Афтӕмӕй семӕ ныхас кӕндзыстӕм, сӕ зӕрдӕйӕн ӕввахс цы у, ууыл. Уый фӕрцы фылдӕр адӕмы базонгӕ кӕндзыстӕм, йӕ миниуджытӕ ӕмӕ йӕ уагӕвӕрдтӕ кӕмӕн нӕ ивынц, Уыимӕ (Иак. 1:17).