«Хуыцауы дзырд... хъаруджын у»
1 «Хуыцауы дзырд цӕрдуд ӕмӕ хъаруджын у»,— ныффыста апостол Павел (Дзут. 4:12, НФ). Уымӕй йӕ цы зӕгъын фӕндыд? Хуыцауы дзырдӕн, кӕнӕ хабарӕн, кӕцы ис Библийы, йӕ бон у адӕмыл тынг ӕндавын. Библийы цы зонындзинӕдтӕ ис, уыдонӕн ис тых адӕймаджы цард хуыздӕрырдӕм фӕивынӕн. Уый цы ӕнцой ӕмӕ цы ныфс дӕтты, уыдон адӕмы хӕстӕгдӕр кӕнынц царддӕттӕг Хуыцау Иегъовӕмӕ. Цы хабар дзы ис, уымӕн йӕ бон у сыгъдӕгзӕрдӕ адӕмы сразӕнгард кӕнын ӕнусон цардмӕ кӕнӕг фӕндагыл цӕуынмӕ. Фӕлӕ цӕмӕй уыдӕттӕ нӕхи цӕстӕй фенӕм, уый тыххӕй хъуамӕ, иннӕтӕн хъусынгӕнгӕйӕ, пайда кӕнӕм Библийӕ.
2 Куыддӕр-иу дын фадат фӕзына, афтӕ-иу Библийӕ стих бакӕс. Куыд рабӕрӕг, афтӕмӕй хъусынгӕнджытӕй бирӕтӕ нал пайда кӕнынц Библийӕ, хӕдзарӕй-хӕдзармӕ куы фӕхъусын кӕнынц, уӕд. Дӕуӕй дӕр уый зӕгъӕн ис? Адӕмӕй бирӕтӕн дзурынӕн рӕстӕг кӕй нӕ вӕййы, уымӕ гӕсгӕ, чи зоны, сахуыр дӕ ӕрмӕстдӕр литературӕ дӕттыныл кӕнӕ та библион стихтӕ дӕхи ныхӕстӕй дзурыныл. Мах хъусынгӕнджыты се ’ппӕты дӕр разӕнгард кӕнӕм, цӕмӕй архайой, хорз уацхъуыды тыххӕй куы дзурой, уӕд Библийӕ ӕппынкъаддӕр иу стих бакӕсыныл; уый руаджы адӕймаг фендзӕн, нӕ ныхӕстӕ ӕцӕгӕйдӕр Хуыцауы Ныхасыл кӕй бындуриуӕг кӕнынц, уый.
3 Кӕд Библи ӕдзухдӕр ӕрмӕст стӕмтӕ кӕсынц, уӕддӕр ын адӕм, ӕмткӕй райсгӕйӕ, нырма аргъ кӕнынц. Суанг ма рӕстӕг кӕмӕн нӕ вӕййы, уыдон дӕр рахицӕн кӕнынц иу-дыууӕ минуты, цӕмӕй байхъусой, комкоммӕ сын Хуыцауы Ныхасӕй цы кӕсынц, уымӕ. Ӕмбӕлон стих аивӕй куы бакӕсай ӕмӕ йӕ цыбыртӕй куы бамбарын кӕнай, уӕд, гӕнӕн ис, ӕмӕ Иегъовӕйы дзырд хъусӕгӕн йӕ зӕрдӕ бацагайа. Фӕлӕ дӕ фыццаг ныхӕсты фӕстӕ дӕ бон куыд у библион стих бакӕсын?
4 Библийӕ пайда кӕн, журналтӕ парахат кӕнгӕйӕ. Иу цӕуӕг цӕстдарӕг Сыгъдӕг Фыстадӕй ӕнтыстджынӕй фӕпайда кӕны, журналтӕ куы фӕпарахат кӕны, уӕд. Йӕ дзыппы дары гыццыл Библи. Журналты тыххӕй цалдӕр ныхасы зӕгъгӕйӕ ӕмӕ статьяйыл цыбыртӕй ӕрдзургӕйӕ, дарддӕр ӕнӕ ракӕ-бакӕгӕнгӕйӕ йӕ Библи бакӕны ӕмӕ статьяимӕ цы стих у баст, уый бакӕсы. Уый бафӕрсы: «Ацы ныфсдӕттӕг зӕрдӕвӕрды тыххӕй цы хъуыды кӕныс?», стӕй бакӕсы, цы стих равзары, уый.
5 Дӕ разы сӕвӕр нысан: кӕимӕ ныхас кӕнай, уыдонӕй алкӕмӕндӕр Библийӕ иу кӕнӕ дыууӕ стихы бакӕсын. Йӕ разӕнгардгӕнӕг тыхы руаджы гӕнӕн ис, ӕмӕ Хуыцаумӕ фылдӕр адӕм ӕрбацӕуа (Иоан. 6:44).