Буары уӕнгтау «кӕрӕдзийыл баст сты»
1 Искуы ахъуыды кодтай, адӕймаджы буар цӕй диссаджы конд у, ууыл? (Пс. 138:14). Буары хӕйттӕ иууылдӕр сты кӕрӕдзийыл баст ӕмӕ сӕ алчидӕр кӕны йӕхи куыст. Хуыцауы Ныхас чырыстон ӕмбырд бары адӕймаджы буаримӕ. Чырыстийы разамындӕй ӕмбырды уӕнгтӕ дӕр «алыхуызон хъӕугӕ ӕрхӕджыты руаджы кӕрӕдзийыл баст сты ӕмӕ ӕмгуыст кӕнынц» (Еф. 4:16а, НД). Афтӕмӕй Иегъовӕ йӕ ӕмвӕнд адӕмы уылты аразы диссаджы хъуыддӕгтӕ.
2 Фыццаг ӕнусы ӕмбырды уӕнгтӕ «ӕмудӕй» (НФ) кӕрӕдзийӕн ӕххуыс кодтой ӕмӕ сӕ уырнындзинад фидар кодтой (Ап. к. 2:44—47). Иегъовӕйы фӕрцы-иу уыдон иумӕ бафӕрӕзтой карз фӕдылзылдӕн (Ап. к. 4:24—31). Уыдон Хуыцауы Паддзахады тыххӕй хъусын кодтой алы ран дӕр, уӕды дунейы алы къуымтӕм дӕр хорз хабар фӕхӕццӕ кодтой (Кол. 1:23). Абон чырыстон ӕмбырд дӕр иумӕ ӕххӕст кӕны ахӕм куыст, ӕрмӕст ӕгас зӕххыл. Цӕй руаджы ис се ’хсӕн ахӕм иудзинад?
3 Хуыцауы ахуырад нӕ ӕнгом кӕны. Ӕппӕт зӕххы къорийыл мах иу кӕны нӕ кувынад. Куыд? Мах зонӕм, Иегъовӕ нын сӕрст чырыстӕтты уылты «афоныл хӕринаг [кӕй] дӕтты», уый (Матф. 24:45). Мах ма стыр аргъ кӕнӕм, ӕмбырды ахуыргӕнджытӕй кӕй сӕвӕрдта, уыцы «лӕвӕрттӕн адӕймӕгты хуызы» (НД). Иегъовӕ нын нӕ уырнындзинад фидар кӕнынӕн цы дӕтты, уый сӕрныллӕгӕй куы исӕм, уӕд Хуыцауы Ныхас хуыздӕр ӕмбардзыстӕм ӕмӕ нӕ фӕнддзӕн Йесойы фӕзмын, уымӕн ӕмӕ стӕм йӕ ахуыргӕнинӕгтӕ. Мах хъуамӕ дарддӕр дӕр ахуыр кӕнӕм Хуыцауы Ныхас, ӕппӕт тыхтӕй архайӕм, цӕмӕй «ӕрцӕуӕм иудзинадмӕ уырнындзинады» (Еф. 4:8, 11—13). Цӕмӕй не ’хсӕн иудзинад уа, уый тыххӕй алы бон дӕр Библи кӕсӕм?
4 Ӕнгом стӕм чырыстон ӕфсымӕрады фӕрцы. Уарзондзинад нӕ ӕнгомдӕр кӕны чырыстон фембӕлдты. Ацы фембӕлдты мах «кӕрӕдзийӕн аргъ кӕнӕм» (Дзут. 10:24, 25, НД). Уый та ууыл дзурӕг у, ӕмӕ не ’фсымӕртӕн ӕрмӕст сӕ уындмӕ ма кӕсӕм, фӕлӕ архайӕм семӕ хуыздӕр зонгӕ кӕныныл, ӕмӕ сын хӕзнатау аргъ кӕнӕм, Иегъовӕ сын куыд аргъ кӕны, афтӕ (Аг. 2:7). Куы фехъусӕм не ’фсымӕрты фидар уырнындзинады тыххӕй, уӕд сӕ тынгдӕр бауарзӕм ӕмӕ афтӕмӕй нӕ иудзинад фидардӕр кӕны. Уӕдӕ дӕуӕй та цы зӕгъӕн ис: ӕмбырдтӕм иудадзыг цӕуыс?
5 Не ’мкусджытӕ уацамынды. Не ’мчырыстӕттимӕ хорз хабар кӕй хъусын кӕнӕм, уый фӕрцы ӕмвӕндӕй ӕххӕст кӕнӕм Хуыцауы фӕндон. Апостол Павел аргъ кодта, йемӕ «Хуыцауы Паддзахадӕн» чи лӕггад кодта, уыдонӕн (Кол. 4:11). Уацамынды кӕрӕдзийӕн исты цаутӕ куы дзурӕм ӕмӕ кӕрӕдзийӕн куы ӕххуыс кӕнӕм, уӕд нын ӕнцондӕр уыдзӕн нӕ чырыстон хӕс ӕххӕст кӕнын ӕмӕ афтӕмӕй фидар кӕндзысты нӕ иудзинады тӕгтӕ (Кол. 3:14).
6 Сыгъдӕг уды ӕххуыс ахъаз у иудзинадӕн. Иегъовӕйы фӕндон зӕрдӕбынӕй кӕй ӕххӕст кӕнӕм, уымӕ гӕсгӕ нын уый дӕтты йӕ сыгъдӕг уд. Уый фӕрцы не ’хсӕн цы хицӕндзинӕдтӕ ис, уыдонӕн фӕразӕм ӕмӕ кӕрӕдзиимӕ хӕларӕй цӕрӕм (Пс. 132:1). Уый нӕ разӕнгард кӕны, цӕмӕй «удӕй иудзинад хъахъхъӕнӕм [«ӕмуд уӕм», НФ], фидыддзинады цӕдисы» (Еф. 4:3). Хуыцауы адӕмы ’хсӕн цы фарн ис, уый махӕй алкӕмӕндӕр йӕ бон у хъахъхъӕнын. Уый тыххӕй хъуамӕ архайӕм, Хуыцауы сыгъдӕг уд нӕ куыд разӕнгард кӕны, уымӕ гӕсгӕ (Гал. 5:22, 23).
7 Чырыстийы разамындӕй иумӕ куы лӕггад кӕнӕм, уӕд «ахъаз кӕнӕм буары рӕзтӕн [...] уарзондзинады фидар кӕнынӕн» (Еф. 4:16ӕ, НД). Уымӕй уӕлдай ма уый кад хӕссы Иегъовӕйӕн, «фарны Хуыцауӕн» (Ром. 16:20, НФ).