Фарстыты асыкк

◼ Кӕд ис ӕндӕр ӕвзагыл къорд саразӕн?

Ӕмбырды территорийы, ӕндӕр ӕвзагыл чи дзуры, ахӕм адӕм бирӕ куы цӕра, уӕд хистӕр нӕлгоймӕгтӕ хъуамӕ бацархайой, цӕмӕй уыцы ӕвзагыл хорз хабар хъуыстгонд цӕуа (km 07.02 1 ф.; km 02.98 3, 4 фф., уыр.). Ног къорд саразӕн ис, ӕндӕр ӕвзагыл дзурӕг адӕм дыууӕ кӕнӕ фылдӕр ӕмбырды территорийыл куы цӕрой, уӕд. Ахӕм уавӕры районон цӕстдарӕг(-джытӕ) ратдзӕн(-дзысты), ӕмбырдтӕн хъусын кӕныны хъуыддаджы кӕрӕдзиимӕ ӕмгуыст кӕнынӕн чи баххуыс кӕна, ахӕм амындтӕ. Ӕндӕр ӕвзагыл фембӕлдмӕ цал адӕймаджы ӕрбацӕудзӕн, уый сбӕрӕг кӕнынӕн рӕстӕгӕй-рӕстӕгмӕ хъӕуы уадзын, ӕргом раныхасимӕ кӕм рацӕуынц, уыцы фембӕлд (публичная встреча) кӕнӕ «Хъахъхъӕнӕн мӕсыджы» ахуыр.

Ӕндӕр ӕвзагыл къорд саразӕн ис ахӕм уавӕрты: 1) хорз хабар ӕндӕр ӕвзагыл хуыздӕр чи ӕмбары, ахӕм хъусынгӕнджытӕ кӕнӕ цымыдисгӕнаг адӕм куы уа, уӕд; 2) разамынд йӕхимӕ чи райса ӕмӕ ӕппынкъаддӕр алы къуыри дӕр иу фембӕлд чи уадза, ахӕм фӕлтӕрд хистӕр нӕлгоймаг кӕнӕ кӕстӕриуӕггӕнӕг ӕфсымӕр куы уа, уӕд; 3) хистӕр нӕлгоймӕгты совет разы куы уа ахӕм къордӕн ӕнӕзивӕгӕй ӕххуыс кӕнын. Ацы домӕнтӕ ӕххӕст куы цӕуой, уӕд хистӕр нӕлгоймӕгтӕ хъуамӕ филиалмӕ ног къорды сырӕзты тыххӕй фехъусын кӕной, ӕмӕ сӕ дарддӕр цы аразын хъӕудзӕн, уый сын зӕгъдзысты.

Ног къордтӕн сӕ фылдӕр райдайынц, чиныгахуыры фембӕлд алы къуыри дӕр кӕй уадзынц, уымӕй. Фӕстӕдӕр хистӕр нӕлгоймӕгтӕ бар раттынц ӕндӕр фембӕлдтӕ уадзынӕн, зӕгъӕм, ӕргом раныхас кӕм вӕййы, уыцы фембӕлд ӕмӕ «Хъахъхъӕнӕн мӕсыджы» ахуыр. Кӕд фӕлтӕрд хистӕр нӕлгоймаг кӕнӕ кӕстӕриуӕггӕнӕг ӕфсымӕр уыцы ӕвзагыл дзуры ӕмӕ йӕ бон у уынаффӕтӕ дӕттын, уӕд Хуыцауы Ныхас хъусынгӕнджыты скъолайы 2-аг, 3-аг ӕмӕ 4-ӕм хӕслӕвӕрдтӕ равдисӕн ис дыккаг къласы. Фӕлӕ ахӕм къорд дзырдарӕхстдзинад ӕмӕ зондамонӕн раныхасмӕ, ахсджиаг хъуыдытӕм Библийӕ ӕмӕ Лӕггаддзинады фембӕлдмӕ хъуамӕ хъуса ӕмбырды иннӕ хайимӕ иумӕ. Уыдонӕн ма сӕ бон у уацамындон фембӕлдтӕ уадзын дӕр.

Ахӕм къорд хъуамӕ архайа хистӕр нӕлгоймӕгты советы разамындӕй. Хистӕр нӕлгоймӕгтӕ хъуамӕ дӕттой хорз разамынд ӕмӕ уыцы къорды уӕнгтыл зӕрдӕбынӕй аудой. Ӕндӕр ӕвзагыл дзурӕг къорд цы ӕмбырды ис, ахӕм ӕмбырд районон цӕстдарӕг куы бӕрӕг кӕна, уӕд уый дӕр семӕ уацамынды ацӕудзӕн ӕмӕ сын сӕ уырнындзинад бафидар кӕндзӕн. Рӕстӕг куыд цӕуа, афтӕ ӕндӕр ӕвзагыл дзурӕг къорд Иегъовӕйы фӕрцы, чи зоны, ӕмбырд дӕр суа.