Ӕххуыс йӕ афоныл
1 Апостол Петр куы федта, йе ’муырнджыты бафидар кӕнын кӕй хъӕуы, уӕд сын хӕларзӕрдӕйӕ сӕ зӕрдыл ӕрлӕууын кодта иуӕй-иу амындтӕ ӕмӕ сӕ бафидар кодта (2 Пет. 1:12, 13; 3:1). «Уырнындзинад райсыны аккаг чи сси, уыдоны» (НД) сразӕнгард кодта чырыстон миниуджытыл кусынмӕ, цӕмӕй ма «баззадаиккой ӕнӕнтыст ӕмӕ ӕнӕ дыргъӕй нӕ Хицау Йесо Чырыстийы базоныны» (2 Пет. 1:1, 5—8). Петры нысан уыд, цӕмӕй сӕ бафидар кодтаид Иегъовӕ сӕм кӕй фӕсидт ӕмӕ сӕ кӕй равзӕрста, уыцы хъуыддаджы ӕмӕ сӕхи «бахъардтаиккой Йӕ размӕ балӕууын фӕрнӕй, ӕнӕфӕчъизийӕ ӕмӕ ӕназымӕй» (2 Пет. 1:10, 11; 3:14, НФ). Бирӕтӕн уыцы зӕрдӕфидаргӕнӕн ныхӕстӕ уыдысты йӕ афоныл.
2 Абон дӕр чырыстон цӕстдарджытӕ Хуыцауы адӕммӕ ахӕм ахаст дарынц. Ацы «ӕнахуыр уӕззау рӕстӕджыты» Иегъовӕйы лӕггадгӕнджытӕй бирӕтӕ сты тынг уӕззау уавӕрты (2 Тим. 3:1, НД). Ӕхцайыл кӕй тыхсынц, бинонты ’хсӕн кӕнӕ сӕрмагонд царды зындзинӕдтӕ кӕй ӕвзарынц, уымӕ гӕсгӕ иуӕй-иутӕ гӕнӕн ис сӕхи хатой Давидау: «Мӕ алфамблай ӕрбатыхстысты бирӕ мӕгуырдзинӕдтӕ [бӕллӕхтӕ]: баййӕфтой мӕн мӕ ӕнӕрӕстадтӕ, ӕмӕ уый тыххӕй уынын дӕр нӕ фӕразын: уыдон мӕ сӕры хъуынтӕй фылдӕр сты; ӕмӕ мӕ зӕрдӕ ныууагъта мӕн» (Пс. 39:13, МГТ). Уыцы зындзинӕдтӕ гӕнӕн ис афтӕ бирӕ уой, ӕмӕ иуӕй-иутӕ ахсджиаг монон хӕслӕвӕрдтӕ мацӕмӕ уал дарой ӕмӕ зӕрдиагӕй чырыстон хъуыддаг мауал ӕххӕст кӕной. Фӕлӕ уыцы бӕллӕхтӕм нӕкӕсгӕйӕ, уыдон уӕддӕр Иегъовӕйы амындтӕ нӕ ферох кодтой (Пс. 118:176). Хистӕр нӕлгоймӕгтӕн ныр у ахӕм афон, цӕмӕй уыцы ӕфсымӕртӕ ӕмӕ хотӕн баххуыс кӕной (Ис. 32:1, 2).
3 Уый тыххӕй хистӕр нӕлгоймӕгтӕ хъуамӕ ӕппӕт тыхтӕй бацархайой, цӕмӕй уацамынды арӕх чи нӕ вӕййы, уыдонӕн баххуыс кӕной. Ардыгӕй мартъийы фӕудмӕ уыцы ӕфсымӕртӕ ахӕм ӕххуыс кӕндзысты. Чиныгахуырӕдты цӕстдарджытӕ хъуамӕ бацӕуой, рагӕй чи нӕ хъусын кӕны, ахӕм чырыстӕттӕм, цӕмӕй сын сӕ уырнындзинад бафидар кӕной ӕмӕ сын баххуыс кӕной фӕстӕмӕ ӕмбырдимӕ хъусын кӕнынӕн. Кӕм хъӕуа, уым ис семӕ ногӕй Библи ахуыр кӕнӕн дӕр. Иннӕ хъусынгӕнджытӕн дӕр зӕгъут, ӕмӕ уын баххуыс кӕной. Ахӕм хъуыддаг дын куы бахӕс кӕной, уӕд дӕ фыдӕбон ӕнӕхъуаджы нӕ уыдзӕн, уӕлдайдӕр та дӕ бон куы уа зӕрдӕфидаргӕнӕн ныхӕстӕ хӕларзӕрдӕйӕ ӕмӕ ӕмбаргӕйӕ дзурын.
4 Мах тынг фӕцин кӕнӕм, исчи та фӕстӕмӕ ӕмбырдимӕ хъусын кӕнын куы райдайы, уӕд (Лук. 15:6). Рагӕй чи нӕ хъусын кӕны, уыдоны бафидар кӕныныл кӕй архайӕм, уый сын, чи зоны, ӕцӕгдӕр уа «йӕ афоныл загъд ныхасау» (Ӕмб. 25:11).