Сыгъдӕг ут уӕ алы хъуыддаджы дӕр
1. Нӕ алы хъуыддаджы дӕр сыгъдӕг цӕмӕн хъуамӕ уӕм?
1 Мах, сыгъдӕг Хуыцау Иегъовӕйы лӕггадгӕнджытӕ, тырнӕм, цӕмӕй нӕ алы хъуыддаджы дӕр уӕм сыгъдӕг (1 Пет. 1:15, 16). Уый ууыл дзурӕг у, ӕмӕ нӕ царды алы фадыджы дӕр Иегъовӕйы уагӕвӕрдтӕм гӕсгӕ архайӕм. Ацы аз нын облӕстон конгрессы уыдзӕн фадат нӕ сыгъдӕг уагахаст равдисынӕн.
2. Уазӕгдзӕрӕнты нӕхи хорз дарын нӕ бон куыд у?
2 Уазӕгдзӕрӕнты. Фарон облӕстон конгрессы делегаттӕ кӕм ӕрлӕууыдысты, уыцы уазӕгдзӕрӕны администратор загъта: «Куыд ӕхсызгон нын уыд, Иегъовӕйы Ӕвдисӕнтӕ нӕм кӕй цардысты. [...] Сымах хуызӕн уазджытӕ нӕм куы цӕуит алы хатт дӕр». Цӕмӕй нын дарддӕр дӕр ахӕм хорз ном уа, уый тыххӕй нӕ хъӕуы ӕххӕст кӕнын ацы зӕрдылдаринӕгтӕ: 1) цал бынаты дӕ хъӕуа, ӕрмӕстдӕр уал ныззаказ кӕн, ӕмӕ уат цал адӕймагӕн у, уымӕй фылдӕр дзы ма цӕрӕт; 2) дӕ заказ куы ивай, уӕд уый тыххӕй ӕвӕстиатӕй фехъусын кӕн уазӕгдзӕрӕны кусджытӕн; 3) ма цӕттӕ кӕн хӕринаг, цӕттӕ кӕныны бар цы уаты нӕй, уым; 4) алы бон дӕр арфӕ кӕн уазӕгдзӕрӕны кусджытӕн; 5) уазӕгдзӕрӕны кусджытимӕ ныхасгӕнгӕйӕ ӕвдис сыгъдӕг уды дыргъ, уӕлдайдӕр та уазӕгдзӕрӕнмӕ бирӕ уазджытӕ куы ӕрцӕуы кӕнӕ уырдыгӕй куы фӕцӕуы, уӕд (Гал. 5:22, 23).
3. Сывӕллӕтты уагахаст иннӕтыл куыд бандавдзӕн?
3 Нӕ хорз уагахастӕн ис стыр тых. Фарон иу ӕрыгон Ӕвдисӕн уазӕгдзӕрӕны кусӕг сылгоймагӕй уӕзданӕй ракуырдта фыссӕнгӕрзтӕ ӕмӕ йын стӕй бузныг загъта. Уый сылгоймаджы зӕрдӕ тынг бацагайдта ӕмӕ загъта: «Кӕм ма фендзынӕ ахӕм ӕгъдауджын фӕсивӕд!». Фӕлӕ уӕддӕр иуӕй-иу хатт фенӕн уыд, ӕнӕркастӕй кӕй ныууагътой, ахӕм сывӕллӕтты лифтыты фыдуаггӕнгӕ, къӕлидорты хъӕлӕбагӕнгӕ ӕмӕ ралидз-балидзгӕнгӕ. Ныййарджытӕ хъуамӕ сӕ сывӕллӕтты сӕхи бар ма уадзой, фӕлӕ сӕм хъуамӕ кӕсой ӕмӕ ӕрмӕстдӕр уӕд уыдзысты ныфсджын, сӕ уагахастӕй Иегъовӕйы кӕй кадджын кӕнынц (Ӕмб. 29:15).
4. Кафейы кӕнӕ та ӕндӕр искуы куы хӕрӕм, уӕд нӕ бон куыд у иннӕтыл хъуыды кӕнын?
4 Ресторанты ӕмӕ кафеты. Конгресс кӕм цыд, уым хӕстӕг рестораны официант загъта: «Иегъовӕйы Ӕвдисӕнтӕ бынтон ӕндӕрхуызон сты. Уыдон алкӕмӕндӕр аргъ кӕнынц». Мах хъуамӕ ӕгӕр хъӕрӕй ма дзурӕм ӕмӕ ма худӕм, цӕмӕй иннӕты ма хъыгдарӕм. Хӕргӕ кӕнӕм ӕви нуазгӕ кӕнӕм, мах фӕнды алцыдӕр кӕнын Хуыцауы кадӕн (1 Кор. 10:31).
5. Цы нысан кӕны хорз уагахаст конгрессы?
5 Конгрессы. Нӕ хорз уагахаст хъуамӕ уӕлдай тынгдӕр бӕрӕг уа конгрессы. Курӕг уӕ стӕм, уагдарты уынаффӕтӕм хъусут, машинӕ лӕууӕндӕтты дӕр ӕмӕ программӕ кӕм цӕуа, уым дӕр (Дзут. 13:17). Бинонтӕ хъуамӕ бадой иумӕ, сывӕллӕттӕ, уыимӕ ӕрыгон фӕсивӕд дӕр, хъуамӕ хицӕнӕй ма бадой. Конгрессы электрон кӕнӕ зӕлтыхджындӕргӕнӕн фӕрӕзтӕм нӕй иугӕнӕн фыссӕн аппаратурӕ, ӕмӕ сӕ хъӕуы афтӕ пайда кӕнын, цӕмӕй макӕй хъыгдарой. Программӕйы рӕстӕджы дӕ къам сисын куы фӕнда, уӕд къамисӕнӕн йӕ рухс ахуыссын кӕн. Пейджертӕ ӕмӕ дзыппыхӕсгӕ телефонтӕн сӕ дзӕнгӕрӕг хъӕуы афтӕ сиу кӕнын, цӕмӕй макӕй тыхсын кӕной. Искӕуыл ӕнӕнхъӕлӕджы исты куы ’рцӕуа, уӕд, дӕ хорзӕхӕй, уый тыххӕй фехъусын кӕн уагдарӕн кӕнӕ та Фыццаг ӕххуысы хайадмӕ. Уым рынчынӕн ӕмбӕлон ӕххуыс бакӕндзысты.
6. Конгрессты нӕ уагахастӕй Хуыцауы куыд кадджын кӕнӕм?
6 Нӕ уагахастӕй хицӕн кӕнӕм иннӕтӕй ӕмӕ кадджын кӕнӕм нӕ Хуыцауы (1 Пет. 2:12). Конгрессы рӕстӕджы Иегъовӕйы Ӕвдисӕнтӕ уӕлдай бӕрӕг дардзысты. Цӕй уӕдӕ фидарӕй аскъуыддзаг кӕнӕм, нӕ алы хъуыддаджы дӕр сыгъдӕг кӕй уыдзыстӕм.
[Рамкӕ 5 фарсыл]
Сыгъдӕг уагахаст
◼ Уазӕгдзӕрӕны уагӕвӕрдтӕ иууылдӕр ӕххӕст кӕн.
◼ Дӕ сывӕллӕттӕм дӕ хъус дзӕбӕх дар.
◼ Иннӕтыл хъуыды кӕн.