Зиу — парахат кӕнӕм ног брошюрӕ
1 Абон дунейы цытӕ цӕуы, уый бирӕты тыхсын кӕны. Фӕлӕ цӕмӕн афтӕ у, дарддӕр цы уыдзӕн ӕмӕ ӕрцӕуинаг тӕрхоны бон цӕмӕй ма фесӕфой, уымӕн цы хъӕуы, уый стӕмтӕ ӕмбарынц (Иез. 9:4). Адӕмы хъӕуы «райхъал» кӕнын, хъӕуы сӕ бамбарын, цы рӕстӕджы цӕрӕм. Ӕмӕ уый тыххӕй 18 октябрӕй, къуырисӕрӕй, 14 ноябрмӕ, хуыцаубонмӕ, уыдзӕн зиу: парахат кӕндзыстӕм ног брошюрӕ «Ма бафынӕй ут!».
2 Ацы брошюрӕ парахат кӕнӕн ис уацамынды хӕдзарӕй-хӕдзармӕ, адӕймагмӕ дыккаг-ӕртыккаг хатт бацӕугӕйӕ, ӕнӕуи нын фадат куы фӕзыны хъусын кӕнынӕн, уӕд, кӕнӕ ӕхсӕнадон бынӕтты. Фӕлӕ йӕ кӕмӕнфӕнды нӕ дӕтдзыстӕм. Дӕтдзыстӕм ӕй, нӕ рӕстӕджы хабӕрттӕ Библи куыд ӕмбарын кӕны, уый базонын кӕй фӕнды, ӕрмӕст ахӕмтӕн. Ӕнӕбары чи байхъуса, уымӕн раттӕн уыдзӕн трактат.
3 Адӕймаджы хъуыдытыл бафтауынӕн зӕгъӕн ис:
◼ «Абон бирӕ адӕмӕн ӕнцой нӕ дӕттынц куырмӕлхынцъ фарстатӕ ӕмӕ зӕрдӕриссӕн хабӕрттӕ. [Цӕвиттонӕн ӕрхӕсс исты зындгонд хабар.] Зыдтай йӕ, ахӕм хабӕрттӕ кӕй цӕудзӕн, уый Библийы бирӕ раздӕр фыст кӕй уыд? [Бауадз ӕй йӕ хъуыды зӕгъын. Стӕй, цӕуыл дзурут, уымӕн бакӕс бӕлвырдгӕнӕн Библийӕ, зӕгъӕм, Матфейы 24:3, 7, 8; Лукайы 21:7, 10, 11 кӕнӕ 2 Тимофеймӕ 3:1—5.] Библи ӕмбарын кӕны, абон рӕстӕг ахӕм цӕмӕн у ӕмӕ адӕммӕ дарддӕр цы ӕнхъӕлмӕ кӕсы. Фӕнды дӕ уый тыххӕй фылдӕр базонын? [Бауадз ӕй йӕ хъуыды зӕгъын. Кӕд бӕрӕг у, ӕмӕ йӕ фылдӕр базонын фӕнды, уӕд ын ратт брошюрӕ.] Ацы брошюрӕ уӕй нӕ кӕнӕм, фӕлӕ дӕ кӕд фӕнды мысайнаг раттын ӕмӕ уымӕй нӕ ӕппӕтдунеон куыстӕн баххуыс кӕнын, уӕд дӕ бузныг уыдзыстӕм».
4 Кӕнӕ зӕгъӕн ис:
◼ «Абон адӕм цы ӕнамонд хабӕрттӕ хъусынц кӕнӕ та сӕхи сӕр цы дудгӕбӕттӕ ’взары, уымӕй афтӕ стыхстысты, ӕмӕ бирӕтӕ фӕрсынц, Хуыцау нӕм афтӕ куыд кӕсы, цӕуылнӕ исты бакӕны, зӕгъгӕ. Библи нын фидарӕй зӕгъы, тагъд Хуыцау адӕмы сӕ фыдӕбонӕй кӕй фервӕзын кӕндзӕн. Кӕс ма, цы хорздзинӕдтӕ нӕм ӕнхъӕлмӕ кӕсы. [Бакӕс Псалом 36:10, 11.] Фӕнды дӕ уый тыххӕй фылдӕр базонын?» Дӕ ныхас балхынцъ кӕн, уӕлдӕр куыд у, афтӕ.
5 Брошюрӕ чи айса, уымӕн, гӕнӕн уӕвгӕйӕ, базон йӕ ном, йӕ адрис ӕмӕ баныхас кӕн йемӕ, ногӕй та йӕм кӕд бацӕудзынӕ. Дыккаг бацыдӕн цы зӕгъӕн ис, ууыл дзырд цӕудзӕн «Нӕ хъусын кӕныны хъуыддаджы» 2004 азы ноябры номыры. Кӕд исчи тынг бацымыдис кодта, уӕд бацархайут фыццаг фембӕлдӕй йемӕ Библи ахуыр кӕнын райдайын «Ма бафынӕй ут!»-ӕй кӕнӕ ӕндӕр брошюрӕйӕ, зӕгъӕм «Цы домы»-йӕ.
6 Ног брошюрӕ райсӕн уыдзӕн, ацы статья ӕмбырды куы ’взарӕм, уӕд, хъусын кӕныны фембӕлды фӕстӕ. Хорз уаид, хъусынгӕнджытӕ ӕмӕ дзы пионертӕ, зиуы фыццаг цалдӕр боны сӕ цас бахъӕуа, уымӕй фылдӕр куы нӕ райсиккой. Цӕй уӕдӕ нын Иегъовӕ ахъазгӕнӕг уӕд ацы ахсджиаг хъуыддаджы, йӕ ном дзы куыд сбӕрзонд уа ӕмӕ, зӕххыл кӕмдӕриддӕр сыгъдӕгзӕрдӕ адӕм ис, уыдонӕн куыд баххуыс кӕнӕм! (Пс. 89:17).