Бинонты фӕтк: Хуыцауы Ныхас ахуыр кӕнын
1 Чырыстон ныййарӕг кӕй дӕ, уымӕ гӕсгӕ дӕ сывӕллӕттӕн ӕппӕты стырдӕр лӕвар уӕд сараздзынӕ, дӕ зӕрдӕйы Иегъовӕмӕ цы уарзондзинад ис, уымӕй сын куы хай кӕнай. Уымӕн сӕйраджыдӕр фӕахъаз уыдзӕн, хӕдзары дӕ бинонтимӕ алы къуыри дӕр Библи куы ахуыр кӕнай (Дык. з. 6:5–7). Дӕ цардӕмбал уырнӕг у ӕви нӕ, йе та дӕ сывӕллӕтты иунӕгӕй хъомыл кӕныс – уӕддӕр сын дӕ бон у ӕххуыс кӕнын, цӕмӕй дӕуыл дӕр ӕмӕ Иегъовӕйыл дӕр ӕнувыддӕр уой. Уый дын бантысдзӕн, иудадзыг иумӕ Хуыцауы Ныхас куы ахуыр кӕнат, уӕд.
2 Бинонтимӕ ахуыр кӕнын райдай. Фыццаг уал спълан кӕн, иумӕ кӕд ахуыр кӕндзыстут, уый. Ахуыры рӕстӕг сбӕлвырд кӕнын дын зын куы уа, уӕд хорз уаид бинонтимӕ аныхас кӕнын (Ӕмб. 15:22). Кӕд дын гыццыл сывӕллӕттӕ ис, уӕд дӕ, чи зоны, бафӕнда къуырийы дӕргъы цалдӕр хатты цыбыр рӕстӕг ахуыр кӕнын. Аскъуыддзаг кӕн, дӕ бинонтӕн хуыздӕр цы уыдзӕн, уый. Ахуырӕн бӕлвырд рӕстӕг равзар ӕмӕ уымӕ гӕсгӕ архай.
3 Цы ис ахуыр кӕнӕн? Иуӕй-иутӕ фӕцӕттӕ кӕнынц, ӕмбырды чиныгахуыры кӕнӕ «Хъахъхъӕнӕн мӕсыг»-ы ахуыры цы ӕрмӕг ӕвзардзысты, уый. Иннӕтӕ та фӕахуыр кӕнынц ӕрыгӕттӕн фыст ӕрмӕг. Гыццыл лӕппу ӕмӕ чызг кӕмӕн ис, ахӕм фыд дзуры: «Сывӕллӕттӕ къуырийы дӕргъы уыцы рӕстӕгмӕ уымӕн фенхъӕлмӕ кӕсынц, ӕмӕ „Мӕ библион радзырдты чиныг“-ӕй цавӕрдӕр радзырдтӕ нӕхӕдӕг ахъазӕм. Уыцы равдыстытӕ тынг арф фӕд ныууадзынц сабиты зӕрдӕты. Куыд хорз ӕй бамбарынц, уый та бирӕ ахсджиагдӕр у, цал абзацы сахуыр кӕнӕм, уымӕй».
4 Алы къуыри дӕр ахуыр кӕнут. Бинонтӕ хъуамӕ иудадзыг Хуыцауы Ныхас ахуыр кӕной ӕмӕ йӕм ӕнӕхъӕн бинонтӕй дӕр цингӕнгӕйӕ ӕнхъӕлмӕ кӕсой. Ӕнӕнхъӕлӕджы исты куы фӕива, уӕд ахуыры бон ӕмӕ рӕстӕг ӕндӕр хатмӕ ис ахӕссӕн. Чи зоны ахӕм уавӕртӕ дӕр уа, ӕмӕ цы ӕрмӕг ахуыр кӕнут, уый дӕр фӕивын бахъӕуа. Фӕлӕ ӕнӕмӕнг цы ивддзинӕдтӕ кӕнын бахъӕуа, уыдон уӕ хъуамӕ уӕ ахуыры фӕткӕй бирӕ рӕстӕгмӕ ма фӕиппӕрд кӕной. Иу чызг дзуры: «Нӕ бинонты ахуыры рӕстӕг ивын куы бахъӕуы, уӕд нӕ фыд алы хатт дӕр гӕххӕттыл ныффыссы, кӕд уыдзӕн, уый, ӕмӕ йӕ зынгӕ бынат ныууадзы. Афтӕмӕй не ’ппӕт дӕр ахуыры рӕстӕг фӕзонӕм». Раппӕлинаг куыннӕ сты, ӕппӕт хъарутӕй дӕр йӕ бинонтимӕ иудадзыг ахуыр кӕныныл чи архайы, уыдон. Дӕ сывӕллӕтты Иегъовӕйы «ахуырады ӕмӕ зондамынды» куы хъомыл кӕнай, уӕд бӕрӕг уыдзӕн, уыдоны дӕр ӕмӕ нӕ уӕларвон Фыды дӕр кӕй уарзыс, уый (Еф. 6:4).