Хъусын кӕнӕм ӕмӕ фидар уӕм
1 «Нӕ размӕ цы фӕндаг ис, ууыл тындзӕм фӕразонӕй»,– фӕдзӕхсы нын Хуыцауы Ныхас (Дзут. 12:1, НТ). Згъорӕг фӕразон, фидар куы нӕ уа, уӕд нӕ рамбулдзӕн. Афтӕ мах дӕр хъӕуы фидар лӕууын, цӕмӕй ӕнусон царды хорзӕх райсӕм (Дзут. 10:36). Хъусын кӕныны хъуыддаг нын куыд ӕххуыс кӕны кӕронмӕ фидар фӕлӕууынӕн? (Матф. 24:13).
2 Фидар кӕны нӕ уырнындзинад. Зӕрдӕвӕрд рӕстаг ног дунейы тыххӕй кӕй хъусын кӕнӕм, уый фӕрцы нӕ ныфс у фидар (1 Фес. 5:8). Уацамынды ӕдзухдӕр куы фӕцӕуӕм, уӕд нын вӕййы, Библийӕ цы базыдтам, ууыл иннӕтимӕ ныхас кӕныны фадат. Мах ӕргом фӕдзурӕм нӕ уырнындзинадыл ӕмӕ афтӕмӕй нӕхӕдӕг фидар кӕнӕм.
3 Библийы цы фыст ис, уый цӕмӕй иннӕтӕн амонынмӕ арӕхсӕм, уый тыххӕй йӕ хъуамӕ нӕхӕдӕг хорз ӕмбарӕм. Уымӕ гӕсгӕ нӕ фӕхъӕуы ӕрмӕг агурын ӕмӕ, цы бакӕсӕм, ууыл лӕмбынӕг хъуыды кӕнын. Библи цас зӕрдиагдӕрӕй ахуыр кӕнӕм, уыйас ӕй хуыздӕр ӕмбардзыстӕм, нӕ уырнындзинад кӕндзӕн фидардӕр, нӕ хъаруйыл та хъару ӕфтдзӕн (Ӕмб. 2:3–5). Уӕдӕ иннӕтӕн ӕххуысгӕнгӕйӕ мах фидар кӕнӕм нӕхи (1 Тим. 4:15, 16).
4 Цӕмӕй Сайтан ӕмӕ хӕйрӕджыты ныхмӕ фидар фӕлӕууӕм, уый тыххӕй хъуамӕ ифтонг уӕм «Хуыцауы ӕппӕт хӕцӕнгӕрзтӕй». Ӕмӕ уыцы хӕцӕнгӕрзтӕй иу уый у, уацамынды нӕ удӕй арт кӕй цӕгъдӕм (Еф. 6:10–13, 15). Хъусын кӕныны хъуыддаджы лӕуд куы уӕм, уӕд нӕ хъуыдытӕ ӕдзухдӕр уыдзысты, хорз цы у, ууыл, ӕмӕ Сайтаны дунейы сӕфт зондыл нӕ ацӕудзыстӕм (Кол. 3:2). Иегъовӕйы хъуыддӕгтӕ иннӕтӕн кӕй амонӕм, уый фӕрцы нӕ рох кӕнӕм, нӕхицӕн дӕр не ’гъдау, нӕ цард алкӕддӕр фӕзминаг кӕй хъуамӕ уой (1 Пет. 2:12).
5 Хуыцау нын ӕххуыс кӕны. Зӕгъын ма хъӕуы уый дӕр, ӕмӕ нӕ хъусын кӕныны хъуыддаг ахуыр кӕны нӕ ныфс Иегъовӕйыл дарын (2 Кор. 4:1, 7). Уый стыр хорзӕх куыннӕ у! Нӕ ныфс ӕгасӕй дӕр Хуыцауыл кӕй дарӕм, уый нын канд уацамынды не ’ххуыс кӕны, фӕлӕ ма царды цыфӕнды зын уавӕрты дӕр (Фил. 4:11–13). О, фидар уӕд уыдзыстӕм, ӕмӕ нӕ зӕрдӕ алы хъуыддаджы дӕр Иегъовӕйыл куы дарӕм (Пс. 54:23). Куыд уынӕм, афтӕмӕй хъусын кӕныны хъуыддаг бирӕ цӕмӕйдӕрты у ахъаз, цӕмӕй фӕразон ӕмӕ фидар уӕм.