Адӕмыл сыгъдӕгзӕрдӕйӕ тыхс, ӕрхъуыдыджын у
1 Иегъовӕ Хуыцау ӕмӕ Йесо Чырысти куыд тыхсынц ӕмӕ куыд аудынц адӕмыл, афтӕ ничи (2 Пар. 16:9; Маркы 6:34). Уацамынды кӕуыл сӕмбӕлӕм, уыдоны цы цымыдис кӕны, цӕуыл мӕт кӕнынц, уый куы базонӕм, уӕд нӕ бон уыдзӕн нӕ ныхас уымӕ гӕсгӕ саразын.
2 Алцыдӕр фиппай. Йесо уыд къӕрцхъус, алцыдӕр фиппайдта (Маркы 12:41–43; Лук. 19:1–6). Мах дӕр хъусын кӕнгӕйӕ, гӕнӕн ис, ӕмӕ фенӕм, хӕдзары дуарыл дины дзауматӕ кӕнӕ нывтӕ кӕй ис, уый. Кӕнӕ та машинӕйыл кӕй ис фыстытӕ,– йӕ хицау цавӕр хъуыдыйыл хӕст у, ууыл дзурӕг чи вӕййы, ахӕмтӕ. Йе та, чи зоны, кӕрты сывӕллоны хъазӕнтӕ ис. Уыдӕттӕ куы фиппайӕм, уӕд ӕнцонтӕй ардзыстӕм фадӕттӕ, цӕмӕй адӕмӕн хорз хабары тыххӕй, куыд хуыздӕр ӕм байхъусой, афтӕ радзурӕм.
3 Адӕймагӕн йӕ цӕсгомӕй, йӕхи куыд дары, уымӕй дӕр бамбарӕн вӕййы йӕ зӕрдӕйы уаг (Ӕмб. 15:13). Чи зоны, йӕ уарзон адӕймаг фӕзиан йе та йыл ӕндӕр исты масты хабар ӕрцыд, ӕмӕ зӕрдӕсаст у. Йӕ зӕрдӕ йын чи бацагайа, ахӕм цалдӕр стихы йын куы бакӕсӕм, уӕд ын, гӕнӕн ис, ӕмӕ фенцондӕр уа (Ӕмб. 16:24). Мыййаг, хӕдзарыхицау тагъд кӕны йе та йӕ къухы сывӕллон кӕуы, уӕд та? Хуыздӕр уаид йемӕ ӕндӕр хатт фембӕлыныл баныхас кӕнын. Ӕрхъуыдыджын куы уӕм ӕмӕ «иннӕйы мӕт» куы кӕнӕм, уӕд, чи зоны, адӕймаджы бафӕнда махмӕ байхъусын, ногӕй йӕм куы бацӕуӕм, уӕд (1 Пет. 3:8, НТ).
4 Дӕ ныхас уавӕрмӕ гӕсгӕ араз. Апостол Павел Афинӕты федта иу нывондхӕссӕн, «ӕнӕзонгӕ Хуыцауӕн». Ӕмӕ уӕд, хорз хабары тыххӕй дзургӕйӕ, йӕ ныхас уымӕ гӕсгӕ сарӕзта. Павел загъта: «Нӕ Йӕ зонгӕйӕ Кӕмӕ кувут, ӕз уын Уый тыххӕй дзурын». Павелы ӕрхъуыдыдзинады фӕрцы йӕ ныхасмӕ хъусджытӕй иуӕй-иутӕ хорз хабар сӕ зӕрдӕмӕ айстой ӕмӕ чырыстӕттӕ систы (Ап. к. 17:23, 34, НТ).
5 Уӕдӕ мах дӕр ӕрхъуыдыджын куы уӕм, алцы куы фиппайӕм, уӕд-иу бамбардзыстӕм, адӕймаджы цы цымыдис кӕны, ӕмӕ-иу нӕ ныхас йӕ уавӕрмӕ гӕсгӕ сараздзыстӕм. Фарстытӕ-иу ӕм ратт, цӕмӕй йӕ хъуыдытӕ зӕгъа. Ахъуыды-иу кӕн, Библийӕ йын цавӕр стихтӕ хуыздӕр уыдзӕн бакӕсын, цӕмӕй йӕ фылдӕр базонын бафӕнда (Ӕмб. 20:5). Ӕрхъуыдыджын, къӕрцхъус куы уӕм ӕмӕ адӕмыл сыгъдӕгзӕрдӕйӕ куы тыхсӕм, уӕд нын хуыздӕр ӕнтысдзӕн хорз хабар хъусын кӕнын.