Адӕмыл сыгъдӕгзӕрдӕйӕ тыхс – дӕ ныхас уавӕртӕм гӕсгӕ араз
1 Апостол Павел хорз хабар хъусынгӕнгӕйӕ алкӕддӕр хъуыды кодта, йӕ ныхасмӕхъусджытӕ цы ӕгъдӕуттӕ ӕмӕ зондыл хӕст сты, ууыл, ӕмӕ йӕ ныхас уымӕ гӕсгӕ арӕзта. Уымӕй махӕн у фӕзминаг (1 Кор. 9:19–23). Рагацау-иу куы ахъуыды кӕнӕм, уӕд нӕ бон уыдзӕн «Нӕ хъусын кӕныны хъуыддаджы» мыхуыр цӕвиттонтӕ фӕивын, цӕмӕй, кӕм хъусын кӕнӕм, уым цӕрӕг адӕмы тынгдӕр бацымыдис кӕной. Адӕймаджы хӕдзары дуарыл, цы уарзы, цӕуыл ӕууӕнды, ууыл дзурӕг исты куы фенӕм, уӕд нӕ бон у нӕ ныхас уыимӕ сбӕттын. Фӕлӕ ма ӕндӕр цӕйдӕр тыххӕй дӕр нӕ бон у нӕ ныхас ивын.
2 Адӕймаг цы зӕгъа, уымӕ гӕсгӕ-иу дӕ ныхас фӕив. Хъусынгӕнгӕйӕ арӕх нӕ ныхас райдайӕм фарстӕй, цӕмӕй хӕдзары хицау йӕ хъуыды зӕгъа. Фӕлӕ куыд бакӕныс, адӕймаг йӕ хъуыды куы фӕзӕгъы, уӕд? Мыййаг, дӕ сӕр ӕфсоны тылд бакӕныс ӕмӕ цы бацӕттӕ кодтай, уый дарддӕр фӕдзурыс? Ӕви дӕ ныхӕстӕй бӕрӕг вӕййы, адӕймаг цы загъта, уый дын уӕлдай кӕй нӕу? Адӕмыл сыгъдӕгзӕрдӕйӕ куы тыхсай – сӕ ныхасмӕ сын лӕмбынӕг куы хъусай, уӕд-иу сӕм дӕ бон уыдзӕн уӕзданӕй ӕндӕр фарстытӕ дӕр раттын, цӕмӕй-иу, ӕцӕг цы хъуыды кӕнынц, уый базонай (Ӕмб. 20:5). Дӕ ныхасӕмбал тынгдӕр цӕуыл мӕт кӕны, уый куы зонай, уӕд ын дӕ бон уыдзӕн йе ’ргом аздахын, Библи уый фӕдыл цы дзуры, уымӕ.
3 Уый тыххӕй хъуамӕ цӕттӕ уӕм, мах цӕуыл фӕндыд дзурын, ууыл нӕ, фӕлӕ ӕндӕр цӕуылдӕр аныхас кӕнынмӕ дӕр. Зӕгъӕм, нӕ ныхас райдыдтам, ног хабӕртты цӕуыл дзырдтой, уымӕй, фӕлӕ адӕймаг та ской кодта, бынӕттон хабӕрттӕй йе та йӕ йӕхи царды хъуыддӕгтӕй тынгдӕр цы тыхсын кӕны, уый тыххӕй. Ахӕм уавӕры, кӕд ыл сыгъдӕгзӕрдӕйӕ тыхсӕм, уӕд дарддӕр дзурдзыстӕм, уымӕн ахсджиагдӕр цы у, ууыл (Фил. 2:4).
4 Уавӕр куыд дома, афтӕ дзур. Адӕймаг нӕм фарст куы ратта, уӕд чи зоны, ӕмӕ хуыздӕр уаид, ӕндӕр хатт ыл куы аныхас кӕниккам. Афтӕмӕй нӕ бон уыдзӕн уыцы фарсты фӕдыл фылдӕр ӕрмӕг бацагурын. Стӕй ма йын раттӕн уыдзӕн, хабар бӕстондӕр ӕвзӕрст кӕм цӕуы, ахӕм литературӕ дӕр. Афтӕ куы кӕнӕм, уӕд бӕрӕг уыдзӕн, адӕмыл сыгъдӕгзӕрдӕйӕ кӕй тыхсӕм ӕмӕ сын Иегъовӕйы базонынӕн ӕнувыдӕй кӕй ӕххуыс кӕнӕм (2 Кор. 2:17).