Царды нын чи ӕххуыс кӕны, уыцы Скъола
1 Хуыцауы Ныхас хъусынгӕнджыты скъолайы 2006 азӕн цы программӕ ис, уый куы цӕуӕм, уӕд архайдзыстӕм, цӕмӕй, Фыстадӕй цӕуыл ахуыр кӕнӕм, уыдӕттӕ ӕххӕст кӕнӕм нӕ лӕггады дӕр ӕмӕ нӕхи царды дӕр. Уый у нӕ сӕйрагдӕр нысан (Иоан. 13:17; Фил. 4:9).
2 Библийӕ ахсджиаг хъуыдытӕ. Ацы азы программӕмӕ гӕсгӕ, Библийӕ ахсджиаг хъуыдытӕ ӕвзаргӕйӕ хъусынгӕнджытӕн уыдзӕн иу минут фылдӕр рӕстӕг сӕ хъуыдытӕ зӕгъынӕн. Уый ууыл дзурӕг у, ӕмӕ ахсджиаг хъуыдытӕ радзурыны хӕслӕвӕрд кӕмӕн уа, уыцы ӕфсымӕр йӕ ныхас хъуамӕ фӕуа ӕхсӕз минутмӕ нӕ, фӕлӕ фондз минутмӕ. Хъусынгӕнджытӕй йӕ хъуыды чи дзура, уыдон дӕр хъуамӕ рӕстӕгмӕ сӕ хъус дарой. Дзӕбӕх куы бацӕттӕ кӕнай, уӕд 30 секундмӕ кӕнӕ къаддӕрмӕ дӕр ис зӕгъӕн, иннӕтӕн чи фӕахъаз уыдзӕн, ахӕм хъуыдытӕ. Хъусынгӕнджытӕн сӕ хъуыдытӕ зӕгъынӕн цы фондз минуты ис, уыцы рӕстӕгмӕ иу-дӕс адӕймаджы бон у дзуапп раттын.
3 Зондамонӕн раныхӕстӕ. Библийӕ ахсджиаг хъуыдытӕ ӕмӕ зондамонӕн раныхӕстӕ хъуамӕ ӕвдисой, уыцы ӕрмӕг нын уацамынды ӕмӕ нӕ царды иннӕ фӕзилӕнты куыд фӕахъаз уыдзӕн, уый. Ныхасы рацӕуӕгӕн йӕ нысан ӕрмӕст уый нӕу, ӕмӕ хъусджыты архайынмӕ сразӕнгард кӕна. Хъуамӕ сын бӕлвырд бацамона, цы бакӕнын хъӕуы, равдиса сын, уый куыд саразӕн ис, ӕмӕ сын бамбарын кӕна, афтӕ куы кӕнӕм, уӕд нын уый куыд фӕахъаз уыдзӕн. Цӕвиттонӕн, йӕ бон у зӕгъын афтӕ: «Ацы стих нын мӕнӕ цы зонд амоны». Кӕнӕ та: «Мӕнӕ куыд у нӕ бон ацы стихтӕй уацамынды спайда кӕнын». Хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕ бынӕттон уавӕртӕ фӕзонынц, ӕмӕ сӕ нысан хъуамӕ уа, ӕрмӕг нӕ цардмӕ куыд хауы, уый ӕмбарын кӕнын,– цас бӕлвырддӕр, уыйас хуыздӕр.
4 Стыр ахъаз уыдзӕн, Библийы цы цӕвиттонтӕ ӕмӕ цаутӕ ис, уыдон нӕ цардимӕ сбӕттын. Фыстадӕй цавӕрдӕр хабармӕ бацамонгӕйӕ, ӕфсымӕрӕн йӕ бон у зӕгъын: «Ахӕм уавӕры, гӕнӕн ис, ӕмӕ ды дӕр уай». Фӕлӕ хъуамӕ йӕ хъус дара, цӕмӕй дарддӕр цы ӕмбарын кӕндзӕн, уый раст уа, уыцы стихты размӕ ӕмӕ сӕ фӕстӕ цы фыст ис, уымӕ гӕсгӕ, Фыстадмӕ гӕсгӕ ӕмткӕй райсгӕйӕ ӕмӕ, «ӕууӕнкджын ӕмӕ зондджын цагъар» мыхуыры цы рауагъта, уымӕ гӕсгӕ (Матф. 24:45).
5 Зонд у, цы базоныс, уый хорз куы ӕмбарай ӕмӕ уымӕ гӕсгӕ куы архайай. Библи зӕгъы: «Сӕйрагдӕр у зонд» (Ӕмб. 4:7). Хуыцауы Ныхас хъусынгӕнджыты скъолайы мах ахуыр кӕнӕм, царды чи ахады, уыцы зондыл, ӕмӕ йӕ иннӕтӕн куыд амонӕм, уыцы хъуыддаджы дӕр хъуамӕ арӕхстджындӕр кӕнӕм.