Библи кӕимӕ ахуыр кӕныс, уыдонӕн ӕххуыс кӕн, цӕмӕй хъусынгӕнджытӕ суой
1 Матфейы 28:19, 20 куыд кӕсӕм, афтӕмӕй Йесо йӕ фӕдылдзӕуджытӕн бахӕс кодта стыр хъуыддаг – ахуыргӕнинӕгтӕ цӕттӕ кӕнын. Ног ахуыргӕнинӕгтӕ та хъуамӕ сӕхӕдӕг ахуыр кодтаиккой иннӕты. Хъуамӕ ӕвӕрд ӕрцыдаид бындур, цӕмӕй ацы дунейӕн йӕ кӕроны размӕ Хуыцауы Паддзахады тыххӕй хорз хабар хъуыстгонд ӕрцӕуа. Ӕмӕ мах ныртӕккӕ цӕрӕм уыцы ахсджиаг рӕстӕджы (Матф. 24:14).
2 Нӕ бон у Библи нӕ сывӕллӕттимӕ ахуыр кӕнын, стӕй, кӕй фӕнды, уыдонимӕ. Мах зӕрдиагӕй фӕнды, цӕмӕй уыдон дӕр суой Чырыстийы ахуыргӕнинӕгтӕ ӕмӕ ахуыр кӕной иннӕты (Лук. 6:40).
3 Ӕххуыс сын кӕн, цӕмӕй хъусын кӕной. Кӕимӕ ахуыр кӕныс, уыдоны разӕнгард кӕн, цӕмӕй, цы базонынц, уый тыххӕй иннӕтӕн дзурой. Радзур-иу сын уацамындӕй исты цымыдисаг хабӕрттӕ. Дӕ сывӕллӕтты сӕ гыццылӕй фӕстӕмӕ ахуыр кӕн, цӕмӕй, сӕ бон куыд у, афтӕ хъусын кӕной (Пс. 148:12, 13). Дӕ ныхӕстӕй ӕмӕ дӕ хъуыддӕгтӕй бӕрӕг уӕд, хъусын кӕнын дын ахсджиаг кӕй у (1 Тим. 1:12).
4 Йегъовӕ лӕггад кӕныны бар дӕтты, йӕ закъӕттӕм ын чи хъусы ӕмӕ сӕ чи ’ххӕст кӕны ӕрмӕстдӕр уыдонӕн. Кӕй зӕгъын ӕй хъӕуы, ног хъусынгӕнджытӕ, фӕлтӕрд ӕмӕ донаргъуыд чи у, уыдоны бӕрц нӕ зонынц. Фӕлӕ уыдон хъуамӕ ӕууӕндой, цы базыдтой, ууыл ӕмӕ сӕ бон уа бамбарын кӕнын Библийы сӕйраг ахуырӕдтӕ (Кӕс чиныг «Организованы», 79–82 фф.). Ног хъусынгӕнджытӕн хъуамӕ иумӕйагӕй ӕппындӕр мацы уа «Стыр Вавилонимӕ» ӕмӕ политикӕимӕ. Уымӕй уӕлдай, хъуамӕ ӕдзух цӕуой алы ӕмбырдмӕ дӕр (Рарг. 18:2, 4; Иоан. 17:16; Дзут. 10:24, 25).
5 Афтӕ дӕм куы кӕса, ӕмӕ дӕ ахуыргӕнинаг цӕттӕ у ӕнӕаргъуыд хъусынгӕнӕгӕй лӕггад кӕнынмӕ, уӕд зӕгъ сӕрдариуӕггӕнӕг цӕстдарӕгӕн. Уый зӕгъдзӕн дыууӕ хистӕр нӕлгоймагӕн, цӕмӕй демӕ ӕмӕ Библи кӕимӕ ахуыр кӕныс, уыимӕ фембӕлой ӕмӕ сбӕрӕг кӕной, йӕ бон у ӕмбырдимӕ иумӕ хъусын кӕнын ӕви нӕ. Дӕ ахуыргӕнинагӕн-иу дарддӕр дӕр ӕххуыс кӕн ӕмӕ йемӕ уацамынды цу.