Хорз хабар хъусын кӕнӕм

ЙЕГЪОВӔ батыхстис, цӕмӕй нын уа, алы хъуыддаджы дӕр кӕй бафӕзмӕм, ахӕм ӕххӕст адӕймаджы цӕвиттон – йӕ Фырт Йесо Чырысти (1 Пет. 2:21). Адӕймаг Чырыстийы фӕдылдзӕуӕг куы свӕййы, уӕд хорз хабар фӕхъусын кӕны, Хуыцауы лӕггадгӕнджытӕ се ’ппӕт дӕр куыд кӕнынц, афтӕ. Йесо загъта, адӕймаг йӕ фӕдылдзӕуӕг куы суа, уӕд ын уый удӕнцой кӕй хӕсдзӕн: «Фыдӕбон чи кӕны ӕмӕ уӕззау уаргъ чи хӕссы,– уе ’ппӕт дӕр мӕм ӕрцӕут, ӕмӕ уын ӕз удӕнцой ратдзынӕн. Ме ’фсондз уӕхиуыл сӕвӕрут ӕмӕ мӕнӕй сахуыр ут, уымӕн ӕмӕ ӕз дӕн фӕлмӕн ӕмӕ сӕрныллӕг, ӕмӕ удӕнцой ссардзыстут» (Матф. 11:28, 29). Ӕмӕ ӕцӕгдӕр афтӕ кӕй у, уый йӕхиуыл бавзары, Йесомӕ чи ’рцӕуы, уыдонӕй алчидӕр.

² Хуыцауы Сӕйраг Лӕггадгӕнӕг Йесо йӕ рӕстӕджы кӕйдӕрты ӕрхуыдта, цӕмӕй йӕ фӕдылдзӕуджытӕ суыдаиккой (Матф. 9:9; Иоан. 1:43). Хъусын кӕнын куыд хъӕуы, уый сын бацамыдта ӕмӕ сӕ арвыста, йӕхӕдӕг цы куыст кодта, уыцы куыст кӕнынмӕ (Матф. 10:1–11:1; 20:28; Лук. 4:43). Фӕстӕдӕр та Хуыцауы Паддзахады тыххӕй хъусын кӕнынмӕ арвыста ноджы 70 ахуыргӕнинаджы (Лук. 10:1, 8–11). Ӕмӕ сӕ куы ’рвыста, уӕд сын загъта: «Сымахмӕ чи хъусы, уый хъусы мӕнмӕ дӕр. Сымах чи ницӕмӕ дары, уый ницӕмӕ дары мӕн дӕр. Ӕмӕ мӕн чи ницӕмӕ дары, уый та ницӕмӕ дары, мӕн чи рарвыста, уый дӕр» (Лук. 10:16). Ацы ныхӕстӕй Йесо йӕ ахуыргӕнинӕгтӕн бамбарын кодта, цы хъуыддаг сын бахӕс кодта, уымӕ уӕлӕнгай цӕстӕй кӕсӕн кӕй нӕй. Уыдон уыдысты Йесойы ӕмӕ Иунӕг Стыр Хуыцауы минӕвӕрттӕ! Ӕмӕ уый зӕгъӕн ис, абон Йесойы фӕдыл цӕуын кӕй фӕнды, уыдонӕй алкӕмӕй дӕр (Лук. 18:22; 2 Кор. 2:17). Хуыцау сын бахӕс кодта йӕ Паддзахады тыххӕй хорз хабар хъусын кӕнын ӕмӕ ахуыргӕнинӕгтӕ цӕттӕ кӕнын (Матф. 24:14; 28:19, 20).

³ Чырыстийы фӕдыл цӕуын кӕй райдыдтам, уый фӕрцы «базыдтам» Йегъовӕ Хуыцауы ӕмӕ Йесо Чырыстийы (Иоан. 17:3). Йегъовӕ нӕ йӕ фӕндӕгтыл цӕуын сахуыр кодта. Йӕ фӕрцы нӕ бон сси нӕ зонд сног кӕнын, нӕ удыхъӕд аивын ӕмӕ нӕ цард Йегъовӕйы рӕстаг уагӕвӕрдтӕм гӕсгӕ саразын (Ром. 12:1, 2; Еф. 4:22–24; Кол. 3:9, 10). Уыцы хорздзинӕдты тыххӕй Йегъовӕйӕ афтӕ бузныг уыдыстӕм, ӕмӕ йын нӕ цард снывонд кодтам, донаргъуыд райстам ӕмӕ систӕм йӕ лӕггадгӕнджытӕ.

⁴ Алкӕддӕр дӕ зӕрдыл дар, Хуыцауӕн лӕггадгӕнгӕйӕ нӕ къухтӕ дӕр ӕмӕ нӕ зӕрдӕтӕ дӕр сыгъдӕг кӕй хъуамӕ уой (Пс. 24:3, 4; Ис. 52:11; 2 Кор. 6:14–7:1). Йесо Чырыстийыл кӕй ӕууӕндӕм, уый фӕрцы нын Хуыцауы раз ис сыгъдӕг цӕсгом (Дзут. 10:19–23, 35, 36; Рарг. 7:9, 10, 14). Апостол Павел чырыстӕттӕн бафӕдзӕхста, зӕгъгӕ, алцыдӕр аразут Хуыцауы кадӕн, цӕмӕй къуылымпыйы хос макӕмӕн уат. Апостол Петр дӕр фыста, нӕ уаг ӕмӕ не ’гъдауӕй фӕзминаг кӕй хъуамӕ уӕм, цӕмӕй не ’нӕуырнӕг хиуӕттӕ дӕр рӕстдзинадӕн коммӕгӕс суой (1 Кор. 10:31, 33; 1 Пет. 3:1). Куыд ис искӕмӕн баххуыс кӕнӕн, цӕмӕй уый дӕр немӕ хорз хабар хъусын кӕнын райдайа?

НОГ ХЪУСЫНГӔНДЖЫТӔ

⁵ Адӕймагимӕ Библи ахуыр кӕнын куы райдайыс, уӕдӕй фӕстӕмӕ-иу ӕй разӕнгард кӕн, цӕмӕй, цы базоны, уый иннӕтӕн дӕр дзура, зӕгъӕм, йӕ хиуӕттӕн, йе ’мбӕлттӕн, кӕимӕ кусы, уыдонӕн ӕмӕ, йӕ хъуыддӕгтӕ кӕнгӕйӕ кӕуыл фембӕлы, уыдонӕн дӕр. Цӕмӕй адӕймаг Чырыстийы фӕдылдзӕуӕг ӕмӕ хорз хабар хъусынгӕнӕг суа, уый тыххӕй йын уыцы хъуыддаджы ӕнӕмӕнг хъӕуы баххуыс кӕнын (Матф. 9:9; Лук. 6:40). Афтӕмӕй гыццылгай сахуыр уыдзӕн, цы базыдта, уый тыххӕй йӕ зонгӕтӕн ӕмӕ йӕ хиуӕттӕн дзурын, ӕмӕ йӕ уырнындзинад куыд фидардӕр кӕна, афтӕ йӕ ӕнӕмӕнг бафӕнддзӕн, цӕмӕй ӕмбырдимӕ дӕр хъусын кӕна.

ХЪУСЫНГӔНӔГ ЦАВӔР ХЪУАМӔ УА

⁶ Цалынмӕ адӕймаджы фыццаг хатт демӕ хӕдзарӕй-хӕдзармӕ хъусын кӕнынмӕ акӕнай, уӕдмӕ уал хъуамӕ сбӕлвырд кӕнай, цӕттӕ у ӕви нӕ. Адӕймаг немӕ уацамынды куы ацӕуы, уӕд уый афтӕ вӕййы, цыма се ’ппӕтӕн дӕр ӕргом фӕзӕгъы, ӕз дӕр Йегъовӕйы Ӕвдисӕн дӕн, зӕгъгӕ. Уымӕ гӕсгӕ уал фыццаг хъуамӕ йӕ цард Йегъовӕйы рӕстаг уагӕвӕрдтӕм гӕсгӕ сараза ӕмӕ бӕрӕг уа, йӕ бон кӕй у ӕнӕаргъуыд хъусынгӕнӕгӕй лӕггад кӕнын.

⁷ Библи кӕимӕ ахуыр кӕныс ӕмӕ Библийы уагӕвӕрдтыл кӕимӕ фӕныхас кӕныс, уымӕн, ӕвӕццӕгӕн, йӕ уавӕртӕ хорз зоныс. Чи зоны, бафиппайдтай, цы базоны, уымӕ гӕсгӕ кӕй цӕры. Фӕлӕ уӕддӕр хистӕр нӕлгоймӕгты бафӕнддзӕн, йӕ цардмӕ чи хауы, ахӕм фарстатыл аныхас кӕнын, дыууӕйӕ дӕр уым куыд уат, афтӕ.

⁸ Хистӕр нӕлгоймӕгты советы координатор спълан кӕндзӕн, цӕмӕй дыууӕ хистӕр нӕлгоймаджы (сӕ иу хъуамӕ уа ӕмбырды комитетӕй) демӕ ӕмӕ, Библи кӕимӕ ахуыр кӕныс, уыимӕ аныхас кӕной. Хистӕр нӕлгоймӕгтӕ фаг кӕм нӕй, уыцы ӕмбырдты ахӕм фембӕлд сӕ бон ауадзын у хистӕр нӕлгоймаг ӕмӕ арӕхстджын кӕстӕриуӕггӕнӕг ӕфсымӕрӕн дӕр. Ӕфсымӕртӕ уыцы хъуыддаг хъуамӕ бакӕной ӕвӕстиатӕй. Адӕймаджы фӕндоны тыххӕй ӕмбырды фембӕлды рӕстӕг куы базоной, уӕд бацархайдзысты, цӕмӕй демӕ ӕмӕ, Библи кӕимӕ ахуыр кӕныс, уыцы адӕймагимӕ фембӕлды фӕстӕ аныхас кӕной. Йемӕ хъуамӕ афтӕ ныхас кӕной, цӕмӕй ма фӕтыхса. Цалынмӕ хъусынгӕнӕг не суа, уӕдмӕ сбӕлвырд кӕнын хъӕуы цалдӕр хъуыддаджы:

1. 1) Библи Хуыцауы комытӕфӕй фыст кӕй ӕрцыд, ууыл ӕууӕнды (2 Тим. 3:16).

2. 2) Библийы сӕйраг ахуырӕдтӕ зоны ӕмӕ сыл ӕууӕндгӕ дӕр кӕны, ӕмӕ йӕ исчи истӕмӕй куы бафӕрса, уӕд дзуапп ратдзӕн Библимӕ гӕсгӕ, мӕнг дины ахуырӕдтӕм гӕсгӕ кӕнӕ йӕхимӕ раст куыд кӕсы, афтӕ нӕ, фӕлӕ (Матф. 7:21–23; 2 Тим. 2:15).

3. 3) Библийы фӕдзӕхстмӕ гӕсгӕ, гӕнӕн ӕмӕ амалӕй, ӕмбырдтӕм цӕуы ӕмӕ афтӕмӕй йӕхи Йегъовӕйы адӕмыл бӕтты (Пс. 122:1; Дзут. 10:24, 25).

4. 4) Библийы хӕтындзинады тыххӕй, уыимӕ цардӕмбалыл гадзрахатӕй рацӕуын, цалдӕр усимӕ цӕрын ӕмӕ гомосексуализмы тыххӕй, цы фыст ис, уый зоны ӕмӕ цӕргӕ дӕр кӕны уыцы ахуырӕдтӕм гӕсгӕ. Кӕд нӕлгоймаг ӕмӕ сылгоймаг лӕг ӕмӕ усы цард кӕнынц, уӕд сӕ къухтӕ закъонмӕ гӕсгӕ фыст сты (Матф. 19:9; 1 Кор. 6:9, 10; 1 Тим. 3:2, 12; Дзут. 13:4).

5. 5) Библийы амындмӕ гӕсгӕ, расыггӕнаг нӕу, стӕй йӕхи хизы, туг кӕуыл сахуыр вӕййы ӕмӕ зонд чи ныкъкъуырма кӕны, ахӕм препараттӕй (дзырд нӕ цӕуы, дохтыр кӕй рафысса, ахӕмтыл) (2 Кор. 7:1; Еф. 5:18; 1 Пет. 4:3, 4).

6. 6) Ӕвзӕр ӕмбӕлттӕй хи хизын цӕмӕн хъӕуы, уый ӕмбары (1 Кор. 15:33).

7. 7) Кӕд раздӕр искӕцы диныл хӕст уыди, уӕд ын йемӕ иумӕйагӕй ницыуал ис. Уыцы дины ӕмбырдтӕм кӕнӕ аргъуанмӕ нал цӕуы ӕмӕ йӕ хъуыддӕгты дӕр нӕ архайы, стӕй йын ӕхцайӕ дӕр не ’ххуыс кӕны (2 Кор. 6:14–18; Рарг. 18:4).

8. 8) Ацы дунейы политикон хъуыддӕгты нӕ архайы (Иоан. 6:15; 15:19; Иак. 1:27).

9. 9) Нӕ архайы хӕстыты ӕмӕ уыдӕттимӕ баст хъуыддӕгты (Ис. 2:4).

10. 10) Ӕцӕгдӕр ӕй фӕнды, Йегъовӕйы Ӕвдисӕн суа, уый (Пс. 110:3).

⁹ Кӕд хистӕр нӕлгоймӕгтӕ дызӕрдыг кӕной, адӕймаг ацы хъуыддӕгтӕй искӕцымӕ раст цӕстӕй кӕй кӕсы, ууыл, уӕд хъуамӕ йемӕ бӕстондӕр аныхас кӕной. Сӕ бон у, цы стихтӕ дзы ис, уыдонӕй спайда кӕнын. Адӕймаг ӕй хъуамӕ ӕмбара, Йегъовӕйы Ӕвдисӕнтимӕ уацамынды чи фӕцӕуы, уый йӕ цард дӕр кӕй хъуамӕ араза, Библийы цы фыст ис, уымӕ гӕсгӕ. Уӕдӕ фарстатӕн цавӕр дзуапп ратдзӕн, уымӕ гӕсгӕ бӕрӕг уыдзӕн, Хуыцау ӕм цӕмӕ ӕнхъӕлмӕ кӕсы, уый ӕмбары ӕви нӕ. Афтӕмӕй хистӕр нӕлгоймӕгтӕ сбӕлвырд кӕндзысты, ӕмбырдимӕ хъусын кӕныны бар ын ис раттӕн ӕви нӕ.

¹⁰ Хистӕр нӕлгоймӕгтӕ цы аскъуыддзаг кодтой, уый зӕгъыныл фӕстиат нӕ кӕндзысты. Фылдӕр хатт адӕймагӕн уый зӕгъӕн вӕййы, ныхас куы фӕвӕййынц, уый фӕстӕ. Кӕд ын бар дӕттынц, уӕд ын хистӕр нӕлгоймӕгтӕ зӕрдиагӕй раарфӕ кӕндзысты, ныр хъусынгӕнӕг дӕ, зӕгъгӕ (Ром. 15:7). Ӕмӕ йӕ баразӕнгард кӕндзысты, цӕмӕй ӕвӕстиатӕй райдайа уацамынды цӕуын ӕмӕ мӕйы кӕрон йӕ уацамынды хыгъд ратта. Стӕй йын зӕгъдзысты, Библи чи ахуыр кӕны, уый ӕнӕаргъуыд хъусынгӕнӕг куы свӕййы ӕмӕ фыццаг хатт уацамынды хыгъд куы ратты, уӕд йӕ номыл кӕй скӕнынц «Хъусынгӕнӕджы карточкӕ» ӕмӕ йӕ ӕмбырды документтимӕ кӕй сӕвӕрынц. Хистӕр нӕлгоймӕгтӕ хъусынгӕнӕджы тыххӕй информаци уый тыххӕй ныффыссынц, цӕмӕй нӕ организацийӕн йӕ бон уа, Йегъовӕйы Ӕвдисӕнтӕ ӕгас зӕххыл дӕр цы куыст кӕнынц, уымӕн разамынд дӕттын, стӕй цӕмӕй хъусынгӕнӕгӕн йӕ бон уа уыцы куысты архайын ӕмӕ йын хистӕр нӕлгоймӕгтӕ йӕ ныфсыл ныфс ӕфтауой ӕмӕ йын разамынд дӕттой. Стӕй ма хистӕр нӕлгоймӕгтӕн сӕ бон у ног хъусынгӕнджытӕн сӕ зӕрдыл ӕрлӕууын кӕнын, хъусынгӕнджыты тыххӕй сӕм цы информаци ис, уымӕй кӕй пайда кӕндзысты, сайты jw.org статьяйы «Глобальная политика защиты данных Свидетелей Иеговы» цы фыст ис, уымӕ гӕсгӕ.

¹¹ Ног хъусынгӕнӕгимӕ хуыздӕр куы базонгӕ уӕм ӕмӕ йын йӕ лӕггады цы ӕнтысы, уымӕй-иу ӕй куы афӕрсӕм, уӕд ыл уый хорзырдӕм фӕзындзӕн. Уый йӕ, чи зоны, сразӕнгард кӕна, цӕмӕй алы мӕй дӕр уацамынды хыгъд дӕтта ӕмӕ Йегъовӕйы хъуыддаджы ноджы зӕрдиагдӕрӕй архайа (Фил. 2:4; Дзут. 13:2).

¹² Иугӕр хистӕр нӕлгоймӕгтӕ сбӕлвырд кодтой, ӕмӕ адӕймаг цӕттӕ у, цӕмӕй уацамынды цӕуа, уӕд ын ратдзысты чиныг «Йегъовӕйы фӕндон чи ӕххӕст кӕны, уыцы организаци». Фыццаг хатт уацамынды хыгъд куы ратта, уый фӕстӕ ӕмбырды цыбыртӕй фехъусын кӕндзысты, ӕнӕаргъуыд хъусынгӕнӕг кӕй сси, уый тыххӕй.

СЫВӔЛЛӔТТӔН КУЫД ИС ӔХХУЫС КӔНӔН

¹³ Сывӕллӕттӕн дӕр сӕ бон у, ӕмӕ хъусынгӕнджытӕ суой. Йесо-иу зӕрдиагӕй баузӕлыд сывӕллӕттыл ӕмӕ-иу сын раарфӕ кодта (Матф. 19:13–15; 21:15, 16). Ӕмӕ кӕд сывӕллӕтты тыххӕй дзуапп сӕйраджыдӕр сӕ ныййарджытӕ дӕттынц, уӕддӕр хорз хабар хъусын кӕнын зӕрдиагӕй кӕй фӕнды, уыцы гыццылтӕн ӕмбырд дӕр куыннӕ ӕххуыс кӕндзӕн. Кӕд дӕуӕн дӕр сывӕллӕттӕ ис, уӕд сын, хъусын кӕныны хъуыддаджы куыд архайыс, уымӕй фӕзминаг у. Уымӕй тынгдӕр сӕ ницы сразӕнгард кӕндзӕн Хуыцауӕн зынгзӕрдӕйӕ лӕггад кӕнынмӕ. Кӕд сывӕллон йӕ уаг ӕмӕ йе ’гъдауӕй фӕзминаг у ӕмӕ йӕ кӕд зӕрдиагӕй фӕнды йӕ уырнындзинады тыххӕй иннӕтӕн дзурын, уӕд ын дарддӕр куыд ис баххуыс кӕнӕн?

¹⁴ Уӕд йӕ ныййарджытӕй сӕ иуӕн йӕ бон у уый тыххӕй, ӕмбырды комитеты чи ис, уыцы хистӕр нӕлгоймӕгтӕй искӕмӕн зӕгъын. Хистӕр нӕлгоймӕгты советы координатор спълан кӕндзӕн, цӕмӕй дыууӕ хистӕр нӕлгоймаджы (сӕ иу хъуамӕ уа ӕмбырды комитетӕй) фембӕлой сывӕллонимӕ ӕмӕ йӕ уырнӕг ныййарӕгимӕ (кӕнӕ ныййарджытимӕ) йе та йӕ кӕд ӕндӕр исчи хъомыл кӕны, уӕд уыимӕ. Ӕмӕ сбӕлвырд кӕндзысты, сывӕллон хъусынгӕнӕг суа, уымӕ цӕттӕ у ӕви нӕ. Кӕд Библийӕ сӕйраг хабӕрттӕ зоны ӕмӕ бӕрӕг у, ӕцӕгдӕр ӕй кӕй фӕнды уацамынды цӕуын, уӕд уый ууыл дзурӕг у, ӕмӕ рӕстдзинады фӕндагыл размӕ цӕуы. Дыууӕ хистӕр нӕлгоймаджы ацы хабӕрттӕ ӕмӕ, хистӕртимӕ ныхас кӕнгӕйӕ сӕ хъус цӕмӕ фӕдарынц, ӕндӕр ахӕм хабӕрттӕ дӕр куы сбӕлвырд кӕной, уӕд бамбардзысты, ӕнӕаргъуыд хъусынгӕнӕгӕй лӕггад кӕныны бар ын ис раттӕн ӕви нӕ (Лук. 6:45; Ром. 10:10). Кӕй зӕгъын ӕй хъӕуы, хистӕр нӕлгоймӕгтӕ сывӕллонимӕ нӕ ныхас кӕндзысты, хистӕртимӕ кӕуыл фӕныхас кӕнынц, фӕлӕ сывӕллӕттӕм чи нӕ хауы, ахӕм фарстатыл.

¹⁵ Фембӕлды рӕстӕг хистӕр нӕлгоймӕгтӕ хъуамӕ сывӕллонӕй раппӕлой, уырнындзинады хъуыддаджы йын хорз цы уайы, уый тыххӕй ӕмӕ йӕ сразӕнгард кӕной, цӕмӕй йӕ разы ахӕм нысан сӕвӕра, ӕмӕ донаргъуыд райса. Ныййарджытӕ бирӕ бафыдӕбон кодтой, цӕмӕй рӕстдзинад сӕ сывӕллоны зӕрдӕйы нывӕрдтаиккой, ӕмӕ уыдон дӕр раппӕлинаг куыннӕ сты. Цӕмӕй ныййарджытӕ сӕ сывӕллонӕн дарддӕр дӕр ӕххуыс кӕной, уый тыххӕй сын сӕ хъус ӕрдарӕн ис, ацы чиныджы 179–181 фӕрстыл цы ӕрмӕг ис, уымӕ, «Чырыстон ныййарджытӕ!», зӕгъгӕ.

ДӔХИ ХУЫЦАУӔН СНЫВОНД КӔН ӔМӔ ДОНАРГЪУЫД РАЙС

¹⁶ Кӕд Йегъовӕйы базыдтай, стӕй кӕд дӕ цард йӕ уагӕвӕрдтӕм гӕсгӕ аразыс ӕмӕ хъусын кӕныны хъуыддаджы архайыс, ӕмӕ афтӕмӕй ӕвдисыс, кӕй йӕ уарзыс, уый, уӕд ма дӕ цы хъӕуы саразын, цӕмӕй йемӕ ноджы ӕнгомдӕр суай? Дӕ цард ын снывонд кӕн ӕмӕ донаргъуыд райс (Матф. 28:19, 20).

¹⁷ Дӕхи снывонд кӕнай, уый цы нысан кӕны? Уый нысан кӕны, дӕхи Хуыцауӕн лӕггад кӕнынӕн кӕй рахицӕн кодтай. Цӕмӕй дӕхи Хуыцауӕн снывонд кӕнай, уый тыххӕй йӕм хъуамӕ скувай ӕмӕ йын фидар дзырд раттай, цӕрӕнбонты йын кӕй лӕггад кӕндзынӕ ӕмӕ йӕ фӕндӕгтыл кӕй цӕудзынӕ. Уый ууыл дзурӕг у, ӕмӕ ӕнустӕм ӕрмӕстдӕр ууыл уыдзынӕ иузӕрдион (Дык. з. 5:9). Уыцы къахдзӕф адӕймаг саразы йӕхӕдӕг, хибарӕй. Уый дӕ бӕсты никӕй бон у саразын.

¹⁸ Фӕлӕ Йегъовӕйӕн хибарӕй афтӕ зӕгъай, ӕнустӕм дын мӕ цард нывонд кӕнын, зӕгъгӕ, уый фаг нӕу. Дӕхи Хуыцауӕн кӕй снывонд кодтай, уый хъуамӕ иннӕтӕн дӕр равдисай. Ӕмӕ уый та равдисдзынӕ, Йесойау ды дӕр донаргъуыд куы райсай, уӕд (1 Пет. 2:21; 3:21). Кӕд дӕ хъуыдытӕ иууылдӕр Йегъовӕйӕн лӕггад кӕнынмӕ сарӕзтай ӕмӕ дӕ донаргъуыд райсын фӕнды, уӕд дӕ цы бакӕнын хъӕуы? Уый тыххӕй зӕгъ хистӕр нӕлгоймӕгты советы координаторӕн. Уый спълан кӕндзӕн, цӕмӕй цалдӕр хистӕр нӕлгоймаджы демӕ аныхас кӕной ӕмӕ сбӕлвырд кӕной, донаргъуыд райсынмӕ цӕттӕ дӕ ӕви нӕ. Уый тыххӕй фылдӕр дзырд цӕуы, ацы чиныджы 182–184 фӕрстыл цы ӕрмӕг ис, уым, «Ӕнӕаргъуыд хъусынгӕнӕг!», зӕгъгӕ, стӕй 185–207 фӕрстыл – «Фарстатӕ, донаргъуыд райсын кӕй фӕнды, уыдонӕн». Дӕ хорзӕхӕй, ӕркӕс сӕм.

ХЪУСЫН КӔНЫНЫ ХЪУЫДДАГ РАЗМӔ КУЫД ЦӔУЫ

¹⁹ Рагӕй фӕстӕмӕ дӕр Хуыцауы адӕмы стыр ныфс бауадзынц, раст дин ӕнӕхъӕн дунейы дӕр куыд парахат кӕны, уый тыххӕй цы хабӕрттӕ фехъусынц, уыдон. Хорз хабар ӕгас зӕххыл дӕр хъуыстгонд кӕй ӕрцӕудзӕн, уый тыххӕй Йесо Чырысти йӕ ахуыргӕнинӕгтӕн фыццаг хатт куы загъта, уӕдӕй фӕстӕмӕ ӕцӕг чырыстӕттӕ сӕ хъус лӕмбынӕг дарынц, уыцы ныхӕстӕ куыд ӕххӕст кӕнынц, уымӕ (Матф. 28:19, 20; Мар. 13:10; Хъуыд. 1:8).

²⁰ Йесойы фыццаг фӕдылдзӕуджытӕ-иу, хъусын кӕныны хъуыддаг размӕ куыд цӕуы, уый тыххӕй куы фехъуыстой, уӕд-иу сын тынг ӕхсызгон уыд (Мар. 6:30). Хъуыддӕгты чиныджы кӕсӕм, н. э. 33 азы Фӕндзайӕм боны 120 ахуыргӕнинаджы бӕрц иумӕ кӕй ӕрӕмбырд сты ӕмӕ сыл сыгъдӕг тых кӕй ӕрцыди. Гыццыл фӕстӕдӕр ахуыргӕнинӕгтӕ баисты 3 000 бӕрц, стӕй та – 5 000 бӕрц. Куыд кӕсӕм, афтӕмӕй сыл «Йегъовӕ алы бон дӕр ӕфтыдта, ирвӕзындзинады фӕндагыл-иу чи слӕууыд, ахӕмты», суанг ма «сауджынтӕй дӕр бирӕтӕ систы уырнджытӕ» (Хъуыд. 1:15; 2:5–11, 41, 47; 4:4; 6:7). Уыцы диссаджы хабӕрттӕ ахуыргӕнинӕгты ныфсыл ныфс куыннӕ ӕфтыдтаиккой! Ӕмӕ кӕд дзуттаг дины разамонджытӕ сӕ ныхмӕ карзӕй цыдысты, уӕддӕр сӕ куыннӕ фӕндыдаид, Хуыцау сын цы хъуыддаг бахӕс кодта, уый дарддӕр дӕр зынгзӕрдӕйӕ кӕнын!

²¹ Н. э. 60–61 азтӕм ӕввахс апостол Павел йӕ фыстӕджы колоссӕгтӕм ныффыста, зӕгъгӕ, хорз хабар «ӕгас дунейы... хӕссы дыргъ ӕмӕ... парахат кӕны» ӕмӕ «хъуыстгонд ӕрцыд арвы бын ӕппӕт адӕмӕн дӕр» (Кол. 1:5, 6, 23). Фыццаг ӕнусы чырыстӕттӕ Хуыцауы ныхасмӕ хъуыстой, ӕмӕ, цалынмӕ н. э. 70 азы дзуттӕгты цардӕвӕрдӕн йӕ кӕрон не ’рцыд, уӕдмӕ сыгъдӕг тыхы фӕрцы сӕ бон сси уыцы стыр куыст бакӕнын. Ӕмӕ-иу уыцы иузӕрдион чырыстӕттӕ, хъусын кӕныны хъуыддаджы цы бантыст, уый тыххӕй куы фехъуыстой, уӕд-иу сыл базыртӕ куыннӕ базад!

²² Абон дӕр Йегъовӕйы организаци бӕстон фыссы, ӕгас зӕххыл дӕр цы стыр куыст цӕуы, уый тыххӕй. Уыцы куысты тыххӕй Матфейы 24:14 фыст ис: «Хуыцауы паддзахады тыххӕй ацы хорз хабар хъуыстгонд ӕрцӕудзӕн ӕгас зӕххы цъарыл дӕр, цӕмӕй уый тыххӕй ӕппӕт адӕмтӕ дӕр фехъусой. Ӕмӕ уӕд ӕрцӕудзӕн кӕрон». Мах нӕхи Хуыцауӕн снывонд кодтам, ӕмӕ нын бахӕс кодта, ӕвӕстиатӕй кӕй хъӕуы бакӕнын, ахӕм хъуыддаг. Ӕмӕ нӕ хъуамӕ алчидӕр зӕрдиагӕй архайа, цӕмӕй, кӕрон цалынмӕ не ’рцыд, уӕдмӕ хорз хабар хъуыстгонд ӕрцӕуа. Йегъовӕ йӕхӕдӕг батыхсдзӕн, цӕмӕй ацы хъуыддаг кӕронмӕ ахӕццӕ уа, ӕмӕ дзы кӕд мах дӕр архайӕм, уӕд нӕ райгонд уыдзӕн (Йез. 3:18–21).

УАЦАМЫНДЫ ХЫГЪД

²³ Бӕлвырдӕй цӕй тыххӕй хъӕуы хыгъд дӕттын? Хыгъды цы хъӕуы фыссын, уый фенӕн ис, нӕ организаци цы «Уацамынды хыгъд»-ы гӕххӕттытӕ мыхуыр кӕны, уым. Фӕлӕ дын уӕддӕр ацы хъуыдытӕ пайда уыдзысты.

²⁴ «Публикацитӕ» фыст кӕм ис, уым фыссын хъӕуы, йӕхи Йегъовӕйӕн чи не снывонд кодта ӕмӕ донаргъуыд чи нӕу, ахӕм адӕмӕн мӕйы дӕргъы мыхуыргонд ӕмӕ электронон публикацитӕ ӕдӕппӕтӕй цал раттай, уый. «Видеотӕ цал хатты равдыстай», зӕгъгӕ, уым та фыссын хъӕуы, адӕмӕн нӕ видеотӕ цал хатты равдыстай, уый.

²⁵ «Дыккаг бацыдты» цы хъӕуы фыссын? Зӕгъӕм, донаргъуыд Ӕвдисӕн чи нӕу, ахӕм адӕймагимӕ аныхас кодтай ӕмӕ йӕ фӕнды фылдӕр базонын, уӕд дзы дӕ бон ныффыссын у, уый фӕстӕ мӕйы дӕргъы йемӕ цал хатты аныхас кодтай, уый. Дыккаг бацыдыл нымайӕн ис, адӕймаджы дӕхӕдӕг куы бабӕрӕг кӕнай, писмо йӕм куы ныффыссай, телефонӕй йӕм куы бадзурай, СМС кӕнӕ йӕм компьютерӕй писмо куы арвитай йе та йын литературӕ куы бахӕссай, уый. Кӕд искӕимӕ Библи ахуыр кӕныс, уӕд та ныффыссӕн ис, мӕйы дӕргъы йемӕ цал хатты ахуыр кодтай, уал дыккаг бацыды. Фыд кӕнӕ мадӕн йӕ бон у алы къуыри дӕр иу дыккаг бацыд ныффыссын, бинонты ахуыр куы уадза ӕмӕ дзы, донаргъуыд чи нӕу, ахӕм сывӕллон куы уа, уӕд.

²⁶ Кӕд адӕймагимӕ Библи алы къуыри дӕр фӕахуыр кӕнӕм, уӕддӕр алы мӕй дӕр ныффыссӕм иу Библийы ахуыр. «Уацамынды хыгъд»-ы хъусынгӕнджытӕ ныффыссынц, мӕйы дӕргъы цал Библийы ахуыры уагътой, уый. Библийы ахуырыл нымад цӕуы, донаргъуыд чи нӕу, ахӕм адӕймагимӕ Библи куы фӕахуыр кӕнӕм, уый. Стӕй дын ӕмбырды комитет куы бахӕс кӕна, цӕмӕй Библи ахуыр кӕнай, ӕрдӕг азӕй фылдӕр уацамынды чи нал цӕуы, ахӕм ӕфсымӕр кӕнӕ хоимӕ, уӕд уый дӕр хъӕуы фыссын. Библийы ахуырыл ма нымад у, донаргъуыд ӕрӕджы чи райста, фӕлӕ чиныг «Амондджынӕй цӕр ӕнустӕм!» чи нӕма фӕци, ахӕм адӕймагимӕ куы ахуыр кӕнай, уый дӕр.

²⁷ Хыгъды сахӕттӕ хъӕуы раст фыссын. Сӕйраджыдӕр фыссын хъӕуы, донаргъуыд Ӕвдисӕн чи нӕу, уыдонӕн хӕдзарӕй-хӕдзармӕ куы фӕхъусын кӕнӕм, ногӕй сӕм куы бацӕуӕм, семӕ Библи куы фӕахуыр кӕнӕм ӕмӕ сын ӕндӕр ахӕм уавӕрты куы фӕхъусын кӕнӕм, йе та нын фадат куы фӕзыны, уӕд семӕ куы фӕныхас кӕнӕм, уыцы рӕстӕг. Дыууӕ хъусынгӕнӕджы иумӕ куы лӕггад кӕной, уӕд рӕстӕг сӕ бон у сӕ дыууӕйӕн дӕр ныффыссын, фӕлӕ дыккаг бацыд кӕнӕ Библийы ахуыр ныффысдзӕн ӕрмӕстдӕр сӕ иу. Кӕд ныййарджытӕ бинонты ахуыры рӕстӕг сӕ дыууӕ дӕр архайынц сӕ сывӕллӕтты раст зондыл аразыныл, уӕд сӕ дыууӕйӕн дӕр сӕ бон у къуырийы мидӕг иу сахат фыссын. Ӕфсымӕртӕн сӕ бон у фыссын, раныхас цы рӕстӕг фӕдзурынц, уыцы рӕстӕг дӕр. Уыцы рӕстӕг ма йӕ бон ныффыссын у, раныхас чи тӕлмац кӕна, уымӕн дӕр. Фӕлӕ ма ис, хыгъды кӕй нӕ фӕфыссӕм, ахӕм ахсджиаг хъуыддӕгтӕ дӕр, зӕгъӕм, хъусын кӕнынмӕ нӕхи куы фӕцӕттӕ кӕнӕм кӕнӕ уацамындон фембӕлды куы вӕййӕм. Йе та иуӕй-иу хъусынгӕнджыты фӕхъӕуы фӕндагыл цыдӕртӕ алхӕнын кӕнӕ ӕндӕр ахӕм хъуыддӕгтӕ бакӕнын, ӕмӕ уыцы рӕстӕг дӕр нӕ фӕфыссӕм.

²⁸ Чырыстӕттӕ се ’фсарм ахуыр кӕнынц Библимӕ гӕсгӕ. Ӕмӕ-иу алы хъусынгӕнӕг дӕр, йе ’фсарм ын цы дзуры, уымӕ гӕсгӕ хъуамӕ ныффысса, цас хъусын кодта, уый. Чидӕртӕ фӕхъусын кӕнынц, бирӕ адӕм кӕм цӕры, ахӕм рӕтты, иннӕтӕ та – цӕрджытӕ бирӕ кӕм нӕй, ахӕм рӕтты, ӕмӕ сын уымӕ гӕсгӕ фӕндагыл бирӕ рӕстӕг бахъӕуы. Уавӕртӕ алыхуызӕттӕ вӕййынц, ӕмӕ хъусынгӕнджытӕ дӕр сӕ лӕггадмӕ алыхуызон цӕстӕй кӕсынц. Разамонӕг совет хъусынгӕнджытӕн нӕ дзуры, уацамынды рӕстӕг мӕнӕ афтӕ нымайын хъӕуы, зӕгъгӕ, ӕмӕ ӕндӕр искӕй дӕр нӕ сӕвӕрдта уыцы хъуыддаджы уынаффӕгӕнӕгӕй (Матф. 6:1; 7:1; 1 Тим. 1:5).

²⁹ Хыгъды минуттӕ фыссын нӕ фӕхъӕуы, ӕрмӕстдӕр сахӕттӕ. Фӕлӕ хъусынгӕнӕгӕн йӕ уавӕртӕ тынг къуындӕг куы уой, уӕд йӕ бон у йӕ хыгъды 15, 30 кӕнӕ 45 минуты дӕр фыссын. Афтӕ кӕнӕн ис, зӕгъӕм, кӕд адӕймагыл азтӕ сӕ уӕз ӕруагътой, уӕззау низы аххосӕй йӕ бон хӕдзарӕй рацӕуын нӕу, зӕрӕдты хӕдзары ис кӕнӕ та йын ӕндӕр аххосӕгты тыххӕй зын у хъусын кӕнын. Ахӕм хъусынгӕнӕг мӕйы дӕргъы 15 минуты йеддӕмӕ куы нӕ хъусын кӕна, уӕд дӕр уыцы рӕстӕг дӕр хъуамӕ ныффысса. Уӕд уый дӕр нымад уыдзӕн, алы мӕй дӕр чи хъусын кӕны, ахӕм хъусынгӕнӕгыл. Ацы ӕгъдау ма хауы, цасдӕр рӕстӕг йӕ уавӕртӕ къуындӕг кӕмӕн сты, уыдонмӕ дӕр, зӕгъӕм, уӕззау низы аххосӕй кӕнӕ йыл исты бӕллӕх кӕй ӕрцыд, уый аххосӕй мӕйы бӕрц хуыссӕнӕй чи не сты. Ацы фадатӕй сӕ бон пайда кӕнын у, тынг къуындӕг уавӕрты чи ис, ӕрмӕстдӕр уыдонӕн. Хъусынгӕнӕгӕн ахӕм бар раттӕн ис ӕви нӕ, уый аскъуыддзаг кӕндзӕн ӕмбырды комитет.

«ХЪУСЫНГӔНӔДЖЫ КАРТОЧКӔ»

³⁰ Алы мӕй дӕр уацамынды хыгъд куы раттыс, уӕд ӕй бахӕссынц «Хъусынгӕнӕджы карточкӕ»-мӕ. Уыцы карточкӕтӕм хъусынгӕнджытӕ ницы бар дарынц, уыдон сты бынӕттон ӕмбырды карточкӕтӕ. Кӕд ӕндӕр ӕмбырдмӕ ахизын фӕнд кӕныс, уӕд уый тыххӕй ӕнӕмӕнг зӕгъ уӕ хистӕр нӕлгоймӕгтӕн. Де ’мбырды секретарь бацархайдзӕн, цӕмӕй дӕ «Хъусынгӕнӕджы карточкӕ» дӕ ног ӕмбырдмӕ ӕрвыст ӕрцӕуа. Уый фӕрцы дӕ ног ӕмбырды хистӕр нӕлгоймӕгтӕ дӕу тыххӕй цыдӕртӕ зондзысты, ӕмӕ сын ӕнцондӕр уыдзӕн, цӕмӕй дӕм сӕ хъус дӕр фӕдарой ӕмӕ дын уырнындзинады хъуыддаджы ӕххуыс дӕр кӕной. Кӕд искуыдӕм ацыдтӕ, фӕлӕ дзы ӕртӕ мӕйӕ фылдӕр нӕ баззайдзынӕ, уӕд-иу дӕ уацамынды хыгъд дӕхи ӕмбырдмӕ арвит.

ХЫГЪД ЦӔМӔН ФӔДӔТТӔМ?

³¹ Хаттӕй-хатт дӕ уацамынды хыгъд раттын нӕ ферох вӕййы? Алкӕмӕн дӕр нӕ рӕстӕгӕй-рӕстӕгмӕ фӕхъӕуы цыдӕртӕ нӕ зӕрдыл ӕрлӕууын кӕнын. Фӕлӕ, хыгъд дӕттын ахсджиаг цӕмӕн у, уый куы ’мбарӕм ӕмӕ уыцы хъуыддагмӕ раст цӕстӕй куы кӕсӕм, уӕд-иу нӕ нӕ хыгъд раттын нӕ ферох уыдзӕн.

³² Чидӕртӕ фӕзӕгъынц: «Цас лӕггад кӕнын, уый Йегъовӕ ӕнӕуи дӕр нӕ зоны, хыгъд дӕттын та ма мӕ цӕмӕн хъӕуы?» Йегъовӕ бӕгуыдӕр зоны, алчидӕр нӕ цы аразы, уый. Стӕй йын ӕппӕт зӕрдӕйӕ лӕггад кӕнӕм ӕмӕ, нӕ бон цыдӕриддӕр у, уый аразӕм ӕви нӕ, уый дӕр зоны. Фӕлӕ-ма ӕрхъуыды кӕн: Йегъовӕ Библийы ныффыссын кодта, Ной науы мидӕг цал боны фӕци ӕмӕ израилӕгтӕ ӕдзӕрӕг быдыры цал азы фӕрацу-бацу кодтой, уый. Ныффыссын ма кодта, иузӕрдион ыл чи уыд ӕмӕ ӕгоммӕгӕс чи разынд, уыдоны нымӕц дӕр. Ноджыдӕр ма ныффыссын кодта, Ханааны цы зӕххытӕ уыди, уыдон иу иннӕйы фӕдыл куыд бацахстой ӕмӕ Израилы иузӕрдион тӕрхонгӕнджытӕн цы стыр хъуыддӕгтӕ бантыст, уыдоны тыххӕй дӕр. Ӕцӕгдӕр, Йегъовӕ Библийы йӕ лӕггадгӕнджыты цардӕй бирӕ лыстӕг хабӕрттӕ ныффыссын кодта. Ӕмӕ уымӕй бӕрӕг у, хабӕрттӕ бӕлвырд фыст уой, уый тынг ахсджиаг хъуыддагыл кӕй нымайы.

³³ Библийы цы историон хабӕрттӕ фыст ӕрцыд, уыдон хорз ӕвдисынц, Хуыцауы адӕм алцыдӕр куыд раст ӕмӕ куыд бӕлвырд фыстой. Библийы бирӕ скъуыддзӕгты бӕлвырд нымӕцтӕ фыст куы нӕ уаид, уӕд дзы дзырд цӕуыл цӕуы, уый кӕронмӕ не ’мбариккам. Дӕ бон у ӕркӕсын ацы стихтӕм: Райдиан 46:27; Рацыд 12:37; Тӕрхонгӕнджыты 7:7; 2 Паддзӕхты 19:35; 2 Азфыстыты 14:9–13; Иоанны 6:10; 21:11; Хъуыддӕгтӕ 2:41; 19:19.

³⁴ Кӕд нӕ хыгъдты, Йегъовӕйӕн лӕггад кӕнгӕйӕ цы аразӕм, уыдӕттӕй алцы нӕ бон ныффыссын нӕу, уӕддӕр нӕ организацийӕн бӕлвырд хъуыддаджы ӕххуыс сты. Фыццаг ӕнусы апостолтӕ хъусын кӕнынӕй куы ӕрбаздӕхтысты, уӕд Йесойӕн радзырдтой, «цытӕ сарӕзтой ӕмӕ адӕмы цӕуыл сахуыр кодтой, уыдӕттӕ иууылдӕр» (Мар. 6:30). Хатт хыгъдтӕй бӕрӕг вӕййы, хъусын кӕныны хъуыддаджы уӕлдай тынгдӕр хъус ӕрдарын цӕмӕ хъӕуы, уый. Хыгъдтӕй бӕрӕг вӕййы, ӕмбырд кӕцыдӕр хъуыддӕгты размӕ кӕй цӕуы, кӕцыдӕрты та – цыдӕр фӕхуыздӕр кӕнын кӕй хъӕуы, зӕгъӕм, хъусынгӕнджыты нымӕцыл раздӕрау нал ӕфты. Чи зоны, хъӕуы хъусынгӕнджыты бафидар кӕнын кӕнӕ цавӕрдӕр зындзинӕдтӕ аскъуыддзаг кӕнын. Бӕрнон ӕфсымӕртӕ хыгъдтӕм ӕркӕсдзысты ӕмӕ бацархайдзысты, цӕмӕй, хъусынгӕнӕджыты кӕнӕ ӕнӕхъӕн ӕмбырд цы хъыгдары, уый аиуварс кӕнынӕн сын баххуыс кӕной.

³⁵ Хыгъдты фӕрцы организаци сбӕлвырд кӕны алыхуызон хабӕрттӕ. Зӕгъӕм, хъусынгӕнджытӕ кӕм нӕ фаг кӕны, хъусынгӕнджыты нымӕц тынгдӕр кӕмыты фылдӕр кӕны, хъуыддаг размӕ ӕгӕр сабыргай кӕм цӕуы кӕнӕ адӕмӕн рӕстдзинад базонынӕн цавӕр публикацитӕ хъӕуы. Хыгъдты фӕрцы Йегъовӕйы организаци фены, дунейы алы рӕтты хъусын кӕнынӕн цавӕр литературӕ хъӕуы, уый, ӕмӕ алцӕуыл дӕр рагацау батыхсы.

³⁶ Хыгъдтӕ нӕ ӕцӕгдӕр тынг бафидар кӕнынц. Хотӕ ӕмӕ ӕфсымӕртӕ ӕгас дунейы дӕр хорз хабар хъусын кӕнгӕйӕ цы стыр куыст кӕнынц, уый нӕ дисы не ’фтауы? Хыгъдты фӕрцы хуыздӕр базонӕм, Йегъовӕйы организаци размӕ куыд цӕуы, уый. Хотӕ ӕмӕ ӕфсымӕртыл уацамынды цы хабӕрттӕ ӕрцӕуы, уыдон нын циндзинад ӕрхӕссынц, нӕ зӕрдӕты зынг нын ссудзынц ӕмӕ нӕ сразӕнгард кӕнынц ноджы фылдӕр хъусын кӕнынмӕ (Хъуыд. 15:3). Тынг ахсджиаг у, цӕмӕй нӕ алчидӕр хыгъд афоныл дӕтта ӕмӕ афтӕмӕй ӕнӕхъӕн дунейы ӕфсымӕртыл тыхса. Ахӕм гыццыл хъуыддагӕй дӕр нӕ бон у равдисын, Йегъовӕ йӕ организацийы цы ӕгъдау сфидар кодта, уымӕ гӕсгӕ кӕй архайӕм (Лук. 16:10; Дзут. 13:17).

ДӔ РАЗЫ НЫСӔНТТӔ ӔВӔР

³⁷ Хъусын кӕныны хъуыддаджы ды цы аразыс, уый иннӕтимӕ барын нӕ хъӕуы (Гал. 5:26; 6:4). Алкӕмӕн дӕр йӕ уавӕртӕ алыхуызон сты. Фӕлӕ, нӕ къухы чи бафтдзӕн, ахӕм нысӕнттӕ куы ӕвӕрӕм нӕ разы, уӕд-иу нӕ бон уыдзӕн фенын, нӕхицӕн цы бантыст, уый. Нӕ нысан-иу нӕ къухы куы бафта, уӕд-иу нын уый стыр циндзинад ӕрхӕсдзӕн.

³⁸ Бӕрӕг у, Йегъовӕ кӕй тагъддӕр кӕны, «стыр бӕллӕхы» рӕстӕг кӕй фервӕзын кӕндзӕн, уыдоны ӕмбырд кӕныны хъуыддаг. Мах цӕрӕм, пехуымпар Исай кӕй кой кодта, уыцы рӕстӕджы: «Армыдзаг адӕмӕй равзӕрдзӕн мин, зынгӕ дӕр чи нӕ кӕны, уыдонӕй – тыхджын адӕм. Ӕз, Йегъовӕ, уыцы хъуыддаг йӕ рӕстӕджы фӕтагъд кӕндзынӕн» (Рарг. 7:9, 14; Ис. 60:22). Цӕй стыр кад у, ацы фӕстаг бонты хорз хабар кӕй хъусын кӕнӕм! (Матф. 24:14).