Апрель — «зӕрдиагӕй кусыны ӕмӕ ӕппӕт тыхтӕй архайыны» рӕстӕг
1 Ӕрымысӕн изӕр Иегъовӕйы адӕмӕн фадат дӕтты хъуыды кӕнынӕн. Уыцы рӕстӕг хъуамӕ ахъуыды кӕнӕм, Чырыстийы мӕлӕт цы пайда ӕрхаста ӕмӕ нын Хуыцау ныфс цӕмӕй бавӕрдта, уый Йесойы туджы фӕрцы нӕ бон райсын кӕй у, ууыл. Ивгъуыд азы 19 апрель куы ӕрымысыс, уӕд дӕ зӕрдыл цы ӕрлӕууы? Дӕ бон у ӕрхъуыды кӕнын, уыцы уалдзыгон изӕр цы адӕмы федтай, уыдоны цӕсгӕмттӕ? Ӕрымысӕн изӕры алцыдӕр циндзинад кӕй хаста ӕмӕ нын нӕ уырнындзинад кӕй фидар кодта, уый? Ахсджиаг библион фарста ӕвзӕрст кӕй цыд ӕмӕ зӕрдӕбынӕй кӕй куывтой, уый? Чи зоны дӕ бафӕндыд, Иегъовӕ ӕмӕ дӕм Йесо цы уарзондзинад равдыстой, уымӕн куыд тынг аргъ кӕныс, уый хуыздӕр равдисын. Ахӕм хъуыдытӕ дыл ныр куыд ӕндавынц?
2 Бӕрӕг у, Иегъовӕйы адӕм сӕ бузныгдзинад ӕрмӕст ныхӕстӕй кӕй не ’вдисынц (Кол. 3:15, 17). Уӕлдайдӕр фарон апрелы чырыстон лӕггаддзинады ӕппӕт тыхтӕй кӕй архайдтам, уымӕй равдыстам, Иегъовӕ нӕ ирвӕзындзинадӕн цы сарӕзта, уымӕн кӕй аргъ кӕнӕм, уый. Минтӕ лӕггад кодтой ӕххуысгӕнӕг пионертӕй, ӕмӕ ивгъуыд азты ӕппӕты стырдӕр нымӕцтӕй фӕфылдӕр сты: Белоруссийы — 77%, Гуырдзыстоны — 46%, Сомихы — 29%, Уӕрӕсейы — 38% ӕмӕ Хъазахстаны — 34%. Уыдон иууылдӕр, уыимӕ ма Паддзахады иннӕ хъусынгӕнджытӕ дӕр, ӕппӕт тыхтӕй кӕй бацархайдтой, уымӕ гӕсгӕ уацамынды сахӕттӕ, журналтӕ ӕмӕ дыккаг бацыдтӕ схызтысты ног ӕппӕты стырдӕр нымӕцмӕ. Нӕ циндзинад ма фӕфылдӕр, мингай адӕймӕгтӕ Библи ахуыр кӕнын кӕй райдыдтой ӕмӕ Ӕрымысӕн изӕрмӕ фыццаг хатт уыйбӕрц адӕм кӕй ӕрбацыд, уымӕй дӕр!
3 Кӕй зӕгъын ӕй хъӕуы, нӕ ныфсыл фидарӕй кӕй ӕууӕндӕм, уый нӕ разӕнгард кӕны архайынмӕ. Уый тыххӕй апостол Павел афтӕ фыста: «Уымӕн ӕмӕ мах уый тыххӕй фыдӕбон кӕнӕм ӕмӕ фауындзинӕдтӕ фӕразӕм [«зӕрдиагӕй кусӕм ӕмӕ ӕппӕт тыхтӕй архайӕм», НД], ӕгас Хуыцауӕй ныфсджын кӕй стӕм, Кӕцы у ӕппӕт адӕймӕгты Ирвӕзынгӕнӕг, уӕлдайдӕр та рӕстыты» (1 Тим. 4:10).
4 Уӕдӕ ацы аз Ӕрымысӕн изӕры размӕ дӕр ӕмӕ йӕ фӕстӕ дӕр, Иегъовӕ дӕ ирвӕзындзинадӕн цы сарӕзта, ууыл кӕй ӕууӕндыс, уый куыд равдисдзынӕ? Фарон апрелы Белоруссийы, Гуырдзыстоны, Сомихы, Уӕрӕсейы ӕмӕ Хъазахстаны уыд Паддзахады хъусынгӕнджыты ног стырдӕр нымӕц. Нӕ бон у ацы аз апрелы бацархайын, цӕмӕй хъусынгӕнджыты нымӕц фӕфылдӕр уа? Уый сӕххӕст кӕнын нӕ бон у. Фӕлӕ хъуамӕ алы хъусынгӕнӕг дӕр, куыд аргъуыд, афтӕ ӕнӕаргъуыд дӕр, хайад иса. Гӕнӕн ис, цымыдисгӕнаг адӕмӕй дӕр бирӕтӕн сӕ бон суа хайад райсын. Уымӕ гӕсгӕ апрелы зӕрдиагӕй кусын ӕмӕ ӕппӕт тыхтӕй архайын куы сфӕнд кӕнай, уӕд ахъуыды кӕн, иннӕты, уыимӕ цымыдисгӕнаг адӕмы дӕр ӕмӕ ӕвӕлтӕрд хъусынгӕнджыты дӕр, демӕ хъусын кӕнынмӕ сразӕнгард кӕнӕн куыд ис, ууыл.
5 Ӕххуыс кӕнӕм, уацамынды алы мӕй дӕр кӕнӕ рагӕй хайад чи нӕ исы, уыдонӕн. Кӕд исчи уацамынды иу кӕнӕ дыууӕ мӕйы хайад нӕ райста, уӕд ӕй дӕ бон у бафидар кӕнын ӕмӕ йӕ демӕ хъусын кӕнынмӕ акӕнын. Кӕд ӕмбырды исчи ӕхсӕз мӕйы кӕнӕ фылдӕр нӕ хъусын кӕны, уӕд хистӕр нӕлгоймӕгтӕ хъуамӕ уӕлдай тынгдӕр бацархайой, цӕмӕй сӕ бабӕрӕг кӕной ӕмӕ сӕ апрелы фӕстӕмӕ хъусын кӕнынмӕ сразӕнгард кӕной.
6 Алчидӕр нӕ хъуамӕ дарддӕр дӕр кура Иегъовӕйӕ йӕ сыгъдӕг уд, цӕмӕй нын лӕггад кӕнынӕн ӕххуыс кӕна (Лук. 11:13). Цы хъуамӕ саразӕм, цӕмӕй сыгъдӕг уд райсӕм? Хъуамӕ кӕсӕм Хуыцауы удцырын Ныхас (2 Тим. 3:16, 17). Ноджыдӕр ма хъуамӕ «хъусӕм, Уд цы дзуры аргъуантӕн [«ӕмбырдтӕн», НД]», уымӕ, ӕмӕ уый тыххӕй хъуамӕ цӕуӕм, алы къуыри дӕр цы фондз фембӕлды вӕййы, уыдонмӕ (Рар. 3:6). Ныр у хорз рӕстӕг, алы мӕй дӕр кӕнӕ рагӕй чи нӕ хъусын кӕны, уыдонӕн баххуыс кӕнынӕн, цӕмӕй Библи сӕрмагондӕй ахуыр кӕной ӕмӕ фембӕлдтӕм ӕнӕсцухӕй цӕуын райдайой (Пс. 49:23). Уыцы иу рӕстӕджы хъуамӕ нӕ хъус лӕмбынӕг дарӕм нӕхи уырнындзинадмӕ дӕр. Фӕлӕ ма уымӕй уӕлдай хъӕуы ноджы цыдӕр.
7 Апостол Петр бамбарын кодта, зӕгъгӕ, Хуыцау йӕ сыгъдӕг уд дӕтты, «коммӕ Йын чи кӕсы, уыдонӕн» (Ап. к. 5:32). Ахӕм коммӕгӕсдзинад нысан кӕны, кӕй хъуамӕ ӕххӕст кӕнӕм фӕдзӕхст — «хъусын кӕнын ӕмӕ ӕвдисӕн лӕууын адӕмӕн» (Ап. к. 1:8; 10:42). Афтӕмӕй, раст у, хъусын кӕнынӕн нӕ Хуыцауы сыгъдӕг уды ӕххуыс кӕй хъӕуы, уый, фӕлӕ ма, Иегъовӕйы зӕрдӕмӕ цы цӕуы, уый куы фӕкӕнӕм, уӕд нын дарддӕр дӕр йӕхӕдӕг кӕй феххуыс кӕны, уый. Уӕдӕ ацы хъуыддаджы Хуыцауы коммӕ ӕнӕзивӕгӕй кӕй хъӕуы кӕсын, уымӕн алкӕддӕр ӕмбӕлон аргъ кӕнӕм!
8 Ӕххуыс кӕнӕм сывӕллӕттӕн. Ныййарджытӕ, мыййаг фӕхатыдыстут, уӕ сывӕллӕтты иннӕтимӕ ӕцӕгады тыххӕй ныхас кӕнын кӕй фӕнды, уый? Уемӕ хъусын кӕнынмӕ фӕцӕуынц? Сӕ уагахаст фӕзминаг у? Кӕд о, уӕд ма цӕмӕ ӕнхъӕлмӕ кӕсут? Бацӕут ӕмбырды службӕйон комитеты уӕнгтӕй иумӕ ӕмӕ базонут, уӕ сывӕллонӕн йӕ бон у апрелы хъусынгӕнӕг суӕвын ӕви нӕ. (Кӕс чиныг «Нӕ лӕггаддзинад»-ы 100, 101 фӕрстӕ, уырыссаг.) Бамбарут, уӕ сывӕллӕттӕн дӕр сӕ бон кӕй у бирӕ саразын, цӕмӕй апрелы Иегъовӕйы тынгдӕр скадджын кӕнӕм (Матф. 21:15, 16).
9 Иу чырыстон мад Джорджийы (АИШ) йӕ гыццыл чызджы алкӕддӕр разӕнгард кодта иннӕтӕн Иегъовӕйы тыххӕй дзурынмӕ. Фарон уыцы чызг йӕ мадимӕ хъусын кӕнынмӕ куы ацыд, уӕд иу лӕгӕн радта брошюрӕ «Цы домы» ӕмӕ йын цыбыртӕй загъта брошюрӕйы сӕргӕндты тыххӕй. Лӕг ӕй бафарста: «Цал азы дыл цӕуы?» Чызг ын загъта: «Авд». Лӕг тынг бадис кодта, сывӕллон ӕмбаргӕ ныхас кӕй кодта, ууыл. Куыд рабӕрӕг, афтӕмӕй, ӕцӕгад зыдта йӕ гыццылӕй нырмӕ, фӕлӕ йӕ царды ахсджиаг бынат нӕ бацахста. Бирӕ нӕ рацыд, афтӕ уыцы лӕг, йӕ ус ӕмӕ йӕ чызг райдыдтой Библи ахуыр кӕнын.
10 Ныридӕгӕн сывӕллӕттӕй бирӕтӕ сты хъусынгӕнджытӕ, ӕмӕ немӕ кӕй лӕггад кӕнынц, уый нын у тынг ӕхсызгон. Уыдонӕн сӕ бон у се ’мгӕрттыл бандавын ӕмӕ сӕ хорз хъуыддӕгтӕм сразӕнгард кӕнын. Уымӕй уӕлдай ма апрель у хорз рӕстӕг бинонтӕн дӕр, уымӕн ӕмӕ, иумӕ сыгъдӕг лӕггаддзинады хайад куы исой, уӕд сӕ кӕрӕдзийыл ӕнувыддӕр уыдзысты ӕмӕ сӕ уырнындзинад дӕр фидардӕр кӕндзӕн. Уыцы хъуыддаджы хъуамӕ къухдариуӕг кӕной бинонты хистӕртӕ (Фӕс. н. 24:27).
11 Ӕххуыс кӕнӕм цымыдисгӕнаг адӕмӕн. Цы ис зӕгъӕн, Библи кӕимӕ ахуыр кӕныс, уыцы цымыдисгӕнаг адӕмы тыххӕй та? Сӕ бон нӕ уаид ацы аз апрелы уацамынды хайад райсын? Чи зоны, чиныг «Базонынад»-ы 2-ӕм сӕры 22-ӕм абзац кӕнӕ 11-ӕм сӕры 14-ӕм абзац куы кастыстут, уӕд сӕ бафӕндыд, цы базыдтой, уый тыххӕй иннӕтӕн дӕр дзурын. Кӕд чиныгӕн йӕ кӕронмӕ фӕхӕццӕ кӕнут, уӕд дӕхи бацӕттӕ кӕн, цӕмӕй уыцы фарстайыл ӕргом аныхас кӕнат, 18-ӕм сӕры 8-ӕм абзац куы кӕсат, уӕд, цыран дзырдӕуы: «Ӕвӕццӕгӕн дӕу тынг фӕнды радзурын дӕ хӕстӕджытӕн, ӕмбӕлттӕ ӕмӕ ӕндӕр адӕймӕгтӕн, цы базыдтай, уый. Гӕнӕн ис уый ныридӕгӕн аразыс Йесойау, кӕцы ӕнӕформалонӕй хъусын кодта цины хабар алкӕмӕндӕр (Лукайы 10:38, 39; Иоанны 4:6—15). Ныр та дӕ, чи зоны, фылдӕр аразын фӕнды». Кӕимӕ ахуыр кӕныс, ацы ныхӕстӕ уыдонмӕ хауынц?
12 Дӕ ахуыргӕнинаг Хуыцауы Ныхасыл ӕууӕнды? Библийы принциптӕй йӕ царды пайда кӕны? Хуыцауы домӕнтӕм гӕсгӕ цӕры? Ӕмбырды фембӕлдтӕм цӕуы? Фӕнды йӕ Иегъовӕ Хуыцауӕн лӕггад кӕнын? Цӕуылнӕ йӕ ис сразӕнгард кӕнӕн хистӕр нӕлгоймӕгтимӕ аныхас кӕнынмӕ, цӕмӕй сбӕлвырд кӕной, ӕнӕаргъуыд хъусынгӕнӕг суӕвын ӕмӕ демӕ апрелы уацамынды хайад исын йӕ бон у ӕви нӕ? (Кӕс чиныг «Нӕ лӕггаддзинад»-ы, 97—100 фӕрстӕ, уырыссаг.) Афтӕмӕй йӕхи цӕстытӕй фендзӕн, Иегъовӕйы организаци йын Иегъовӕйӕн ӕппӕт тыхтӕй лӕггад кӕнынӕн куыд ӕххуыс кӕндзӕн, уый.
13 Кӕй зӕгъын ӕй хъӕуы, ахуыргӕнинӕгтӕй иуӕй-иутӕн ӕнтыстытӕ сӕ къухы тагъддӕр ӕфты. Уый тыххӕй «Нӕ паддзахадон лӕггаддзинад»-ы 2000 азы июны номыры 8 фарсыл 5, 6-ӕм абзацты цы амындтӕ уыд, уыдонмӕ гӕсгӕ бирӕтӕ ахуыр кӕнынц дыккаг чиныг, цымыдисгӕнаг адӕймӕгтӕй ма ӕххуыс кӕй хъӕуы, цӕмӕй зӕрдиагӕй хъусын кӕнын райдайой, уыдонимӕ. Уыцы сыгъдӕгзӕрдӕ адӕм, «тагъддӕр уа ӕви ӕрӕгмӕ дӕр», Чырыстийы ӕцӕг ахуыргӕнинӕгтӕ кӕй суыдзысты, ууыл хъуамӕ алкӕддӕр нӕ ныфс дарӕм (Ап. к. 26:29, НФ). Фӕлӕ кӕд ахӕм адӕймӕгтимӕ рагӕй ахуыр кӕныс, уӕд ацы аз Ӕрымысӕн изӕр хорз фадат нӕ уыдзӕн, цӕмӕй дӕ ахуыргӕнинӕгтӕ райдайой ӕвдисын, Чырыстийы нывондӕн куыд тынг аргъ кӕнынц, уый?
14 Куыд сын ис баххуыс кӕнӕн, цӕмӕй хайад исын райдайой? Цӕмӕй базонӕм, ногтӕн куыд ис баххуыс кӕнӕн, цӕмӕй лӕггад кӕнын райдайой, уый тыххӕй ӕркӕсӕм, Йесо йӕ ахуыргӕнинӕгты куыд ахуыр кодта, уымӕ. Уый сӕ нӕ арвыста, адӕм кӕм ӕрӕмбырд сты, уырдӕм, ӕмӕ сын нӕ загъта, райдайут дзурын, зӕгъгӕ. Фыццаг уый бахахх кодта хъусын кӕныны ахсджиагдзинад, сразӕнгард сӕ кодта уый тыххӕй кувынмӕ ӕмӕ стӕй бацархайдта, цӕмӕй сын уыдаид ӕртӕ сӕйраг хъуыддаджы: кӕимӕ хъусын кодтаиккой, ахӕм ӕмбал, участок ӕмӕ цы зӕгъын хъуыд, уый (Матф. 9:35—38; 10:5—7; Мар. 6:7; Лук. 9:2, 6). Дӕуӕн дӕр дӕ бон у афтӕ кӕнын. Дӕ сывӕллонӕн ӕххуыс кӕнай, ног ахуыргӕнинагӕн ӕви, цасдӕр рӕстӕджы дӕргъы лӕггаддзинады хыгъд чи нӕ радта, ахӕм адӕймагӕн, хорз уыдзӕн, дӕлдӕр лӕвӕрд уынаффӕтӕм гӕсгӕ куы архайай, уӕд.
15 Бахахх кӕн, хъусын кӕнын цӕмӕн хъӕуы, уый. Адӕймагӕн бамбарын кӕн, хъусын кӕнын ахсджиаг цӕмӕн у, уый. Уыцы хъуыддаг цы циндзинад хӕссы, уый тыххӕй йын зӕгъ. Радзур ын ӕмбырды ӕнтыстдзинӕдты тыххӕй, уацамындӕй исты цаутӕ. Матфейы 9:36—38-ӕм стихты Йесо цы зондахаст равдыста, ахӕм ӕвдис. Хъусынгӕнӕг суӕвын кӕй фӕнды кӕнӕ уацамынды алы мӕй дӕр хайад чи нӕ исы, ахӕм адӕймаджы сразӕнгард кӕн, цӕмӕй кува, кӕй йӕ фӕнды хъусын кӕныны хъуыддаджы хайад исын, стӕй ма, цӕмӕй ӕгас дунейыл дӕр уыцы хъуыддаг ӕнтыстджынӕй цӕуа, уый тыххӕй.
16 Адӕймаджы сразӕнгард кӕн, хъусын кӕнынӕн цы бирӕ фадӕттӕ ис, уыдоныл хъуыды кӕнынмӕ. Зӕгъ ын, кӕй ис цӕуӕн, чиныгахуыркӕнынады къорд цы уацамындон фембӕлдтӕ уадзы, уыдонмӕ. Ис ныхас кӕнӕн хӕстӕджытӕ ӕмӕ зонгӕтимӕ, йе та сихорыл улӕфты рӕстӕджы не ’мкусджытимӕ ӕмӕ иумӕ кӕимӕ ахуыр кӕнӕм, уыдонимӕ. Ӕхсӕнадон транспортыл цӕугӕйӕ арӕх ныхас райдайӕн вӕййы, кӕимӕ цӕуӕм, уыдонмӕ зӕрдӕхӕларӕй сдзургӕйӕ. Ныхас нӕхӕдӕг куы райдайӕм, уӕд арӕх фӕзыны фадат адӕймагимӕ ӕцӕгады тыххӕй аныхас кӕнынӕн. Ӕцӕгӕйдӕр, ис бирӕ фадӕттӕ нӕ ныфсы тыххӕй иннӕтӕн «бонӕй-бонмӕ» дзурынӕн (Пс. 95:2, 3).
17 Адӕймаг хъусынгӕнӕг куы суа, уӕд хуыздӕр уыдзӕн, гӕнӕн уӕвгӕйӕ, тагъддӕр йемӕ хӕдзарӕй-хӕдзармӕ хъусын кӕнынмӕ ацӕуын. Кӕд апрелы фылдӕр лӕггад кӕнын фӕнд кӕныс, уӕд, участокты тыххӕй дзуапп чи дӕтты, уыцы ӕфсымӕры бафӕрс, ӕмбӕлон участок дзы ис ӕви нӕ. Кӕд дзы ис, уӕд дын уыдзӕн фадат, цӕмӕй дзы бӕстон бакусай. Зӕгъӕм, уацамынды фӕстӕ, йе та фембӕлдмӕ кӕнӕ ӕндӕр искуыдӕм куы цӕуай, уӕд, гӕнӕн ис, бафиппайай, раздӕр хӕдзары кӕй нӕ баййӕфтай кӕнӕ чи бацымыдис кодта, уый хӕдзары кӕй ис. Ӕгӕр ӕрӕгмӕ куы нӕ уа, уӕд дӕ бон у адӕймагмӕ цыбыр рӕстӕгмӕ бауайын. Афтӕмӕй лӕггаддзинадӕй уыдзынӕ райгонд ӕмӕ дын хӕсдзӕн циндзинад.
18 Ныхас райдайынӕн ссар зӕрдӕмӕхъаргӕ ныхӕстӕ. Гӕнӕн ис, адӕймаджы фӕнда Паддзахады тыххӕй хъусын кӕнын, фӕлӕ йӕм афтӕ кӕса, ӕмӕ йӕ бон хорз дзурын нӕу, уӕлдайдӕр та ног хъусынгӕнӕг кӕнӕ рагӕй чи нал хъусын кӕны, ахӕм кӕд у, уӕд. Ногтӕн ӕмӕ уацамынды алы мӕй дӕр хайад чи нӕ исы, уыдонӕн куы ӕххуыс кӕнай, уӕд дын уыцы рӕстӕг дзӕгъӕлы нӕ уыдзӕн. Лӕггаддзинады фембӕлдтӕ ӕмӕ уацамындон фембӕлдты ис хорз хъуыдытӕ фехъусӕн, фӕлӕ адӕймаг йӕхӕдӕг кӕй цӕттӕ кӕна, уымӕн баивӕн ницӕмӕй ис.
19 Куыд у дӕ бон ногтӕн уацамындмӕ цӕттӕ кӕнынӕн ӕххуыс кӕнын? Райдай, журнал раттынӕн цы ис зӕгъӕн, уымӕй, дӕ ныхас уӕд хуымӕтӕг ӕмӕ цыбыр! Зӕгъ сын, цӕмӕй ахъуыды кӕной, фӕстаг хабӕртты цы фехъуыстой, уымӕй участокыл адӕмы цы бацымыдис кӕндзӕн, ууыл, ӕмӕ уый фӕстӕ ссарут фӕстаг журналты ӕмбӕлон хъуыдытӕ. Иумӕ афӕлварут, цы бацӕттӕ кодтат, уый, ӕмӕ дзы, гӕнӕн уӕвгӕйӕ, тагъддӕр спайда кӕнут уацамынды.
20 Архайӕм, цӕмӕй фидӕны хъусынгӕнджыты нымӕц фӕфылдӕр уа. Фарон Ӕрымысӕн изӕрмӕ ӕрбацыд 14,8 милуан адӕймагӕй фылдӕр. Лӕггаддзинады хыгъд чи радта, уыдон та уыдысты 6 милуанӕй фылдӕр. Уый ууыл дзурӕг у, ӕмӕ 8,8 милуан адӕймаджы бӕрц афтӕ бацымыдис кодтой, ӕмӕ ӕрбацыдысты сӕрмагонд программӕмӕ, цыран фехъуыстой Библийы сӕйраг ахуырӕдтӕй сӕ иуы тыххӕй. Чи зоны, махӕй кӕимӕдӕрты базонгӕ сты, ӕмӕ сыл уый дӕр, гӕнӕн ис, хорзырдӕм бандӕвта. Уыдонӕй бирӕтӕ кӕнынц нӕ хорзы кой, дӕттынц мысайнӕгтӕ нӕ ӕппӕтдунеон хъуыддагӕн ӕмӕ нӕ ныхмӕ исчи исты куы фӕдзуры, уӕд нӕ сӕрыл фӕхӕцынц. Гӕнӕн ис, ӕмӕ нын фидӕны уыцы бирӕ адӕм нӕ нымӕц фӕфылдӕр кӕной. Цы у нӕ бон саразын, цӕмӕй ноджы ӕнтыстджындӕр уой?
21 Ӕрымысӕн изӕрмӕ цы ног адӕм ӕрбацӕуы, уыдонӕн сӕ фылдӕр махӕй чидӕр фӕхоны. Арӕх уый ууыл дзурӕг вӕййы, ӕмӕ сын хъусджыты ’хсӕн ӕппынкъаддӕр иу зонгӕ адӕймаг вӕййы. Кӕд адӕймаджы фӕхуыдтам ӕмӕ ӕрбацыди, уӕд ыл хъуамӕ бацин кӕнӕм ӕмӕ йын баххуыс кӕнӕм, цӕмӕй программӕйӕ пайда райса. Залы бирӕ адӕм кӕй уыдзӕн, уымӕ гӕсгӕ-иу ын баххуыс кӕн бынат ссарынӕн. Радт ӕм Библи ӕмӕ йын зӕгъ, йӕ бон кӕй у дӕ зарджыты чиныгӕй демӕ зарын, уый. Кӕд дӕ истӕмӕй бафӕрса, уӕд ын дзуапп радт. Зӕрдӕхӕларӕй йӕм дӕ хъус куы дарай, уӕд ӕй уый, чи зоны, иууыл тынгдӕр сразӕнгард кӕна дарддӕр дӕр истытӕ базонынмӕ. Кӕй зӕгъын ӕй хъӕуы, уый хауы махӕй алкӕмӕдӕр — куы фенӕм ӕнӕзонгӕ адӕймаджы, уӕд ын зӕрдӕхӕларӕй хъуамӕ салам радтӕм ӕмӕ йемӕ иу гыццыл аныхас кӕнӕм, цӕмӕй кӕрӕдзи хуыздӕр базонӕм.
22 Адӕймаг Ӕрымысӕн изӕрмӕ куы ӕрбацӕуа, уӕд ын уый йӕ зондахастыл, гӕнӕн ис, тынг бандава. Чи зоны, фембӕлдмӕ уый тыххӕй ӕрбацыд, ӕмӕ йӕ фарстытӕн дзуапп ӕндӕр никуы ссардта, стӕй нӕ организацийы кӕй ис, лӕмбынӕгдӕр раиртасинагыл цы нымайы, ахӕм цыдӕр. Иегъовӕйы ӕгӕрон уарзондзинады тыххӕй раздӕр чи ницы фехъуыста, уыцы адӕймаг куы базона, ахӕстаргъ куыд ӕрцыд фыст, уый, уӕд ыл, гӕнӕн ис, тынг бандава. Уый уайтагъд бафиппайдзӕн, мах иннӕтӕй кӕй хицӕн кӕнӕм — стӕм сыгъдӕгзӕрдӕ, хӕларзӕрдӕ, уарзӕм адӕмы ӕмӕ сын кад кӕнӕм. Нӕ залы ницы ис, аргъуанты цы федтаид, уый хуызӕнӕй — хуызтӕ ӕмӕ ӕнӕсӕрфат ӕгъдӕуттӕ. Ног ӕрбацӕуджытӕ, кӕй зӕгъын ӕй хъӕуы, фендзысты, залы кӕй ис алыхуызон адӕймӕгтӕ ӕмӕ дзы ӕхца кӕй не ’мбырд кӕнынц, уый. Уыдӕттӕ сыл, гӕнӕн ис, афтӕ тынг бандавой, ӕмӕ ма ноджыдӕр ӕрбацӕуой.
23 Ӕрымысӕн изӕры фӕстӕ хъуамӕ, фыццаг хатт чи ӕрбацыд, уыдонӕн рӕстӕг ссарӕм ӕмӕ сын баххуыс кӕнӕм. Кӕй фӕхонай, уыдонӕн сӕйраджыдӕр ды дӕттыс дзуапп. Цалынмӕ нӕ ацӕуой, уӕдмӕ йӕ базон, Паддзахады залы ма цы фембӕлдтӕ вӕййы, уыдоны тыххӕй зонынц ӕви нӕ. Зӕгъ сын, иннӕ къуыри цы раныхас уыдзӕн, уый тыххӕй. Зӕгъ сын, сӕ хӕдзармӕ хӕстӕгдӕр ӕмбырды чиныгахуыркӕнынад кӕм ӕмӕ кӕд вӕййы, уый. Фӕстӕдӕр сӕм куы бацӕуай, уӕд сын радт чиныг «Сфӕлдисӕг» ӕмӕ сын зӕгъ, 30 апрелӕй райдайгӕ къуырийы дзырд кӕй цӕудзӕн ахӕм темӕйыл: «Сфӕлдисӕджы тыххӕй чиныгӕй цы ис базонӕн?» Бамбарын сын кӕн, тагъд цы облӕстон конгресс уыдзӕн, уырдӕм ӕнӕхъӕн ӕмбырд цӕмӕн фӕнд кӕны ацӕуын, уый.
24 Уазӕгуаты сӕм бацу. Радт сын брошюрӕ «Цы домы» ӕмӕ чиныг «Базонынад», кӕцытӕ сӕ базонгӕ кӕндзысты Библийы сӕйраг ахуырӕдтимӕ. Кӕд нырма Библи нӕ ахуыр кӕнынц, уӕд семӕ уый тыххӕй аныхас кӕн. Радт сын брошюрӕ «Иегъовӕйы Ӕвдисӕнтӕ Хуыцауы фӕндон иумӕйагӕй ӕххӕст кӕнынц ӕппӕт зӕххыл». Уый руаджы фендзысты, нӕ организаци куыд архайы, уый. Зӕгъ сын, цӕмӕй бакӕсой нӕ видеофильмтӕм. Бацархай, цӕмӕй ӕмбырдӕй иннӕтимӕ дӕр ӕмбӕлой. Дарддӕр дӕр сӕм цу, хон сӕ фембӕлдтӕм, районон цӕстдарӕг де ’мбырды куы уа, уӕд, йе та районон кӕнӕ специалон конгресмӕ. Радт сын фылдӕр фадӕттӕ, цӕмӕй равдисой, «ӕнусон цардмӕ раст ахаст кӕмӕн ис», ахӕмтӕ кӕй сты, уый! (Ап. к. 13:48, НД).
25 Хистӕр нӕлгоймӕгтӕн сӕ бон цы у саразын. Апрелы хъусынгӕнджытӕ ӕппӕт тыхтӕй архайдзысты ӕви нӕ, уый бирӕ цӕмӕйдӕрты хистӕр нӕлгоймӕгтӕй кӕнгӕ у. Кӕд чиныгахуыркӕнынады разамонӕг дӕ, уӕд дӕхицӕн ныффысс, дӕ бон куыд у дӕ чиныгахуыркӕнынады къорды уӕнгтӕй алкӕмӕндӕр баххуыс кӕнын, цӕмӕй сӕрмагонд хъуыддӕгты хайад райсой. Мыййаг дӕ къорды ис сывӕллӕттӕ, цымыдисгӕнаг адӕймӕгтӕ, уацамынды алы мӕй дӕр кӕнӕ рагӕй хайад чи нӕ исы, ахӕмтӕ? Сразӕнгард кӕн ныййарджыты, пионертӕ кӕнӕ иннӕ хъусынгӕнджыты, цӕмӕй сын баххуыс кӕной. Дӕхи бон сын цӕмӕй у, уымӕй сын баххуыс кӕн. Цӕвиттонӕн, дыууӕ азы дӕргъы уацамынды алы мӕй дӕр хайад чи нӕ иста, иу ахӕм хо фарон апрелы хъусын кодта 50 сахатӕй фылдӕр. Цымӕ йыл цы бандӕвта? Хо загъта, зӕгъгӕ йыл бандӕвта, хистӕр нӕлгоймӕгтӕ йӕ кӕй бӕрӕг кодтой, уый.
26 Хистӕр нӕлгоймӕгтӕ ӕмӕ службӕйон ӕххуысгӕнджытӕ хъуамӕ иумӕ сбӕлвырд кӕной, иннӕ мӕймӕ сын участоктӕ, журналтӕ ӕмӕ ӕндӕр литературӕ фаг ис ӕви нӕ. Фылдӕр уацамындон фембӕлдтӕ ма ис саразӕн? Кӕд о, уӕд-иу уый тыххӕй ӕмбырдӕн фехъусын кӕнут. Уымӕй уӕлдай ма, фембӕлды кӕнӕ хибарӕй кувгӕйӕ, Иегъовӕйӕн балӕгъстӕ кӕн, цӕмӕй нын ацы мӕй раарфӕ кӕна ӕмӕ Паддзахады хъуыддаджы фылдӕр саразӕм (Ром. 15:30, 31; 2 Фес. 3:1).
27 Фарон апрелы Цӕгат Каролинӕйы иу ӕмбырды хистӕр нӕлгоймӕгтӕ тынг разӕнгард кодтой хъусынгӕнджыты фылдӕр лӕггад кӕнынмӕ. Алы къуыри дӕр сын фембӕлдты дзырдтой, цӕмӕй ахъуыды кодтаиккой куывды мидӕг, сӕ бон у ӕви нӕ ӕххуысгӕнӕг пионертӕй лӕггад кӕнын. Фадат-иу куы фӕци, уӕд-иу хистӕр нӕлгоймӕгтӕ ӕмӕ службӕйон ӕххуысгӕнджытӕ зӕрдӕрайгӕйӕ дзырдтой, апрель лӕггаддзинады ӕппӕты хуыздӕр мӕй кӕй хъуамӕ скӕной, ууыл. Уый фӕстиуӕгӕн хъусынгӕнджытӕн сӕ 58 %, уыимӕ хистӕр нӕлгоймӕгтӕ ӕмӕ службӕйон ӕххуысгӕнджытӕ иууылдӕр, уыцы мӕй лӕггад кодтой пионертӕй!
28 Зӕрдиаг архайд хӕссы циндзинад. Лӕггаддзинады «зӕрдиагӕй [куы] кусӕм ӕмӕ ӕппӕт тыхтӕй [куы] архайӕм», уӕд нӕм цавӕр арфӕдзинӕдтӕ ӕнхъӕлмӕ кӕсы? (1 Тим. 4:10). Уӕлдӕр цы хистӕр нӕлгоймӕгты кой кодтам, уыдон ныффыстой, сӕ ӕмбырд фарон апрелы куыд зӕрдиагӕй лӕггад кодта, уый тыххӕй: «Ӕфсымӕртӕ ӕмӕ хотӕ арӕх фӕдзурынц, хъусын кӕныны хъуыддаджы фылдӕр хайад исын куы райдыдтой, уӕдӕй нырмӕ сӕ кӕрӕдзи фылдӕр кӕй бауарзтой ӕмӕ сӕ кӕрӕдзийыл ӕнувыддӕр кӕй систы, уый тыххӕй».
29 Цӕуын зын кӕмӕн у, иу ахӕм ӕрыгон ӕфсымӕры тынг фӕндыд фарон апрелы фылдӕр балӕггад кӕнын. Алцыдӕр хорз кӕй спълан кодта, стӕй йын йӕ мад ӕмӕ йӕ чырыстон ӕфсымӕртӕ ӕмӕ хотӕ кӕй баххуыс кодтой, уый руаджы ӕнтыстджынӕй балӕггад кодта ӕххуысгӕнӕг пионерӕй. Цы ӕнкъардта уый фӕстӕ? Ӕфсымӕр загъта: «Мӕ царды мӕхи фыццаг хатт фӕхатыдтӕн ӕнӕниз адӕймагӕй!».
30 Ӕнӕгуырысхойӕ ис зӕгъӕн, Иегъовӕ тынг кӕй арфӕ кӕны, йӕ Паддзахады тыххӕй хъусын кӕныны фадатӕн тынг чи аргъ кӕны, уыдонӕн (Пс. 144:11, 12). Нӕ Хицауы мӕлӕт бӕрӕг кӕнгӕйӕ, мах ӕмбарӕм, Хуыцауыл иузӕрдион кӕй стӕм, уый тыххӕй нӕм фидӕны ноджы фылдӕр арфӕдзинӕдтӕ кӕй ӕнхъӕлмӕ кӕсы, уый. Апостол Павел ӕппӕт зӕрдӕйӕ бӕллыд ӕнусон царды лӕвармӕ. Фӕлӕ уый зыдта, уыцы лӕвар ӕнцад бадгӕйӕ ӕмӕ ӕнхъӕлмӕ кӕсгӕйӕ кӕй нӕй райсӕн, уый. Павел фыста: «Цӕй тыххӕй ӕз фыдӕбон дӕр кӕнын ӕмӕ тырнын [«ӕппӕт тыхтӕй архайын», НД] Уый хъаруйӕ, кӕцы мӕн мидӕг архайы хъомысджынӕй» (Кол. 1:29). Иегъовӕ Йесойы уылты Павелӕн радта хъару, цӕмӕй ирвӕзынгӕнӕн лӕггаддзинад ӕххӕст кодтаид, ӕмӕ абон махӕн дӕр ратдзӕн ахӕм хъару. Уыцы хъаруйӕ ды дӕр апрелы спайда кӕндзынӕ?
[Рамкӕ 3 фарсыл]
Апрелы хъусын кӕнынмӕ кӕй у дӕ бон сразӕнгард кӕнын?
Дӕ сывӕллоны?
Библи кӕимӕ ахуыр кӕныс, уый?
Рагӕй чи нал хъусын кӕны, ахӕм адӕймаджы?