Иунӕгӕй ӕмӕ бинонтимӕ Библи ахуыр кӕнын ахсджиаг у!
1. Ацы фӕстаг рӕстӕг ныл Разамонӕг совет уӕлдай тынгдӕр цӕмӕн тыхсы?
1 Фыццаг ӕнусы куыд уыд, афтӕ абон дӕр Разамонӕг совет тынг тыхсы Йегъовӕйы адӕмыл (Ап. хъ. 15:6, 28). Стыр бӕллӕхы тар мигътӕ хӕстӕгӕй-хӕстӕгдӕр кӕй кӕнынц, уымӕ гӕсгӕ ӕнӕмӕнг у, цӕмӕй алы хъусынгӕнӕг дӕр йӕхи Йегъовӕйыл тынгдӕр бӕтта. Чиныгахуырӕн нын раздӕр цы рӕстӕг уыди, уымӕй ныр куыд пайда кӕнӕн уыдзӕн? Хорз уаид, алчидӕр нӕ уыцы рӕстӕг йӕ бинонтимӕ Библи куы ахуыр кӕнид. Уыцы рӕстӕгӕй ӕмбаргӕйӕ куы пайда кӕнӕм, уӕд нӕ бон уыдзӕн Хуыцауы Ныхасыл арфдӕр хъуыды кӕнын ӕмӕ нӕ цард уымӕ гӕсгӕ аразын (Пс. 1:1–3; Ром. 11:33, 34).
2. Куыд хъуамӕ спълан кӕнӕм нӕ бинонты ахуыры изӕр?
2 Бинонты ахуыры изӕр. Бинонты хистӕртӕ Йегъовӕйы раз хӕсджын сты, цӕмӕй сӕ бинонтимӕ ӕрвылкъуыри дӕр Библи ахуыр кӕной (Дык. з. 6:6, 7). Бинонтӕ кӕмӕн нӕй, уыдонӕн дӕр сӕ бон у уыцы рӕстӕг Библи ахуыр кӕнын ӕмӕ йӕ иртасын. Фыдрӕстӕг кӕй у, уымӕ гӕсгӕ нӕ алчидӕр хъуамӕ йӕ рӕстӕгӕй, куыд хуыздӕр у, афтӕ пайда кӕна, цӕмӕй Библи ахуыр кӕна, арф ыл хъуыды кӕна ӕмӕ йӕ уырнындзинад фидар кӕна (Еф. 5:15, 16).
3, 4 Библийы ахуырӕн ӕрмӕг кӕм ис бацагурӕн ӕмӕ нӕ зӕрдыл цы хъуамӕ дарӕм?
3 Цы ис ахуыр кӕнӕн? Библийы ахуырӕн ӕрмӕг Индексы кӕнӕ «„Хъахъхъӕнӕн мӕсыг“-ы библиотекӕйы» дискыл куы бацагурӕм, уӕд дзы алчидӕр йӕхицӕн цыдӕр зондӕн райсдзӕн ӕмӕ йын пайда уыдзӕн. Аныхас кӕнӕн ма ис, «Хъахъхъӕнӕн мӕсыг»-ы цы рубрикӕтӕ ис, уыдоныл, зӕгъӕм, «Бинонты амонд цӕмӕй кӕнгӕ у», «Уӕ сывӕллӕтты ахуыр кӕнут», «Нӕ кӕстӕртӕн». «Райхъал ут!»-ы дӕр ис рубрикӕ «Фӕсивӕды фарстатӕ», стӕй ма дзы вӕййы хорз статьятӕ Хуыцауы диссаджы сфӕлдыстады тыххӕй.
4 Библи лӕмбынӕг куы кӕсӕм, уӕд Хуыцауы уагӕвӕрдтӕ ӕмӕ амындтӕ бинонтӕй алкӕмӕн дӕр йӕ хъуыдыйы ӕмӕ йӕ зӕрдӕйы баззайдзысты ӕмӕ сын сӕ царды ӕххуыс кӕндзысты (Дзут. 4:12). Бакӕсӕн ма ис нӕ организацийы уагъд кинонывтӕм ӕмӕ сыл иумӕ аныхас кӕнӕн. Ис ма бирӕ ӕндӕр гӕнӕнтӕ, цӕмӕй Библийы ахуыр алкӕмӕн дӕр цымыдисагдӕр уа. Цӕуылнӕ ис бинонтӕй алкӕйдӕр бафӕрсӕн, цӕуыл сӕ фӕндит аныхас кӕнын ӕмӕ Библийы ахуыр куыд цӕуа, уымӕй?
5. Иунӕгӕй ӕмӕ бинонтимӕ Библи ахуыр кӕнын абон ахсджиаг цӕмӕн у?
5 Ахсджиаг цӕмӕн у? Нӕ уырнындзинад куы фидар кӕнӕм, уӕд нӕ бон уыдзӕн «фидар лӕууын ӕмӕ кӕсын, Йегъовӕ нӕ... куыд фервӕзын кӕндзӕн, уымӕ» (Рац. 14:13). Ныййарджыты тынг хъӕуы Хуыцауы разамынд, цӕмӕй «ацы дуджы хӕлд ӕмӕ зыгъуыммӕ адӕмы ’хсӕн» сӕ сывӕллӕтты хъомыл кӕной (Фил. 2:15). Сывӕллӕттӕн хъӕуы баххуыс кӕнын, цӕмӕй сыл, абон скъолаты цы ӕнӕгъдау зондахаст ис, уый ма бандава (Ӕмб. 22:3, 6). Лӕг ӕмӕ ус хъуамӕ кӕрӕдзимӕ ӕнгомдӕр уой ӕмӕ Йегъовӕимӕ «ӕртӕ тагӕй быд бӕндӕнӕй» баст уой (Еккл. 4:12). Цӕй уӕдӕ, ӕмбаргӕйӕ пайда кӕнӕм, цы рӕстӕг ма баззад, уымӕй ӕмӕ «нӕ удыхъӕд аразӕм нӕ сыгъдӕг уырнындзинадыл»! (Иудӕ 20).