«Бӕстон хъусын кӕнӕм» бирӕуӕладзыгон хӕдзӕртты
1. Цы хауы «хорз хабар... бӕстон хъусын кӕнынмӕ»?
1 Апостол Павелау мах дӕр фӕнды «хорз хабар адӕмӕн бӕстон хъусын кӕнын» (Ап. хъ. 20:24). Уымӕ гӕсгӕ архайӕм нӕ участокты фылдӕр адӕмӕн дзурын Хуыцауы Паддзахады тыххӕй. Кӕмӕн хъусын кӕнӕм, уыдонмӕ хауынц, бирӕуӕладзыгон хӕдзӕртты чи цӕры, уыцы адӕм дӕр. Ахӕм хӕдзӕртты тынг бирӕ адӕм кӕй цӕры, уымӕ гӕсгӕ нын вӕййы бирӕ фадӕттӕ фылдӕр адӕмӕн хорз хабар фехъусын кӕнынӕн.
2. Бирӕуӕладзыгон хӕдзӕртты куы хъусын кӕнӕм, уӕд ӕмбаргӕйӕ цӕмӕн хъуамӕ архайӕм?
2 Давджытӕй ӕмӕ фыдгӕнджытӕй тӕссаг кӕй у, уымӕ гӕсгӕ бирӕуӕладзыгон хӕдзӕртты бахизӕн дуӕрттӕ арӕхдӕр вӕййынц ӕхгӕд, стӕй дзы вӕййы дуаргӕс кӕнӕ видеокамерӕтӕ (2 Тим. 3:1, 2). Гӕнӕн ис, цӕрджытӕ дуаргӕсы бафӕдзӕхсой, цӕмӕй ӕнӕзонгӕ адӕмы мидӕмӕ ма уадза. Йӕ бон у, ӕмӕ нӕ ӕддӕмӕ дӕр рарвита, уӕлдайдӕр та цӕрджытӕй исчи куы хъаст кӕна, уӕд. Уымӕ гӕсгӕ хъуамӕ уӕм ӕмбаргӕ ӕмӕ ӕрхъуыдыджын.
3. Бирӕуӕладзыгон хӕдзӕртты хъусын кӕнын хуыздӕр кӕд у ӕмӕ цӕмӕн?
3 Кӕд хъуамӕ хъусын кӕнӕм. Ӕндӕр участокты цы рӕстӕг фӕхъусын кӕнӕм, афтӕ бирӕуӕладзыгон хӕдзӕртты дӕр хъусын кӕнынӕн ӕппӕты хуыздӕр рӕстӕг у, цӕрджытӕ хӕдзары куы уой, уӕд. Фӕлӕ цӕрджытӕн сӕ фылдӕр хӕдзӕртты куы нӕ уой, уӕд сӕм куы цӕуӕм, уӕд нӕм, гӕнӕн ис, дуаргӕсы зӕрдӕ фехсайа. Хъусынгӕнджытӕй бирӕтӕ цӕрджыты хӕдзары баййафынц изӕрырдӕм, фӕскуыст кӕнӕ сабат ӕмӕ хуыцаубоны фӕссихор. Сӕумӕрайсом сӕм куы бацӕуӕм (уӕлдайдӕр та улӕфты бонты), уӕд нӕ дуаргӕс мидӕмӕ уадзгӕ дӕр нӕ бакӕндзӕн.
4, 5. Домофонтӕ цы хӕдзӕртты ис, уырдӕм куыд у нӕ бон бацӕуын?
4 Мидӕмӕ куыд бацӕуӕм. Хъусын кӕныны размӕ дуаргӕсимӕ хъуамӕ ма дзурӕм. Бахизӕны домофон куы уа, уӕд нӕ бон у цӕрджытимӕ домофонӕй ныхас кӕнын, цалынмӕ нӕ исчи мидӕмӕ нӕ бауадза, уӕдмӕ. Уавӕртӕм гӕсгӕ, чи зоны нӕ бон уа, чи нӕ ’рбауагъта, уыцы адӕймагӕй дарддӕр ма иннӕ фатертӕм дӕр бацӕуын. Фӕлӕ хатт хуыздӕр вӕййы фӕстӕмӕ аздӕхын ӕмӕ иннӕ цӕрджытӕм дӕр домофонӕй фӕдзурын. Хъуамӕ ӕмбаргӕ уӕм ӕмӕ хъуыды кӕнӕм, цал фатермӕ бадзурдзыстӕм, ууыл.
5 Домофонӕй куы фӕдзурӕм, уӕд иуӕй-иу цӕрджыты фӕфӕнды, цӕмӕй сын ӕнӕ ракӕ-бакӕйӕ зӕгъӕм, цӕмӕн ӕрбацыдыстӕм, уый. Дӕхи-иу уӕзданӕй бацамон. Кӕд фатеры хицауӕн йӕ ном кӕнӕ йӕ мыггаг бахизӕны хыгъды фыст у, уӕд ӕм йӕ номӕй дзур. Цыбыртӕй йын зӕгъ, дӕ бацыды сӕр цы у, уый. Иуӕй-иу хъусынгӕнджытӕ сӕ ныхас райдайынц чиныг «Рассуждение»-йӕ комкоммӕ кӕцыдӕр хъуыдытӕ кӕсгӕйӕ.
6. Цы хъуамӕ аразӕм, дуаргӕс нӕ мидӕмӕ куы нӕ уадза, уӕд?
6 Дуаргӕс нӕ мидӕмӕ куы нӕ уадза, уӕд йемӕ дӕр ис аныхас кӕнӕн. Дуаргӕстӕй бирӕты зӕрдӕмӕ цӕуы нӕ литературӕ. Нӕ бон ма у бахизӕны йемӕ Библи ахуыр кӕнын дӕр райдайын. Фӕлӕ нӕ дуаргӕс мидӕмӕ куы бауадза, цӕмӕй, фылдӕр базонын кӕй фӕнды, уыимӕ аныхас кӕнӕм, уӕд уый фӕстӕ иннӕтӕм хъуамӕ ма хойӕм.
7. Цавӕр сумкӕ нӕм хъуамӕ уа?
7 Нӕ конд ӕмӕ нӕ уагахаст. Стыр сумкӕтӕ цӕсты хауынц. Уымӕ гӕсгӕ хуыздӕр у гыццыл сумкӕ хӕссын, кӕнӕ та ӕнӕ сумкӕйӕ цӕуын. Иуӕй-иу хъусынгӕнджытӕ сӕ литературӕ фӕхӕссынц папкӕйы ӕмӕ сӕ Библи та сӕ къухы кӕнӕ сӕ дзыппы.
8. Бирӕуӕладзыгон хӕдзӕртты куыд ис къордтӕй хъусын кӕнӕн?
8 Хорз уаид, бацӕуӕнты кӕнӕ машинӕты лӕууӕндӕтты стыр къордтӕй куы нӕ ӕмбырд кӕниккам – афтӕмӕй адӕмы нӕхимӕ не ’ркӕсын кӕндзыстӕм. Уӕлдай лӕмбынӕг та хъуамӕ уӕм, фыдракӕндтӕ арӕх кӕм сты, ахӕм районты (Ӕмб. 22:3). Зӕгъӕм, дыууӕ кӕнӕ ӕртӕ къордӕн сӕ бон у кӕрӕдзимӕ ’ввахс хъусын кӕнын, цӕмӕй иутӕ кӕцыдӕр дуары раз куы хъусын кӕной, уӕдмӕ сӕм иннӕтӕ та ӕнхъӕлмӕ кӕсой.
9. Нӕхи уӕзданӕй куыд равдисӕм ӕмӕ уый ахсджиаг цӕмӕн у?
9 Мидӕмӕ бахизгӕйӕ-иу нӕ дзабыртӕ асӕрфӕм ӕмӕ-иу нӕ фӕстӕ дуар дзӕбӕх бахгӕнӕм. Афтӕ куы кӕнӕм, уӕд никӕй стыхсын кӕндзыстӕм. Мидӕмӕ куы бацӕуӕм, уӕд комкоммӕ лифтмӕ бахизӕм кӕнӕ нӕ кӕцы уӕладзыгмӕ хъӕуы, уырдӕм схизӕм. Уӕд нӕм никӕй зӕрдӕ фехсайдзӕн.
10. Цӕмӕй асинтыл кӕнӕ бахизӕнты ма хъӕлӕба кӕнӕм, уый тыххӕй цы бакӕнын хъӕуы?
10 Бирӕуӕладзыгон хӕдзӕртты асинтыл дӕр ӕмӕ къӕлидорты дӕр хъӕлӕба тынг фӕхъуысы. Уымӕ гӕсгӕ хъуамӕ дзурӕм сабыр, фӕлӕ нӕ хӕдзары хицау куыд хъуса, афтӕ. Не ’мбалимӕ дӕр хъуамӕ ныхас кӕнӕм сабыр ӕмӕ уӕзданӕй, цӕмӕй нӕм цӕрджыты зӕрдӕ ма фехсайа. Цӕмӕй цӕрджыты ма стыхсын кӕнӕм, уый тыххӕй хъуамӕ иу уӕладзыджы фӕд-фӕдыл алы дуармӕ ма хойӕм, фӕлӕ уал нырма, иу кӕроны цы дуар ис, уырдӕм бахойӕм, стӕй та иннӕ кӕрон цы дуар ис, уымӕ. Дуар тынг кӕнӕ бирӕ рӕстӕг куы хойӕм, уӕд, мидӕгӕй чи ис, уыдон гӕнӕн ис тӕрсгӕ дӕр фӕкӕной.
11. Дуарыл «глазок» куы уа, уӕд куыд архайдзыстӕм?
11 Дуарыл «глазок» куы уа, уӕд афтӕ слӕу, цӕмӕй хӕдзары хицау уына дӕу дӕр ӕмӕ де ’мбалы дӕр. «Глазокмӕ» комкоммӕ кӕс, ӕмӕ куы бамбарай, чидӕр дӕм кӕсы, уӕд ын салам ратт ӕмӕ дӕ ныхас райдай. Хӕдзары хицау дӕ куы бафӕрса чи дӕ, зӕгъгӕ, уӕд ын дӕ ном ӕмӕ де ’мбалы ном зӕгъ. Уӕд, чи зоны, хӕдзары хицау дуар бакӕна. Дуар куы нӕ бакӕна, уӕд дӕр дӕ ныхас адарддӕр кӕн.
12. Цӕмӕй нӕ литературӕ къӕхты бын ма уа ӕмӕ нӕ ма хъаст кӕной, уый тыххӕй куыд хъуамӕ архайӕм?
12 Хӕдзары куы ничи уа. Арӕх дуаргӕстӕ фӕхъаст кӕнынц, дуӕртты раз цы литературӕ ныууадзӕм кӕнӕ зӕххыл чи вӕййы, уыдон сӕ ӕфснайын кӕй фӕхъӕуы. Дуӕртты цы литературӕ бавӕрӕм, уый ӕнцонтӕй зӕхмӕ ӕрхауы ӕмӕ къӕхты бын фӕвӕййы. Уымӕ гӕсгӕ, хӕдзары куы ничи уа, уӕд хуыздӕр уыдзӕн, нӕ литературӕ, ӕддӕмӕ кӕм нӕ зына, ахӕм ран бавӕрын.
13. Хӕдзары хицау мӕсты куы уа, уӕд нӕхи куыд хъуамӕ дарӕм?
13 Хӕдзары хицау мӕсты куы уа. Хӕдзары хицау мӕсты куы уа ӕмӕ нӕ дуаргӕсӕн ӕддӕмӕ куы ’рвитын кӕна, уӕд хуыздӕр уаид уыцы уӕладзыгӕй ацӕуын ӕмӕ ӕндӕр хатт ӕрбаздӕхын. Иуӕй-иу хатт та раст уаид уыцы хӕдзарӕй бынтондӕр ацӕуын, цӕмӕй нӕм дуаргӕсӕй ныхас ма ӕрхауа. Хӕдзары хицау немӕ тызмӕгӕй куы нӕ ныхас кӕна, уӕддӕр ын йӕ хӕдзары номыр хъӕуы фӕнысан кӕнын ӕмӕ йӕ карточкӕйы бавӕрын. Ахӕм адӕймаджы хистӕр нӕлгоймӕгтӕ рӕстӕгӕй-рӕстӕгмӕ бӕрӕг кӕндзысты, цӕмӕй базоной, йӕ хъуыды аивта ӕви нӕ.
14, 15. Участокӕй нӕ куы расурой, уӕд куыд хъуамӕ кӕнӕм?
14 Куы нӕ расурой. Бирӕуӕладзыгон хӕдзары дуаргӕс кӕнӕ нын хъахъхъӕнӕг куы зӕгъа, цӕмӕй уыцы хӕдзарӕй ацӕуӕм, уӕд хъуамӕ ӕнӕ радзур-бадзурӕй уырдыгӕй ацӕуӕм. Мах нӕ фӕнды, цӕмӕй нӕм дзырд ӕрхауа кӕнӕ нӕм ӕртхъирӕн кӕной тӕрхондонмӕ кӕнӕ милицӕмӕ раттынӕй. Дуаргӕстӕ фылдӕр хатт нӕ ныхмӕ нӕ вӕййынц, фӕлӕ сӕ куыст цы домы, уый фӕкӕнынц.
15 Дуаргӕс нӕ мидӕмӕ куы нӕ уадза, уӕд нӕ бон у уӕзданӕй ӕмӕ хӕларзӕрдӕйӕ бамбарын кӕнын, нӕ цыды сӕр цы у, уый (1 Пет. 3:15). Мах ӕмбарӕм, уымӕн йӕ хӕс кӕй у, цӕмӕй хӕдзары цӕрджытӕ ӕдас ӕмӕ ӕдыхст уой. Чи зоны нӕ мидӕмӕ бауадза. Фӕлӕ нӕ куы нӕ бауадза, уӕд уырдыгӕй ацӕуӕм. Уавӕртӕ куы амоной, уӕд нӕ бон у дуаргӕсӕй бар ракурын, цӕмӕй рӕстӕгӕй-рӕстӕгмӕ нӕ литературӕ бахизӕны кӕнӕ ӕндӕр ран уадзӕм (Кол. 4:6). Уыцы хабӕрттӕ хъуамӕ уацамындӕн дзуапдӕттӕг цӕстдарӕг зона.
16. Цы хъуамӕ аразӕм, цавӕрдӕр хӕдзармӕ нӕ бон бахауын куы нӕ уа, уӕд?
16 Бирӕ рӕстӕг куы рацӕуа, уӕд, чи зоны, хъусынгӕнджытӕй уыцы хӕдзары исчи хъусын кӕна. Кӕд исты зындзинӕдтӕ фӕзына, уӕд хистӕр нӕлгоймӕгтӕ филиалӕй ӕххуыс ракурдзысты. Цавӕрдӕр хӕдзармӕ бацӕуӕн куы нӕ уа, уӕд бацархайын хъӕудзӕн, цӕмӕй цӕрджытӕн хорз хабар хъусын кӕной телефонӕй кӕнӕ та писмоты уылты. Иуӕй-иу хъусынгӕнджытӕ фӕхъусын кӕнынц уынджы, ахӕм хӕдзармӕ ’ввахс. Уыдон фӕхъусын кӕнынц райсомӕй кӕнӕ изӕры, адӕм куыстмӕ ӕмӕ куыстӕй куы фӕцӕуынц, уӕд.
17. Бирӕуӕладзыгон хӕдзӕртты хъусын кӕнын ахсджиаг цӕмӕн у?
17 Ацы фыддунейӕн йӕ кӕрон ӕрхӕстӕг ис. Йегъовӕмӕ йӕ номӕй чи кува, ӕрмӕстдӕр уыдон фервӕздзысты. «Фӕлӕ кӕуыл нӕ баууӕндыдысты, уымӕ куыд хъуамӕ кувой? Ӕмӕ кӕй тыххӕй нӕ фехъуыстой, ууыл куыд баууӕндой? Ӕмӕ куы ничи хъусын кӕна, уӕд хъусгӕ дӕр куыд фӕкӕндзысты?» (Ром. 10:13, 14). Ахӕм хӕдзӕртты дӕр цӕрынц, «йӕ зӕрдӕ ӕнусон цардмӕ здӕхт кӕмӕн у», ахӕм адӕм (Ап. хъ. 13:48). Ӕмбаргӕйӕ куы архайӕм, уӕд уыцы адӕмӕн дӕр хорз хабар фехъусын кӕндзыстӕм.