Библийӕ арӕхстджынӕй пайда кӕн
1. Библийӕ пайда кӕнын хорз цӕмӕн у?
1 Уацамынды Хуыцауы Ныхасӕй арӕхстджынӕй куы пайда кӕнӕм, уӕд нӕм адӕм хуыздӕр хъусдзысты, стӕй афтӕмӕй хурмӕ хӕсдзыстӕм мӕнг ахуырӕдтӕ ӕмӕ адӕмы ӕрымысгӕ ӕгъдӕуттӕ (2 Тим. 2:15; 1 Пет. 3:15).
2. Цы нын баххуыс кӕндзӕн, цӕмӕй-иу Библийы стихтӕ тагъд ссарӕм?
2 Библи хуыздӕр базон. Цавӕрдӕр кусӕнгарз цас хуыздӕр базонай, уыйас дзы арӕхстджындӕрӕй архайдзынӕ. Библи ӕнӕхъӕнӕй куы бакӕсай, уӕд ын йӕ сӕйраг хъуыды зондзынӕ. Уый ма дын баххуыс кӕндзӕн, цӕмӕй стихтӕ бахъуыды кӕнай ӕмӕ-иу сӕ тагъд ссарай. Библи цас хуыздӕр зонай, уыйас зӕрдиагдӕрӕй ӕмӕ ныфсджындӕрӕй дзурдзынӕ хӕдзарӕй хӕдзармӕ хъусын кӕнгӕйӕ ӕмӕ ӕндӕр уавӕрты (1 Фес. 1:5).
3, 4. а) Библи хуыздӕр базонӕн куыд ис? ӕ) Дӕуӕн та цы ’ххуыс кӕны, цӕмӕй Библи хуыздӕр базонай?
3 Ӕмбырды рӕстӕг-иу алы хатт дӕр Библи гом кӕн. Хӕдзары Библи куы фӕахуыр кӕныс ӕмӕ ӕмбырдтӕм куы фӕцӕттӕ кӕныс, уӕд-иу стихтӕ бакӕн ӕмӕ-иу ахъуыды кӕн, куыд сӕ спайда кӕнӕн ис, ууыл. Бирӕты хъуыдымӕ гӕсгӕ, Библийӕн йӕхи кӕй фӕкӕсынц, компьютеры кӕнӕ гӕххӕттыл нӕ, фӕлӕ, уый руаджы уацамынды стихтӕ рӕвдздӕр ссарынц (Иоан. 14:26).
4 Иуӕй-иу бинонтӕ рӕстӕг рахицӕн кӕнынц, цӕмӕй Библийы стихтӕ бахъуыды кӕной. Уый тыххӕй гӕххӕттыл иуырдыгӕй ныффыссынц стих, иннӕрдыгӕй та, кӕм фыст ис, уый. Афтӕмӕй базонынц, стих кӕнӕ, кӕм фыст ис, уый бахъуыды кодтой, ӕви нӕ. Уацамынды нӕ ныхас куыд райдайдзыстӕм ӕмӕ адӕймагӕн йӕ фарстайӕн Библийӕ цавӕр дзуапп ратдзыстӕм, уый-иу куы афӕлварӕм, уӕд дӕр арӕхстджындӕр кӕндзыстӕм.
5. Цӕмӕн нӕ фӕнды Библийӕ арӕхстджынӕй пайда кӕнын?
5 Библиимӕ иу чиныг дӕр абарӕн нӕй. Ӕрмӕстдӕр ацы чиныг дӕтты адӕмӕн ахӕм «зонд, цӕмӕй фервӕзой» (2 Тим. 3:15). Адӕмӕн сӕ фылдӕр нӕ зонынц, цы диссаджы хӕзнатӕ дзы ӕмбӕхст ис, уый. Уымӕ гӕсгӕ хъумӕ архайӕм, цӕмӕй Библийӕ арӕхстджынӕй пайда кӕнӕм ӕмӕ сын ӕвдисӕм, цы фыст дзы ис, уый (Ӕмб. 2:1–5).