Царды нын фыццаг бынаты цы ис?
1. Хуыцауӕн лӕггад кӕнын Чырыстийӕн ахсджиаг кӕй уыд, уый цӕмӕй бӕрӕг у?
1 Чырыстийӕн царды фыццаг бынаты уыд Хуыцауӕн лӕггад кӕнын. Йесо йӕхиуыл нӕ ауӕрста, сӕдӕгай километртӕ-иу фӕцыд Палестинӕйы зӕххыл, цӕмӕй, гӕнӕн уӕвгӕйӕ, фылдӕр адӕмӕн хорз хабар фехъусын кодтаид. Хуымӕтӕг цард кӕй кодта, уый фӕрцы йӕ бон уыд фылдӕр рӕстӕг Хуыцауӕн лӕггад кӕнын (Матф. 8:20). Иухатт ын адӕм куы дзырдтой, цӕмӕй уым баззадаид ӕмӕ сын сӕ рынчынты сдзӕбӕх кодтаид, уӕд сын загъта: «Иннӕ горӕтты дӕр мӕ хъӕуы Хуыцауы паддзахады тыххӕй хорз хабар фехъусын кӕнын, уымӕн ӕмӕ уый тыххӕй ӕрвыст дӕн» (Лук. 4:43).
2. Хуыцауӕн лӕггад кӕнын Йесойӕн афтӕ ахсджиаг цӕмӕн уыд?
2 Хуыцауӕн лӕггад кӕнын Йесойӕн афтӕ ахсджиаг цӕмӕн уыд? Фыццаджыдӕр хъуыды кодта Йегъовӕйы ном срухс кӕныныл (Матф. 6:9). Йесо уарзта йӕ уӕларвон Фыды, ӕмӕ йӕ фӕндыд, цӕмӕй йын ӕххӕст кодтаид йӕ фӕндон ӕмӕ йӕ алы фӕдзӕхст дӕр (Иоан. 14:31). Уымӕй уӕлдай, Чырысти уарзта адӕмы ӕмӕ йӕ фӕндыд, куы сын баххуыс кодтаид (Матф. 9:36, 37).
3. Хуыцауӕн лӕггад кӕнын нын фыццаг бынаты кӕй ис, уый цӕмӕй бӕрӕг уыдзӕн?
3 Чырыстийы фӕзмӕм. Чырыстийау нын Хуыцауӕн лӕггад кӕнын фыццаг бынаты уа, уый ӕнцон нӕу, уымӕн ӕмӕ нын ацы дуне нӕ рӕстӕг ӕнӕвгъауӕй исы ӕмӕ нӕ бирӕ цӕмӕйдӕрты къуылымпы кӕны (Матф. 24:37–39; Лук. 21:34). Уымӕ гӕсгӕ хъуамӕ «бӕлвырд кӕнӕм», ахсджиагдӕр цы у, уый, ӕмӕ рӕстӕг арӕм, цӕмӕй-иу нӕхи уацамындмӕ бацӕттӕ кӕнӕм ӕмӕ ӕдзух хорз хабар хъусын кӕнӕм (Фил. 1:10). Мах архайӕм, цӕмӕй хуымӕтӕг цард кӕнӕм ӕмӕ ацы дунейӕ ӕххӕстӕй ма пайда кӕнӕм (1 Кор. 7:31).
4. Ахсджиаг цы у, уый абон фыццаг бынаты ’вӕрын цӕмӕн хъӕуы?
4 Ӕмбаргӕ адӕймаг рӕстӕгӕн аргъ кӕнын зоны. Рӕстӕг ын бирӕ куы нӕ вӕййы, уӕд фыццаг саразы, ахсджиагдӕр цы хъуыддаг вӕййы, уый. Зӕгъӕм, куы базона, тыхджын дымгӕ кӕй ӕрбацӕуы, уӕд йӕ рӕстӕг ӕмӕ йӕ хъарутӕ сараздзӕн, цӕмӕй йӕ бинонты бахъахъхъӕна ӕмӕ хабар йӕ сыхӕгтӕн фехъусын кӕна. Афтӕ ахсджиаг чи не сты, уыцы хъуыддӕгтӕ та уал фӕлӕудзысты. Армагеддоны тыхдымгӕ куы радыма, уымӕ бирӕ рӕстӕг нал баззад (Соф. 1:14–16; 1 Кор. 7:29). Цӕмӕй нӕхӕдӕг дӕр ӕмӕ нӕм чи хъусы, уыдон дӕр фервӕзой, уый тыххӕй хъуамӕ ӕдзухдӕр нӕхимӕ кӕсӕм, стӕй нӕ хъус дарӕм, иннӕтӕн куыд ӕмӕ цы амонӕм, уымӕ – ӕмбырды дӕр ӕмӕ уацамынды дӕр (1 Тим. 4:16). Нӕ ирвӕзындзинад баст у, Хуыцауӕн лӕггад кӕнын нын алкӕддӕр фыццаг бынаты ис ӕви нӕ, ууыл.