Ног рубрикӕ Библи ахуыр кӕнын райдайынӕн
1. Цавӕр ног рубрикӕ фӕзындзӕн ӕмӕ нын уый руаджы цы ӕнтысдзӕн?
1 Январӕй фӕстӕмӕ брошюрӕйы фӕзындзӕн ног рубрикӕ, ӕмӕ нын ӕххуыс кӕндзӕн адӕмимӕ Библи ахуыр кӕнын райдайынӕн. Уыцы рубрикӕ хуыйндзӕн «Хуыцауы Ныхас хуыздӕр базон», зӕгъгӕ. Кӕй зӕгъын ӕй хъӕуы, алкӕмӕндӕр ӕхсызгон уыдзӕн ацы рубрикӕ кӕсын. Уый руаджы адӕмимӕ ӕнцонтӕй уыдзӕн ныхас райдайӕн.
2. Ног рубрикӕ куыд арӕзт уыдзӕн?
2 Ногӕй дзы цы уыдзӕн. Сӕргӕндтӕ ӕмӕ дӕлсӕргӕндтӕ уыдзысты фарстаты хуызы, ӕмӕ-иу сӕ уыдзӕн раттӕн, кӕимӕ ныхас кӕнӕм, уымӕ. Фыст ма дзы уыдзӕн Библийӕ стихтӕ, ӕмӕ кӕимӕ ныхас кӕнӕм, уымӕн сӕ йӕ бон уыдзӕн Библийӕ кӕсын. Абзацтӕ цыбыр кӕй уыдзысты, уымӕ гӕсгӕ сыл уыдзӕн дуары раз аныхас кӕнӕн дӕр. Алы абзац дӕр амоны, Библи кӕй фӕрцы фӕахуыр кӕнӕм, уыцы чиныгмӕ, ӕмӕ дӕ бон уыдзӕн уыцы чиныгмӕ рахизын, гӕнӕн дын-иу куы фӕуа, уӕд.
3. Хӕдзарӕй-хӕдзармӕ хъусынгӕнгӕйӕ нӕ бон куыд у адӕймагимӕ Библи ахуыр кӕнын райдайын?
3 Куыд дзы ис пайда кӕнӕн. Брошюрӕ куы дӕттай, уӕд адӕймагмӕ раттӕн ис, хъуыдытыл ӕй чи бафтауа, ахӕм фарстатӕ. Зӕгъӕм, фыццаг рубрикӕ уыдзӕн, Библи цы пайда у, уый тыххӕй. Адӕймаджы-иу бафӕрс: «Куыд хъуыды кӕныс, Библи Хуыцауы Ныхас у ӕви ӕнӕуи дзӕбӕх чиныг? [Бауадз ӕй дзуапп раттын.] Мӕнӕ ма ӕркӕс ам цы фыст ис, уымӕ». Фыццаг фарста-иу ӕм ратт, стӕй-иу фыццаг абзац ӕмӕ стих бакӕс. Уый фӕстӕ та фарста ногӕй бакӕс, ӕмӕ йын зӕгъ, цӕмӕй йӕ хъуыды зӕгъа. Уавӕрмӕ гӕсгӕ-иу ӕрмӕгӕй равзарут, уӕ бон цас суа, уыйбӕрц. Куы цӕуай, уӕд-иу зӕгъ, иннӕ хатт та кӕцы фарстайыл аныхас кӕндзыстут, уый, ӕмӕ-иу баныхас кӕнут, иннӕ хатт ӕм кӕд ӕрбацӕудзынӕ, ууыл. Алы къуыри дӕр-иу ӕм ӕрбацу, цӕмӕй-иу ноджы фылдӕр ӕрмӕг равзарат, цалынмӕ йын ног брошюрӕ не ’рбахӕссай, уӕдмӕ. Кӕнӕ йын дӕ бон у комкоммӕ Библи ахуыр кӕныны тыххӕй зӕгъын. Уый фӕстӕ-иу ын уыцы статьямӕ гӕсгӕ равдис, Библи куыд фӕахуыр кӕнӕм, уый.
4. Дыккаг бацыдты рӕстӕг дӕ бон куыд у ацы статьятӕй пайда кӕнын?
4 Ацы рубрикӕйӕ ма дӕ бон уыдзӕн пайда кӕнын, адӕймагмӕ литературӕ куы хӕссай ӕмӕ дыккаг бацыдтӕ куы кӕнай, уӕд дӕр. Дӕ бон у дӕ ныхас афтӕ райдайын: «Ацы брошюрӕйы фӕзынд ног рубрикӕ. Куыд дзы ис пайда кӕнӕн, уый дын равдисдзынӕн». Мах Хуыцаумӕ кувӕм, цӕмӕй ацы ног рубрикӕйы фӕрцы бирӕ адӕм «рӕстдзинад цы у, уый бӕлвырдӕй базоной ӕмӕ фервӕзой» (1 Тим. 2:4).