Уынджы ӕнтыстджынӕй хъусын кӕнын
1. Нӕ бон Йесойы цавӕр хъуыддаджы у фӕзмын?
1 Йесо зӕххыл куы уыд, уӕд-иу не ’фсӕрмы кодта адӕмимӕ ныхас кӕнын,– фӕнды сыл фӕндагыл фембӕлдаид, фӕнды ӕндӕр ран (Лук. 9:57–61; Иоан. 4:7). Йесойы фӕндыд ахсджиаг хабар фылдӕр адӕмӕн фехъусын кӕнын. Абон уынджы хъусын кӕнын у хорз фадат, цӕмӕй адӕмӕн ӕххуыс кӕнӕм Хуыцауы зонд райсынӕн (Ӕмб. 1:20). Ӕмӕ ӕнтыстджын уӕд уыдзыстӕм, нӕхӕдӕг-иу куы фӕраздӕр уӕм ӕмӕ ӕмбаргӕйӕ куы архайӕм.
2. Уынджы хъусын кӕнгӕйӕ-иу цӕмӕн хъуамӕ фӕраздӕр уӕм?
2 Фӕраздӕр-иу у. Хуыздӕр уаид, уыцы иу ран куы нӕ лӕууис кӕнӕ куы нӕ бадис, зӕгъгӕ мӕм исчи бацӕудзӕн, фӕлӕ-иу адӕммӕ дӕхӕдӕг куы бацӕуис. Адӕймагмӕ-иу дӕ мидбылты бахуд ӕмӕ-иу йемӕ фӕлмӕнӕй, уӕзданӕй сныхас кӕн. Искӕимӕ куы хъусын кӕнай, уӕд хуыздӕр уыдзӕн, адӕмимӕ хицӕнтӕй куы ныхас кӕниккат. Исчи дӕм куы байхъуса, уӕд хорз уаид, куы-иу бацархаис, цӕмӕй ӕндӕр хатт дӕр йемӕ аныхас кӕнай. Аив куы уа, уӕд уӕ ныхасы кӕрон дӕ бон у адӕймаджы уӕзданӕй бафӕрсын, зӕгъгӕ ма нӕ бон кӕд у нӕ ныхас адарддӕр кӕнын. Иуӕй-иу хотӕ ӕмӕ ӕфсымӕртӕ уынджы арӕх уыцы иу ран кӕй фӕхъусын кӕнынц, уымӕ гӕсгӕ сӕ бон вӕййы уыцы иу адӕмимӕ цалдӕр хатты дӕр аныхас кӕнын ӕмӕ сын рӕстдзинады тыххӕй фылдӕр цыдӕртӕ радзурын.
3. Уынджы хъусын кӕнгӕйӕ ӕмбаргӕдзинад куыд ӕвдисдзыстӕм?
3 Ӕмбаргӕ у. Алы хатт дӕр-иу лӕмбынӕг хъуыды кӕн, уынджы кӕм лӕудзынӕ ӕмӕ-иу кӕмӕ бацӕудзынӕ, ууыл. Алы адӕймаджы дӕр нӕ хъӕуы уромын. Къӕрцхъус у. Зӕгъӕм, адӕймаг тагъд куы кӕна, уӕд хуыздӕр уаид, куы нӕ йӕ ӕрлӕууын кӕнис. Дуканиты, кафеты, базарты, куыстуӕтты ӕмӕ ӕндӕр ахӕм рӕтты куы хъусын кӕнай, уӕд дӕ хъӕуы ӕмбаргӕйӕ архайын, цӕмӕй сын сӕ хицӕутты ма смӕсты кӕнай. Хорз уаид, мидӕмӕ чи цӕуы, уыдоны нӕ, фӕлӕ ӕддӕмӕ чи рахизы, уыдоны-иу куы ӕрлӕууын кӕнис. Адӕймагмӕ-иу афтӕ бацу, цӕмӕй-иу ма фӕтӕрса кӕнӕ ма фесхъиуа. Ӕмбаргӕдзинад ма дӕ бахъӕудзӕн искӕмӕн литературӕ дӕтгӕйӕ дӕр. Адӕймаг дӕм зӕрдиагӕй куы нӕ байхъуса, уӕд ын брошюрӕты бӕсты раттӕн ис трактат.
4. Уынджы хъусын кӕнын хорз цӕмӕй у ӕмӕ нын нӕ циныл цин куыд ӕфтауы?
4 Уынджы хъусын кӕнгӕйӕ цыбыр рӕстӕгмӕ нӕ бон у байтауын бирӕ мыггӕгтӕ – рӕстдзинады мыггӕгтӕ (Еккл. 11:6). Уынджы кӕимӕ аныхас кӕнӕм, уыдонӕй иуӕй-иутӕ, гӕнӕн ис, ӕмӕ разыной, хӕдзары кӕй нӕ баййафӕм, уыдон. Уӕдӕ нӕ хъарутӕ уынджы хъусын кӕнынмӕ куы саразӕм, уӕд уыдзыстӕм ӕнтыстджын ӕмӕ нӕ циныл цин ӕфтдзӕн.