Хъусын кӕнӕм ӕхсӕнадон бынӕтты
1. Фыццаг ӕнусы ахуыргӕнинӕгтау чырыстӕттӕ абон дӕр ӕхсӕнадон бынӕтты куыд хъусын кӕнынц ӕмӕ уый фӕрцы сӕ къухы цы ’фты?
1 Йесойы ахуыргӕнинӕгтӕ фыццаг ӕнусы куыд кодтой, афтӕ абон дӕр чырыстӕттӕ архайынц, адӕмыл кӕмфӕнды ма сӕмбӕлой, семӕ хорз хабары тыххӕй ныхас кӕнын (Ап. к. 16:13; 17:17; 20:20, 21). Ӕмӕ сӕ фыдӕбон дзӕгъӕлы нӕу – арӕх афтӕмӕй ссарынц, хӕдзары баййафӕн кӕй нӕй, ахӕм дзӕбӕх адӕймӕгты.
2. Ӕхсӕнадон бынӕтты хъусынгӕнгӕйӕ нӕ стыр ӕмбаргӕдзинад цӕмӕн хъӕуы ӕмӕ цӕмӕй уыцы куыст фӕткыл уа, уый тыххӕй нӕ бон цы у саразын?
2 Фӕлӕ ӕхсӕнадон бынӕтты хъусынгӕнгӕйӕ хъӕуы стыр ӕмбаргӕдзинад – архайын хъӕуы арӕхсгӕ, адӕм нӕм куыд нӕ ныккӕсой. Зӕгъӕм, цалдӕрӕй уыцы иу ран куы хъусын кӕнӕм кӕнӕ уыцы иу куыстуатмӕ куы бацӕуӕм, уӕд нӕ адӕм стыхсдзысты. Ӕмӕ уый та, цы хъуыддаджы лӕуд стӕм, уымӕн къуылымпыйы хос цы уа, ӕндӕр ын ном не скӕндзӕн. Уӕдӕ цы саразӕн ис, цӕмӕй афтӕ ма уа? Ӕхсӕнадон бынӕттӕ бирӕ цы ӕмбырдтӕн ис, уыдонӕй иуӕй-иутӕ афтӕ бакодтой, ӕмӕ алы ахӕм бынатӕй дӕр сарӕзтой хицӕн участок (1 Кор. 14:40). Стӕй ма, цӕмӕй уыцы куыст фӕтк ӕмӕ ӕгъдауыл уа, уый тыххӕй хорз уаид, ӕмӕ нӕ ӕмбырдмӕ цы хауы, ӕрмӕстдӕр уым куы хъусын кӕниккам – иу нын ӕмбырды комитет ма зӕгъӕд, иннӕ ӕмбырдӕн ӕххуыс хъӕуы, зӕгъгӕ, ӕндӕр. (Кӕс km 11/98 6 ф., 18, 19 абз.)
3. Ӕхсӕнадон бынӕтты хъусын кӕнгӕйӕ иуӕй-иутӕн адӕмимӕ аныхас кӕнын куыд рауайы?
3 Куыд ис ныхас райдайӕн. Йесо цъайы раз сылгоймагимӕ куы ныхас кодта, уӕд райдыдта хуымӕтӕг цӕмӕйдӕр ӕмӕ дарддӕр йӕ ныхас нывӕзта, сылгоймаджы ӕцӕгад базонын фӕндыд, уый куыд бӕрӕг кодта, афтӕ (Иоан. 4:7–26). Абон дӕр кӕцыдӕр уавӕрты хорз у ныхас афтӕ райдайын. Хъусынгӕнджытӕй иуӕй-иутӕ зӕгъынц, ӕхсӕнадон бынӕтты уайтагъд Библийӕ дзурын кӕй нӕ райдайынц, фӕлӕ уал фыццаг адӕймагӕн салам раттынц ӕмӕ йӕ цӕмӕйдӕрты афӕрстытӕ кӕнынц. Уый фӕрцы сын ӕнцондӕр вӕййы, цӕуыл ӕмӕ сӕ куыд хъӕуы ныхас кӕнын, уый бамбарын. Адӕмӕн сӕ мӕт, сӕ сагъӕс цы вӕййы, уыдон дӕр уый кой скӕнынц ӕмӕ сын хорз ныхас бацайдагъ вӕййы. Адӕймаг цӕмӕй тыхсы, уый тыххӕй куы фӕдзуры, уӕд ӕм лӕмбынӕг фӕхъусынц. Уӕдмӕ ныхас сабыргай ахизы, Хуыцауы Ныхас цы ныфс дӕтты, уымӕ (Ром. 15:4).
4. Фылдӕр базонын кӕй фӕнды, уыдонӕн дарддӕр куыд ис баххуыс кӕнӕн?
4 Кӕимӕ аныхас кодтам, уыдоны ма рох кӕнӕм. Зӕгъгӕ, адӕймагимӕ дзӕбӕх аныхас кодтам, уӕд нӕ хъӕуы ӕппӕт дӕр саразын, цӕмӕй ма йемӕ уый фӕстӕ дӕр сӕмбӕлӕм. Куыд? Куы аныхас кӕнат, уӕд дӕ бон у, ӕмӕ дӕ фыссӕн чиныг сисай ӕмӕ йын зӕгъай: «Ӕхсызгон мын уыди демӕ аныхас кӕнын. Ӕндӕр хатт нӕ ныхас адарддӕр кӕнӕм, уымӕн исты гӕнӕн ис?» Кӕнӕ «Иу журнал бакастӕн, ӕмӕ мӕ фӕнды, ды дӕр ӕй куы бакӕсис. Мӕнмӕ гӕсгӕ, дӕ зӕрдӕмӕ дӕр фӕцӕудзӕн. Ӕрмӕст дын ӕй куыд раттон? Мӕ бон у, ӕмӕ дӕм ӕй хӕдзармӕ, йе та куыстмӕ бахӕссон?» Иуӕй-иу хъусынгӕнджытӕ та адӕймаджы комкоммӕ бафӕрсынц йӕ телефоны номырӕй. Ӕмӕ бирӕтӕ «нӕ» нӕ фӕзӕгъынц.
5. Ӕхсӕнадон бынӕтты хъусынгӕнгӕйӕ нӕ нысан алкӕддӕр цы хъуамӕ уа?
5 Ӕхсӕнадон бынӕтты кӕуыл сӕмбӕлӕм, уыдонӕй бирӕтӕ райдайынц Библи ахуыр кӕнын. Семӕ ахуыр кӕнӕн ис сӕхимӕ хӕдзары, куысты, уынджы кӕнӕ парчы искуы, йе та телефонӕй. Уӕдӕ, ӕхсӕнадон бынӕтты хъусынгӕнгӕйӕ, нӕ нысан алкӕддӕр уӕд адӕймагимӕ Библи ахуыр кӕнын райдайын.