Ног мадзӕлттӕ, адӕм кӕм вӕййы, ахӕм рӕтты хъусын кӕнынӕн
1. Фыццаг ӕнусы чырыстӕттӕ нын фӕзминаг цӕмӕй сты?
1 Фыццаг ӕнусы чырыстӕттӕ ӕрмӕст хӕдзарӕй-хӕдзармӕ нӕ хъусын кодтой, фӕлӕ ма адӕм ноджыдӕр кӕм уыди, уым дӕр (Хъуыд. 20:20). Зӕгъӕм, цыдысты-иу кувӕндонмӕ, уымӕн ӕмӕ зыдтой, бирӕ адӕм дзы кӕй вӕййы (Хъуыд. 5:42). Апостол Павел Афинты куы уыди, уӕд алы бон дӕр хъусын кодта базары (Хъуыд. 17:17). Абон мах дӕр хорз хабар сӕйраджыдӕр хъусын кӕнӕм хӕдзарӕй-хӕдзармӕ. Фӕлӕ ма хъусын кӕнӕм, адӕмыл фембӕлӕн кӕм ис, уым дӕр, зӕгъӕм, машинӕты лӕууӕндӕтты, куыстуӕтты, паркты, стыр уынгты ӕмӕ ӕндӕр рӕтты. Алы хъусынгӕнӕджы дӕр фӕразӕнгард кӕнынц, цӕмӕй, бирӕ адӕм кӕм вӕййы, ахӕм рӕтты, гӕнӕн уӕвгӕйӕ, хъусын кӕна. Ӕмӕ ныр бирӕтӕн фадат уыдзӕн, цӕмӕй спайда кӕной, адӕм кӕм вӕййы, ахӕм рӕтты хъусын кӕнынӕн цы дыууӕ ног мадзалы фӕзынд, уыдонӕй.
2. 2011 азы ноябры цавӕр ног мадзалӕй райдыдтам пайда кӕнын?
2 Ног мадзал стыр горӕтты хъусын кӕнынӕн. 2013 азы «Ӕрвылазон чиныджы» 16 ӕмӕ 17 фӕрстыл фыст ис, 2011 азы ноябры Нью-Йорчы, бирӕ адӕм кӕм вӕййы, ахӕм рӕтты хъусын кӕнынӕн ног мадзалӕй кӕй спайда кодтам. Стъӕлттыл ӕмӕ-иу цӕлхытыл арӕзт стендтыл сӕвӕрдтам литературӕ алыхуызон ӕвзӕгтыл, стӕй, адӕмы ӕргом йӕхимӕ чи здахы, ахӕм нывтӕ. Уыцы рӕтты алы бон дӕр вӕййы мингай адӕм, уыимӕ, хъахъхъӕнгӕ кӕй кӕнынц, ахӕм хӕдзӕртты чи цӕры кӕнӕ, хӕдзары зын баййафӕн чи у, ахӕм адӕм дӕр. Нӕ литературӕ дуне адӕмы бацымыдис кодта. Ӕрмӕст иу мӕймӕ апарахат кодтам 3 797 журналы ӕмӕ 7 986 чиныджы. Бирӕтӕ загътой, цӕмӕй семӕ Библи ахуыр кӕнын райдыдтаиккам. Нӕ сӕйраг нысан уыди фылдӕр адӕмимӕ Библи ахуыр кӕнын райдайын, ӕмӕ-иу исчи йӕ адрис куы ныууагъта, уӕд-иу ӕй уайтагъд радтам, кӕй территоримӕ хауди, уыцы ӕмбырдмӕ.
3. Ацы ног мадзалӕй кӕм пайда кӕндзысты?
3 Ацы ног мадзал ахӕм хорз тыллӕг кӕй ӕрхаста, уымӕ гӕсгӕ дзы ныр пайда кӕнынц ӕгас дунейы дӕр стыр горӕтты. Бынӕттон филиалтӕ аскъуыддзаг кӕнынц, хуыздӕр кӕцы горӕтты уыдзӕн ног мадзалӕй спайда кӕнын. Уыцы горӕтты хъуамӕ уа бирӕ вокзалтӕ, куыстуӕттӕ ӕмӕ бирӕуӕладзыгон хӕдзӕрттӕ, стӕй, бирӕ адӕм кӕм уа, ахӕм уынгтӕ. Ног мадзалӕй цы ӕмбырдтӕ пайда кӕндзысты, уыдонмӕ филиал писмо арвитдзӕн ӕмӕ сын бацамондзӕн, цы кӕнын сӕ хъӕуы, уый. Уыцы хъуыддаджы сӕйраджыдӕр архайдзысты ӕххӕстрӕстӕг ӕмӕ сӕрмагонд пионертӕ, иуӕй-иу рӕтты та – ӕххуысгӕнӕг пионертӕ дӕр.
4. Ног мадзалӕй куыд пайда кӕнынц?
4 Ног мадзалӕй куыд пайда кӕнынц. Ацы мадзалӕй чи пайда кӕны, уыцы хъусынгӕнджытӕ фӕлӕууынц стъолы кӕнӕ цӕлхытыл арӕзт стенды фарсмӕ ӕмӕ фенхъӕлмӕ кӕсынц, адӕм сӕм кӕд бацӕудзысты, уымӕ. Исчи сӕм куы бацӕуы, уӕд ын фӕзӕгъынц, йӕ бон кӕй у, чи йӕ бацымыдис кодта, уыцы литературӕ райсын. Пионертӕ адӕмы фарстатӕн Фыстадӕй дзуапп раттынц. Адӕймаг литературӕ куы райсы, уӕд ын пионертӕ мысайнӕгты тыххӕй ницы фӕзӕгъынц. Фӕлӕ сӕ куы бафӕрсы, ӕхца нӕм кӕцӕй цӕуы, уӕд ын бамбарын кӕнынц, йӕ бон кӕй у мысайнаг арвитын, нӕ организацийӕн банчы цы счет ис, уырдӕм. Счет йӕ бон базонын у, нӕ литературӕйы цы адристӕ ис, уыдонӕй иумӕ куы ныффысса, уӕд. Кӕнӕ та йӕ бон у мысайнаг ныппарын, Йегъовӕйы Ӕвдисӕнтӕн сӕ Паддзахады залты цы мысайнӕгты асыччытӕ ис, уыдонӕй иуы, ӕмӕ йын фӕзӕгъынц хӕстӕгдӕр Паддзахады залы адрис. Гӕнӕн куы вӕййы, уӕд адӕймаджы бафӕрсынц: «Фӕнды дӕ, цӕмӕй дӕ исчи бабӕрӕг кӕна?» кӕнӕ «Зоныс ӕй, литературӕ парахат кӕнынӕй дарддӕр ма адӕмимӕ Библи дӕр кӕй ахуыр кӕнӕм?»
5. Иу бинонтӕ ног мадзалы фӕрцы кӕй хъусын кӕнынц, уый сын арфӕйаг хъуыддаг цӕмӕн у?
5 Ацы ног мадзал у арфӕйаг хъуыддаг. Иу бинонтӕ ныффыстой: «Стъолы цур лӕугӕйӕ алы бон дӕр мингай адӕмы кӕй уынӕм, уый фӕрцы ноджы хуыздӕр ӕмбарӕм, ӕгас дунейы дӕр адӕмӕн хорз хабар фехъусын кӕныны тыххӕй цы стыр куыст цӕуы, уый. Уыйбӕрц адӕм кӕй уынӕм ӕмӕ сӕ Йегъовӕ алкӕй дӕр кӕй уарзы, ууыл кӕй хъуыды кӕнӕм, уый нын ӕххуыс кӕны, цӕмӕй нын хъусын кӕныны хъуыддаг дарддӕр дӕр царды фыццаг бынаты уа. Нӕ цӕстытыл ауайын кӕнӕм, не стъолы цурты чи цӕуы, уыдоны зӕрдӕтӕм Йегъовӕ кӕй ныккӕсы, цӕмӕй ссара, аккаг чи у, уыдоны. Стӕй ӕмбарӕм, зӕдтӕ нын кӕй ӕххуыс кӕнынц».
6. а) Бирӕ ӕмбырдтӕ цавӕр ног мадзалӕй спайда кодтой ӕмӕ уый иннӕ мадзалӕй цӕмӕй хицӕн кӕны? ӕ) Ӕмбырдтӕн сӕ бон куыд у ӕмгуыст кӕнын, бирӕ адӕм кӕй вӕййы, уым хъусын кӕнгӕйӕ?
6 Бирӕ адӕм кӕм вӕййы, ахӕм рӕтты бынӕттон ӕмбырдтӕ куыд хъусын кӕнынц. Бирӕ рӕтты ма хистӕр нӕлгоймӕгты советтӕ спайда кодтой ӕндӕр ног мадзалӕй – стъӕлттӕ кӕнӕ цӕлхытыл арӕзт стендтӕ сӕвӕрдтой, се ’мбырды территорийы бирӕ адӕм кӕм цӕуы, ахӕм рӕтты. Ацы мадзал хицӕн кӕны, уӕлдӕр цы мадзалы кой кодтам, уымӕй. Уыцы мадзалӕй хъусын кӕнынӕн филиал равзары стыр горӕттӕ ӕмӕ уыцы иу территорийы фӕхъусын кӕнынц хъусынгӕнджытӕ алыхуызон ӕмбырдтӕй. (Кӕс рамкӕ «Хъӕуы хорз ӕмгуыст кӕнын».)
7. Хистӕр нӕлгоймӕгтӕ цы сараздзысты, цӕмӕй се ’мбырд, хуыздӕр кӕм уа, уым хъусын кӕна?
7 Хистӕр нӕлгоймӕгты ахъуыды кӕнын хъӕудзӕн, се ’мбырды территорийы фылдӕр адӕм кӕм вӕййы ӕмӕ ахӕм рӕтты хъусын кӕнын ӕцӕгдӕр хуыздӕр уыдзӕн ӕви нӕ, ууыл. Стъӕлттӕ ӕмӕ цӕлхытыл арӕзт стендтӕ сӕвӕрӕн уыдзӕн вокзалты, горӕты фӕзты, паркты, стыр уынгты, институтты ӕмӕ аэропортты раз, базарадон-ирхӕфсӕн центрты ӕмӕ ӕндӕр ахӕм рӕтты. Ахӕм ран стъол ӕвӕрӕн уыдзӕн уыцы иу ран, уыцы иу бонты ӕмӕ уыцы иу рӕстӕг. Стъӕлттӕ ӕвӕрын хуыздӕр уыдзӕн базарадон-ирхӕфсӕн центрты раз, ӕнӕуи стыр дуканийы раз нӕ, фӕлӕ, уымӕн ӕмӕ стыр дуканитӕм адӕм ӕрмӕст ӕлхӕнынмӕ фӕцӕуынц. Иуӕй-иу рӕтты, зӕгъӕм, бирӕ адӕм кӕм фӕцӕуы, уыцы уынгты сӕвӕрӕн ис гыццылдӕр стендтӕ. Хистӕр нӕлгоймӕгтӕн сӕ бон у нӕ сайтӕй рафыссын ног брошюрӕты стыр нывтӕ (бацӕттӕ сӕ кодтой ахӕм рӕтты хъусын кӕнынӕн). Ацы мадзалӕй пайда кӕнын хъӕудзӕн, фыццаг мадзалӕй куыд пайда кӕнынц, афтӕ. Стӕй ма уацамындӕн дзуапдӕттӕг цӕстдарӕг хъусынгӕнджытӕн ӕмбарын кӕндзӕн, цы аразын сӕ хъӕуы, уый. Фылдӕр базонын кӕй фӕнды, ахӕм адӕймаг йӕ адрис куы ныууадза, фӕлӕ ӕндӕр ӕмбырды территоримӕ куы хауа, уӕд уайтагъд хъӕудзӕн байдзаг кӕнын бланк «Пожалуйста, посети этого человека» (S-43) ӕмӕ йӕ ӕмбырды секретармӕ раттын.
8. Кӕд уӕ территорийы ног мадзӕлттӕй спайда кӕнӕн нӕй, уӕддӕр уӕ бон цы у аразын, цӕмӕй, адӕм кӕм вӕййы, уым хъусын кӕнат?
8 Бирӕ адӕм кӕм вӕййы, уым хъусын кӕн. Иуӕй-иу ӕмбырдты территорийы нӕй, бирӕ адӕм кӕм вӕййы ӕмӕ стъӕлттӕ кӕнӕ цӕлхытыл арӕзт стендтӕ кӕм сӕвӕрой, ахӕм уынгтӕ. Фӕлӕ ахӕм ӕмбырдты дӕр хъусынгӕнджытӕн сӕ бон у уацамынды рӕстӕг, адӕм кӕм вӕййы, уым хъусын кӕнын. Уӕ территорийы бирӕ дуканитӕ кӕнӕ куыстуӕттӕ ис? Йе та парктӕ кӕнӕ, бирӕ адӕм кӕм фембырд кӕнынц, ӕндӕр ахӕм бынӕттӕ? Кӕд о, уӕд уӕ бон у уым хъусын кӕнын.
9. Адӕм кӕмдӕриддӕр вӕййы, уым хъусын кӕнын цӕмӕн хъӕуы?
9 Йегъовӕйы фӕнды, «цӕмӕй алыхуызон адӕм, рӕстдзинад цы у, уый бӕлвырдӕй базоной ӕмӕ фервӕзой» (1 Тим. 2:4). Уымӕ гӕсгӕ мах дӕр архайӕм, цӕмӕй Хуыцауы Паддзахады тыххӕй хорз хабар фылдӕр адӕмӕн фехъусын кӕнӕм, цалынмӕ кӕрон не ’рцыд, уӕдмӕ (Матф. 24:14). Бирӕ рӕтты зын у адӕмы хӕдзары баййафын, ӕмӕ сын хорз хабар радзурӕн ис, ӕндӕр искуы куы уой, ӕрмӕстдӕр уӕд. Уӕдӕ адӕмыл кӕмдӕриддӕр ӕмбӕлӕм, уым сын куы хъусын кӕнӕм, уӕд нӕ лӕггады рохуаты ницы уадздзыстӕм (2 Тим. 4:5).
[Рамкӕ 5 фарсыл]
Хъӕуы хорз ӕмгуыст кӕнын
Куыд нын фехъусын кодтой, афтӕмӕй цалдӕр ӕмбырды хъусынгӕнджытӕ иуӕй-иу хатт фӕхъусын кӕнынц уыцы иу уынгты, машинӕты лӕууӕндӕтты, куыстуӕтты кӕнӕ вокзалты. Алыхуызон ӕмбырдтӕй хъусынгӕнджытӕ литературӕ ныууадзынц уыцы иу куыстуаты, библиотекӕйы кӕнӕ приемнийы. Уый тыххӕй уыцы куыстуӕтты кусджытӕ ӕмӕ, уым хӕстӕг чи цӕры, уыдон хатт фӕмӕсты кӕнынц, кӕд бирӕ хъусынгӕнджытӕ уыцы иу рӕстӕг не ’рбацӕуынц, уӕддӕр. Уымӕ гӕсгӕ хуыздӕр уаид, хъусынгӕнджытӕ ахӕм рӕтты ӕрмӕстдӕр се ’мбырды территорийы куы хъусын кӕниккой.
Кӕд хъусынгӕнджыты фӕнды, иннӕ ӕмбырды территорийы бирӕ адӕм кӕм вӕййы, ахӕм ран хъусын кӕнын, уӕд хъуамӕ аныхас кӕной се ’мбырды уацамындӕн дзуапдӕттӕг цӕстдарӕгимӕ. Уый фӕдзурдзӕн уыцы ӕмбырды уацамындӕн дзуапдӕттӕг цӕстдарӕгмӕ, цӕмӕй сын бар радта сӕ территорийы хъусын кӕнынӕн. Иу территорийы, алыхуызон ӕвзӕгтыл чи ис, ахӕм ӕмбырдтӕ куы хъусын кӕной, уӕд уацамындӕн дзуапдӕттӕг цӕстдарджытӕ хъуамӕ ӕмгуыст кӕной, цӕмӕй сӕ территорийы адӕмы ӕнӕхъуаджы ма тыхсын кӕной. Афтӕ куы кӕной, уӕд алцыдӕр уыдзӕн «уаг ӕмӕ ӕгъдауыл» (1 Кор. 14:40).
[Ныв 6 фарсыл]
[Ныв 6 фарсыл]