Йегъовӕ нӕ ахуыр кӕны ацы куыст кӕнын
1. Йегъовӕ адӕмӕн исты куы бахӕс кӕны, уӕд ма цы саразы?
1 Йегъовӕ адӕмӕн исты куы бахӕс кӕны, уӕд ма сын бацамоны, куыд кӕнын ӕй хъӕуы, уый дӕр. Зӕгъӕм, Йегъовӕ Нойӕн куы загъта, цӕмӕй нау сарӕзтаид, уӕд ын бамбарын кодта, куыд аразын ӕй хъӕуы, уый дӕр. Фӕлӕ Ной уыцы хъуыддагӕн ницы зыдта (Райд. 6:14–16). Моисей, сӕрныллӕг фыййау, Израилы хистӕртимӕ ӕмӕ фараонимӕ ныхас кӕнынмӕ куы цыд, уӕд ын Йегъовӕ зӕрдӕ бавӕрдта: «Куы дзурай, уӕд ӕз уыдзынӕн демӕ ӕмӕ дын амондзынӕн, цы дзурын дӕ хъӕуы, уый» (Рац. 4:12). Йегъовӕ нын цы бахӕс кодта, уый ӕххӕст кӕнынмӕ куы фӕцӕуӕм, ома хорз хабар хъусын кӕнынмӕ, уӕд нын ратты амындтӕ дӕр. Ахуыр нӕ кӕны Хуыцауы Ныхас хъусынгӕнджыты скъолайы ӕмӕ Хъусын кӕныны фембӕлды. Цӕуыл ахуыр кӕнӕм уыцы фембӕлдты?
2. Хъусынгӕнджыты скъола нын пайда кӕд ӕрхӕсдзӕн?
2 Хъусынгӕнджыты скъола. Дӕхи-иу алы фембӕлдмӕ дӕр дзӕбӕх бацӕттӕ кӕн. Уый фӕстӕ ӕмбырды куы фенай, хъусынгӕнӕг ӕрмӕгӕй йӕ хӕслӕвӕрды куыд спайда кодта, уӕд бамбардзынӕ, цы саразын дӕ хъӕуы, цӕмӕй ноджы хуыздӕр ахуыргӕнӕг суай (Ӕмб. 27:17). Алы хатт дӕр-иу «Хъусынгӕнджыты скъолайы» чиныг демӕ ӕрбахӕсс ӕмӕ дзы пайда кӕн. Скъолайы цӕстдарӕг-иу ахуыргӕнинагӕн йӕ хӕслӕвӕрды фӕстӕ уынаффӕтӕ куы дӕтта, уӕд-иу чиныджы сыфты кӕрон цы бынат ис, уым-иу фӕнысан кӕн, кӕцытӕй дзы спайда кӕндзынӕ, уый. Фӕлӕ дын Скъола стырдӕр пайда хӕсдзӕн, куы дзы архайай, уӕд. Скъолайы фыст дӕ? Хӕслӕвӕрд дын куы раттой, уӕд-иу дӕхи хорз бацӕттӕ кӕн ӕмӕ дын цы уынаффӕ радтой, уымӕй пайда кӕн. Уый фӕстӕ уацамынды пайда кӕн, цӕуыл сахуыр дӕ, уымӕй.
3. Цы нын баххуыс кӕндзӕн, цӕмӕй нын хъусын кӕныны фембӕлд пайда уа?
3 Хъусын кӕныны фембӕлд. Ацы фембӕлды цы уынаффӕтӕ вӕййы, уыдон хуыздӕр бахъуыды кӕнӕм, ӕрмӕг рагацау куы бакӕсӕм ӕмӕ дзуаппытӕ куы бацӕттӕ кӕнӕм, уӕд. Цыбыр дзуаппытӕ куы дӕттӕм, уӕд иннӕтӕн дӕр рӕстӕг уыдзӕн дзуапп раттынӕн. Цы равдыстытӕ дзы вӕййы, уыдонмӕ лӕмбынӕг хъус ӕмӕ дзы цы уынаффӕтӕ вӕййы, уыдонӕй пайда кӕн, цӕмӕй уацамынды ӕнтыстджындӕр уай. «Нӕ хъусын кӕныны хъуыддаджы» сыфтӕ-иу бафснай, цӕмӕй-иу дзы дӕ бон уа фидӕны дӕр пайда кӕнын.
4. Фембӕлдты цы базонӕм, уымӕй хорз пайда кӕнын цӕмӕн хъӕуы?
4 Хуыцау Ной ӕмӕ Моисейӕн цы куыст бахӕс кодта, уый ӕнцон нӕ уыд. Ӕнцон нӕу, Йегъовӕ нын цы куыст бахӕс кодта, уый дӕр – ӕгас зӕххы цъарыл дӕр хорз хабар хъусын кӕнын (Матф. 24:14). Мах ӕнтыстджын уыдзыстӕм, Йегъовӕйыл, Стыр Зондамонӕгыл, нӕ ныфс куы дарӕм ӕмӕ нын цы амоны, уымӕй хорз куы пайда кӕнӕм, уӕд (Ис. 30:20).