Мыггӕгтыл дон кӕнӕм, цӕмӕй сзайой
1. Дон цавӕр мыггӕгтыл хъуамӕ кӕнӕм, цӕмӕй сзайой?
1 Цӕхӕрадоны цы мыггӕгтӕ ныссадзай, уыдоныл дон куы кӕнай, уӕд сзайдзысты. Афтӕ у, нӕ территорийы адӕмы зӕрдӕты цы рӕстдзинады мыггӕгтӕ байтауӕм, уыдоны хабар дӕр (1 Кор. 3:6). Хъуамӕ-иу сӕм фӕстӕмӕ ӕрбаздӕхӕм ӕмӕ-иу рӕстдзинады мыггӕгтыл Хуыцауы Ныхасӕй дон ныккӕнӕм, цӕмӕй уидаг ауадзой, сзайой ӕмӕ дидинӕг ракалой.
2. Цы аразӕн ис, цӕмӕй иннӕ хатт дӕр адӕймагимӕ аныхас кӕнӕм?
2 Фарстатӕ дӕтт. Дӕхи уацамындмӕ куы цӕттӕ кӕнай, уӕд хорз уаид, исты цымыдисаг фарста дӕр куы бацӕттӕ кӕнис, цӕмӕй адӕймагмӕ ногӕй куы бацӕуай, уӕд ын дзуапп раттай. Уӕ ныхасы кӕрон-иу ӕм уыцы фарста ратт ӕмӕ баныхас кӕн, ногӕй йӕм кӕд бацӕудзынӕ, ууыл. Бирӕтӕ исты темӕ равзарынц нӕ публикацитӕй, цӕмӕй адӕймагӕн равдисой, Библи ахуыр кӕнӕн куыд ис, уый.
3. Дӕ бон цы у ныффыссын?
3 Алцыдӕр фысс. Адӕймагимӕ куы аныхас кӕнай, уый фӕстӕ-иу рӕстӕг ссар, цӕмӕй уӕ ныхасы тыххӕй алцыдӕр ныффыссай. Ныффыссӕн ис адӕймагӕн йӕ ном, йӕ адрис, бон, рӕстӕг, цӕуыл ныхас кодтай ӕмӕ йын цы литературӕ ныууагътай, уый (кӕд ын ныууагътай, уӕд). Цавӕр диныл хӕст у? Бинонтӕ йын ис? Цы йӕ цымыдис кӕны ӕмӕ цӕуыл тыхсы? Уыдӕттӕ дын баххуыс кӕндзысты, цӕмӕй иннӕ хатт уӕ ныхас адарддӕр кӕнат. Стӕй ма ныффыссӕн ис, кӕд ӕм ӕрбацӕудзынӕ ӕмӕ йын цавӕр фарстайӕн ратдзынӕ дзуапп, уый дӕр.
4. Чи дӕм байхъуыста, уыдонмӕ ногӕй цӕуын цӕмӕн хъӕуы?
4 Ногӕй сӕм цу. Сайтан улӕфт нӕ зоны, цӕмӕй, адӕймаджы зӕрдӕйы «цы дзырд байтыдтой, уый ахӕсса» (Мар. 4:14, 15). Уымӕ гӕсгӕ дӕ ныфс ма асӕттӕд, адӕймаджы-иу хӕдзары ногӕй куы нӕ баййафай, уӕд. Дӕ бон ӕм у писмо ныффыссын кӕнӕ та йӕм кӕй ӕрбацыдтӕ, уый тыххӕй гӕххӕттыл афыссын ӕмӕ йын ӕй йӕ дуары зыхъхъыры бавӕрын. Иу пионер-хо дуаргӕрон сылгоймагимӕ Библи ахуыр кӕнын райдыдта, фӕлӕ йӕ стӕй йӕ бон нӕ уыд хӕдзары баййафын, ӕмӕ йӕм писмо ныффыста. Ӕппынфӕстаг ӕй хӕдзары куы баййӕфта, уӕд ын сылгоймаг загъта, йӕ писмойӕ кӕй бамбӕрста, тынг ыл кӕй тыхсы ӕмӕ йын уый ӕхсызгон кӕй уыд. Рӕстдзинады мыггӕгтыл дон куы кӕнӕм, уӕд уидаг ауадздзысты, сзайдзысты ӕмӕ тыллӕг ратдзысты «чи ӕртын хатты фылдӕр, чи ӕхсай хатты фылдӕр, чи та сӕдӕ хатты фылдӕр», ӕмӕ нын уый уыдзӕн цины хос (Мар. 4:20).