Адӕмӕн ӕххуыс кӕнӕм, цӕмӕй Хуыцаумӕ хъусой
1. Облӕстон конгрессы «Ӕрцӕуӕд Хуыцауы Паддзахад!», зӕгъгӕ, цавӕр брошюрӕтӕ райстам ӕмӕ хорз кусӕнгӕрзтӕ цӕй фӕрцы сты?
1 Фарон облӕстон конгрессы «Ӕрцӕуӕд Хуыцауы Паддзахад!», зӕгъгӕ, райстам дыууӕ ног брошюрӕйы «Хуыцаумӕ хъус ӕмӕ ӕнустӕм цӕрай» ӕмӕ йӕ хуымӕтӕг вариант «Хуыцаумӕ хъус». Ацы брошюрӕты бирӕ текст кӕй нӕй, уымӕ гӕсгӕ сты ӕнцон тӕлмац кӕнынӕн ӕмӕ сыл рӕстӕг дӕр бирӕ нӕ ацӕуы. Зӕгъӕм, брошюрӕ «Хуыцаумӕ хъус ӕмӕ ӕнустӕм цӕрай» уыцы иу рӕстӕг рацыд 431 ӕвзагыл.
2. Ацы брошюрӕтӕ пайда кӕмӕн уыдзысты?
2 Ацы брошюрӕтӕ сӕйраджыдӕр пайда кӕмӕн уыдзысты? Ӕркӕсӕм, ӕгас дунейы дӕр хъусынгӕнджытӕ цы уавӕртыл сӕмбӕлынц, уымӕ:
• Хъусынгӕнӕг адӕймагимӕ ныхас кӕны фыццаг хатт кӕнӕ дыккаг хатт, ӕмӕ бамбӕрста, адӕймаг ӕвзӕр кӕй кӕсы кӕнӕ кӕсын кӕй нӕ зоны.
• Хъусынгӕнӕг ахӕм адӕмӕн хъусын кӕны, ӕмӕ се ’взагыл нӕ публикацитӕ нӕй кӕнӕ та дзы иу цалдӕр йеддӕмӕ нӕй. Кӕнӕ уӕ территорийы адӕмӕн сӕ фылдӕр цы ӕвзагыл дзурынц, ууыл сын кӕсын зын у.
• Хъусынгӕнӕг йӕ участокы хъусын кӕны, хъусӕй чи нӕ хъусы, ахӕм адӕмӕн къухӕйамонгӕ ӕвзагыл.
• Ныййарджыты фӕнды рӕстдзинад амонын, нырма кӕсын чи нӕ зоны, ахӕм гыццыл сывӕллонӕн.
3. Брошюрӕ «Хуыцаумӕ хъус» куыд арӕзт у?
3 Брошюрӕтӕ куыд арӕзт сты. Брошюрӕ «Хуыцаумӕ хъус»-ы ис тынг гыццыл текст. Алы фарсыл дӕр бынӕй фыст ис хуымӕтӕг хъуыдыйад ӕмӕ стих Библийӕ. Уыдон ӕмбарын кӕнынц сӕйраг хъуыдытӕ. Афтӕ арӕзт цӕмӕн у? Дӕ цӕстытыл-ма ауайын кӕн ахӕм уавӕр: чидӕр дӕм радта брошюрӕ, кӕсын цы ӕвзагыл нӕ зоныс, ууыл. Уыцы ӕвзагыл дамгъӕтӕ дӕр нӕ зоныс. Рӕсугъд нывтӕ дзы куы уа, уӕддӕр дӕ цымӕ бацымыдис кӕндзӕн? Ӕвӕццӕгӕн, нӕ. Раст афтӕ, кӕсын чи нӕ зоны, уыдоны дӕр нӕ фӕфӕнды кӕсын, бирӕ текст кӕм вӕййы, ахӕм публикацитӕ. Уый тыххӕй брошюрӕйы алы фарсыл дӕр сӕйрагдӕр сты нывтӕ ӕмӕ сӕ кӕцы кӕй фӕдыл хъӕуы ӕмбарын кӕнын, уый амынд у стрелкӕтӕй.
4. Брошюрӕ «Хуыцаумӕ хъус ӕмӕ ӕнустӕм цӕрай» куыд арӕзт у?
4 Брошюрӕты «Хуыцаумӕ хъус ӕмӕ ӕнустӕм цӕрай» ӕмӕ «Хуыцаумӕ хъус»-ы нывтӕ сты ӕмхуызон. Фӕлӕ брошюрӕ «Хуыцаумӕ хъус ӕмӕ ӕнустӕм цӕрай» у, иугыццыл кӕсын чи зоны кӕнӕ кӕсын чи ахуыр кӕны, ахӕм адӕмӕн. Библийы ахуыр чи уадза, уымӕн йӕ бон уыдзӕн пайда кӕнын ацы брошюрӕйӕ, кӕд йӕ ахуыргӕнинаг брошюрӕйӕ «Хуыцаумӕ хъус» ахуыр кӕна, уӕд дӕр. Алы урок дӕр ис дыууӕ фарсыл. Уӕлейӕ галиу къуымы ис фарста, ӕмӕ йӕ дзуапп ис уыцы дыууӕ фарсыл. Нывтӕй уӕлдай ма дзы ис хъуыдыйӕдтӕ ӕмӕ стихтӕ Библийӕ. Бирӕ фӕрстыл рахиз къуымы ис, йӕ хуызӕй чи хицӕн кӕны, ахӕм рамкӕ. Уыцы рамкӕты ис уӕлӕмхасӕн хъуыдытӕ ӕмӕ стихтӕ, ӕмӕ сыл ныхас кӕнӕн уыдзӕн ахуыргӕнинаджы курдиӕттӕм гӕсгӕ.
5. Ацы брошюрӕтӕ кӕд ӕмӕ куыд ис дӕттӕн?
5 Куыд сӕ ис пайда кӕнӕн. Дӕ бон сӕ у хӕдзарӕй-хӕдзармӕ хъусын кӕнгӕйӕ дӕттын, афтӕ дӕм куы кӕса, ӕмӕ адӕймагӕн пайда уыдзысты, уӕд, уыцы мӕй брошюрӕтӕ куы нӕ парахат кӕнӕм, уӕд дӕр. (Кӕс рамкӕ «Куыд сӕ ис дӕттӕн».) Дӕттӕн сӕ ис дыккаг бацыды рӕстӕг дӕр. Адӕймагӕн дӕ бон у зӕгъын, зӕгъгӕ, дын цыдӕр ӕрбахастон ӕмӕ йӕм брошюрӕ ратт.
6. Нӕ бон куыд у ацы брошюрӕты ӕххуысӕй искӕимӕ Библи ахуыр кӕнын?
6 Брошюрӕйы «Хуыцаумӕ хъус» фарстатӕ нӕй, уымӕ гӕсгӕ нӕ ныхас нӕ араздзыстӕм фарстатӕ ӕмӕ дзуаппытӕм гӕсгӕ, Библи цы публикацийы фӕрцы фӕахуыр кӕнӕм, уӕд куыд фӕаразӕм, афтӕ. Алы культурӕйы дӕр адӕм уарзынц исты хабӕрттӕм хъусын. Уӕдӕ нывтӕй пайда кӕн, цӕмӕй-иу Библийӕ цавӕрдӕр хабӕрттӕ радзурай. Бамбарын-иу кӕн, нывы цы ис, уый. Зӕрдиагӕй-иу дзур. Адӕймаджы-иу афӕрс, нывы цы уыны, уымӕй ӕмӕ-иу йӕ хъуыды зӕгъӕд. Бакӕс-иу, бынӕй цы стихтӕ ис, уыдон ӕмӕ-иу сыл иумӕ аныхас кӕнут. Фарстатӕ-иу ӕм дӕтт, цӕмӕй йӕ хъуыдытӕ дзура, ӕмӕ базонай, алцыдӕр раст ӕмбары ӕви нӕ. Адӕймагимӕ брошюрӕ «Хуыцаумӕ хъус ӕмӕ ӕнустӕм цӕрай» куы ахуыр кӕнай, уӕд-иу алы нывыл ныхасгӕнгӕйӕ дӕр текст ӕмӕ стихтӕ иумӕ бакӕсут.
7. Нӕ ахуыргӕнинагӕн нӕ бон куыд у ӕххуыс кӕнын, цӕмӕй йӕ уырнындзинад фидар кӕна?
7 Ахуыргӕнинагӕн ӕххуыс кӕнӕм йӕ уырнындзинад фидар кӕнынӕн. Ныфс нӕ ис, ахӕм ахуыры фӕрцы адӕймаджы кӕй бафӕнддзӕн, цӕмӕй хуыздӕр кӕсын сахуыр уа ӕмӕ Йегъовӕйы тыххӕй фылдӕр базона (Матф. 5:3; Иоан. 17:3). Кӕд адӕймагимӕ брошюрӕйыл «Хуыцаумӕ хъус» фӕныхас кӕныс ӕмӕ дӕм афтӕ кӕсы, хуыздӕр кӕсын райдыдта, уӕд дӕ бон у йемӕ брошюрӕ «Хуыцаумӕ хъус ӕмӕ ӕнустӕм цӕрай» ахуыр кӕнын райдайын. Адӕймагимӕ кӕцыфӕнды брошюрӕ ма сахуыр кӕнай, уӕддӕр донаргъуыд исынмӕ цӕттӕ нӕ уыдзӕн. Брошюрӕйы фӕстӕ хъуамӕ йемӕ ахуыр кӕнай, Библи цы публикацийы фӕрцы фӕахуыр кӕнӕм, уый кӕнӕ ӕндӕр ахӕм публикаци, цӕмӕй йӕм Библийӕ фылдӕр зонындзинӕдтӕ уа.
8. Ахӕм ног брошюрӕтӕ нын кӕй ис, уый нын ӕхсызгон цӕмӕн у?
8 Адӕм хъуамӕ хъусой Дунедарӕг Хуыцаумӕ, кӕд сӕ ӕнустӕм цӕрын фӕнды, уӕд (Ис. 55:3). Йегъовӕйы фӕнды, цӕмӕй «алыхуызон адӕм», уыимӕ кӕсын чи нӕ зоны, уыдон дӕр, базоной, хъусын ӕм куыд хъӕуы, уый (1 Тим. 2:3, 4). Куыд ӕхсызгон нын у, ацы ног брошюрӕты фӕрцы нӕ бон кӕй у адӕмы ахуыр кӕнын, цӕмӕй Хуыцаумӕ хъусой!
[Рамкӕ 3 фарсыл]
Куыд сӕ ис дӕттӕн
Адӕймагӕн 2 ӕмӕ 3 фӕрстӕ равдис ӕмӕ зӕгъ: «Ахӕм дунейы дӕ цӕрын нӕ фӕндид? [Бауадз ӕй йӕ хъуыды зӕгъын.] Библи нын зӕрдӕ ӕвӕры [кӕнӕ, Сыгъдӕг Фыстад нын зӕрдӕ ӕвӕры], тагъд рӕстӕджы Хуыцау зӕхх кӕй срӕсугъд кӕндзӕн, сабыр цард ыл кӕй скӕндзӕн, ӕмӕ дзы мӕгуыр ӕмӕ рынчын адӕм кӕй нал уыдзӕн. Дӕ хъус-ма ӕрдар, цы кӕнын нӕ хъӕуы, цӕмӕй уыцы дунейы цӕрӕм. [Бакӕс Исайы 55:3, фыст ис 3 фарсыл уӕлейӕ.] Ам дзырд цӕуы, Хуыцау нын кӕй дзуры, цӕмӕй йӕм ӕрбацӕуӕм ӕмӕ йӕм байхъусӕм. Фӕлӕ нӕ бон куыд у Хуыцаумӕ хъусын?» Байгом кӕн 4 ӕмӕ 5 фӕрстӕ, ӕмӕ дзы цы дзуапп ис, ууыл йемӕ аныхас кӕн. Кӕд адӕймаджы не ’вдӕла, уӕд ын брошюрӕ ратт ӕмӕ йемӕ баныхас кӕн, иннӕ хатт ӕм кӕй ӕрбацӕудзынӕ ӕмӕ йыл кӕй аныхас кӕндзыстут.