Хорз хабар хъусын кӕнгӕйӕ пайда кӕн трактаттӕй
1. Хуыцауы адӕм трактаттӕй куыд пайда кодтой?
1 Йегъовӕйы адӕм рагӕй фӕстӕмӕ пайда кӕнынц трактаттӕй, цӕмӕй хорз хабар хъусын кӕной. 1880 азы Чарлз Рассел, ӕмӕ йын чи ӕххуыс кодта, уыдон уадзын райдыдтой «Библииртасджыты трактаттӕ». Уыцы трактаттӕ-иу байуӕрстой, журнал «Хъахъхъӕнӕн мӕсыг» чи каст, уыдонӕн, цӕмӕй сӕ уыдон дӕр иннӕтӕн парахат кодтаиккой. Трактатты фӕрцы бирӕтӕ фехъуыстой хорз хабар. 1884 азы Рассел закъонмӕ гӕсгӕ организаци срегистраци кодта. Уыцы организаци ӕхца нӕ куыста, фӕлӕ йӕ нысан уыди Хуыцауы фӕндон ӕххӕст кӕнын. Организацийӕн йӕ номы уыди дзырд «трактат» дӕр – «Сионы Хъахъхъӕнӕн мӕсыджы ӕмӕ трактатты ӕхсӕнад». Абон та хуыйны Хъахъхъӕнӕн мӕсыджы, Библитӕ ӕмӕ трактатты Ӕхсӕнад (Пенсильвани). 1918 азмӕ Библииртасджытӕ апарахат кодтой 300 милуан трактатӕй фылдӕр. Нӕ рӕстӕджы дӕр трактаттӕ стыр ӕххуыс сты хъусын кӕныны хъуыддаджы.
2. Трактаттӕ хорз цӕмӕй сты?
2 Трактаттӕ хорз цӕмӕй сты. Трактаттӕ вӕййынц рӕсугъд ӕмӕ зӕрдӕмӕдзӕугӕ. Цыбыртӕй дзы фыст вӕййы ахсджиаг хъуыдытӕ ӕмӕ дзы адӕймаг бирӕ цыдӕртӕ базоны. Уымӕ гӕсгӕ, чингуытӕ ӕмӕ брошюрӕтӕ кӕсын чи нӕ уарзы, уыдоны зӕрдӕмӕ фӕцӕуынц. Суанг ног хъусынгӕнджытӕн дӕр ӕмӕ сывӕллӕттӕн дӕр сӕ бон у трактаттӕ дӕттын. Трактаттӕ гыццыл кӕй сты, уымӕ гӕсгӕ бирӕ бынат нӕ ахсынц.
3. Радзур, трактаттӕ куыд ахсджиаг сты, уый чи ’вдисы, ахӕм цӕвиттон дӕхи цардӕй кӕнӕ абзацы чи ис, уый.
3 Бирӕтӕ хорз хабар фехъуыстой трактаты фӕрцы. Зӕгъӕм, Гаитийы иу сылгоймаг уынджы ссардта трактат. Уый йӕ систа, бакасти ӕй ӕмӕ загъта: «Рӕстдзинад ссардтон!» Ӕппынфӕстаг ацыд Паддзахады залмӕ, райдыдта Библи ахуыр кӕнын ӕмӕ донаргъуыд райста. Ӕмӕ цӕй фӕрцы? Хуыцауы Ныхасыл арӕзт трактаты фӕрцы!
4. Мӕйы дӕргъы трактаттӕ куы парахат кӕнӕм, уӕд нӕ нысан цы хъуамӕ уа?
4 Хӕдзарӕй-хӕдзармӕ. Трактаттӕ хъусын кӕныны хъуыддаджы стыр ӕххуыс кӕй сты, уымӕ гӕсгӕ сӕ ноябрӕй райдайгӕйӕ рӕстӕгӕй-рӕстӕгмӕ кӕцыдӕр мӕйты парахат кӕндзыстӕм. Нӕ нысан уый нӕу, ӕмӕ сӕ адӕмӕн ӕнӕуи дӕттӕм, фӕлӕ цӕмӕй семӕ Библийыл ныхас кӕнын райдайӕм. Адӕймагимӕ фыццаг хатт ныхас кӕнай ӕви йӕм ногӕй бацӕуай, куы дӕм байхъуса, уӕд ын дӕ бон у равдисын, адӕмимӕ Библи цавӕрдӕр публикацийы фӕрцы куыд фӕахуыр кӕнӕм, уый. Хӕдзарӕй-хӕдзармӕ хъусын кӕнгӕйӕ нӕ бон куыд у трактаттӕй пайда кӕнын? Алыхуызон трактаттӕ нӕм кӕй ис, уымӕ гӕсгӕ хъуамӕ зонӕм, цы фыст дзы ис, уый.
5. Нӕ бон куыд у трактаттӕ хӕдзарӕй-хӕдзармӕ парахат кӕнын?
5 Нӕ ныхас куыд райдайдзыстӕм ӕмӕ цы трактатӕй спайда кӕндзыстӕм, уый, нӕ участокы цы адӕм цӕры, уымӕй кӕнгӕ у. Нӕ бон у адӕймагӕн трактат раттын ӕмӕ афтӕмӕй ныхас кӕнын райдайын. Чи зоны, трактаты рӕсугъд цъар йӕ зӕрдӕмӕ фӕцӕуа ӕмӕ йӕ бацымыдис кӕна. Кӕнӕ та нӕ бон у адӕймагӕн цалдӕр трактаты равдисын, цӕмӕй йӕхӕдӕг равзара, тынгдӕр ӕй кӕцы цымыдис кӕны, уый. Нӕ участокы адӕм дуар гом кӕнын куы нӕ уӕндой, уӕд нӕ бон у трактатыл афтӕ хӕцын, цӕмӕй йын адӕймаг йе ’ддаг цъар уына. Йе та йын нӕ бон у зӕгъын, трактат ӕм дуары бынты кӕй бадӕтдзыстӕм, цӕмӕй йын йӕ хъуыды базонӕм. Трактаты ном фарста куы уа, уӕд уыцы фарста адӕймагмӕ раттӕм ӕмӕ йӕ йӕ хъуыдыйӕ бафӕрсӕм. Кӕнӕ та йӕм нӕ бон раттын у, чи йӕ бацымыдис кӕндзӕн ӕмӕ нӕ ныхас кӕй фӕрцы адарддӕр кӕндзыстӕм, ахӕм фарста. Уый фӕстӕ нӕ бон у трактатӕй иу скъуыддзаг бакӕсын ӕмӕ дзы кӕд фарста уа, уӕд адӕймаджы йӕ хъуыдыйӕ бафӕрсын. Сӕйраг стихтӕ ис Библийӕ бакӕсӕн. Нӕ ныхасы кӕрон ын нӕ бон у зӕгъын, иннӕ хатт цӕуыл аныхас кӕндзыстӕм, уый. Кӕд, хӕдзары чи нӕ вӕййы, уыдонӕн не ’мбырды хъусынгӕнджытӕ литературӕ ныууадзынц, уӕд нӕ бон у трактат ахӕм ран сӕвӕрын, цӕмӕй иннӕтӕм ма зына.
6. Уынджы хъусын кӕнгӕйӕ куыд ис трактаттӕй пайда кӕнӕн?
6 Уынджы хъусын кӕнгӕйӕ. Искуы трактаттӕ уынджы парахат кодтай? Бирӕтӕ тагъд кӕй фӕкӕнынц, уый тыххӕй сӕ нӕ фӕфӕнды немӕ ныхасмӕ ӕрлӕууын. Афтӕмӕй зын бамбарӕн вӕййы, адӕймаджы ӕцӕгдӕр фӕнды фылдӕр базонын ӕви нӕ. Ахӕм адӕймагӕн ног брошюрӕтӕй куы раттӕм, уӕд ӕй нӕ базондзыстӕм, бакӕсдзӕн ӕй ӕви нӕ. Уымӕ гӕсгӕ хуыздӕр уаид, трактат ын куы раттикам. Трактаты ’ддаг фарс адӕймаджы хъуыдытыл кӕй бафтауы ӕмӕ дзы кӕсинаг бирӕ кӕй нӕ вӕййы, уый фӕрцы йӕ, чи зоны, адӕймаг цалдӕр минутмӕ дӕр акӕса. Кӕй зӕгъын ӕй хъӕуы, адӕймаг куы нӕ тагъд кӕна, уӕд нӕ бон у йемӕ, трактаты цы хъуыдытӕ ис, уыдонӕй иуӕй-иутыл аныхас кӕнын.
7. Радзур, не ’мчырыстӕттӕ трактаттӕй куыд пайда кодтой, хъусын кӕнынӕн-иу сын фадат куы фӕзынд, уӕд.
7 Фадат нын куы фӕзына, уӕд хъусын кӕнгӕйӕ. Фадат куы фӕзыны, уӕд ӕнцон у трактатты фӕрцы хъусын кӕнын. Иу ӕфсымӕр ӕдзухдӕр йемӕ фӕхӕссы трактаттӕ. Искӕуыл куы фембӕлы, уӕд ӕм трактат ратты ӕмӕ йын фӕзӕгъы, ам цы фыст ис, уый-ма бакӕс. Зӕгъӕм, дуканимӕ куы бацӕуы, уӕд дзы уӕйгӕнджытӕм дӕр ратты. Иу бинонтӕ та Нью-Йоркмӕ экскурсийы куы цыдысты, уӕд ахъуыды кодтой, алыхуызон адӕмыл дзы кӕй фембӕлдзысты, ууыл. Уымӕ гӕсгӕ семӕ рахастой брошюрӕ «Благая весть» ӕмӕ трактаттӕ алыхуызон ӕвзӕгтыл. Искӕй-иу ӕндӕр ӕвзагыл дзургӕ куы фехъуыстой, уӕд-иу ын йе ’взагыл трактат радтой, зӕгъӕм, уынджы уӕйгӕнджытӕн кӕнӕ-иу парчы йе та рестораны сӕ цуры чи сбадт, уыдонӕн.
8. Трактаттӕ тауинагимӕ абарӕн цӕмӕн ис?
8 «Байтау дӕ хуым». Трактаттӕ абарӕн ис тауинагимӕ. Зӕхкусӕг тауинаг парахатӕй байтауы, уымӕн ӕмӕ йӕ нӕ фӕзоны, кӕцы дзы сзайдзӕн. Екклесиасты 11:6 фыст ис: «Райсомӕй байтау дӕ хуым ӕмӕ изӕрмӕ дӕр дӕ къухтӕн ӕнцой ма дӕтт, уымӕн ӕмӕ йӕ нӕ зоныс, мыггаг кӕм ссӕудзӕн – ам ӕви уым, ӕви дыууӕ раны дӕр». Уымӕ гӕсгӕ дарддӕр дӕр трактаттӕй пайда кӕнӕм ӕмӕ афтӕмӕй «тауӕм зонындзинӕдтӕ» (Ӕмб. 15:7).
[Хицӕнгонд текст 3 фарсыл]
Трактаттӕ хъусын кӕныны хъуыддаджы стыр ӕххуыс кӕй сты, уымӕ гӕсгӕ сӕ ноябрӕй райдайгӕйӕ рӕстӕгӕй-рӕстӕгмӕ кӕцыдӕр мӕйты парахат кӕндзыстӕм