Стыр тыллӕг чи хӕссы, ахӕм зиу
Конгрессӕй ӕртӕ къуыри раздӕр райдайдзӕн зиу – фылдӕр базонын кӕй фӕнды, уыдоны конгресмӕ хондзыстӕм. Уыцы зиу тынг ахсджиаг у. Хуынды гӕххӕтт чи райсы ӕмӕ конгресмӕ чи ӕрбацӕуы, уыдоны зӕрдӕмӕ фӕцӕуынц Библийыл арӕзт раныхӕстӕ, конгрессы алыхуызон хайӕдты куыст, нӕ хорз ӕгъдау ӕмӕ, не ’хсӕн цы иудзинад ис, уый (Пс. 110:3; 133:1; Ис. 65:13, 14). Ӕмӕ кӕд хабар афтӕ у, уӕд, конгресмӕ дард рӕттӕй цӕуын кӕй хъӕуы, уыдоны дӕр хондзыстӕм?
2011 азы облӕстон конгрессы фӕстӕ иу филиал писмо райста, йӕ дуары хуынды гӕххӕтт чи ссардта, иу ахӕм сылгоймагӕй. Йегъовӕйы Ӕвдисӕнтӕ-иу ын йӕ дуар куы бахостой, уӕд-иу сӕм никуы ракаст. Йӕ писмойы ныффыста: «Уыдис мын рӕсугъд хӕдзар, хорз цардӕмбал, ӕмӕ мӕм афтӕ каст, ӕмӕ мын ис, амондджын цардӕн цыдӕриддӕр хъӕуы, уый. Фӕлӕ уӕддӕр амондджын нӕ уыдтӕн ӕмӕ мын цыдӕр нӕ фаг кодта. Уымӕ гӕсгӕ мӕхицӕн загътон, сабаты конгресмӕ кӕй ацӕудзынӕн, кӕд мӕ 320 километры цӕуын хъуыди, уӕддӕр». Конгресс йӕ зӕрдӕмӕ афтӕ тынг фӕцыди, ӕмӕ йӕ лӕгмӕ телефонӕй бадзырдта ӕмӕ йын загъта, хуыцаубоны программӕмӕ дӕр ӕй кӕй фӕнды байхъусын ӕмӕ уым кӕй баззайдзӕн. «Раныхӕстӕм байхъуыстон, бирӕ Ӕвдисӕнтимӕ базонгӕ дӕн, ӕмӕ мӕ нӕ фӕндыди, цӕмӕй конгресс фӕуыдаид». Хӕдзармӕ куы ’рыздӕхт, уӕд Библи ахуыр кӕнын райдыдта ӕмӕ цыппар мӕйы фӕстӕ сси ӕнӕаргъуыд хъусынгӕнӕг. «Куыд амондджын дӕн, мӕ дуары уыцы хуынды гӕххӕтт кӕй ссардтон, уымӕн ӕмӕ ныр мӕ цардӕй райгонд дӕн!»
Хуынды гӕххӕтт чи райса, уыдонӕй чидӕртӕ ӕнӕмӕнг ацӕудзысты конгресмӕ. Уымӕ гӕсгӕ ацы ахсджиаг зиуы хъӕудзӕн зӕрдиагӕй архайын. Хуынды гӕххӕттытӕ ма дӕм куы баззайа, уӕд-иу сӕ демӕ конгресмӕ рахӕсс, цӕмӕй сӕ дӕттай, фадат дын куы фӕзына, уӕд.
[Рамкӕ 5 фарсыл]
Хуынды гӕххӕттытӕ куыд парахат кӕндзыстӕм?
Цӕмӕй нӕ участоктыл аххӕссӕм, уый тыххӕй хъӕудзӕн цыбыртӕй дзурын. Нӕ бон уыдзӕн зӕгъын: «Дӕ бон хорз. Ӕгас зӕххыл дӕр парахат кӕнӕм ахӕм хуынды гӕххӕттытӕ. Фӕнды мӕ, цӕмӕй дзы дӕуӕн дӕр раттон. Ацы хуынды гӕххӕтты фыст ис, кӕдӕм дӕ хонӕм, уый». Зӕрдиагӕй-иу дзур. Хуынды гӕххӕттытӕ улӕфгӕ бонты куы парахат кӕнӕм, уӕд семӕ дӕттӕн уыдзӕн брошюрӕтӕ дӕр.