Зӕрдиагӕй хонӕм облӕстон конгресмӕ «Чырыстийы фӕдыл цу!»
Ногӕй та дӕтдзыстӕм хуынды гӕххӕттытӕ
1 Фарон ӕгас дунейы дӕр адӕмы хуыдтам облӕстон конгресмӕ «Ирвӕзындзинад ӕввахс у!». Уыцы конгресс тынг баххуыс кодта, фылдӕр базонын кӕй фӕндыд, уыдонӕн. Ахӕм конгресмӕ фыццаг хатт чи ӕрбацыд, уыдоны зӕрдӕмӕ тынг фӕцыд, Йегъовӕйы Ӕвдисӕнтӕ цы программӕ бацӕттӕ кодтой, уый (Ис 65:13). Тынг ӕхсызгон сын уыд, ахӕм фӕлмӕн, ӕмзонд адӕмы ’хсӕн кӕй уыдысты (Пс. 132:1). Цӕмӕй ацы аз дӕр, гӕнӕн уӕвгӕйӕ, фылдӕр адӕмы фӕхонӕм облӕстон конгресмӕ, уый тыххӕй та ногӕй дӕтдзыстӕм хуынды гӕххӕттытӕ.
2 Фарон цы бантыст. Зӕххы алы кӕрӕттӕй нын куыд фехъусын кодтой, афтӕмӕй, фарон адӕмы облӕстон конгресмӕ кӕй хуыдтам, уый стыр ахъаз фӕци. Бирӕ рӕтты нын нӕ куыстӕй тынг раппӕлыдысты. Зӕгъӕм, иу газеты ныффыстой: «Йегъовӕйы Ӕвдисӕнтӕ зӕрдиагӕй бафыдӕбон кодтой, цӕмӕй, сӕ алыварс чи цӕры, уыдонӕй алкӕйдӕр конгресмӕ фӕхуыдтаиккой. Уыцы хъуыддагӕн рахицӕн кодтой фылдӕр рӕстӕг, фылдӕр сӕ бахъуыд цӕуын дӕр ӕмӕ ныхас та кодтой цыбыртӕй». Уыцы стыр куыст бафиппайдтой иннӕ горӕтты дӕр, ӕмӕ уый тыххӕй фыстой ӕмӕ дзырдтой хабӕртты. Конгрессы размӕ хуынды гӕххӕттытӕ кӕй лӕвӕрдтам, уый тыххӕй нӕ раппӕлыдысты ӕппынкъаддӕр ӕртӕ газеты. Иу уацхӕссӕг та ныффыста, дыууӕ фарсӕй фылдӕр чи бацахста, ахӕм статья. Радзырдта, цӕуыл ӕууӕндӕм ӕмӕ кӕрӕдзийыл куыд ӕнувыд стӕм, стӕй хуынды гӕххӕтт ӕмӕ конгрессы тыххӕй дӕр. Нӕ хотӕй иу хӕдзарӕй-хӕдзармӕ хуынды гӕххӕттытӕ куы лӕвӕрдта, уӕд ын иу сылгоймаг йӕ ныхас фескъуыдта: «Диссӕгтӕ, мӕнӕ ныртӕккӕ кастӕн уый тыххӕй газеты!» Иннӕ ран та хӕдзары хицау загъта: «Гыццыл раздӕр куы кастӕн уый тыххӕй, ӕмӕ мӕм мӕнӕ уӕхӕдӕг ӕрбацыдыстут! Кӕм ис мӕ хуынды гӕххӕтт?» Стӕй ма афтӕ дӕр бакодта: «Йегъовӕйы Ӕвдисӕнтӕ тынг хорз хъуыддаг аразынц».
3 Конгресмӕ цы уазджытӕ ӕрбацыд, уыдонӕй бирӕтӕ бадтысты, сӕ хуынды гӕххӕтт сӕ къухы, афтӕмӕй. Иуӕй-иутӕ ӕрцыдысты дард рӕттӕй. Афтӕ зӕрдиагӕй кӕй архайдтам, уый фӕрцы конгресмӕ бирӕ адӕм ӕрбацыд. Зӕгъӕм, иу бӕстӕйы, конгрессы чи уыд, уыдон, уый размӕ азимӕ абаргӕйӕ уыдысты 27 проценты фылдӕр.
4 Нӕ территори. Хуынды гӕххӕттытӕ уардзыстӕм, конгресмӕ ма ӕртӕ къуыри куы хъӕуа, уӕд. Хъуамӕ зӕрдиагӕй бацархайӕм, цӕмӕй не ’мбырды территорийыл аххӕссӕм. Бирӕ участоктӕ цы ӕмбырдты ис, уым хъусынгӕнджыты бон уыдзӕн, хӕдзары кӕй нӕ баййафой, уыдонӕн хуынды гӕххӕттытӕ уадзын, кӕм нӕ зыной, ахӕм ран, конгресмӕ ма иу къуыри куы баззайа, уӕд. Хъуамӕ ӕмбырдтӕ бацархайой, цӕмӕй сӕ хуынды гӕххӕттытӕ иууылдӕр байуарой, ӕмӕ сӕ участоктыл ӕрзилой. Кӕд ма сӕм хуынды гӕххӕттытӕ баззайа, уӕд сӕ раттӕн уыдзӕн пионертӕн.
5 Куыд ис ныхас райдайӕн. Уӕ бон у зӕгъын: «Мах хонӕм, ӕгас зӕххыл дӕр цы ахсджиаг хабар уыдзӕн, уымӕ. Мӕнӕ дӕуӕн дӕр хуынды гӕххӕтт. Кӕдӕм дӕ хонӕм, уый тыххӕй ам фылдӕр фыст ис». Афтӕ цыбыртӕй куы ныхас кӕнӕм, уӕд фылдӕр адӕмӕн ратдзыстӕм хуынды гӕххӕттытӕ. Кӕй зӕгъын ӕй хъӕуы, адӕймаг нӕ истӕмӕй куы фӕрса, уӕд ын дзуапп раттынӕн рӕстӕг ссардзыстӕм. Фылдӕр базонын кӕй фӕнда, уый-иу дӕхимӕ афысс ӕмӕ-иу ӕй цыбыр рӕстӕгмӕ бабӕрӕг кӕн.
6 Мах хъуамӕ Чырыстийы фӕдыл цӕуӕм! (Иоан. 3:36). Тагъд цы облӕстон конгресс уыдзӕн, уырдӕм чи ’рбацӕуа, уыдон базондзысты, сӕ бон куыд у Чырыстийы фӕдыл цӕуын. Фидарӕй зонӕм, облӕстон конгресмӕ, «Чырыстийы фӕдыл цу!», зӕгъгӕ, кӕй хондзыстӕм, уый фӕрцы та хорз хабар тынгдӕр айхъуысдзӕн. Уымӕ гӕсгӕ адӕмы зӕрдиагӕй хондзыстӕм. Цӕй уӕдӕ уын Йегъовӕ арфӕ кӕнӕд, ӕгас дунейы дӕр цы куыст цӕудзӕн, уым кӕй фыдӕбон кӕндзыстут, уый тыххӕй!