Уацамынды ӕнӕдзургӕйӕ ма лӕуу
1. Нӕ бон куыд у апостол Павелы фӕзмын, иннӕтимӕ уацамынды куы вӕййӕм, уӕд?
1 Апостол Павел йе ’мчырыстӕттимӕ цы рӕстӕг уыди, уый нымадта хорз фадатыл, цӕмӕй-иу «кӕрӕдзийы уырнындзинадӕй бафидар уыдаиккой» (Ром. 1:12). Уацамынды рӕстӕг хорз фадатыл нымайыс, цӕмӕй, кӕимӕ фӕхъусын кӕныс, уый бафидар кӕнай ӕмӕ йын баххуыс кӕнай? Ӕнӕдзургӕйӕ лӕууыны бӕсты-иу хуыздӕр нӕ уаид, куы йын радзурис, дӕуӕн та цы ӕххуыс кӕны, цӕмӕй ӕнтыстджынӕй хъусын кӕнай?
2. Уацамынды кӕимӕ вӕййӕм, уый нӕ бон куыд у ныфс уадзын ӕмӕ уый ахсджиаг цӕмӕн у?
2 Ныфс сӕ уадз. Хъусынгӕнджытӕй иуӕй-иутӕ ныфсджын нӕ вӕййынц, ӕмӕ уый бӕрӕг вӕййы сӕ цӕсгомӕй ӕмӕ сӕ хъӕлӕсӕй. Нӕ бон сӕ у ныфс бауадзын, зӕрдиагӕй сӕ куы раппӕлӕм, уӕд. Нӕ бон ма сӕ куыд у ныфс уадзын? Иу цӕуӕг цӕстдарӕг уацамынды кӕимӕ вӕййы, уымӕн ӕргом фӕдзуры, цӕмӕй тӕрсы, уыдӕтты тыххӕй ӕмӕ арӕх кӕй фӕкувы, цӕмӕй-иу фӕныфсджындӕр уа. Ӕндӕр ӕфсымӕр та загъта, уымӕн цы баххуыс кӕны, уый тыххӕй: «Фыццаг уал адӕймагмӕ бахудын. Цӕмӕй уый мӕ бон суа, уый тыххӕй иуӕй-иу хатт кувгӕ дӕр фӕкӕнын». Цы дын ӕххуыс кӕны, цӕмӕй уацамынды ныфсджындӕр уай? Кӕимӕ хъусын кӕныс, уымӕн-иу ӕй радзур.
3. Уацамынды кӕимӕ уай, уый цӕмӕй ноджы ӕнтыстджындӕр уа, уый тыххӕй йын дӕ бон куыд у баххуыс кӕнын?
3 Кӕрӕдзийӕ ахуыр кӕнут. Чи зоны, дӕ ныхас райдайыс хуымӕтӕг ныхӕстӕй кӕнӕ фарстайӕ, зӕгъӕм, цыдӕр бынӕттон хабарӕй. Кӕнӕ та нӕ публикациты цы цӕвиттонтӕ уыд, уыдонӕй иуы цыдӕр фӕивтай ӕмӕ дӕм адӕм хорз байхъуыстой. Уыдӕттӕ-иу де ’мбалӕн радзур (Ӕмб. 27:17). Зӕгъӕм, адӕймагмӕ дыккаг хатт куы цӕуат, уӕд, демӕ чи уа, уымӕн-иу радзур, уыцы адӕймагимӕ цӕуыл ныхас кӕндзынӕ ӕмӕ куыд. Библийы ахуыры фӕстӕ йын дӕ бон у радзурын, ахуыргӕнинаджы зӕрдӕ бацагайыны тыххӕй, уыцы темӕйӕ, стихӕй кӕнӕ ахуыр кӕныны мадзалӕй цӕмӕн спайда кодтай.
4. Не ’мчырыстӕттӕн цӕмӕн хъуамӕ ӕххуыс кӕнӕм?
4 Фыццаг ӕнусы хъусынгӕнджытӕ ӕрмӕст ӕнӕуырнӕг адӕмыл нӕ хъуыды кодтой, фӕлӕ ма ӕмбӕрстой, кӕрӕдзи фидар кӕнын куыд ахсджиаг уыд, уый дӕр (Хъуыд. 11:23; 15:32). Апостол Павел ӕрыгон Тимофейы ахуыр кодта ӕмӕ йӕ стӕй разӕнгард кодта, цӕмӕй, цы базыдта, уый иннӕтӕн дӕр дзырдтаид (2 Тим. 2:2). Уацамынды не ’мчырыстӕттӕн хорздзинад аразын куы нӕ рох кӕнӕм, уӕд сӕ циндзинадыл ӕфтдзӕн ӕмӕ арӕхстджындӕр кӕндзысты, стӕй нӕ уӕларвон Фыд Йегъовӕйы зӕрдӕ дӕр рухс кӕндзӕн (Дзут. 13:15, 16).