«Дӕ къухтӕн ӕнцой ма дӕтт»

Хицауы хъуыддаджы нырма бирӕ фыдӕбон кӕнын хъӕуы (1 Кор. 15:58). Кӕд уе ’мбырдӕн ис, арӕх кӕм нӕ хъусын кӕнынц, ахӕм территори, уӕд дзы уӕ бон у уӕхицӕн участоктӕ райсын. Афтӕмӕй ӕмбырдӕн баххуыс кӕндзыстут, цӕмӕй, арӕх кӕм нӕ хъусын кӕнынц, уыцы территорийыл аххӕсса.

Ахӕм ӕмбырдты хистӕр нӕлгоймӕгтӕн ма сӕ бон у къордтӕ саразын, цӕмӕй, арӕх кӕм нӕ хъусын кӕнынц, уыцы территори бакусой. Хорз уаид, хъусынгӕнджытӕ-иу хӕринаг семӕ куы ахӕссиккой, ӕмӕ, ӕмбырдӕн дард ран цы участоктӕ ис, уым ӕнӕхъӕн бон хъусын кӕной. Ӕвзӕр нӕ уаид, уӕ разы ахӕм нысан куы сӕвӕриккат, цӕмӕй, гӕнӕн уӕвгӕйӕ, ацы аз ахӕм территоритӕн сӕ фылдӕрыл ӕрзилат.

Кӕд уе ’мбырд йӕ территори ӕдзухдӕр ӕнӕхъӕнӕй бакусы, уӕд уӕ бон у, ӕндӕр рӕтты ӕмбырдтӕн иу цасдӕр рӕстӕг баххуыс кӕнын сӕ участоктыл ӕрзилынӕн. Фароны лӕггады азы хъусынгӕнджыты 37 къорды афтӕ бакодтой, ӕмӕ сын ныр ис, хорз сӕм чи хъусы, бирӕ ахӕм адӕм ӕмӕ бирӕ Библийы ахуыртӕ. Кӕмӕн баххуыс кодтой, иу ахӕм ӕмбырды хистӕр нӕлгоймаг загъта, зӕгъгӕ, 14 хъусынгӕнӕджы 10 бонмӕ сарӕзтой, не ’мбырд иу мӕймӕ цы сарӕзтаид, уый. Дӕ бон у ацы аз афтӕ баххуыс кӕнын?

Уӕрӕсейы нырма ис, иу ӕмбырдӕн дӕр нысангонд чи нӕу, бирӕ ахӕм территоритӕ, сты 1 300 бӕрц. Ӕмӕ уыцы территоритӕй иу кӕнӕ фылдӕры балӕггад кӕнын кӕй бафӕнда, ахӕм хъусынгӕнджытӕ дӕр разындзӕн. Кӕд фарон бирӕтӕ ахӕм рӕттӕм ацыдысты, уӕддӕр уыцы территоритыл се ’ппӕтыл не ’рзылдысты. Уымӕ гӕсгӕ уӕ разӕнгард кӕнӕм, цӕмӕй ацы аз дӕр филиалӕй бар ракурат ӕмӕ Хуыцауы Паддзахады тыххӕй фылдӕр хъусын кӕнат (Лук. 9:60).

Хъусынгӕнджытӕ кӕм нӕ фаг кӕны, ахӕм ранмӕ ацӕуын кӕй фӕнды, уыдон гыццыл не сты. Кӕд дӕу дӕр фӕнды, уӕд хорз уаид, уый тыххӕй уе ’мбырды хистӕр нӕлгоймӕгтимӕ куы аныхас кӕнис. Стӕй ма дӕ бон у ӕркӕсын 2011 азы августы «Нӕ хъусын кӕныны хъуыддаджы» статьямӕ «Дӕ бон у Македонимӕ ацӕуын?», 4–6 фӕрстӕ.

Паддзахады мыггаг тау. Ӕмбырдӕн йӕ территорийы хъусын кӕнынӕн баххуыс кӕнын кӕй фӕнды кӕнӕ, иу ӕмбырдӕн дӕр нысангонд чи нӕу, ахӕм территоримӕ ацӕуын кӕй фӕнды, уый хъуамӕ бацӕуа уацамындӕн дзуапдӕттӕг цӕстдарӕгмӕ. Уый йӕм ратдзӕн ахӕм территориты хыгъд.

Хъуамӕ гутоныл ныххӕцӕм, цӕмӕй фылдӕр лӕггад кӕнӕм ӕмӕ размӕ кӕсӕм (Лук. 9:62). Мах нӕ зонӕм, мыггаг кӕм сырӕздзӕн, уый (Еккл. 11:6). Цӕй уӕдӕ, Филиппау Йегъовӕ ӕмӕ йӕ организацийы къухы хорз кусӕнгӕрзтӕ уӕм, цӕмӕй, кӕм хъӕуы, уым Паддзахады мыггаг тауӕм, цалынмӕ кӕрон не ’рцыд, уӕдмӕ (Хъуыд. 8:26, 27; Матф. 28:20).