Зӕрӕдты хӕдзӕртты чи цӕры, уыдоны ма рох кӕнӕм
1. Зӕрӕдты хӕдзӕртты чи цӕры, уыдонӕн дӕр хорз хабар цӕмӕн хъӕуы фехъусын кӕнын?
1 Бирӕтыл азтӕ сӕ уӕз кӕй ӕруагътой, уый тыххӕй сӕ бон алцы аразын нал у (Еккл. 12:1–7). Чидӕртӕ сӕ цӕры зӕрӕдты хӕдзӕртты. Уӕдӕ хорз хабар ӕрмӕст хӕдзарӕй-хӕдзармӕ куы хъусын кӕнӕм, уӕд ӕй нӕ фехъусдзысты. Кӕд, зӕрӕдты хӕдзӕртты чи цӕры, уыцы ацӕргӕтӕй ӕмӕ инвалидтӕй бирӕтӕн сӕ бон цӕуын нӕ вӕййы ӕмӕ рохгӕнаг вӕййынц, уӕддӕр дзы бирӕты бон у Йегъовӕйы тыххӕй базонын ӕмӕ йӕ бауарзын. Нӕ бон сын куыд у «диссаджы ныфсы» тыххӕй фехъусын кӕнын? (Тит. 2:13).
2. Зӕрӕдты хӕдзӕртты адристы хыгъд куыд саразӕн ис?
2 Цӕмӕй райдайӕм. Зӕрӕдты хӕдзӕртты адристы хыгъд саразӕн ис алыхуызон справочниктӕм гӕсгӕ. Агур сӕ афтӕ «зӕрӕдты хӕдзӕрттӕ», «зӕрӕдты пансионаттӕ» ӕмӕ афтӕ дарддӕр. Ӕмбырды уацамындӕн дзуапдӕттӕг цӕстдарӕг фӕлтӕрдджын хъусынгӕнджытӕн бахӕс кӕндзӕн ахӕм рӕттӕм ацӕуын. Алцыдӕр хорз куы спълан кӕнат ӕмӕ уӕ ныфс Йегъовӕйыл куы дарат, уӕд уын чи зоны бантыса Библийы ахуыры къорд саразын (Ӕмб. 21:5; 1 Иоан. 5:14, 15).
3, 4. а) Ацӕргӕтимӕ уӕ Библи ахуыр кӕнын кӕй фӕнды, уый тыххӕй кӕмӕн ис зӕгъӕн? ӕ) Куыд ис бамбарын кӕнӕн, цы араздзынӕ, уый?
3 Ацӕргӕтимӕ уӕ Библи ахуыр кӕнын кӕй фӕнды, уый тыххӕй кӕмӕн ис зӕгъӕн? Зӕрӕдты хӕдзар стыр куы уа, ӕмӕ дзы бирӕ цӕрджытӕ ӕмӕ бирӕ кусджытӕ куы уа, уӕд хуыздӕр уыдзӕн секретармӕ бацӕуын ӕмӕ баныхас кӕнын директоримӕ фембӕлыныл. Фӕлӕ зӕрӕдты хӕдзары цалдӕр адӕймаджы куы цӕра ӕмӕ дзы дыууӕ-ӕртӕ кусӕджы йеддӕмӕ куы нӕ уа, уӕд та хуыздӕр уыдзӕн ахӕм рӕстӕг бацӕуын, цӕмӕй хицауӕн йӕхиимӕ аныхас кӕнай.
4 Бамбарын-иу кӕн, Библийы хабӕрттӕ кӕсын ӕмӕ сыл ныхас кӕнын чи уарзы, уыдонӕн дӕ рӕстӕг кӕй не ’вгъау кӕныс ӕмӕ уый лӕвар кӕй аразыс. Базон, цӕрджытӕй кӕй фӕнды, цӕмӕй Библийыл ныхас кӕной къуыри 30 минуты бӕрц. Пайда кӕнӕн ис алыхуызон публикацитӕй. Фӕлӕ бирӕты зӕрдӕмӕ тынгдӕр цӕуынц хуымӕтӕг ӕвзагӕй фыст чингуытӕ, зӕгъӕм, «Ӕппӕты номдзыддӕр адӕймаг». Дӕ бон сӕ у директорӕн дӕр равдисын. Баныхас кӕнӕн ис, Библийыл цы бон, цы рӕстӕг ӕмӕ кӕм ныхас кӕндзыстут, ууыл. Ӕмӕ гӕнӕн ис директор уый тыххӕй хъусинаг бакӕна хъусинӕгты фӕйнӕгыл. Йегъовӕйы Ӕвдисӕн кӕй дӕ, уый дзурынӕй ма тӕрс. Директорӕн ма бамбарын кӕн, дины ӕгъдӕуттӕ кӕй нӕ кӕндзынӕ, фӕлӕ Библийыл кӕй ныхас кӕндзынӕ.
5. Цы аразӕн ис, цӕмӕй Библийы ахуыр адӕмы зӕрдӕмӕ цӕуа ӕмӕ сын пайда хӕсса?
5 Ахуыр куыд уадздзыстӕм. Библийыл куыд ныхас кӕндзыстӕм, уый баст уыдзӕн, зӕрӕдты хӕдзары цы уавӕртӕ ис, ууыл. Уымӕ гӕсгӕ хъуамӕ ӕмбаргӕ уӕм ӕмӕ, куы хъӕуа, уӕд-иу цыдӕртӕ дӕр фӕивӕм. Ахуыр чи уадздзӕн, уый-иу хъуамӕ йемӕ ӕрбахӕсса, цы публикаци ахуыр кӕндзысты, уымӕй цалдӕр ӕмӕ-иу сӕ ахуыры фӕстӕ ӕрӕмбырд кӕна. Чи зоны дзы искӕй бахъӕуа публикаци стыр шрифтыл дӕр. Ӕнӕуи ахуыры куыд вӕййы, афтӕ уӕ бон у абзацтӕ кӕсын, ӕмӕ сӕ фарстатӕ ӕмӕ дзуаппытӕм гӕсгӕ ӕвзарын. Хорз чи кӕсы ӕмӕ кӕй фӕнды, уыдонӕн зӕгъӕн ис, цӕмӕй абзацтӕ ӕмӕ стихтӕ кӕсой. Ахуыры рӕстӕг алкӕй дӕр разӕнгард кӕн йӕ хъуыдытӕ дзурынмӕ. У хӕларзӕрдӕ ӕмӕ хъӕлдзӕг. Директорӕй бар ракур, цӕмӕй сын нӕ организацийы видеофильмтӕй искӕцытӕ равдисай, зӕгъӕм, Библийыл тынгдӕр баууӕндынӕн чи ӕххуыс кӕны кӕнӕ Библийы хабӕрттыл арӕзт чи у, ахӕмтӕ. Гӕнӕн куы уа, уӕд-иу ахуыр райдай ӕмӕ фӕу цыбыр куывдӕй. Хъусынгӕнджытӕй чидӕртӕ Паддзахады зарджытӕ дӕр азарынц.
6. Цы ис саразӕн, чидӕр цӕуылдӕр разы куы нӕ уа, уӕд?
6 Цы саразӕн ис, ахуыры рӕстӕг цы кӕсут кӕнӕ цӕуыл дзурут, уыимӕ чидӕр разы куы нӕ уа, уӕд? Дзуапп ын куы дӕттай, уӕд ӕмбаргӕ у (Кол. 4:6). Чи зоны дӕ бон суа, йӕ фарстайӕн дзуапп чи дӕтты, Библийӕ ахӕм стих бакӕсын. Арӕх хуыздӕр вӕййы адӕймагӕн бузныг зӕгъын ӕмӕ баныхас кӕнын, цӕмӕй уыцы фарстайыл ахуыры фӕстӕ хицӕнӕй аныхас кӕнат.
7. Цы саразӕн ис, адӕймаг фарста куы радта кӕнӕ йӕ фылдӕр базонын куы фӕнда?
7 Хатт адӕймаг фарста ратты кӕнӕ йӕ фылдӕр базонын бафӕнды. Ахӕм уавӕры иу хо фӕзӕгъы: «Тынг хорз фарста у. Фӕлӕ не ’рмӕг кӕронмӕ фӕуӕм, ӕмӕ стӕй дӕ фарстайыл дӕр аныхас кӕндзыстӕм». Арӕх адӕймагимӕ баныхас кӕнӕн вӕййы, цӕмӕй йемӕ хицӕнӕй Библи ахуыр кӕнай ӕндӕр рӕстӕг ӕмӕ ӕндӕр ран.
8. Куыд ис хыгъды фыссӕн, Библи къордимӕ кӕнӕ хицӕн адӕймӕгтимӕ куы ахуыр кӕнат, уӕд?
8 Хуыздӕр уаид, зӕрӕдты хӕдзармӕ Библи ахуыр кӕнынмӕ уыцы иу Ӕвдисӕнтӕ куы цӕуиккой. Хъусынгӕнджытӕй алкӕмӕндӕр йӕ бон у рӕстӕг фыссын. Къордимӕ Библи куы ахуыр кӕнат, уӕд ахуыр чи уадзы, уыцы хъусынгӕнӕгӕн йӕ бон у алы хатт дӕр фыссын иу дыккаг бацыд ӕмӕ мӕйы мидӕг та – иу Библийы ахуыр. Йӕ бон ахуыр кӕнын кӕмӕн у, ахӕм адӕймагимӕ хицӕнӕй Библи куы ахуыр кӕнат, уӕд ӕй ис хыгъды фыссӕн, ӕнӕуи куыд фӕкӕнӕм, афтӕ.
9, 10. Зӕрӕдты хӕдзары чи хъусын кӕна, уыдонмӕ цавӕр миниуджытӕ хъуамӕ уа? Бамбарын ӕй кӕн.
9 Куыдфӕндыйы цӕстӕй йӕм ма кӕсӕм. Хорз уаид къордимӕ Библи ахуыр кӕнын уыцы иу бон ӕмӕ уыцы иу рӕстӕг. Зӕрӕдты хӕдзары чи цӕры ӕмӕ чи кусы, уыдоны ныфс уыдзӕн, ӕнӕсцухӕй сӕм кӕй цӕудзыстӕм, ӕмӕ-иу ахуыр афоныл кӕй райдайдзыстӕм ӕмӕ кӕй фӕуыдзыстӕм (Матф. 5:37). Уымӕ гӕсгӕ хъуамӕ нӕ хӕс зӕрдиагӕй ӕххӕст кӕнӕм ӕмӕ алцыдӕр уаг ӕмӕ ӕгъдауыл кӕнӕм. Рӕстӕг куыд равдыста, афтӕмӕй хуыздӕр вӕййы, къордимӕ Библи куы фӕахуыр кӕнынц дыууӕ фӕлтӕрдджын хъусынгӕнӕджы (Еккл. 4:9, 10). Зӕрӕдты хӕдзар стыр куы уа, уӕд гӕнӕн ис фылдӕр хъусынгӕнджыты ӕххуыс бахъӕуа.
10 Ахсджиаг ма у, цӕмӕй хӕларзӕрдӕ уӕм ӕмӕ адӕмыл тыхсӕм (Фил. 2:4). Фыццаг ахуырмӕ чи ӕрбацӕуа, уыдонӕй-иу алкӕимӕ дӕр базонгӕ у. Сӕ нӕмттӕ сын ныффысс, ӕмӕ-иу сӕ иннӕ хатмӕ бахъуыды кӕн. Фӕлӕ ацӕргӕтӕй иуӕй-иуты зӕрдӕмӕ нӕ фӕцӕуы, ӕнӕзонгӕ адӕм сӕм ӕрмӕст сӕ номӕй куы фӕдзурынц. Фӕразон ӕмӕ лӕмбынӕг куы уай, уӕд алкӕмӕн дӕр ӕнцондӕр уыдзӕн.
11. Къордимӕ Библи чи ахуыр кӕны, уыдон куыд хъуамӕ аргъ кӕной, зӕрӕдты хӕдзары чи кусы, уыдонӕн ӕмӕ дзы чи цӕры, уыдоны хӕстӕджытӕн?
11 Уымӕй уӕлдай ма хъуамӕ аргъ кӕнӕм, зӕрӕдты хӕдзары чи кусы, уыдонӕн ӕмӕ дзы чи цӕры, уыдоны хӕстӕджытӕн, ӕмӕ сӕм хорз цӕстӕй кӕсӕм. Ахуыр кӕд цӕудзӕн, уымӕн рӕстӕг куы снысан кӕнат, уӕд-иу ӕй ӕнӕ директоры барлӕвӕрдӕй ма аивут. Уый ма хауы, ахуыр куыд уадзут, уымӕ дӕр. Рӕстӕгӕй-рӕстӕгмӕ-иу директоры афӕрсут, ахуыр адӕмы зӕрдӕмӕ куыд цӕуы. Ахуыры рӕстӕг ацӕргӕтӕм сӕ хӕстӕджытӕ куы ӕрбацӕуой, уӕд-иу уыдонимӕ дӕр базонгӕ ут. Бамбарын-иу сын кӕнут, Библи цӕмӕн ахуыр кӕнут ӕмӕ сын сӕ хӕстӕгыл зӕрдиагӕй кӕй тыхсут. Зӕгъут сын, цӕмӕй уыдон дӕр уемӕ абадой ӕмӕ байхъусой.
12, 13. Радзурут, зӕрӕдты хӕдзӕртты хъусын кӕнгӕйӕ бирӕтӕн цы бантыст, уый тыххӕй.
12 Цы нын бантыст. Цӕуӕг цӕстдарджытӕ ӕмӕ ӕмбырдтӕ куыд фехъусын кодтой, афтӕмӕй сын ахӕм рӕтты хъусын кӕнгӕйӕ бирӕ бантыст. Иу зӕрӕдты хӕдзары фыццаг ахуырмӕ ӕрбацыд 20 адӕймаджы бӕрц ӕмӕ дзы ӕхсӕз адӕймагимӕ райдыдтой хицӕнӕй Библи ахуыр кӕнын. Иу сылгоймаг дзы донаргъуыд дӕр райста. Ӕндӕр хӕдзары та 85-аздзыд сылгоймаг райдыдта ӕмбырды фембӕлдтӕм цӕуын ӕмӕ йӕ бафӕндыд донаргъуыд райсын. Иу зӕрӕдты хӕдзары администраци куы аскъуыддзаг кодта, цӕмӕй сӕм Йегъовӕйы Ӕвдисӕнтӕ мауал цӕуой, уӕд йӕ цӕрджытӕ директормӕ бахъаст кодтой! Ӕппынфӕстаг сын Библи ахуыр кӕныны бар радтой, ӕмӕ-иу фембӕлдмӕ ӕрбацыд 25–30 адӕймаджы.
13 Зӕрӕдты хӕдзары чи цӕры, уыдонмӕ цы уарзондзинад ӕвдисӕм, уый ӕрмӕст уыдоныл нӕ фӕзыны. Зӕгъӕм, арӕх кусджытӕ дӕр ахуыры рӕстӕг фӕхъусынц ӕмӕ ма дзуаппытӕ дӕр фӕдӕттынц. Ацӕргӕтыл зӕрдиагӕй кӕй тыхсӕм, уый иннӕтӕ дӕр ӕнӕбафиппайгӕ нӕ фӕвӕййынц (1 Пет. 2:12). Библи адӕмимӕ цӕмӕн фӕахуыр кӕнӕм, уый иу директор куы базыдта, уӕд загъта: «Раздӕр кӕм уыдыстут? Кӕд райдайдзыстут ахуыр кӕнын?» Ӕндӕр хӕдзары директор та ныффыста: «Мӕн тынг фӕнды, цӕмӕй нӕ регионы цыдӕриддӕр зӕрӕдты хӕдзӕрттӕ ис, уым Йегъовӕйы Ӕвдисӕнтӕ адӕмимӕ Библи ахуыр кӕной. Йегъовӕйы Ӕвдисӕнты сӕ дин разӕнгард кӕны, цӕмӕй адӕмӕн лӕвар ӕххуыс кӕной ӕмӕ афтӕмӕй стыр ӕххуыс сты нӕ ӕхсӕнадӕн». Гавайы сакъадӕхты иу зӕрӕдты хӕдзары администраци Йегъовӕйы Ӕвдисӕнтӕн сӕ лӕггады тыххӕй радта кады гӕххӕтт. Фыст дзы уыди, сӕ цӕрджытӕн «зынаргъ хӕзнаты» хуызӕн кӕй сты.
14. Зӕрӕдты хӕдзары чи цӕры, уыдонӕн ӕххуыс кӕнын нӕ цӕмӕн хъуамӕ фӕнда?
14 Йегъовӕйы фӕнды, цӕмӕй йӕ ацӕргӕтӕ дӕр кадджын кӕной (Пс. 148:12, 13). Уый хауы, зӕрӕдты хӕдзары чи цӕры, уыдонмӕ дӕр. Кӕд уе ’мбырды территорийы зӕрӕдты хӕдзар ис, уӕд хорз уаид уыдонӕн дӕр хорз хабар куы фехъусын кӕниккат. Хистӕр нӕлгоймӕгты ӕмӕ зӕрӕдты хӕдзары директоры ӕххуысӕй нын чи зоны бантыса ацӕргӕтӕн хорз хабар радзурын. Зӕрӕдты куы нӕ рох кӕнӕм, уӕд Йегъовӕйы фӕзмдзыстӕм (Пс. 71:9, 18).