Уацамынды уӕ рӕстӕгӕй, хуыздӕр куыддӕриддӕр у, афтӕ пайда кӕнут
2014 лӕггады азы Йегъовӕйы Ӕвдисӕнтӕ хъусын кодтой 1 945 487 604 сахаты. Уымӕй бӕрӕг у, тынг нӕ кӕй фӕнды Йегъовӕйӕн ӕппӕт хъарутӕй лӕггад кӕнын (Пс. 110:3; 1 Кор. 15:58). «Рӕстӕг бирӕ [кӕй] нал баззад», уый зонгӕйӕ нӕ бон нӕ уаид нӕ зынаргъ рӕстӕгӕй афтӕ пайда кӕнын, цӕмӕй хорз хабар фылдӕр адӕмӕн фехъусын кӕнӕм? (1 Кор. 7:29).
Цӕмӕй нӕ рӕстӕгӕй, хуыздӕр куыддӕриддӕр у, афтӕ пайда кӕнӕм, уый тыххӕй нӕ фӕхъӕуы цыдӕр фӕивын. Зӕгъӕм, кӕд дын арӕх уацамынды афтӕ вӕййы, ӕмӕ сахат кӕнӕ уымӕй фылдӕр никӕимӕ сныхас кӕныс, уӕд дӕ бон нӕ уаид ӕндӕр уавӕрты хъусын кӕнын, цӕмӕй-иу фылдӕр адӕмы ссарай ӕмӕ-иу семӕ аныхас кӕнай? Кӕй зӕгъын ӕй хъӕуы, алыхуызон территориты алыхуызон уавӕртӕ ис. Фӕлӕ, дӕлдӕр цы уынаффӕтӕ ис, уыдон дын баххуыс кӕндзысты дӕ рӕстӕгӕй, хуыздӕр куыддӕриддӕр у, афтӕ пайда кӕнынӕн, цӕмӕй «уӕлдӕф тымбылкъухӕй» ма хойай (1 Кор. 9:26).
Хӕдзарӕй-хӕдзармӕ хъусын кӕнӕм. Бирӕ азты дӕргъы афтӕ у, ӕмӕ хъусынгӕнджытӕ уацамынды куы фӕцӕуынц, уӕд райдайынц хӕдзарӕй-хӕдзармӕ хъусын кӕнын. Фӕлӕ бирӕтӕ боныгон куысты кӕй вӕййынц, уымӕ гӕсгӕ хорз уаид, участокмӕ-иу изӕрыгӕтты куы цӕуиккам. Боныгон та нын, чи зоны, фылдӕр бантыса, уынджы кӕнӕ куыстуӕтты куы хъусын кӕнӕм, уӕд.
Бирӕ адӕм кӕм вӕййы, ахӕм рӕтты хъусын кӕнӕм. Ӕмбырдтӕ стендтӕ хъуамӕ ӕвӕрой, сӕ территорийы бирӕ адӕм кӕм вӕййы, ахӕм рӕтты. (Кӕс 2013 азы июлы «Нӕ хъусын кӕныны хъуыддаг», 5 ф.) Кӕд уыцы рӕтты раздӕрау бирӕ адӕм нал уа, уӕд ӕмбырды комитет, чи зоны, ахӕм уынаффӕ рахӕсса, цӕмӕй стендтӕ ӕвӕрын райдайой, фылдӕр адӕм кӕм вӕййы, уым.
Уый размӕ кӕимӕ аныхас кодтам ӕмӕ, Библи кӕимӕ ахуыр кӕнӕм, уыдоны-иу абӕрӕг кӕнӕм. Чи зоны, уӕлдӕр кӕй кой кодтам, уыцы уавӕрты хъусын кӕнгӕйӕ нӕ къухы бирӕ нӕ бафты. Цымӕ уыцы рӕстӕг нӕ бон нӕ уаид, уый размӕ кӕимӕ аныхас кодтам кӕнӕ, Библи кӕимӕ ахуыр кӕнӕм, уыдоны абӕрӕг кӕнын? Кӕд дын сабатбонты райсомӕй хӕдзарӕй-хӕдзармӕ хъусын кӕнгӕйӕ фылдӕр бантысы, уӕд-иу дӕ бон нӕ уаид, Библи кӕимӕ ахуыр кӕныс, уыдоны та фӕссихор кӕнӕ изӕрыгон абӕрӕг кӕнын? Хъусынгӕнджытӕ, уый размӕ кӕимӕ ныхас кодтой, уыдонмӕ ногӕй цӕуынвӕнд куы кӕной, уӕд хорз уаид, Библи кӕимӕ ахуыр кӕнынц, уыдонӕй уырдӕм хӕстӕг чи цӕры, уыдонмӕ дӕр-иу куы бацӕуиккой. Афтӕмӕй сӕ къухы фылдӕр ӕфтдзӕн.
Уацамынды куы вӕййӕм, уӕд, кӕй зӕгъын ӕй хъӕуы, уыцы рӕстӕг хыгъды ныффыссӕм. Фӕлӕ нӕ циныл цин бафты, уацамынды нын фылдӕр куы бантысы, уӕд. Кӕд кӕцыдӕр уавӕрты хъусын кӕнгӕйӕ дӕ къухы бирӕ нӕ бафты, уӕд-иу бафӕлвар уыцы рӕстӕг ӕндӕр уавӕрты хъусын кӕнын. Кув «хуымы Хицау» Йегъовӕмӕ, цӕмӕй дын разамынд дӕтта, ӕмӕ дӕ бон уа уацамынды дӕ рӕстӕгӕй, хуыздӕр куыддӕриддӕр у, афтӕ пайда кӕнын (Матф. 9:38).