Фарстаты асыкк

◼ Ӕндӕр бӕстӕйы чи цӕры, ахӕм ӕнӕзонгӕ адӕмӕн Интернеты уылты хъусын кӕнӕн йе та семӕ Библи ахуыр кӕнӕн ис?

Иуӕй-иу хъусынгӕнджытӕ Интернетӕй фӕпайда кӕнынц, цӕмӕй, хъусын кӕныны бар кӕм нӕй кӕнӕ хъусынгӕнджытӕ бирӕ кӕм нӕй, ахӕм бӕстӕты адӕмимӕ Библи ахуыр кӕной. Кӕмӕндӕрты сӕ уый фӕрцы бирӕ бантыст. Фӕлӕ хъусынгӕнджытӕ ӕнӕзонгӕ адӕмимӕ Интернеты уылты кӕрӕдзимӕ писмотӕ куы фервитынц йе та кӕрӕдзимӕ онлайн куы фӕфыссынц, уӕд сӕхи тӕссаг уавӕры баппарынц. (Кӕс 2007 азы июлы «Нӕ хъусын кӕныны хъуыддаг», 3 ф.) Кӕд сӕ нысан сыгъдӕгзӕрдӕ адӕммӕ хорз хабар фӕхӕццӕ кӕнын вӕййы, уӕддӕр, чи зоны, афтӕ рауайа, ӕмӕ сӕ ӕвзӕр зондыл чи сараза, ахӕм адӕймагмӕ кӕнӕ та суанг, раст дин чи ныууагъта, ахӕммӕ райдайой фыссын (1 Кор. 1:19–25; Кол. 2:8). Стӕй сӕрибарӕй хъусын кӕнын кӕм нӕ уадзынц кӕнӕ уый бар бынтондӕр кӕм нӕй, уыцы бӕстӕты хицауад, чи зоны, йӕ хъус дара, Интернеты уылты адӕм кӕрӕдзимӕ цы писмотӕ фервитынц, уыдонмӕ. Ахӕм бӕстӕты цӕрӕг адӕмӕй искӕмӕ куы фыссӕм, уӕд, чи зоны, уыцы бӕстӕйы хотӕ ӕмӕ ӕфсымӕрты тӕссаг уавӕры баппарӕм. Уымӕ гӕсгӕ хъусынгӕнджытӕ Интернеты уылты ӕндӕр бӕстӕты цӕрӕг адӕмы хъуамӕ ма агурой, цӕмӕй сын хорз хабар фехъусын кӕной.

Ӕндӕр бӕстӕйӕ рӕстӕгмӕ чи ӕрцыд, ахӕм адӕймагӕн хорз хабар куы фехъусын кӕнӕм ӕмӕ стӕй фӕстӕмӕ сӕхимӕ куы аздӕха, уӕд-иу ӕм хъуамӕ уырдӕм ма фыссӕм, цӕмӕй йын рӕстдзинад базонынӕн баххуыс кӕнӕм, кӕд нӕ бӕстӕйы филиалӕй ацы фарстайы фӕдыл ӕндӕр разамынд нӕй, уӕд. Фӕлӕ, цалынмӕ нӕ ацыд, уӕдмӕ йын нӕ бон у равдисын, нӕ сайты фылдӕр ӕрмӕг куыд ис ссарӕн йе та йын зӕгъын, йӕ бӕстӕйы филиалмӕ йӕ бон куыд у ныффыссын кӕнӕ телефонӕй бадзурын. Стӕй ма йӕ нӕ бон у баразӕнгард кӕнын, цӕмӕй йӕм хӕстӕгдӕр чи у, уыцы Паддзахады залмӕ бацӕуа. Кӕй зӕгъын ӕй хъӕуы, иуӕй-иу бӕстӕты Паддзахады залтӕ нӕй. Кӕд ӕй фӕнда, цӕмӕй йӕ бынӕттон Ӕвдисӕнтӕй исчи абӕрӕг кӕна, уӕд-иу хъуамӕ байдзаг кӕнӕм бланк «Пожалуйста, посети этого человека» (S-43) ӕмӕ йӕ ӕмбырды секретармӕ раттӕм. Уый бланк нӕ сайты уылты арвитдзӕн. Уыцы адӕймаг цы бӕстӕйы цӕры, уыцы бӕстӕмӕ йӕ хъус цы филиал дары, уый хуыздӕр зоны, цы уавӕртӕ дзы ис ӕмӕ иннӕтӕн рӕстдзинад базонынӕн куыд ис баххуыс кӕнӕн. (Кӕс 2014 азы июны «Нӕ хъусын кӕныны хъуыддаг», 7 ф. ӕмӕ 2011 азы ноябры «Нӕ хъусын кӕныны хъуыддаг», 2 ф.)

Кӕд, ӕдзух кӕмӕ цӕуӕм, ахӕм адӕймаг ӕндӕр бӕстӕмӕ цӕрынмӕ ацыд йе та кӕд, Интернеты уылты кӕимӕ базонгӕ стӕм ӕмӕ ӕндӕр бӕстӕйы чи цӕры, ахӕм адӕймагимӕ Библи ахуыр кӕнын райдыдтам, уӕд хъуамӕ бакӕнӕм, уӕлдӕр цы амындтӕ ис, уыдонмӕ гӕсгӕ. Фӕлӕ цалынмӕ уыцы адӕймагмӕ бынӕттон хъусынгӕнджытӕй исчи нӕ райдайа цӕуын, уӕдмӕ йӕм нӕ бон у фыссын. Фӕлӕ кӕд адӕймаг, сӕрибарӕй хъусын кӕнын кӕм нӕ уадзынц кӕнӕ уый бар бынтондӕр кӕм нӕй, ахӕм бӕстӕйы цӕры, уӕд хъуамӕ уӕлдай къӕрцхъус уӕм, йемӕ Библийы фарстатыл телефонӕй куы ныхас кӕнӕм йе та йӕм уый фӕдыл ӕнӕуи писмотӕ кӕнӕ Интернеты уылты куы фыссӕм, уӕд (Матф. 10:16).