Каин кӕй ракуырдта?

Дзуапп Библийӕ

Каин, фыццаг лӕг ӕмӕ усы хистӕр лӕппу, ракуырдта йӕ хотӕй иуы кӕнӕ та йе ’ввахс хиуӕттӕй кӕйдӕр. Ахӕм хатдзӕг ис скӕнӕн, Библийы Каины ӕмӕ йӕ бинонты тыххӕй цы фыст ис, уымӕй.

Каины ӕмӕ йӕ бинонты тыххӕй Библийы цы фыст ис?

• Адӕм иууылдӕр равзӕрдысты Адам ӕмӕ Евӕйӕ. Хуыцау «иу адӕймагӕй [Адамӕй] рауагъта ӕппӕт адӕмты ӕгас зӕххыл цӕрынӕн» (Хъуыддӕгтӕ 17:26). Адамы ус Евӕ сси, зӕххыл чидӕриддӕр цӕры, уыдоны мад (Райдиан 3:20). Уымӕ гӕсгӕ Каин, ӕвӕццӕгӕн, ракуырдта Адам ӕмӕ Евӕйы иннӕ байзӕддӕгтӕй кӕйдӕр.

• Каин ӕмӕ йе ’фсымӕр Авел уыдысты Евӕйы фыццаг дыууӕ сывӕллоны (Райдиан 4:1, 2). Каин йе ’фсымӕры кӕй амардта, уый тыххӕй хауӕггаг куы фӕци, уӕд хъаст кодта: «Чи [мыл] фембӕла, уый мӕ удӕгасӕй нӕ ныууадздзӕн» (Райдиан 4:14). Цымӕ кӕмӕй тарсти? Библийы фыст ис, зӕгъгӕ ма Адамӕн «ноджыдӕр райгуырди лӕппутӕ ӕмӕ чызджытӕ» (Райдиан 5:4). Уӕдӕ, ӕвӕццӕгӕн, Каинӕн тӕссаг уыд Адам ӕмӕ Евӕйы иннӕ байзӕддӕгтӕй.

• Зӕххыл адӕм куы фӕзындысты, уыцы рӕстӕг хионы ракурын диссаг нӕ уыд. Зӕгъӕм, Хуыцауы иузӕрдион лӕггадгӕнӕг Авраам ракуырдта йӕ хойы: фыдӕй иу уыдысты, мадӕй та – хицӕнтӕ (Райдиан 20:12). Кӕрӕдзийӕн афтӕ чи бавӕййы, уыдонӕн сӕ цард баиу кӕныны бар кӕй нӕй, уый тыххӕй фыццаг хатт загъд ӕрцыд Моисейы закъоны. Ӕмӕ уыцы Закъон та фӕзынд Каины замантӕй бирӕ ӕнусты фӕстӕ (Левит 18:9, 12, 13). Тугхӕстӕг чи сты, ахӕм лӕг ӕмӕ усӕн сахъат цот кӕй райгуырдзӕн, уымӕй абон куыд тӕссаг у, уыцы заман, ӕвӕццӕгӕн, афтӕ тӕссаг нӕ уыд.

• Библийы Адам ӕмӕ Евӕйы тыххӕй, стӕй сӕ бинонты тыххӕй цы фыст ис, уымӕ гӕсгӕ фидарӕй зӕгъӕн ис, сӕ хабӕрттӕ ӕцӕг кӕй сты. Хӕдзарвӕндӕгты номхыгъдты Адамы ном фыццаг кӕй у, уый ӕрмӕст Райдианы чиныджы, Моисей кӕй ныффыста, уыцы чиныджы, нӕй фенӕн, фӕлӕ ма историктӕ Ездрӕ ӕмӕ Лука кӕй ныффыстой, уыцы чингуыты дӕр (Райдиан 5:3–5; 1 Азфыстыты 1:1–4; Лукайы 3:38). Библи чи фыста, уыдон кодтой Каины кой дӕр, ӕмӕ уымӕй бӕрӕг у, Каины хабар ӕцӕг кӕй уыди, ууыл кӕй нӕ дызӕрдыг кодтой (Дзуттӕгтӕм 11:4; 1 Иоанны 3:12; Иудӕйы 11).