Райдианы цӕссыгтӕ — уый фӕстӕ та стыр цин

СЫЛГОЙМАГ куыд сдзӕбӕх, уый фенгӕйӕ, Иаир кӕй зӕгъын ӕй хъӕуы, ноджы тынгдӕр баууӕндыд, Йесойы бон диссӕгтӕ аразын кӕй у, ууыл. Гыццыл раздӕр Иаир лӕгъстӕ кодта Йесойӕн, цӕмӕй йемӕ ацӕуа ӕмӕ йын баххуыс кӕна йӕ 12-аздзыд уарзон чызгӕн, кӕцы у мӕлӕтдзаг рынчын. Фӕлӕ Иаир иуыл тынгдӕр цӕмӕй тарст, уый йӕ баййӕфта. Йесо ма сылгоймагимӕ куы ныхас кодта, афтӕ цалдӕр нӕлгоймаджы ӕрбацыд ӕмӕ Иаирӕн хибарӕй ӕмбарын кӕнынц: «Дӕ чызг амард; цӕмӕн ма тыхсын кӕныс Ахуыргӕнӕджы?»

Ӕвирхъау хабар! Ахъуыды ма кӕн: адӕмы ’хсӕн ахӕм дзырддзӕугӕ адӕймаг йӕ чызджы мӕлӕт фехъусгӕйӕ, сси бынтон ӕнӕбон. Фӕлӕ уыцы ныхӕстӕ Йесо дӕр кӕй фехъуыста, уымӕ гӕсгӕ Иаиры фидар кӕны: «Ма тӕрс, ӕрмӕст ӕууӕнд».

Йесо уыцы зӕрдӕрыст адӕймагимӕ араст йӕ хӕдзармӕ. Сӕ бацыдмӕ уым ӕрӕмбырд бирӕ кӕуӕг ӕмӕ дзыназӕг адӕм. Уыдон ӕрдиаггӕнгӕ сӕ риутӕ хойынц. Хӕдзармӕ куы бацыдысты, уӕд Йесо фӕрсы адӕмы: «Цӕмӕн змӕст стут ӕмӕ кӕут? чызг нӕ амард, фӕлӕ фынӕй у».

Уый фехъусгӕйӕ, адӕм Йесойыл худын райдыдтой, уымӕн ӕмӕ зонынц, чызг ӕцӕгдӕр мард кӕй у. Йесо та дзуры, зӕгъгӕ, уый ӕрмӕст фынӕй кӕны. Хуыцауы тыхы фӕрцы Йесо сфӕнд кодта, адӕймаджы тарф фынӕйӕ райхъал кӕнын куыд ӕнцон у, афтӕ ӕнцонӕй адӕмы дӕр мӕрдтӕй раздахӕн кӕй ис, уый равдисын.

Уый фӕстӕ Петр, Иаков, Иоанн ӕмӕ мард чызджы мад ӕмӕ фыдӕй фӕстӕмӕ иннӕ адӕмы Йесо ӕддӕмӕ рарвыста. Ӕмӕ уыцы фондз адӕймагимӕ, чызг кӕм хуыссыд, уыцы уатмӕ бацыд. Йесо чызджы къухыл рахӕцыд ӕмӕ йӕм дзуры: «„Талифа-куми“, ома: „чызг, дӕуӕн зӕгъын, сыст“». Чызг уыцы тӕккӕ сыстад ӕмӕ цӕуын райдыдта! Уый фенгӕйӕ, йӕ ныййарджытӕ фырцинӕй сӕхицӕн бынат нал ардтой.

Уый фӕстӕ Йесо Иаир ӕмӕ йӕ усӕн загъта, цӕмӕй сывӕллонӕн хӕринаг раттой, ӕмӕ сӕ бафӕдзӕхста, цӕмӕй цы ӕрцыд, уый тыххӕй макӕмӕн радзурой. Фӕлӕ уӕддӕр тагъд рӕстӕджы уыцы диссаджы хабар айхъуыст ӕгас комбӕстыл. Ныр Йесо дыккаг адӕймаджы райгас кодта. Матфейы 9:18—26; Маркы 5:35—43; Лукайы 8:41—56.

▪ Цавӕр хабар фехъусын кодтой Иаирӕн ӕмӕ йӕ Йесо куыд бафидар кодта?

▪ Цы федтой Иаиры хӕдзармӕ бацӕугӕйӕ?

▪ Йесо цӕмӕн загъта, чызг фынӕй у, зӕгъгӕ?

▪ Йесо йемӕ кӕй бакодта ӕмӕ райгасдзинад йӕхи цӕстӕй чи федта?