ਨਫ਼ਰਤ ਦਾ ਚੱਕਰ ਕਿਵੇਂ ਤੋੜੀਏ?

4 | ਰੱਬ ਦੀ ਮਦਦ ਨਾਲ ਨਫ਼ਰਤ ʼਤੇ ਜਿੱਤ ਹਾਸਲ ਕਰੋ

ਬਾਈਬਲ ਦੀ ਸਿੱਖਿਆ:

“ਪਵਿੱਤਰ ਸ਼ਕਤੀ ਅਨੁਸਾਰ ਚੱਲ ਕੇ ਇਹ ਗੁਣ ਪੈਦਾ ਹੁੰਦੇ ਹਨ: ਪਿਆਰ, ਖ਼ੁਸ਼ੀ, ਸ਼ਾਂਤੀ, ਧੀਰਜ, ਦਇਆ, ਭਲਾਈ, ਨਿਹਚਾ, ਨਰਮਾਈ, ਸੰਜਮ।”—ਗਲਾਤੀਆਂ 5:22, 23.

ਇਸ ਦਾ ਕੀ ਮਤਲਬ ਹੈ?

ਰੱਬ ਦੀ ਮਦਦ ਨਾਲ ਨਫ਼ਰਤ ਦੇ ਚੱਕਰ ਨੂੰ ਤੋੜਿਆ ਜਾ ਸਕਦਾ ਹੈ। ਉਸ ਦੀ ਸ਼ਕਤੀ ਸਾਡੇ ਵਿਚ ਉਹ ਗੁਣ ਪੈਦਾ ਕਰ ਸਕਦੀ ਹੈ ਜੋ ਅਸੀਂ ਆਪਣੇ ਆਪ ਕਦੇ ਵੀ ਪੈਦਾ ਨਹੀਂ ਕਰ ਸਕਦੇ। ਇਸ ਲਈ ਆਪਣੀ ਤਾਕਤ ਨਾਲ ਨਫ਼ਰਤ ʼਤੇ ਜਿੱਤ ਹਾਸਲ ਕਰਨ ਦੀ ਬਜਾਇ ਸਾਨੂੰ ਰੱਬ ਦੀ ਤਾਕਤ ʼਤੇ ਭਰੋਸਾ ਕਰਨਾ ਚਾਹੀਦਾ ਹੈ। ਜੇ ਅਸੀਂ ਇੱਦਾਂ ਕਰਾਂਗੇ, ਤਾਂ ਅਸੀਂ ਵੀ ਰੱਬ ਦੇ ਸੇਵਕ ਪੌਲੁਸ ਦੀ ਇਸ ਗੱਲ ਨਾਲ ਸਹਿਮਤ ਹੋਵਾਂਗੇ: “ਪਰਮੇਸ਼ੁਰ ਆਪਣੀ ਸ਼ਕਤੀ ਨਾਲ ਮੈਨੂੰ ਹਰ ਹਾਲਾਤ ਦਾ ਸਾਮ੍ਹਣਾ ਕਰਨ ਦੀ ਤਾਕਤ ਬਖ਼ਸ਼ਦਾ ਹੈ।” (ਫ਼ਿਲਿੱਪੀਆਂ 4:13) ਵਾਕਈ, ਅਸੀਂ ਕਹਿ ਸਕਾਂਗੇ: “ਮੈਨੂੰ ਯਹੋਵਾਹ ਤੋਂ ਮਦਦ ਮਿਲਦੀ ਹੈ।” —ਜ਼ਬੂਰ 121:2.

ਤੁਸੀਂ ਕੀ ਕਰ ਸਕਦੇ ਹੋ?

“ਯਹੋਵਾਹ ਨੇ ਮੈਨੂੰ ਹਿੰਸਕ ਆਦਮੀ ਤੋਂ ਸ਼ਾਂਤੀ-ਪਸੰਦ ਇਨਸਾਨ ਬਣਾ ਦਿੱਤਾ।” —ਵਲਡੋ

ਯਹੋਵਾਹ ਪਰਮੇਸ਼ੁਰ ਨੂੰ ਸ਼ਕਤੀ ਲਈ ਦਿਲੋਂ ਪ੍ਰਾਰਥਨਾ ਕਰੋ। (ਲੂਕਾ 11:13) ਆਪਣੇ ਵਿਚ ਚੰਗੇ ਗੁਣ ਪੈਦਾ ਕਰਨ ਲਈ ਉਸ ਤੋਂ ਮਦਦ ਮੰਗੋ। ਬਾਈਬਲ ਵਿੱਚੋਂ ਪਿਆਰ, ਸ਼ਾਂਤੀ, ਧੀਰਜ ਅਤੇ ਸੰਜਮ ਵਰਗੇ ਗੁਣਾਂ ਬਾਰੇ ਜਾਣੋ ਜਿਨ੍ਹਾਂ ਦੀ ਮਦਦ ਨਾਲ ਤੁਸੀਂ ਆਪਣੇ ਦਿਲ ਵਿੱਚੋਂ ਨਫ਼ਰਤ ਕੱਢ ਸਕਦੇ ਹੋ। ਦੇਖੋ ਕਿ ਤੁਸੀਂ ਇਨ੍ਹਾਂ ਗੁਣਾਂ ਨੂੰ ਆਪਣੇ ਵਿਚ ਕਿਵੇਂ ਪੈਦਾ ਕਰ ਸਕਦੇ ਹੋ। ਨਾਲੇ ਉਨ੍ਹਾਂ ਲੋਕਾਂ ਨਾਲ ਦੋਸਤੀ ਕਰੋ ਜੋ ਇਹ ਗੁਣ ਪੈਦਾ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਹ ਦੋਸਤ ਤੁਹਾਨੂੰ “ਪਿਆਰ ਅਤੇ ਚੰਗੇ ਕੰਮ ਕਰਨ ਦੀ ਹੱਲਾਸ਼ੇਰੀ” ਦੇ ਸਕਦੇ ਹਨ।—ਇਬਰਾਨੀਆਂ 10:24.

ਤਜਰਬਾ—ਵਲਡੋ

ਹਿੰਸਾ ਤੇ ਨਫ਼ਰਤ ʼਤੇ ਜਿੱਤ ਹਾਸਲ ਕੀਤੀ

ਵਲਡੋ ਦਾ ਬਚਪਨ ਬਹੁਤ ਹੀ ਬੁਰੇ ਮਾਹੌਲ ਵਿਚ ਬੀਤਿਆ ਜਿਸ ਕਰਕੇ ਉਹ ਨਫ਼ਰਤ ਨਾਲ ਭਰਿਆ ਹੋਇਆ ਸੀ। ਉਹ ਕਹਿੰਦਾ ਹੈ: “ਮੈਂ ਅਕਸਰ ਗਲੀਆਂ ਵਿਚ ਡ੍ਰੱਗਜ਼ ਵੇਚਣ ਵਾਲਿਆਂ ਨਾਲ ਲੜਦਾ ਹੁੰਦਾ ਸੀ। . . . ਇਕ ਵਾਰ ਵਿਰੋਧੀ ਗੈਂਗ ਨੇ ਇਕ ਗੁੰਡੇ ਨੂੰ ਪੈਸੇ ਦੇ ਕੇ ਮੈਨੂੰ ਮਾਰਨ ਲਈ ਭੇਜਿਆ। ਮੈਂ ਜ਼ਖ਼ਮੀ ਹੋਇਆ, ਪਰ ਮੇਰੀ ਜਾਨ ਬਚ ਗਈ।”

ਜਦੋਂ ਵਲਡੋ ਦੀ ਪਤਨੀ ਨੇ ਯਹੋਵਾਹ ਦੇ ਗਵਾਹਾਂ ਦੀ ਮਦਦ ਨਾਲ ਬਾਈਬਲ ਤੋਂ ਸਿੱਖਣਾ ਸ਼ੁਰੂ ਕੀਤਾ, ਤਾਂ ਉਸ ਨੂੰ ਚੰਗਾ ਨਹੀਂ ਲੱਗਾ। ਉਹ ਕਹਿੰਦਾ ਹੈ: “ਮੈਂ ਗਵਾਹਾਂ ਨਾਲ ਨਫ਼ਰਤ ਕਰਦਾ ਸੀ ਤੇ ਕਈ ਵਾਰ ਉਨ੍ਹਾਂ ਨੂੰ ਗਾਲ਼ਾਂ ਕੱਢਦਾ ਹੁੰਦਾ ਸੀ। ਪਰ ਉਹ ਮੇਰੇ ਨਾਲ ਹਮੇਸ਼ਾ ਪਿਆਰ ਤੇ ਸ਼ਾਂਤੀ ਨਾਲ ਗੱਲ ਕਰਦੇ ਸਨ।”

ਕੁਝ ਸਮੇਂ ਬਾਅਦ, ਵਲਡੋ ਨੇ ਵੀ ਬਾਈਬਲ ਤੋਂ ਸਿੱਖਣਾ ਸ਼ੁਰੂ ਕੀਤਾ। ਉਸ ਨੇ ਕਿਹਾ: “ਸਿੱਖੀਆਂ ਗੱਲਾਂ ਅਨੁਸਾਰ ਚੱਲਣਾ ਸੌਖਾ ਨਹੀਂ ਸੀ। ਮੈਨੂੰ ਲੱਗਦਾ ਸੀ ਕਿ ਮੈਂ ਆਪਣੇ ਗੁੱਸੇ ʼਤੇ ਕਦੇ ਵੀ ਕਾਬੂ ਨਹੀਂ ਪਾ ਸਕਾਂਗਾ।” ਪਰ ਬਾਈਬਲ ਦੀ ਇਕ ਗੱਲ ਕਰਕੇ ਉਸ ਨੇ ਵੱਡੇ ਬਦਲਾਅ ਕੀਤੇ।

ਵਲਡੋ ਨੇ ਦੱਸਿਆ: “ਇਕ ਦਿਨ ਸਟੱਡੀ ਕਰਾਉਣ ਵਾਲੇ ਭਰਾ ਆਲੇਹਾਂਦਰੋ ਨੇ ਮੈਨੂੰ ਬਾਈਬਲ ਵਿੱਚੋਂ ਗਲਾਤੀਆਂ 5:22, 23 ਪੜ੍ਹਨ ਲਈ ਕਿਹਾ। . . . ਆਲੇਹਾਂਦਰੋ ਨੇ ਸਮਝਾਇਆ ਕਿ ਇਨ੍ਹਾਂ ਗੁਣਾਂ ਨੂੰ ਆਪਣੇ ਵਿਚ ਪੈਦਾ ਕਰਨਾ ਮੇਰੇ ਆਪਣੇ ਵੱਸ ਦੀ ਗੱਲ ਨਹੀਂ ਹੈ, ਸਗੋਂ ਪਰਮੇਸ਼ੁਰ ਦੀ ਪਵਿੱਤਰ ਸ਼ਕਤੀ ਦੀ ਮਦਦ ਨਾਲ ਮੈਂ ਇੱਦਾਂ ਕਰ ਸਕਦਾ ਹਾਂ। ਇਸ ਸੱਚਾਈ ਨੇ ਮੇਰੇ ਨਜ਼ਰੀਏ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ।”

ਰੱਬ ਦੀ ਮਦਦ ਨਾਲ ਵਲਡੋ ਨਫ਼ਰਤ ਦੇ ਚੱਕਰ ਨੂੰ ਤੋੜ ਸਕਿਆ। ਉਸ ਨੇ ਕਿਹਾ: “ਮੇਰੇ ਰਿਸ਼ਤੇਦਾਰਾਂ ਤੇ ਦੋਸਤਾਂ ਨੂੰ ਯਕੀਨ ਨਹੀਂ ਹੁੰਦਾ ਕਿ ਮੈਂ ਕਿੰਨਾ ਬਦਲ ਗਿਆ ਹਾਂ।” ਉਹ ਅੱਗੇ ਦੱਸਦਾ ਹੈ: “ਯਹੋਵਾਹ ਨੇ ਮੈਨੂੰ ਹਿੰਸਕ ਆਦਮੀ ਤੋਂ ਸ਼ਾਂਤੀ-ਪਸੰਦ ਇਨਸਾਨ ਬਣਾ ਦਿੱਤਾ।”