‘ਯਿਸੂ ਬਾਰੇ ਖ਼ੁਸ਼ ਖ਼ਬਰੀ’ ਸੁਣਾਉਣੀ

1, 2. ਪਹਿਲੀ ਸਦੀ ਵਿਚ ਖ਼ੁਸ਼ ਖ਼ਬਰੀ ਦੇ ਪ੍ਰਚਾਰ ਨੂੰ ਰੋਕਣ ਦੇ ਜਤਨਾਂ ਦਾ ਉਲਟਾ ਅਸਰ ਕਿਵੇਂ ਪਿਆ?

ਮਸੀਹੀਆਂ ਉੱਤੇ ਜ਼ੁਲਮਾਂ ਦਾ ਝੱਖੜ ਝੁੱਲਣ ਲੱਗ ਪੈਂਦਾ ਹੈ ਤੇ ਸੌਲੁਸ ਮੰਡਲੀ ʼਤੇ “ਕਹਿਰ ਢਾਹੁਣ” ਲੱਗਦਾ ਹੈ। (ਰਸੂ. 8:3) ਚੇਲੇ ਜਾਨ ਬਚਾਉਣ ਲਈ ਭੱਜ ਜਾਂਦੇ ਹਨ ਅਤੇ ਕੁਝ ਨੂੰ ਸ਼ਾਇਦ ਲੱਗਦਾ ਹੈ ਕਿ ਸੌਲੁਸ ਮਸੀਹੀ ਧਰਮ ਦਾ ਖੁਰਾ-ਖੋਜ ਮਿਟਾਉਣ ਵਿਚ ਸਫ਼ਲ ਹੋ ਜਾਵੇਗਾ। ਪਰ ਮਸੀਹੀਆਂ ਦੇ ਖਿੰਡ-ਪੁੰਡ ਜਾਣ ਨਾਲ ਜੋ ਹੁੰਦਾ ਹੈ, ਉਸ ਬਾਰੇ ਕਿਸੇ ਨੇ ਕਦੀ ਸੋਚਿਆ ਵੀ ਨਹੀਂ ਸੀ। ਕੀ ਹੁੰਦਾ ਹੈ?

² ਜਿਨ੍ਹਾਂ ਇਲਾਕਿਆਂ ਵਿਚ ਚੇਲੇ ਖਿੰਡ-ਪੁੰਡ ਗਏ, ਉੱਥੇ ਉਨ੍ਹਾਂ ਨੇ “ਬਚਨ ਦੀ ਖ਼ੁਸ਼ ਖ਼ਬਰੀ ਦਾ ਪ੍ਰਚਾਰ” ਕਰਨਾ ਸ਼ੁਰੂ ਕਰ ਦਿੱਤਾ। (ਰਸੂ. 8:4) ਅਤਿਆਚਾਰ ਪਰਮੇਸ਼ੁਰ ਦੇ ਲੋਕਾਂ ਨੂੰ ਖ਼ੁਸ਼ ਖ਼ਬਰੀ ਦਾ ਪ੍ਰਚਾਰ ਕਰਨ ਤੋਂ ਨਹੀਂ ਰੋਕ ਸਕੇ! ਅਸਲ ਵਿਚ ਇਨ੍ਹਾਂ ਕਾਰਨ ਰਾਜ ਦਾ ਸੰਦੇਸ਼ ਫੈਲਿਆ। ਵਿਰੋਧੀਆਂ ਨੇ ਚੇਲਿਆਂ ਨੂੰ ਭੱਜਣ ਲਈ ਮਜਬੂਰ ਕੀਤਾ ਜਿਸ ਕਰਕੇ ਦੂਰ-ਦੁਰਾਡੀਆਂ ਥਾਵਾਂ ʼਤੇ ਵੀ ਪ੍ਰਚਾਰ ਹੋਣਾ ਸ਼ੁਰੂ ਹੋ ਗਿਆ। ਅੱਗੇ ਚੱਲ ਕੇ ਅਸੀਂ ਦੇਖਾਂਗੇ ਕਿ ਮੌਜੂਦਾ ਸਮਿਆਂ ਵਿਚ ਵੀ ਇਸੇ ਤਰ੍ਹਾਂ ਹੋਇਆ ਹੈ।

“ਜਿਹੜੇ ਚੇਲੇ ਖਿੰਡ-ਪੁੰਡ ਗਏ ਸਨ” (ਰਸੂ. 8:4-8)

3. (ੳ) ਫ਼ਿਲਿੱਪੁਸ ਕੌਣ ਸੀ? (ਅ) ਸਾਮਰਿਯਾ ਵਿਚ ਜ਼ਿਆਦਾ ਪ੍ਰਚਾਰ ਕਿਉਂ ਨਹੀਂ ਹੋਇਆ ਸੀ, ਪਰ ਯਿਸੂ ਨੇ ਉਸ ਇਲਾਕੇ ਬਾਰੇ ਕਿਹੜੀ ਭਵਿੱਖਬਾਣੀ ਕੀਤੀ ਸੀ?

³ “ਜਿਹੜੇ ਚੇਲੇ ਖਿੰਡ-ਪੁੰਡ ਗਏ ਸਨ,” ਉਨ੍ਹਾਂ ਵਿਚ ਫ਼ਿਲਿੱਪੁਸ ਵੀ ਸੀ।a (ਰਸੂ. 8:4; “‘ਪ੍ਰਚਾਰਕ’ ਫ਼ਿਲਿੱਪੁਸ” ਨਾਂ ਦੀ ਡੱਬੀ ਦੇਖੋ।) ਉਹ ਸਾਮਰਿਯਾ ਸ਼ਹਿਰ ਚਲਾ ਗਿਆ ਜਿੱਥੇ ਜ਼ਿਆਦਾ ਪ੍ਰਚਾਰ ਨਹੀਂ ਹੋਇਆ ਸੀ ਕਿਉਂਕਿ ਯਿਸੂ ਨੇ ਇਕ ਵਾਰ ਰਸੂਲਾਂ ਨੂੰ ਹਿਦਾਇਤ ਦਿੱਤੀ ਸੀ: “ਤੁਸੀਂ ਗ਼ੈਰ-ਯਹੂਦੀ ਲੋਕਾਂ ਕੋਲ ਨਾ ਜਾਣਾ ਅਤੇ ਨਾ ਹੀ ਕਿਸੇ ਸਾਮਰੀ ਸ਼ਹਿਰ ਵਿਚ ਜਾਣਾ, ਪਰ ਤੁਸੀਂ ਸਿਰਫ਼ ਇਜ਼ਰਾਈਲ ਦੇ ਘਰਾਣੇ ਦੀਆਂ ਗੁਆਚੀਆਂ ਹੋਈਆਂ ਭੇਡਾਂ ਕੋਲ ਜਾਣਾ।” (ਮੱਤੀ 10:5, 6) ਯਿਸੂ ਨੂੰ ਪਤਾ ਸੀ ਕਿ ਸਮਾਂ ਆਉਣ ਤੇ ਸਾਮਰਿਯਾ ਵਿਚ ਚੰਗੀ ਤਰ੍ਹਾਂ ਗਵਾਹੀ ਦਿੱਤੀ ਜਾਵੇਗੀ ਕਿਉਂਕਿ ਸਵਰਗ ਜਾਣ ਤੋਂ ਪਹਿਲਾਂ ਉਸ ਨੇ ਕਿਹਾ ਸੀ: “ਤੁਸੀਂ ਯਰੂਸ਼ਲਮ, ਪੂਰੇ ਯਹੂਦਿਯਾ, ਸਾਮਰਿਯਾ ਅਤੇ ਧਰਤੀ ਦੇ ਕੋਨੇ-ਕੋਨੇ ਵਿਚ ਮੇਰੇ ਬਾਰੇ ਗਵਾਹੀ ਦਿਓਗੇ।”​—ਰਸੂ. 1:8.

4. ਫ਼ਿਲਿੱਪੁਸ ਦੇ ਪ੍ਰਚਾਰ ਪ੍ਰਤੀ ਸਾਮਰੀ ਲੋਕਾਂ ਨੇ ਕਿਹੋ ਜਿਹਾ ਹੁੰਗਾਰਾ ਭਰਿਆ ਅਤੇ ਕਿਉਂ?

⁴ ਫ਼ਿਲਿੱਪੁਸ ਨੇ ਦੇਖਿਆ ਕਿ ਸਾਮਰਿਯਾ ਵਿਚ ‘ਫ਼ਸਲ ਵਾਢੀ ਲਈ ਪੱਕ ਚੁੱਕੀ ਸੀ।’ (ਯੂਹੰ. 4:35) ਉੱਥੇ ਰਹਿੰਦੇ ਲੋਕਾਂ ਲਈ ਉਸ ਦਾ ਸੰਦੇਸ਼ ਗਰਮੀ ਵਿਚ ਹਵਾ ਦੇ ਠੰਢੇ ਬੁੱਲੇ ਵਾਂਗ ਸੀ ਅਤੇ ਅਸੀਂ ਇਸ ਦਾ ਕਾਰਨ ਸਮਝ ਸਕਦੇ ਹਾਂ। ਯਹੂਦੀ ਲੋਕ ਸਾਮਰੀ ਲੋਕਾਂ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਰੱਖਦੇ ਸਨ ਅਤੇ ਕਈ ਤਾਂ ਉਨ੍ਹਾਂ ਨਾਲ ਨਫ਼ਰਤ ਕਰਦੇ ਸਨ। ਪਰ ਸਾਮਰੀ ਲੋਕਾਂ ਨੇ ਦੇਖਿਆ ਕਿ ਖ਼ੁਸ਼ ਖ਼ਬਰੀ ਦਾ ਸੰਦੇਸ਼ ਭੇਦ-ਭਾਵ ਦੀਆਂ ਕੰਧਾਂ ਟੱਪ ਕੇ ਸਾਰਿਆਂ ਨੂੰ ਉਮੀਦ ਦਿੰਦਾ ਸੀ। ਇਹ ਸੰਦੇਸ਼ ਫ਼ਰੀਸੀਆਂ ਦੀ ਸਿੱਖਿਆ ਤੋਂ ਬਿਲਕੁਲ ਵੱਖਰਾ ਸੀ ਜੋ ਸਾਮਰੀ ਲੋਕਾਂ ਨਾਲ ਪੱਖਪਾਤ ਕਰਦੇ ਸਨ! ਸਾਮਰੀ ਲੋਕਾਂ ਨੂੰ ਜੋਸ਼ ਅਤੇ ਨਿਰਪੱਖਤਾ ਨਾਲ ਗਵਾਹੀ ਦੇ ਕੇ ਫ਼ਿਲਿੱਪੁਸ ਨੇ ਦਿਖਾਇਆ ਕਿ ਉਸ ਨੇ ਆਪਣੇ ਉੱਤੇ ਪੱਖਪਾਤ ਦਾ ਪਰਛਾਵਾਂ ਨਹੀਂ ਪੈਣ ਦਿੱਤਾ ਸੀ। ਇਸ ਲਈ ਹੈਰਾਨੀ ਦੀ ਗੱਲ ਨਹੀਂ ਕਿ ਸਾਮਰੀ ਲੋਕਾਂ ਦੀਆਂ ਭੀੜਾਂ ਦੀਆਂ ਭੀੜਾਂ “ਇਕ ਮਨ ਹੋ ਕੇ” ਉਸ ਦਾ ਸੰਦੇਸ਼ ਸੁਣਦੀਆਂ ਸਨ।​—ਰਸੂ. 8:6.

5-7. ਮਿਸਾਲਾਂ ਦਿਓ ਜਿਨ੍ਹਾਂ ਤੋਂ ਪਤਾ ਲੱਗਦਾ ਹੈ ਕਿ ਮਸੀਹੀਆਂ ਦੇ ਖਿੰਡ-ਪੁੰਡ ਜਾਣ ਨਾਲ ਖ਼ੁਸ਼ ਖ਼ਬਰੀ ਦਾ ਪ੍ਰਚਾਰ ਹੋਇਆ।

⁵ ਪਹਿਲੀ ਸਦੀ ਵਾਂਗ ਅੱਜ ਵੀ ਅਤਿਆਚਾਰ ਪਰਮੇਸ਼ੁਰ ਦੇ ਲੋਕਾਂ ਨੂੰ ਪ੍ਰਚਾਰ ਕਰਨ ਤੋਂ ਨਹੀਂ ਰੋਕ ਸਕੇ ਹਨ। ਅਕਸਰ ਇੱਦਾਂ ਹੋਇਆ ਹੈ ਕਿ ਜਦੋਂ ਵੀ ਮਸੀਹੀਆਂ ਨੂੰ ਇਕ ਜਗ੍ਹਾ ਤੋਂ ਦੂਜੀ ਜਗ੍ਹਾ ਜਾਣ ਲਈ ਮਜਬੂਰ ਕੀਤਾ ਗਿਆ ਜਾਂ ਜੇਲ੍ਹਾਂ ਵਿਚ ਸੁੱਟਿਆ ਗਿਆ, ਤਾਂ ਉਨ੍ਹਾਂ ਨੇ ਨਵੀਂ ਜਗ੍ਹਾ ਜਾ ਕੇ ਲੋਕਾਂ ਨੂੰ ਰਾਜ ਦਾ ਸੰਦੇਸ਼ ਸੁਣਾਇਆ ਹੈ। ਉਦਾਹਰਣ ਲਈ, ਦੂਸਰੇ ਵਿਸ਼ਵ ਯੁੱਧ ਦੌਰਾਨ ਯਹੋਵਾਹ ਦੇ ਗਵਾਹਾਂ ਨੇ ਨਾਜ਼ੀ ਤਸ਼ੱਦਦ ਕੈਂਪਾਂ ਵਿਚ ਜੋਸ਼ ਨਾਲ ਗਵਾਹੀ ਦਿੱਤੀ। ਇਕ ਕੈਂਪ ਵਿਚ ਗਵਾਹਾਂ ਨੂੰ ਮਿਲਣ ਵਾਲੇ ਇਕ ਯਹੂਦੀ ਨੇ ਕਿਹਾ: “ਜਿਹੜੇ ਕੈਦੀ ਯਹੋਵਾਹ ਦੇ ਗਵਾਹ ਸਨ, ਉਨ੍ਹਾਂ ਦੇ ਬੁਲੰਦ ਹੌਸਲੇ ਦੇਖ ਕੇ ਮੈਨੂੰ ਯਕੀਨ ਹੋ ਗਿਆ ਕਿ ਉਨ੍ਹਾਂ ਦੀ ਨਿਹਚਾ ਬਾਈਬਲ ʼਤੇ ਆਧਾਰਿਤ ਹੈ ਤੇ ਮੈਂ ਵੀ ਗਵਾਹ ਬਣ ਗਿਆ।”

⁶ ਕੁਝ ਅਤਿਆਚਾਰੀਆਂ ਨੂੰ ਵੀ ਖ਼ੁਸ਼ ਖ਼ਬਰੀ ਸੁਣਾਈ ਗਈ ਜਿਸ ਨੂੰ ਉਨ੍ਹਾਂ ਨੇ ਸਵੀਕਾਰ ਕੀਤਾ। ਮਿਸਾਲ ਲਈ, ਜਦੋਂ ਫ਼ਰੰਸ ਡੈਸ਼ ਨੂੰ ਆਸਟ੍ਰੀਆ ਦੇ ਗੂਜ਼ਨ ਤਸ਼ੱਦਦ ਕੈਂਪ ਵਿਚ ਘੱਲਿਆ ਗਿਆ ਸੀ, ਤਾਂ ਉਸ ਨੇ ਕੈਂਪ ਦੇ ਇਕ ਅਫ਼ਸਰ ਨਾਲ ਬਾਈਬਲ ਸਟੱਡੀ ਕੀਤੀ। ਉਨ੍ਹਾਂ ਦੀ ਖ਼ੁਸ਼ੀ ਦਾ ਕੋਈ ਟਿਕਾਣਾ ਨਹੀਂ ਰਿਹਾ ਜਦੋਂ ਦੋਵੇਂ ਜਣੇ ਕਈ ਸਾਲਾਂ ਬਾਅਦ ਯਹੋਵਾਹ ਦੇ ਗਵਾਹਾਂ ਦੇ ਇਕ ਸੰਮੇਲਨ ਵਿਚ ਦੁਬਾਰਾ ਮਿਲੇ ਅਤੇ ਹੁਣ ਉਹ ਦੋਵੇਂ ਖ਼ੁਸ਼ ਖ਼ਬਰੀ ਦੇ ਪ੍ਰਚਾਰਕ ਸਨ!

⁷ ਅਤਿਆਚਾਰ ਹੋਣ ਕਰਕੇ ਜਦੋਂ ਮਸੀਹੀਆਂ ਨੂੰ ਇਕ ਦੇਸ਼ ਤੋਂ ਦੂਜੇ ਦੇਸ਼ ਭੱਜਣਾ ਪਿਆ, ਤਾਂ ਉਦੋਂ ਵੀ ਕੁਝ ਇਸੇ ਤਰ੍ਹਾਂ ਹੋਇਆ। ਮਿਸਾਲ ਲਈ, 1970 ਦੇ ਦਹਾਕੇ ਵਿਚ ਮਲਾਵੀ ਦੇ ਯਹੋਵਾਹ ਦੇ ਗਵਾਹਾਂ ਨੂੰ ਭੱਜ ਕੇ ਮੋਜ਼ਾਮਬੀਕ ਜਾਣਾ ਪਿਆ। ਉੱਥੇ ਜਾ ਕੇ ਉਨ੍ਹਾਂ ਨੇ ਮੋਜ਼ਾਮਬੀਕ ਦੇ ਲੋਕਾਂ ਨੂੰ ਜ਼ੋਰਾਂ-ਸ਼ੋਰਾਂ ਨਾਲ ਪ੍ਰਚਾਰ ਕੀਤਾ। ਜਦੋਂ ਮੋਜ਼ਾਮਬੀਕ ਵਿਚ ਵਿਰੋਧ ਦੀ ਲਹਿਰ ਉੱਠੀ, ਤਾਂ ਵੀ ਪ੍ਰਚਾਰ ਦਾ ਕੰਮ ਚੱਲਦਾ ਰਿਹਾ। ਭਰਾ ਫ਼ਰਾਂਸੀਸਕੋ ਕੋਆਨਾ ਕਹਿੰਦਾ ਹੈ: “ਪ੍ਰਚਾਰ ਕਰਨ ਕਰਕੇ ਸਾਨੂੰ ਕੁਝ ਜਣਿਆਂ ਨੂੰ ਕਈ ਵਾਰ ਗਿਰਫ਼ਤਾਰ ਕੀਤਾ ਗਿਆ, ਪਰ ਜਦੋਂ ਕਈਆਂ ਨੇ ਰਾਜ ਦੇ ਸੰਦੇਸ਼ ਨੂੰ ਕਬੂਲ ਕੀਤਾ, ਤਾਂ ਸਾਨੂੰ ਯਕੀਨ ਸੀ ਕਿ ਪਰਮੇਸ਼ੁਰ ਸਾਡੀ ਮਦਦ ਕਰ ਰਿਹਾ ਸੀ, ਜਿਵੇਂ ਉਸ ਨੇ ਪਹਿਲੀ ਸਦੀ ਦੇ ਮਸੀਹੀਆਂ ਦੀ ਕੀਤੀ ਸੀ।”

8. ਰਾਜਨੀਤਿਕ ਅਤੇ ਆਰਥਿਕ ਤਬਦੀਲੀਆਂ ਦਾ ਪ੍ਰਚਾਰ ਦੇ ਕੰਮ ʼਤੇ ਕੀ ਅਸਰ ਪਿਆ ਹੈ?

⁸ ਸਿਰਫ਼ ਅਤਿਆਚਾਰਾਂ ਕਰਕੇ ਹੀ ਹੋਰ ਥਾਵਾਂ ʼਤੇ ਮਸੀਹੀ ਧਰਮ ਨਹੀਂ ਫੈਲਿਆ। ਹਾਲ ਹੀ ਦੇ ਦਹਾਕਿਆਂ ਵਿਚ ਰਾਜਨੀਤਿਕ ਅਤੇ ਆਰਥਿਕ ਤਬਦੀਲੀਆਂ ਹੋਣ ਕਰਕੇ ਵੀ ਕਈ ਭਾਸ਼ਾਵਾਂ ਤੇ ਕੌਮਾਂ ਦੇ ਲੋਕਾਂ ਨੂੰ ਰਾਜ ਦਾ ਸੰਦੇਸ਼ ਸੁਣਨ ਦਾ ਮੌਕਾ ਮਿਲਿਆ ਹੈ। ਜਿਹੜੇ ਦੇਸ਼ ਯੁੱਧ ਦੀ ਲਪੇਟ ਵਿਚ ਹਨ ਅਤੇ ਗ਼ਰੀਬੀ ਦੀ ਮਾਰ ਸਹਿ ਰਹੇ ਹਨ, ਉੱਥੋਂ ਕਈ ਲੋਕ ਹੋਰ ਦੇਸ਼ਾਂ ਨੂੰ ਭੱਜ ਗਏ ਜਿੱਥੇ ਹਾਲਾਤ ਠੀਕ ਹਨ। ਉੱਥੇ ਉਨ੍ਹਾਂ ਵਿੱਚੋਂ ਕੁਝ ਲੋਕਾਂ ਨੇ ਬਾਈਬਲ ਸਟੱਡੀ ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਕਈ ਇਲਾਕਿਆਂ ਵਿਚ ਵੱਡੀ ਗਿਣਤੀ ਵਿਚ ਸ਼ਰਨਾਰਥੀਆਂ ਦੇ ਆਉਣ ਨਾਲ ਵਿਦੇਸ਼ੀ ਭਾਸ਼ਾਵਾਂ ਵਿਚ ਪ੍ਰਚਾਰ ਹੋਣਾ ਸ਼ੁਰੂ ਹੋਇਆ ਹੈ। ਕੀ ਤੁਸੀਂ ਆਪਣੇ ਇਲਾਕੇ ਵਿਚ “ਸਾਰੀਆਂ ਕੌਮਾਂ, ਕਬੀਲਿਆਂ, ਨਸਲਾਂ ਅਤੇ ਭਾਸ਼ਾਵਾਂ ਦੇ ਲੋਕਾਂ” ਨੂੰ ਗਵਾਹੀ ਦੇਣ ਦੀ ਕੋਸ਼ਿਸ਼ ਕਰ ਰਹੇ ਹੋ?​—ਪ੍ਰਕਾ. 7:9.

“ਮੈਨੂੰ ਵੀ ਇਹ ਅਧਿਕਾਰ ਦਿਓ” (ਰਸੂ. 8:9-25)

9. ਸ਼ਮਊਨ ਕੌਣ ਸੀ ਅਤੇ ਕਿਹੜੀ ਗੱਲ ਨੇ ਉਸ ਨੂੰ ਫ਼ਿਲਿੱਪੁਸ ਵੱਲ ਖਿੱਚਿਆ?

⁹ ਫ਼ਿਲਿੱਪੁਸ ਨੇ ਸਾਮਰਿਯਾ ਵਿਚ ਬਹੁਤ ਸਾਰੀਆਂ ਨਿਸ਼ਾਨੀਆਂ ਦਿਖਾਈਆਂ। ਮਿਸਾਲ ਲਈ, ਉਸ ਨੇ ਅਪਾਹਜ ਲੋਕਾਂ ਨੂੰ ਠੀਕ ਕੀਤਾ ਅਤੇ ਲੋਕਾਂ ਵਿੱਚੋਂ ਦੁਸ਼ਟ ਦੂਤ ਵੀ ਕੱਢੇ। (ਰਸੂ. 8:6-8) ਫ਼ਿਲਿੱਪੁਸ ਦੇ ਚਮਤਕਾਰਾਂ ਨੂੰ ਦੇਖ ਕੇ ਖ਼ਾਸ ਤੌਰ ਤੇ ਇਕ ਆਦਮੀ ਬਹੁਤ ਪ੍ਰਭਾਵਿਤ ਹੋਇਆ। ਉਹ ਜਾਦੂਗਰ ਸ਼ਮਊਨ ਸੀ ਜਿਸ ਦਾ ਲੋਕਾਂ ਵਿਚ ਬੜਾ ਇੱਜ਼ਤ-ਮਾਣ ਸੀ। ਉਸ ਬਾਰੇ ਲੋਕ ਕਹਿੰਦੇ ਸਨ: “ਇਹ ਆਦਮੀ ਤਾਂ ਪਰਮੇਸ਼ੁਰ ਦੀ ਮਹਾਂਸ਼ਕਤੀ ਹੈ।” ਪਰ ਸ਼ਮਊਨ ਨੇ ਪਰਮੇਸ਼ੁਰ ਦੀ ਅਸਲੀ ਮਹਾਂਸ਼ਕਤੀ ਉਦੋਂ ਦੇਖੀ ਜਦੋਂ ਉਸ ਨੇ ਫ਼ਿਲਿੱਪੁਸ ਨੂੰ ਚਮਤਕਾਰ ਕਰਦਿਆਂ ਦੇਖਿਆ ਅਤੇ ਉਹ ਮਸੀਹੀ ਬਣ ਗਿਆ। (ਰਸੂ. 8:9-13) ਪਰ ਬਾਅਦ ਵਿਚ ਉਸ ਦੀ ਪਰਖ ਹੋਈ ਕਿ ਉਹ ਕਿਸ ਇਰਾਦੇ ਨਾਲ ਮਸੀਹੀ ਬਣਿਆ ਸੀ। ਕਿਵੇਂ?

10. (ੳ) ਸਾਮਰਿਯਾ ਵਿਚ ਪਤਰਸ ਅਤੇ ਯੂਹੰਨਾ ਨੇ ਕੀ ਕੀਤਾ? (ਅ) ਜਦ ਸ਼ਮਊਨ ਨੇ ਦੇਖਿਆ ਕਿ ਪਤਰਸ ਅਤੇ ਯੂਹੰਨਾ ਦੇ ਹੱਥ ਰੱਖਦਿਆਂ ਹੀ ਨਵੇਂ ਚੇਲਿਆਂ ਨੂੰ ਪਵਿੱਤਰ ਸ਼ਕਤੀ ਮਿਲ ਰਹੀ ਸੀ, ਤਾਂ ਉਸ ਨੇ ਕੀ ਕੀਤਾ?

¹⁰ ਜਦੋਂ ਯਰੂਸ਼ਲਮ ਵਿਚ ਰਸੂਲਾਂ ਨੂੰ ਪਤਾ ਲੱਗਾ ਕਿ ਸਾਮਰਿਯਾ ਵਿਚ ਜ਼ਿਆਦਾ ਤੋਂ ਜ਼ਿਆਦਾ ਲੋਕ ਖ਼ੁਸ਼ ਖ਼ਬਰੀ ਨੂੰ ਕਬੂਲ ਕਰ ਰਹੇ ਸਨ, ਤਾਂ ਉਨ੍ਹਾਂ ਨੇ ਪਤਰਸ ਅਤੇ ਯੂਹੰਨਾ ਨੂੰ ਉੱਥੇ ਘੱਲਿਆ। (“ਪਤਰਸ ‘ਰਾਜ ਦੀਆਂ ਚਾਬੀਆਂ’ ਵਰਤਦਾ ਹੈ” ਨਾਂ ਦੀ ਡੱਬੀ ਦੇਖੋ।) ਉੱਥੇ ਪਹੁੰਚ ਕੇ ਦੋਵਾਂ ਰਸੂਲਾਂ ਨੇ ਨਵੇਂ ਚੇਲਿਆਂ ਉੱਤੇ ਆਪਣੇ ਹੱਥ ਰੱਖੇ ਜਿਸ ਕਰਕੇ ਉਨ੍ਹਾਂ ਨੂੰ ਪਵਿੱਤਰ ਸ਼ਕਤੀ ਮਿਲੀ।b ਜਦੋਂ ਸ਼ਮਊਨ ਨੇ ਇਹ ਦੇਖਿਆ, ਤਾਂ ਉਸ ਦੀਆਂ ਅੱਖਾਂ ਅੱਡੀਆਂ ਰਹਿ ਗਈਆਂ। ਉਸ ਨੇ ਰਸੂਲਾਂ ਨੂੰ ਕਿਹਾ: “ਮੈਨੂੰ ਵੀ ਇਹ ਅਧਿਕਾਰ ਦਿਓ ਤਾਂਕਿ ਜਿਸ ਉੱਤੇ ਮੈਂ ਹੱਥ ਰੱਖਾਂ, ਉਸ ਨੂੰ ਪਵਿੱਤਰ ਸ਼ਕਤੀ ਮਿਲ ਜਾਵੇ।” ਉਹ ਇਹ ਪਵਿੱਤਰ ਦਾਤ ਖ਼ਰੀਦਣ ਲਈ ਉਨ੍ਹਾਂ ਨੂੰ ਪੈਸੇ ਵੀ ਦੇਣ ਲਈ ਤਿਆਰ ਸੀ।​—ਰਸੂ. 8:14-19.

11. ਪਤਰਸ ਨੇ ਸ਼ਮਊਨ ਨੂੰ ਕਿਹੜੀ ਤਾੜਨਾ ਦਿੱਤੀ ਅਤੇ ਸ਼ਮਊਨ ਨੇ ਕੀ ਕੀਤਾ?

¹¹ ਪਤਰਸ ਨੇ ਸਖ਼ਤੀ ਨਾਲ ਸ਼ਮਊਨ ਨੂੰ ਤਾੜਿਆ। ਉਸ ਨੇ ਕਿਹਾ: “ਤੂੰ ਅਤੇ ਤੇਰੇ ਚਾਂਦੀ ਦੇ ਪੈਸੇ ਨਾਸ਼ ਹੋ ਜਾਣ ਕਿਉਂਕਿ ਤੂੰ ਉਸ ਦਾਤ ਨੂੰ ਪੈਸਿਆਂ ਨਾਲ ਖ਼ਰੀਦਣ ਬਾਰੇ ਸੋਚਿਆ ਜੋ ਪਰਮੇਸ਼ੁਰ ਮੁਫ਼ਤ ਵਿਚ ਦਿੰਦਾ ਹੈ। ਤੇਰਾ ਇਸ ਕੰਮ ਵਿਚ ਕੋਈ ਹਿੱਸਾ ਜਾਂ ਸਾਂਝ ਨਹੀਂ ਹੈ ਕਿਉਂਕਿ ਪਰਮੇਸ਼ੁਰ ਦੀਆਂ ਨਜ਼ਰਾਂ ਵਿਚ ਤੇਰਾ ਦਿਲ ਸਾਫ਼ ਨਹੀਂ ਹੈ।” ਪਤਰਸ ਨੇ ਸ਼ਮਊਨ ਨੂੰ ਤੋਬਾ ਕਰਨ ਅਤੇ ਮਾਫ਼ੀ ਲਈ ਪ੍ਰਾਰਥਨਾ ਕਰਨ ਵਾਸਤੇ ਕਿਹਾ। ਪਤਰਸ ਨੇ ਕਿਹਾ: “ਆਪਣੀ ਬੁਰੀ ਸੋਚ ਨੂੰ ਬਦਲ ਅਤੇ ਯਹੋਵਾਹ ਨੂੰ ਫ਼ਰਿਆਦ ਕਰ ਕਿ ਜੇ ਹੋ ਸਕੇ, ਤਾਂ ਉਹ ਤੈਨੂੰ ਮਾਫ਼ ਕਰ ਦੇਵੇ।” ਸ਼ਮਊਨ ਬੁਰਾ ਇਨਸਾਨ ਨਹੀਂ ਸੀ; ਉਹ ਉਹੀ ਕਰਨਾ ਚਾਹੁੰਦਾ ਸੀ ਜੋ ਪਰਮੇਸ਼ੁਰ ਦੀਆਂ ਨਜ਼ਰਾਂ ਵਿਚ ਸਹੀ ਸੀ, ਪਰ ਉਸ ਦੀ ਸੋਚ ਇਕ ਪਲ ਲਈ ਗ਼ਲਤ ਹੋ ਗਈ ਸੀ। ਇਸ ਲਈ ਉਸ ਨੇ ਰਸੂਲਾਂ ਨੂੰ ਬੇਨਤੀ ਕੀਤੀ: “ਕਿਰਪਾ ਕਰ ਕੇ ਤੁਸੀਂ ਹੀ ਮੇਰੇ ਲਈ ਯਹੋਵਾਹ ਨੂੰ ਫ਼ਰਿਆਦ ਕਰੋ ਕਿ ਤੁਸੀਂ ਜੋ ਕਿਹਾ ਹੈ, ਉਹ ਮੈਨੂੰ ਭੁਗਤਣਾ ਨਾ ਪਵੇ।”​—ਰਸੂ. 8:20-24.

12. ਈਸਾਈ-ਜਗਤ ਵਿਚ ਪਦਵੀਆਂ ਦੀ ਕਿੰਨੀ ਕੁ ਸੌਦੇਬਾਜ਼ੀ ਹੋਈ ਹੈ?

¹² ਸ਼ਮਊਨ ਨੂੰ ਦਿੱਤੀ ਪਤਰਸ ਦੀ ਤਾੜਨਾ ਅੱਜ ਮਸੀਹੀਆਂ ਲਈ ਚੇਤਾਵਨੀ ਹੈ ਕਿ ਅਸੀਂ “ਮੰਡਲੀਆਂ ਵਿਚ ਪਦਵੀਆਂ ਦੀ ਸੌਦੇਬਾਜ਼ੀ” ਨਾ ਕਰੀਏ। ਧਰਮ-ਤਿਆਗੀ ਈਸਾਈ-ਜਗਤ ਦਾ ਇਤਿਹਾਸ ਇਹੋ ਜਿਹੀਆਂ ਮਿਸਾਲਾਂ ਨਾਲ ਭਰਿਆ ਹੋਇਆ ਹੈ। ਐਨਸਾਈਕਲੋਪੀਡੀਆ ਬ੍ਰਿਟੈਨਿਕਾ (1878) ਦੇ ਨੌਵੇਂ ਐਡੀਸ਼ਨ ਵਿਚ ਦੱਸਿਆ ਹੈ: “ਪੋਪ ਨੂੰ ਚੁਣਨ ਲਈ ਰੱਖੀਆਂ ਚਰਚ ਦੀਆਂ ਗੁਪਤ ਸਭਾਵਾਂ ਦਾ ਇਤਿਹਾਸ ਪੜ੍ਹ ਕੇ ਇਕ ਵਿਅਕਤੀ ਨੂੰ ਯਕੀਨ ਹੋ ਜਾਂਦਾ ਹੈ ਕਿ ਚਰਚ ਵਿਚ ਰਿਸ਼ਵਤਖ਼ੋਰੀ ਤੋਂ ਬਿਨਾਂ ਕਦੀ ਕਿਸੇ ਪੋਪ ਦੀ ਚੋਣ ਨਹੀਂ ਹੋਈ। ਜ਼ਿਆਦਾ ਕਰਕੇ ਇਨ੍ਹਾਂ ਸਭਾਵਾਂ ਵਿਚ ਬਹੁਤ ਹੀ ਘਟੀਆ ਤੇ ਬੇਸ਼ਰਮ ਤਰੀਕੇ ਨਾਲ ਤੇ ਖੁੱਲ੍ਹੇ-ਆਮ ਸੌਦੇਬਾਜ਼ੀ ਹੋਈ ਹੈ।”

13. ਮਸੀਹੀਆਂ ਨੂੰ ਕਿਹੜੀ ਸੌਦੇਬਾਜ਼ੀ ਦੇ ਫੰਦੇ ਤੋਂ ਖ਼ਬਰਦਾਰ ਰਹਿਣਾ ਚਾਹੀਦਾ ਹੈ?

¹³ ਮਸੀਹੀਆਂ ਨੂੰ ਮੰਡਲੀ ਵਿਚ ਸੌਦੇਬਾਜ਼ੀ ਦੇ ਫੰਦੇ ਤੋਂ ਖ਼ਬਰਦਾਰ ਰਹਿਣਾ ਚਾਹੀਦਾ ਹੈ। ਮਿਸਾਲ ਲਈ, ਮਸੀਹੀਆਂ ਨੂੰ ਚਾਪਲੂਸੀ ਕਰ ਕੇ ਜਾਂ ਤੋਹਫ਼ੇ ਦੇ ਕੇ ਉਨ੍ਹਾਂ ਭਰਾਵਾਂ ਨੂੰ ਖ਼ੁਸ਼ ਕਰਨ ਦੀ ਕੋਸ਼ਿਸ਼ ਨਹੀਂ ਕਰਨੀ ਚਾਹੀਦੀ ਜਿਹੜੇ ਮੰਡਲੀ ਵਿਚ ਹੋਰ ਸਨਮਾਨ ਦੇ ਸਕਦੇ ਹਨ। ਦੂਸਰੇ ਪਾਸੇ, ਜਿਨ੍ਹਾਂ ਭਰਾਵਾਂ ਕੋਲ ਸਨਮਾਨ ਦੇਣ ਦਾ ਅਧਿਕਾਰ ਹੈ, ਉਨ੍ਹਾਂ ਨੂੰ ਅਮੀਰਾਂ ਦੀ ਤਰਫ਼ਦਾਰੀ ਕਰਨ ਤੋਂ ਖ਼ਬਰਦਾਰ ਰਹਿਣਾ ਚਾਹੀਦਾ ਹੈ। ਇਹ ਦੋਵੇਂ ਸੌਦੇਬਾਜ਼ੀ ਦੇ ਮਾਮਲੇ ਹਨ। ਦਰਅਸਲ ਪਰਮੇਸ਼ੁਰ ਦੇ ਸਾਰੇ ਸੇਵਕਾਂ ਨੂੰ ਆਪਣੇ ਆਪ ਨੂੰ ‘ਸਭ ਤੋਂ ਛੋਟੇ ਸਮਝਣਾ’ ਚਾਹੀਦਾ ਹੈ ਅਤੇ ਉਨ੍ਹਾਂ ਨੂੰ ਯਹੋਵਾਹ ਉੱਤੇ ਭਰੋਸਾ ਰੱਖਣਾ ਚਾਹੀਦਾ ਹੈ ਕਿ ਉਹ ਸਮਾਂ ਆਉਣ ਤੇ ਪਵਿੱਤਰ ਸ਼ਕਤੀ ਨਾਲ ਉਨ੍ਹਾਂ ਨੂੰ ਸਨਮਾਨ ਦੇਵੇਗਾ। (ਲੂਕਾ 9:48) ਪਰਮੇਸ਼ੁਰ ਦੇ ਸੰਗਠਨ ਵਿਚ ਉਨ੍ਹਾਂ ਲੋਕਾਂ ਲਈ ਕੋਈ ਜਗ੍ਹਾ ਨਹੀਂ ਹੈ ਜਿਹੜੇ “ਆਪਣੀ ਵਡਿਆਈ ਕਰਾਉਣ” ਦੀ ਕੋਸ਼ਿਸ਼ ਕਰਦੇ ਹਨ।​—ਕਹਾ. 25:27.

“ਜੋ ਤੂੰ ਪੜ੍ਹ ਰਿਹਾ ਹੈਂ, ਕੀ ਉਹ ਤੈਨੂੰ ਸਮਝ ਵੀ ਆਉਂਦਾ ਹੈ?” (ਰਸੂ. 8:26-40)

14, 15. (ੳ) ਇਥੋਪੀਆ ਤੋਂ ਆਇਆ ਆਦਮੀ ਕੌਣ ਸੀ ਅਤੇ ਫ਼ਿਲਿੱਪੁਸ ਉਸ ਨੂੰ ਕਿਵੇਂ ਮਿਲਿਆ? (ਅ) ਫ਼ਿਲਿੱਪੁਸ ਦਾ ਸੰਦੇਸ਼ ਸੁਣ ਕੇ ਇਥੋਪੀਆ ਦੇ ਆਦਮੀ ਨੇ ਕੀ ਕੀਤਾ ਅਤੇ ਉਸ ਦਾ ਬਪਤਿਸਮਾ ਜਲਦਬਾਜ਼ੀ ਵਿਚ ਚੁੱਕਿਆ ਕਦਮ ਕਿਉਂ ਨਹੀਂ ਸੀ? (ਫੁਟਨੋਟ ਦੇਖੋ।)

¹⁴ ਯਹੋਵਾਹ ਦੇ ਦੂਤ ਨੇ ਫ਼ਿਲਿੱਪੁਸ ਨੂੰ ਉਸ ਰਾਹ ʼਤੇ ਜਾਣ ਲਈ ਕਿਹਾ ਜੋ ਯਰੂਸ਼ਲਮ ਤੋਂ ਗਾਜ਼ਾ ਨੂੰ ਜਾਂਦਾ ਸੀ। ਫ਼ਿਲਿੱਪੁਸ ਦੇ ਮਨ ਵਿਚ ਸ਼ਾਇਦ ਆਇਆ ਹੋਣਾ ਕਿ ਦੂਤ ਨੇ ਉਸ ਨੂੰ ਉੱਥੇ ਜਾਣ ਲਈ ਕਿਉਂ ਕਿਹਾ ਸੀ। ਪਰ ਜਲਦੀ ਪਤਾ ਲੱਗ ਗਿਆ ਕਿਉਂਕਿ ਉਸ ਨੂੰ ਇਥੋਪੀਆ ਦਾ ਰਹਿਣ ਵਾਲਾ ਇਕ ਆਦਮੀ ਮਿਲਿਆ ਜੋ “ਯਸਾਯਾਹ ਨਬੀ ਦੀ ਕਿਤਾਬ ਪੜ੍ਹ ਰਿਹਾ ਸੀ।” (“ਖੋਜਾ ਜਾਂ ਮੰਤਰੀ?” ਨਾਂ ਦੀ ਡੱਬੀ ਦੇਖੋ।) ਯਹੋਵਾਹ ਦੀ ਪਵਿੱਤਰ ਸ਼ਕਤੀ ਨੇ ਫ਼ਿਲਿੱਪੁਸ ਨੂੰ ਉਸ ਆਦਮੀ ਦੇ ਰਥ ਕੋਲ ਜਾਣ ਲਈ ਕਿਹਾ। ਰਥ ਦੇ ਨਾਲ-ਨਾਲ ਦੌੜਦਿਆਂ ਉਸ ਨੇ ਇਥੋਪੀਆ ਦੇ ਆਦਮੀ ਨੂੰ ਪੁੱਛਿਆ: “ਜੋ ਤੂੰ ਪੜ੍ਹ ਰਿਹਾ ਹੈਂ, ਕੀ ਉਹ ਤੈਨੂੰ ਸਮਝ ਵੀ ਆਉਂਦਾ ਹੈ?” ਉਸ ਆਦਮੀ ਨੇ ਕਿਹਾ: “ਜਦ ਤਕ ਕੋਈ ਮੈਨੂੰ ਨਾ ਸਮਝਾਵੇ, ਤਾਂ ਮੈਨੂੰ ਕਿਵੇਂ ਸਮਝ ਆਵੇਗਾ?”​—ਰਸੂ. 8:26-31.

¹⁵ ਇਥੋਪੀਆ ਦੇ ਆਦਮੀ ਨੇ ਫ਼ਿਲਿੱਪੁਸ ਨੂੰ ਆਪਣੇ ਰਥ ਵਿਚ ਚੜ੍ਹਾ ਲਿਆ। ਉਨ੍ਹਾਂ ਵਿਚ ਬਹੁਤ ਵਧੀਆ ਗੱਲਬਾਤ ਹੋਈ। ਯਸਾਯਾਹ ਦੀ ਭਵਿੱਖਬਾਣੀ ਵਿਚ “ਭੇਡ” ਜਾਂ “ਸੇਵਕ” ਦੀ ਪਛਾਣ ਲੰਬੇ ਸਮੇਂ ਤੋਂ ਭੇਤ ਬਣੀ ਹੋਈ ਸੀ। (ਯਸਾ. 53:1-12) ਫ਼ਿਲਿੱਪੁਸ ਨੇ ਉਸ ਆਦਮੀ ਨੂੰ ਸਮਝਾਇਆ ਕਿ ਇਹ ਭਵਿੱਖਬਾਣੀ ਯਿਸੂ ਮਸੀਹ ʼਤੇ ਪੂਰੀ ਹੋਈ ਸੀ। ਪੰਤੇਕੁਸਤ 33 ਈਸਵੀ ਦੇ ਦਿਨ ਬਪਤਿਸਮਾ ਲੈਣ ਵਾਲਿਆਂ ਵਾਂਗ ਇਥੋਪੀਆ ਦੇ ਆਦਮੀ ਨੂੰ ਵੀ ਤੁਰੰਤ ਪਤਾ ਲੱਗ ਗਿਆ ਸੀ ਕਿ ਉਸ ਨੂੰ ਕੀ ਕਰਨਾ ਚਾਹੀਦਾ ਸੀ। ਉਸ ਨੇ ਫ਼ਿਲਿੱਪੁਸ ਨੂੰ ਕਿਹਾ: “ਦੇਖ! ਇੱਥੇ ਪਾਣੀ ਹੈ। ਹੁਣ ਮੈਨੂੰ ਬਪਤਿਸਮਾ ਲੈਣ ਤੋਂ ਕਿਹੜੀ ਗੱਲ ਰੋਕਦੀ ਹੈ?” ਇਥੋਪੀਆ ਦੇ ਆਦਮੀ ਨੇ ਬਿਨਾਂ ਦੇਰ ਕੀਤਿਆਂ ਫ਼ਿਲਿੱਪੁਸ ਤੋਂ ਬਪਤਿਸਮਾ ਲੈ ਲਿਆ!c (“‘ਪਾਣੀ’ ਵਿਚ ਬਪਤਿਸਮਾ” ਨਾਂ ਦੀ ਡੱਬੀ ਦੇਖੋ।) ਬਾਅਦ ਵਿਚ ਪਵਿੱਤਰ ਸ਼ਕਤੀ ਨੇ ਫ਼ਿਲਿੱਪੁਸ ਨੂੰ ਅਸ਼ਦੋਦ ਭੇਜ ਦਿੱਤਾ ਜਿੱਥੇ ਉਸ ਨੇ ਖ਼ੁਸ਼ ਖ਼ਬਰੀ ਸੁਣਾਉਣੀ ਜਾਰੀ ਰੱਖੀ।​—ਰਸੂ. 8:32-40.

16, 17. ਦੂਤ ਅੱਜ ਪ੍ਰਚਾਰ ਦੇ ਕੰਮ ਵਿਚ ਕਿਵੇਂ ਸ਼ਾਮਲ ਹਨ?

¹⁶ ਅੱਜ ਮਸੀਹੀਆਂ ਨੂੰ ਉਹੀ ਕੰਮ ਕਰਨ ਦਾ ਸਨਮਾਨ ਮਿਲਿਆ ਹੈ ਜੋ ਫ਼ਿਲਿੱਪੁਸ ਕਰ ਰਿਹਾ ਸੀ। ਮਸੀਹੀ ਸਫ਼ਰ ਕਰਦਿਆਂ ਅਤੇ ਹੋਰ ਕਈ ਮੌਕਿਆਂ ʼਤੇ ਲੋਕਾਂ ਨੂੰ ਰਾਜ ਦਾ ਸੰਦੇਸ਼ ਸੁਣਾਉਂਦੇ ਹਨ। ਪ੍ਰਚਾਰ ਦੌਰਾਨ ਸਾਨੂੰ ਦਿਲਚਸਪੀ ਰੱਖਣ ਵਾਲੇ ਲੋਕ ਮਿਲਦੇ ਹਨ। ਪਰ ਕਈ ਵਾਰ ਸਾਨੂੰ ਅਜਿਹੇ ਲੋਕ ਮਿਲਦੇ ਹਨ ਜਿਨ੍ਹਾਂ ਨੂੰ ਮਿਲਣਾ ਚਮਤਕਾਰ ਤੋਂ ਘੱਟ ਨਹੀਂ ਹੁੰਦਾ। ਅਸੀਂ ਇਸ ਤਰ੍ਹਾਂ ਦੇ ਲੋਕਾਂ ਨੂੰ ਮਿਲਣ ਦੀ ਉਮੀਦ ਰੱਖ ਸਕਦੇ ਹਾਂ ਕਿਉਂਕਿ ਬਾਈਬਲ ਸਾਫ਼-ਸਾਫ਼ ਦੱਸਦੀ ਹੈ ਕਿ ਦੂਤ ਪ੍ਰਚਾਰ ਦੇ ਕੰਮ ਵਿਚ ਸਾਡੀ ਅਗਵਾਈ ਕਰ ਰਹੇ ਹਨ ਤਾਂਕਿ ਸੰਦੇਸ਼ “ਹਰ ਕੌਮ, ਹਰ ਕਬੀਲੇ, ਹਰ ਭਾਸ਼ਾ ਬੋਲਣ ਵਾਲੇ ਅਤੇ ਹਰ ਨਸਲ ਦੇ ਲੋਕਾਂ ਨੂੰ” ਸੁਣਾਇਆ ਜਾਵੇ। (ਪ੍ਰਕਾ. 14:6) ਯਿਸੂ ਨੇ ਭਵਿੱਖਬਾਣੀ ਕੀਤੀ ਸੀ ਕਿ ਦੂਤ ਪ੍ਰਚਾਰ ਦੇ ਕੰਮ ਵਿਚ ਸੇਧ ਦੇਣਗੇ। ਉਸ ਨੇ ਕਣਕ ਅਤੇ ਜੰਗਲੀ ਬੂਟੀ ਦੀ ਮਿਸਾਲ ਦਿੰਦਿਆਂ ਕਿਹਾ ਸੀ ਕਿ “ਵਾਢੀ ਦਾ ਸਮਾਂ ਯੁਗ ਦਾ ਆਖ਼ਰੀ ਸਮਾਂ ਹੈ ਅਤੇ ਫ਼ਸਲ ਵੱਢਣ ਵਾਲੇ ਦੂਤ ਹਨ।” ਅੱਗੇ ਉਸ ਨੇ ਕਿਹਾ ਕਿ ਦੂਤ ‘ਉਸ ਦੇ ਰਾਜ ਵਿੱਚੋਂ ਉਨ੍ਹਾਂ ਸਾਰੀਆਂ ਚੀਜ਼ਾਂ ਨੂੰ ਇਕੱਠਾ ਕਰ ਕੇ’ ਵੱਖ ਕਰਨਗੇ “ਜੋ ਠੋਕਰ ਦਾ ਕਾਰਨ ਬਣਦੀਆਂ ਹਨ ਅਤੇ ਉਨ੍ਹਾਂ ਨੂੰ ਵੀ ਜਿਹੜੇ ਬੁਰੇ ਕੰਮ ਕਰਦੇ ਹਨ।” (ਮੱਤੀ 13:37-41) ਇਸੇ ਸਮੇਂ ਦੌਰਾਨ ਦੂਤ ਸਵਰਗੀ ਰਾਜ ਦੇ ਵਾਰਸਾਂ ਨੂੰ ਅਤੇ ਬਾਅਦ ਵਿਚ “ਹੋਰ ਭੇਡਾਂ” ਦੀ “ਵੱਡੀ ਭੀੜ” ਨੂੰ ਵੀ ਇਕੱਠਾ ਕਰਨਗੇ ਜਿਨ੍ਹਾਂ ਨੂੰ ਉਹ ਆਪਣੇ ਸੰਗਠਨ ਵਿਚ ਲਿਆਉਣਾ ਚਾਹੁੰਦਾ ਹੈ।​—ਪ੍ਰਕਾ. 7:9; ਯੂਹੰ. 6:44, 65; 10:16.

¹⁷ ਅਸੀਂ ਅੱਜ ਇਸ ਗੱਲ ਦਾ ਸਬੂਤ ਦੇਖ ਸਕਦੇ ਹਾਂ। ਪ੍ਰਚਾਰ ਦੌਰਾਨ ਸਾਨੂੰ ਕੁਝ ਲੋਕ ਮਿਲਦੇ ਹਨ ਜਿਹੜੇ ਦੱਸਦੇ ਹਨ ਕਿ ਉਹ ਪਰਮੇਸ਼ੁਰ ਨੂੰ ਮਦਦ ਲਈ ਤਰਲੇ ਕਰ ਰਹੇ ਸਨ। ਦੋ ਭੈਣਾਂ ਦੇ ਤਜਰਬੇ ʼਤੇ ਗੌਰ ਕਰੋ ਜੋ ਇਕ ਛੋਟੇ ਬੱਚੇ ਨਾਲ ਪ੍ਰਚਾਰ ਕਰ ਰਹੀਆਂ ਸਨ। ਦੁਪਹਿਰ ਹੋਣ ਤੇ ਉਹ ਪ੍ਰਚਾਰ ਖ਼ਤਮ ਕਰ ਕੇ ਜਾਣ ਹੀ ਵਾਲੀਆਂ ਸਨ, ਪਰ ਬੱਚਾ ਅਗਲੇ ਘਰ ਜਾਣ ਲਈ ਕੁਝ ਜ਼ਿਆਦਾ ਹੀ ਉਤਾਵਲਾ ਸੀ। ਉਸ ਨੇ ਇਕੱਲੇ ਨੇ ਜਾ ਕੇ ਉਸ ਘਰ ਦਾ ਦਰਵਾਜ਼ਾ ਖੜਕਾ ਦਿੱਤਾ! ਇਕ ਤੀਵੀਂ ਨੇ ਦਰਵਾਜ਼ਾ ਖੋਲ੍ਹਿਆ ਅਤੇ ਦੋਵਾਂ ਭੈਣਾਂ ਨੇ ਜਾ ਕੇ ਉਸ ਨਾਲ ਗੱਲ ਕੀਤੀ। ਉਨ੍ਹਾਂ ਦੀ ਹੈਰਾਨੀ ਦੀ ਕੋਈ ਹੱਦ ਨਹੀਂ ਰਹੀ ਜਦੋਂ ਤੀਵੀਂ ਨੇ ਦੱਸਿਆ ਕਿ ਉਹ ਹੁਣੇ-ਹੁਣੇ ਪ੍ਰਾਰਥਨਾ ਕਰ ਰਹੀ ਸੀ ਕਿ ਕੋਈ ਆ ਕੇ ਬਾਈਬਲ ਸਮਝਣ ਵਿਚ ਉਸ ਦੀ ਮਦਦ ਕਰੇ। ਫਿਰ ਉਸ ਔਰਤ ਨਾਲ ਬਾਈਬਲ ਸਟੱਡੀ ਸ਼ੁਰੂ ਹੋ ਗਈ।

18. ਸਾਨੂੰ ਆਪਣੀ ਸੇਵਕਾਈ ਨੂੰ ਐਵੇਂ ਕਿਉਂ ਨਹੀਂ ਸਮਝਣਾ ਚਾਹੀਦਾ?

¹⁸ ਯਹੋਵਾਹ ਦੇ ਗਵਾਹ ਹੋਣ ਕਰਕੇ ਤੁਹਾਡੇ ਕੋਲ ਦੂਤਾਂ ਨਾਲ ਮਿਲ ਕੇ ਪ੍ਰਚਾਰ ਕਰਨ ਦਾ ਸਨਮਾਨ ਹੈ ਜੋ ਅੱਜ ਵੱਡੇ ਪੈਮਾਨੇ ʼਤੇ ਹੋ ਰਿਹਾ ਹੈ। ਇਸ ਸਨਮਾਨ ਨੂੰ ਐਵੇਂ ਨਾ ਸਮਝੋ। ਜੇ ਤੁਸੀਂ ਜੀ-ਜਾਨ ਨਾਲ ‘ਯਿਸੂ ਬਾਰੇ ਖ਼ੁਸ਼ ਖ਼ਬਰੀ’ ਸੁਣਾਉਂਦੇ ਰਹੋਗੇ, ਤਾਂ ਤੁਹਾਡੀ ਖ਼ੁਸ਼ੀ ਦੁਗਣੀ-ਚੌਗੁਣੀ ਹੋਵੇਗੀ!​—ਰਸੂ. 8:35.