ਪ੍ਰਸ਼ਨ ਡੱਬੀ

◼ ਇੰਟਰਨੈੱਟ ਉੱਤੇ ਕਿਸੇ ਅਣਜਾਣ ਵਿਅਕਤੀ ਨਾਲ ਗੱਲ ਕਰਨ ਦੇ ਕੀ ਖ਼ਤਰੇ ਹਨ?

ਇੰਟਰਨੈੱਟ ਦੀਆਂ ਬਹੁਤ ਸਾਰੀਆਂ ਵੈੱਬ ਸਾਈਟਾਂ ਉੱਤੇ ਲੋਕ ਇਕ-ਦੂਜੇ ਨੂੰ ਮਿਲ ਕੇ ਗੱਲਬਾਤ ਕਰਦੇ ਹਨ। ਇਨ੍ਹਾਂ ਵਿੱਚੋਂ ਕਈ ਸਾਈਟਾਂ ਉੱਤੇ ਉਹ ਆਪਣੇ ਬਾਰੇ ਜਾਣਕਾਰੀ ਤੇ ਫ਼ੋਟੋਆਂ ਵਗੈਰਾ ਪਾ ਸਕਦੇ ਹਨ। ਜੋ ਲੋਕ ਇਹ ਜਾਣਕਾਰੀ ਦੇਖਦੇ ਹਨ, ਉਹ ਫਿਰ ਉਸ ਵਿਅਕਤੀ ਨਾਲ ਸੰਪਰਕ ਕਰ ਸਕਦੇ ਹਨ ਜਿਸ ਨੇ ਜਾਣਕਾਰੀ ਪਾਈ ਹੁੰਦੀ ਹੈ। ਮੁੰਡੇ-ਕੁੜੀਆਂ ਨੂੰ ਇਹ ਸਾਈਟਾਂ ਬਹੁਤ ਪਸੰਦ ਹਨ। ਕਲੀਸਿਯਾ ਦੇ ਕਈ ਨੌਜਵਾਨ ਵੀ ਇਨ੍ਹਾਂ ਸਾਈਟਾਂ ਉੱਤੇ ਅਜਿਹੇ ਲੋਕਾਂ ਨਾਲ ਗੱਲਬਾਤ ਕਰਦੇ ਹਨ ਜੋ ਯਹੋਵਾਹ ਦੇ ਗਵਾਹ ਹੋਣ ਦਾ ਦਾਅਵਾ ਕਰਦੇ ਹਨ।

ਲੋਕਾਂ ਲਈ ਇੰਟਰਨੈੱਟ ਉੱਤੇ ਆਪਣੇ ਬਾਰੇ ਝੂਠੀ ਜਾਣਕਾਰੀ ਦੇਣੀ ਬਹੁਤ ਆਸਾਨ ਹੈ। (ਜ਼ਬੂ. 26:4) ਉਹ ਸ਼ਾਇਦ ਆਪਣਾ ਅਸਲੀ ਨਾਂ ਨਾ ਦੱਸਣ ਜਾਂ ਕਲੀਸਿਯਾ ਵਿਚ ਉਨ੍ਹਾਂ ਦੀ ਨੇਕਨਾਮੀ ਨਾ ਹੋਵੇ। ਜਾਂ ਹੋ ਸਕਦਾ ਉਹ ਬੁਰੀ ਨੀਅਤ ਨਾਲ ਸਾਡੇ ਨਾਲ ਦੋਸਤੀ ਕਰ ਰਹੇ ਹੋਣ। ਯਹੋਵਾਹ ਦਾ ਗਵਾਹ ਹੋਣ ਦਾ ਦਾਅਵਾ ਕਰਨ ਵਾਲਾ ਕੋਈ ਵਿਅਕਤੀ ਸ਼ਾਇਦ ਅਸਲ ਵਿਚ ਗਵਾਹ ਨਾ ਹੋਵੇ ਜਾਂ ਹੋ ਸਕਦਾ ਉਸ ਨੂੰ ਕਲੀਸਿਯਾ ਵਿੱਚੋਂ ਛੇਕਿਆ ਗਿਆ ਹੋਵੇ ਜਾਂ ਫਿਰ ਧਰਮ-ਤਿਆਗੀ ਹੋਵੇ ਜੋ ਮਸੀਹੀਆਂ ਨੂੰ ਪਰਮੇਸ਼ੁਰ ਤੋਂ ਦੂਰ ਲੈ ਜਾਣਾ ਚਾਹੁੰਦਾ ਹੈ। (ਗਲਾ. 2:4) ਇਸੇ ਤਰ੍ਹਾਂ, ਬੱਚਿਆਂ ਨਾਲ ਬਦਫੈਲੀ ਕਰਨ ਵਾਲੇ ਲੋਕ ਵੀ ਅਜਿਹੀਆਂ ਵੈੱਬ ਸਾਈਟਾਂ ਰਾਹੀਂ ਆਪਣੇ ਸ਼ਿਕਾਰ ਦੀ ਭਾਲ ਕਰਦੇ ਹਨ।

ਜੇ ਸਾਨੂੰ ਪੂਰਾ ਯਕੀਨ ਹੈ ਕਿ ਜਿਸ ਨਾਲ ਅਸੀਂ ਗੱਲ ਕਰਦੇ ਹਾਂ, ਉਸ ਦੀ ਕਲੀਸਿਯਾ ਵਿਚ ਨੇਕਨਾਮੀ ਹੈ, ਤਾਂ ਵੀ ਵੈੱਬ ਸਾਈਟ ਉੱਤੇ ਸਾਡੀ ਗੱਲਬਾਤ ਦਾ ਰੁਖ਼ ਗ਼ਲਤ ਵਿਸ਼ਿਆਂ ਵੱਲ ਜਾ ਸਕਦਾ ਹੈ। ਇਸ ਦਾ ਇਕ ਕਾਰਨ ਇਹ ਹੈ ਕਿ ਆਮੋ-ਸਾਮ੍ਹਣੇ ਨਾ ਹੋਣ ਕਰਕੇ ਲੋਕ ਜ਼ਿਆਦਾ ਖੁੱਲ੍ਹ ਕੇ ਗੱਲ ਕਰਦੇ ਹਨ। ਉਹ ਸ਼ਾਇਦ ਇਹ ਵੀ ਮਹਿਸੂਸ ਕਰਨ ਕਿ ਵੈੱਬ ਸਾਈਟ ਉੱਤੇ ਉਹ ਜੋ ਵੀ ਗੱਲ ਕਰਨਗੇ, ਉਸ ਬਾਰੇ ਉਨ੍ਹਾਂ ਦੇ ਮਾਤਾ-ਪਿਤਾ, ਬਜ਼ੁਰਗਾਂ ਜਾਂ ਦੂਜਿਆਂ ਨੂੰ ਪਤਾ ਨਹੀਂ ਲੱਗੇਗਾ। ਬੜੇ ਦੁੱਖ ਦੀ ਗੱਲ ਹੈ ਕਿ ਕਲੀਸਿਯਾ ਦੇ ਕੁਝ ਮੁੰਡੇ-ਕੁੜੀਆਂ ਵੀ ਵੈੱਬ ਸਾਈਟਾਂ ਉੱਤੇ ਅਸ਼ਲੀਲ ਗੱਲਾਂ ਕਰਨ ਦੇ ਫੰਦੇ ਵਿਚ ਫਸੇ ਹਨ। (ਅਫ਼. 5:3, 4; ਕੁਲੁ. 3:8) ਕਈਆਂ ਨੇ ਵੈੱਬ ਸਾਈਟਾਂ ਉੱਤੇ ਆਪਣੀਆਂ ਕਾਮ-ਉਕਸਾਊ ਤਸਵੀਰਾਂ ਪਾਈਆਂ ਹਨ, ਅਸ਼ਲੀਲ ਉਪਨਾਮਾਂ ਤੋਂ ਜਾਣੇ ਜਾਂਦੇ ਹਨ ਜਾਂ ਅਸ਼ਲੀਲ ਮਿਊਜ਼ਿਕ ਵਿਡਿਓ ਪਾਏ।

ਇਨ੍ਹਾਂ ਸਾਰੀਆਂ ਗੱਲਾਂ ਨੂੰ ਦੇਖਦੇ ਹੋਏ ਮਾਪਿਆਂ ਨੂੰ ਧਿਆਨ ਰੱਖਣਾ ਚਾਹੀਦਾ ਹੈ ਕਿ ਉਨ੍ਹਾਂ ਦੇ ਬੱਚੇ ਕੰਪਿਊਟਰ ਉੱਤੇ ਕੀ ਕਰਦੇ ਹਨ। (ਕਹਾ. 29:15) ਕਿਸੇ ਅਜਨਬੀ ਨੂੰ ਆਪਣੇ ਘਰ ਸੱਦਣਾ ਜਾਂ ਬੱਚਿਆਂ ਨਾਲ ਇਕੱਲੇ ਰਹਿਣ ਦੇਣਾ ਖ਼ਤਰਨਾਕ ਹੈ। ਇਸੇ ਤਰ੍ਹਾਂ, ਇੰਟਰਨੈੱਟ ਉੱਤੇ ਅਜਨਬੀਆਂ ਨਾਲ, ਭਾਵੇਂ ਉਹ ਗਵਾਹ ਹੋਣ ਦਾ ਦਾਅਵਾ ਕਰਦੇ ਹਨ, ਦੋਸਤੀ ਕਰਨੀ ਸਾਡੇ ਲਈ ਜਾਂ ਸਾਡੇ ਬੱਚਿਆਂ ਲਈ ਖ਼ਤਰਨਾਕ ਹੈ।—ਕਹਾ. 22:3.