“ਦੁਨੀਆਂ ਦੇ ਲੋਕਾਂ ਵਿਚ ਆਪਣਾ ਚਾਲ-ਚਲਣ ਹਮੇਸ਼ਾ ਨੇਕ ਰੱਖੋ”

1. ਆਉਣ ਵਾਲੇ ਸੰਮੇਲਨ ਵਿਚ ਸਾਡੇ ਲਈ ਆਪਣਾ ਚਾਲ-ਚਲਣ ਨੇਕ ਰੱਖਣਾ ਕਿਉਂ ਜ਼ਰੂਰੀ ਹੈ?

¹ ਹਰ ਸਾਲ ਸਾਡੇ ਸੰਮੇਲਨਾਂ ਦੌਰਾਨ ਲੋਕਾਂ ਦਾ ਧਿਆਨ ਸਾਡੇ ਵੱਲ ਖਿੱਚਿਆ ਜਾਂਦਾ ਹੈ। ਇਸ ਲਈ ਬਹੁਤ ਜ਼ਰੂਰੀ ਹੈ ਕਿ ਅਸੀਂ ਪਰਮੇਸ਼ੁਰ ਦੀ ਵਡਿਆਈ ਕਰਨ ਲਈ ਚੰਗਾ ਚਾਲ-ਚਲਣ ਰੱਖੀਏ। (ਲੇਵੀ. 20:26) ਜੇ ਅਸੀਂ ਸਲੀਕੇ ਨਾਲ ਪੇਸ਼ ਆਈਏ ਅਤੇ ਵਧੀਆ ਢੰਗ ਦੇ ਕੱਪੜੇ ਪਾਈਏ, ਤਾਂ ਲੋਕ ਸਾਫ਼ ਦੇਖ ਸਕਣਗੇ ਕਿ ਅਸੀਂ ਮਸੀਹ ਦੇ ਸੱਚੇ ਚੇਲੇ ਹਾਂ। ਇਸ ਸਾਲ ਦੇ ਵੱਡੇ ਸੰਮੇਲਨ ਜਾਂ ਅੰਤਰਰਾਸ਼ਟਰੀ ਸੰਮੇਲਨ ਵਿਚ ਹਾਜ਼ਰ ਹੋ ਕੇ ਅਸੀਂ “ਦੁਨੀਆਂ ਦੇ ਲੋਕਾਂ ਵਿਚ ਆਪਣਾ ਚਾਲ-ਚਲਣ ਹਮੇਸ਼ਾ ਨੇਕ” ਕਿਵੇਂ ਰੱਖ ਸਕਦੇ ਹਾਂ ਤਾਂਕਿ ਸਾਡੇ ਸਵਰਗੀ ਪਿਤਾ ਦੀ ਵਡਿਆਈ ਹੋਵੇ?​—1 ਪਤ. 2:12.

2. ਸੰਮੇਲਨ ਦੌਰਾਨ ਮਸੀਹੀ ਸੁਭਾਅ ਦਿਖਾਉਣ ਦੇ ਸਾਡੇ ਕੋਲ ਕਿਹੜੇ ਮੌਕੇ ਹਨ?

² ਮਸੀਹੀ ਸੁਭਾਅ ਦਿਖਾਓ: ਅਸੀਂ ਇਕ-ਦੂਜੇ ਨੂੰ ਪਿਆਰ ਕਰਦੇ ਹਾਂ ਅਤੇ ਉਨ੍ਹਾਂ ਲੋਕਾਂ ਨਾਲ ਵੀ ਵਧੀਆ ਢੰਗ ਨਾਲ ਪੇਸ਼ ਆਉਂਦੇ ਹਾਂ ਜੋ “ਮੰਡਲੀ ਦਾ ਹਿੱਸਾ ਨਹੀਂ ਹਨ।” ਹਾਂ, ਸਾਡਾ ਰਵੱਈਆ ਦੁਨੀਆਂ ਦੇ ਲੋਕਾਂ ਤੋਂ ਬਹੁਤ ਵੱਖਰਾ ਹੈ। (ਕੁਲੁ. 3:10; 4:5; 2 ਤਿਮੋ. 3:1-5) ਸਾਨੂੰ ਹੋਟਲ ਅਤੇ ਰੈਸਟੋਰੈਂਟ ਵਿਚ ਕੰਮ ਕਰਨ ਵਾਲਿਆਂ ਨਾਲ ਪਿਆਰ ਅਤੇ ਧੀਰਜ ਨਾਲ ਪੇਸ਼ ਆਉਣਾ ਚਾਹੀਦਾ ਹੈ, ਉਸ ਸਮੇਂ ਵੀ ਜਦੋਂ ਕੋਈ ਮੁਸ਼ਕਲ ਖੜ੍ਹੀ ਹੋ ਜਾਵੇ। ਸਲੀਕੇ ਨਾਲ ਪੇਸ਼ ਆਉਣ ਵਿਚ ਇਹ ਵੀ ਸ਼ਾਮਲ ਹੈ ਕਿ ਅਸੀਂ ਉਨ੍ਹਾਂ ਨੂੰ ਟਿੱਪ ਦੇਈਏ ਜੋ ਸਾਡੀ ਮਦਦ ਕਰਦੇ ਹਨ। ਸੀਟਾਂ ਰੱਖਦੇ ਸਮੇਂ ਜਾਂ ਸੰਮੇਲਨ ਵਿਚ ਰਿਲੀਜ਼ ਹੋਏ ਪ੍ਰਕਾਸ਼ਨ ਲੈਣ ਲਈ ਲਾਈਨ ਵਿਚ ਖੜ੍ਹਨ ਵੇਲੇ ਸਾਨੂੰ ਆਪਣੇ ਬਾਰੇ ਹੀ ਨਹੀਂ ਸੋਚਣਾ ਚਾਹੀਦਾ, ਸਗੋਂ ਦੂਜਿਆਂ ਬਾਰੇ ਵੀ ਸੋਚਣਾ ਚਾਹੀਦਾ ਹੈ। (1 ਕੁਰਿੰ. 10:23, 24) ਪਹਿਲੀ ਵਾਰ ਸੰਮੇਲਨ ʼਤੇ ਆਉਣ ਤੋਂ ਬਾਅਦ ਇਕ ਦਿਲਚਸਪੀ ਰੱਖਣ ਵਾਲੇ ਆਦਮੀ ਨੇ ਕਿਹਾ: “ਉਸ ਦਿਨ ਦਿੱਤਾ ਗਿਆ ਕੋਈ ਵੀ ਭਾਸ਼ਣ ਮੈਨੂੰ ਯਾਦ ਨਹੀਂ, ਪਰ ਮੈਂ ਗਵਾਹਾਂ ਦਾ ਚਾਲ-ਚਲਣ ਦੇਖ ਕੇ ਬਹੁਤ ਪ੍ਰਭਾਵਿਤ ਹੋਇਆ।”

3. ਮਾਪਿਆਂ ਨੂੰ ਕਿਸ ਗੱਲ ਦੀ ਯਾਦ ਦਿਲਾਈ ਜਾਂਦੀ ਹੈ?

³ ਸੰਮੇਲਨ, ਰੈਸਟੋਰੈਂਟਾਂ ਅਤੇ ਹੋਟਲਾਂ ਵਿਚ ਮਾਪਿਆਂ ਨੂੰ ਆਪਣੇ ਬੱਚਿਆਂ ਦੀ ਨਿਗਰਾਨੀ ਕਰਨੀ ਚਾਹੀਦੀ ਹੈ। (ਕਹਾ. 29:15) ਰੈਸਟੋਰੈਂਟ ਦੇ ਮੈਨੇਜਰ ਨੇ ਇਕ ਜੋੜੇ ਨੂੰ ਕਿਹਾ: “ਅਸੀਂ ਤੁਹਾਡੇ ਲੋਕਾਂ ਨੂੰ ਬਹੁਤ ਪਸੰਦ ਕਰਦੇ ਹਾਂ। ਤੁਹਾਡੇ ਪਰਿਵਾਰ ਅਤੇ ਬੱਚੇ ਬਹੁਤ ਹੀ ਸਲੀਕੇ ਨਾਲ ਪੇਸ਼ ਆਉਂਦੇ ਹਨ। ਅਸੀਂ ਸਾਰਾ ਸਟਾਫ਼ ਗੱਲਾਂ ਕਰ ਰਹੇ ਸਾਂ, ਕਿੰਨਾ ਚੰਗਾ ਹੁੰਦਾ ਜੇ ਤੁਸੀਂ ਹਰ ਹਫ਼ਤੇ ਦੇ ਅਖ਼ੀਰ ਵਿਚ ਹੋਟਲ ਵਿਚ ਰਹਿਣ ਆਉਂਦੇ।”

4. ਸੰਮੇਲਨ ਦੇ ਸਮੇਂ ਦੌਰਾਨ ਸਾਨੂੰ ਆਪਣੇ ਪਹਿਰਾਵੇ ਬਾਰੇ ਕੀ ਯਾਦ ਰੱਖਣ ਦੀ ਲੋੜ ਹੈ?

⁴ ਸਲੀਕੇਦਾਰ ਕੱਪੜੇ: ਸੰਮੇਲਨ ਦੌਰਾਨ ਸਾਨੂੰ ਸਲੀਕੇਦਾਰ ਕੱਪੜੇ ਪਾਉਣ ਦੀ ਲੋੜ ਹੈ। (1 ਤਿਮੋ. 2:9) ਸਾਨੂੰ ਅਜਿਹੇ ਫ਼ੈਸ਼ਨ ਦੇ ਕੱਪੜੇ ਨਹੀਂ ਪਾਉਣੇ ਚਾਹੀਦੇ ਜੋ ਦੁਨੀਆਂ ਦੇ ਲੋਕ ਪਾਉਂਦੇ ਹਨ। ਹੋਟਲ ਵਿਚ ਚੈਕਿੰਗ ਕਰਦਿਆਂ ਅਤੇ ਉੱਥੋਂ ਜਾਂਦਿਆਂ ਜਾਂ ਸੰਮੇਲਨ ਤੋਂ ਪਹਿਲਾਂ ਤੇ ਬਾਅਦ ਵਿਚ ਆਰਾਮ ਕਰਦਿਆਂ ਵੀ ਸਾਨੂੰ ਸਾਫ਼-ਸੁਥਰੇ ਤੇ ਸਲੀਕੇਦਾਰ ਕੱਪੜੇ ਪਾਉਣੇ ਚਾਹੀਦੇ ਹਨ। ਸਾਨੂੰ ਦੁਨੀਆਂ ਦੇ ਲੋਕਾਂ ਵਾਂਗ ਬੇਢੰਗੇ ਜਾਂ ਤੰਗ ਕੱਪੜੇ ਨਹੀਂ ਪਾਉਣੇ ਚਾਹੀਦੇ। ਜੇ ਅਸੀਂ ਸਲੀਕੇਦਾਰ ਕੱਪੜੇ ਪਾਵਾਂਗੇ, ਤਾਂ ਸਾਨੂੰ ਸੰਮੇਲਨ ਬੈਜ ਕਾਰਡ ਲਗਾ ਕੇ ਫ਼ਖ਼ਰ ਹੋਵੇਗਾ ਅਤੇ ਮੌਕਾ ਮਿਲਣ ਤੇ ਗਵਾਹੀ ਦੇਣ ਲੱਗਿਆਂ ਸਾਨੂੰ ਸ਼ਰਮਿੰਦਗੀ ਮਹਿਸੂਸ ਨਹੀਂ ਹੋਵੇਗੀ। ਆਉਣ ਵਾਲੇ ਸੰਮੇਲਨ ਦੌਰਾਨ ਸਾਡੇ ਵਧੀਆ ਪਹਿਰਾਵੇ ਅਤੇ ਚਾਲ-ਚਲਣ ਸਦਕਾ ਨੇਕਦਿਲ ਲੋਕ ਪਰਮੇਸ਼ੁਰ ਦੇ ਸੰਦੇਸ਼ ਨੂੰ ਸੁਣਨਗੇ ਅਤੇ ਅਸੀਂ ਯਹੋਵਾਹ ਦੇ ਦਿਲ ਨੂੰ ਖ਼ੁਸ਼ ਕਰਾਂਗੇ।​—ਸਫ਼. 3:17.