ਸਾਡੇ ਜ਼ਿਲ੍ਹਾ ਸੰਮੇਲਨ—ਸੱਚਾਈ ਬਾਰੇ ਜ਼ਬਰਦਸਤ ਗਵਾਹੀ
1. ਹਰ ਸਾਲ ਤਿਉਹਾਰ ਮਨਾਉਣ ਨਾਲ ਇਜ਼ਰਾਈਲੀਆਂ ਨੂੰ ਕਿਹੜੀਆਂ ਜ਼ਰੂਰੀ ਸੱਚਾਈਆਂ ਉੱਤੇ ਸੋਚ-ਵਿਚਾਰ ਕਰਨ ਦਾ ਮੌਕਾ ਮਿਲਦਾ ਸੀ?
1 ਪੁਰਾਣੇ ਜ਼ਮਾਨੇ ਵਿਚ ਇਜ਼ਰਾਈਲੀ ਹਰ ਸਾਲ ਤਿੰਨ ਵਾਰੀ ਤਿਉਹਾਰ ਮਨਾਉਣ ਲਈ ਇਕੱਠੇ ਹੁੰਦੇ ਸਨ। ਭਾਵੇਂ ਕਿ ਇਨ੍ਹਾਂ ਤਿਉਹਾਰਾਂ ਤੇ ਜਾਣ ਲਈ ਸਿਰਫ਼ ਆਦਮੀਆਂ ਨੂੰ ਕਿਹਾ ਗਿਆ ਸੀ, ਪਰ ਇਨ੍ਹਾਂ ਖ਼ੁਸ਼ੀ ਭਰੇ ਇਕੱਠਾਂ ʼਤੇ ਜਾਣ ਲਈ ਸਾਰਾ ਪਰਿਵਾਰ ਯਰੂਸ਼ਲਮ ਜਾਂਦਾ ਹੁੰਦਾ ਸੀ। (ਬਿਵ. 16:15, 16) ਅਜਿਹੇ ਮੌਕਿਆਂ ਤੇ ਉਹ ਸੱਚਾਈ ਦੀਆਂ ਜ਼ਰੂਰੀ ਗੱਲਾਂ ʼਤੇ ਚਰਚਾ ਅਤੇ ਸੋਚ-ਵਿਚਾਰ ਕਰ ਸਕਦੇ ਸਨ। ਇਨ੍ਹਾਂ ਵਿੱਚੋਂ ਕੁਝ ਸੱਚਾਈਆਂ ਕਿਹੜੀਆਂ ਸਨ? ਇਕ ਤਾਂ ਇਹ ਸੀ ਕਿ ਯਹੋਵਾਹ ਖੁੱਲ੍ਹੇ-ਦਿਲ ਵਾਲਾ ਪਰਮੇਸ਼ੁਰ ਸੀ। (ਬਿਵ. 15:4, 5) ਇਸ ਦੇ ਨਾਲ-ਨਾਲ ਉਹ ਭਰੋਸਾ ਰੱਖਦੇ ਸਨ ਕਿ ਉਹ ਉਨ੍ਹਾਂ ਨੂੰ ਸੇਧ ਦੇ ਸਕਦਾ ਸੀ ਤੇ ਉਨ੍ਹਾਂ ਦੀ ਰੱਖਿਆ ਵੀ ਕਰ ਸਕਦਾ ਸੀ। (ਬਿਵ. 32:9, 10) ਇਜ਼ਰਾਈਲੀ ਇਸ ਗੱਲ ਉੱਤੇ ਵੀ ਸੋਚ-ਵਿਚਾਰ ਕਰ ਸਕਦੇ ਸਨ ਕਿ ਉਹ ਯਹੋਵਾਹ ਦੇ ਨਾਂ ʼਤੇ ਚੁਣੀ ਹੋਈ ਕੌਮ ਸੀ, ਇਸ ਕਰਕੇ ਉਨ੍ਹਾਂ ਨੂੰ ਆਪਣੀ ਜ਼ਿੰਦਗੀ ਉਸ ਦੇ ਕਾਨੂੰਨਾਂ ਮੁਤਾਬਕ ਜੀਉਣੀ ਚਾਹੀਦੀ ਸੀ। (ਬਿਵ. 7:6, 11) ਅਸੀਂ ਵੀ ਅੱਜ ਸਾਲਾਨਾ ਜ਼ਿਲ੍ਹਾ ਸੰਮੇਲਨਾਂ ਤੋਂ ਇਸੇ ਤਰ੍ਹਾਂ ਫ਼ਾਇਦਾ ਉਠਾਉਂਦੇ ਹਾਂ।
2. ਜ਼ਿਲ੍ਹਾ ਸੰਮੇਲਨ ਦਾ ਪ੍ਰੋਗ੍ਰਾਮ ਸੱਚਾਈ ਉੱਤੇ ਰੌਸ਼ਨੀ ਕਿਵੇਂ ਪਾਵੇਗਾ?
2 ਪ੍ਰੋਗ੍ਰਾਮ ਸੱਚਾਈ ਉੱਤੇ ਚਾਨਣ ਪਾਉਂਦਾ ਹੈ: ਅਸੀਂ ਜ਼ਿਲ੍ਹਾ ਸੰਮੇਲਨਾਂ ਵਿਚ ਭਾਸ਼ਣ ਸੁਣ ਕੇ, ਡਰਾਮੇ ਦੇਖ ਕੇ, ਪ੍ਰਦਰਸ਼ਨ ਤੇ ਇੰਟਰਵਿਊਆਂ ਸੁਣ ਕੇ ਬਾਈਬਲ ਦਾ ਹੋਰ ਵਧੀਆ ਗਿਆਨ ਲੈ ਸਕਦੇ ਹਾਂ ਜਿਨ੍ਹਾਂ ਤੋਂ ਸਾਨੂੰ ਖ਼ੁਸ਼ੀ ਮਿਲਦੀ ਹੈ। (ਯੂਹੰ. 17:17) ਆਉਣ ਵਾਲੇ ਜ਼ਿਲ੍ਹਾ ਸੰਮੇਲਨ ਲਈ ਕਾਫ਼ੀ ਤਿਆਰੀ ਕੀਤੀ ਜਾ ਚੁੱਕੀ ਹੈ। ਯਹੋਵਾਹ ਦੇ ਸੰਗਠਨ ਨੇ ਦੁਨੀਆਂ ਭਰ ਵਿਚ ਰਹਿੰਦੇ ਲੋਕਾਂ ਦੀਆਂ ਲੋੜਾਂ ਮੁਤਾਬਕ ਇਹ ਪ੍ਰੋਗ੍ਰਾਮ ਖ਼ਾਸ ਕਰਕੇ ਤਿਆਰ ਕੀਤਾ ਹੈ। (ਮੱਤੀ 24:45-47) ਜ਼ਿਲ੍ਹਾ ਸੰਮੇਲਨ ਵਿਚ ਜੋ ਕੁਝ ਹੋਣ ਵਾਲਾ ਹੈ, ਕੀ ਤੁਸੀਂ ਉਸ ਨੂੰ ਦੇਖਣ ਤੇ ਸੁਣਨ ਲਈ ਉਤਾਵਲੇ ਹੋ?
3. ਪ੍ਰੋਗ੍ਰਾਮ ਤੋਂ ਪੂਰਾ ਫ਼ਾਇਦਾ ਲੈਣ ਲਈ ਸਾਨੂੰ ਕੀ ਕਰਨ ਦੀ ਲੋੜ ਹੈ?
3 ਸਾਨੂੰ ਸਭ ਤੋਂ ਜ਼ਿਆਦਾ ਉਦੋਂ ਫ਼ਾਇਦਾ ਹੋਵੇਗਾ ਜੇ ਅਸੀਂ ਤਿੰਨੇ ਦਿਨ ਹਾਜ਼ਰ ਹੋਵਾਂਗੇ ਤੇ ਧਿਆਨ ਨਾਲ ਸੁਣਾਂਗੇ। ਜੇ ਤੁਸੀਂ ਛੁੱਟੀ ਲੈਣ ਲਈ ਆਪਣੇ ਬਾਸ ਨਾਲ ਅਜੇ ਤਕ ਗੱਲ ਨਹੀਂ ਕੀਤੀ, ਤਾਂ ਜਲਦੀ ਗੱਲ ਕਰੋ। ਪ੍ਰੋਗ੍ਰਾਮ ਨੂੰ ਧਿਆਨ ਨਾਲ ਸੁਣਨ ਲਈ ਸਮੇਂ ਸਿਰ ਸੌਂਵੋ। ਕਈਆਂ ਨੇ ਦੇਖਿਆ ਹੈ ਕਿ ਜੇ ਉਹ ਭਾਸ਼ਣਕਾਰ ਵੱਲ ਦੇਖਦੇ ਹਨ ਤੇ ਛੋਟੇ-ਛੋਟੇ ਨੋਟਸ ਲਿਖਦੇ ਹਨ, ਤਾਂ ਇਸ ਨਾਲ ਉਨ੍ਹਾਂ ਦਾ ਧਿਆਨ ਨਹੀਂ ਭਟਕਦਾ। ਆਪਣੇ ਮੋਬਾਇਲ ਜਾਂ ਪੇਜਰ ਨਾਲ ਆਪਣਾ ਜਾਂ ਕਿਸੇ ਦਾ ਧਿਆਨ ਭੰਗ ਨਾ ਹੋਣ ਦਿਓ। ਪ੍ਰੋਗ੍ਰਾਮ ਦੌਰਾਨ ਗੱਲਾਂ ਕਰਨ, ਐੱਸ.ਐੱਮ.ਐੱਸ. ਭੇਜਣ ਅਤੇ ਖਾਣ-ਪੀਣ ਤੋਂ ਵੀ ਪਰਹੇਜ਼ ਕਰੋ।
4. ਸੰਮੇਲਨ ਦੌਰਾਨ ਮਾਪੇ ਆਪਣੇ ਬੱਚਿਆਂ ਦੀ ਮਦਦ ਕਿਵੇਂ ਕਰ ਸਕਦੇ ਹਨ ਤਾਂਕਿ ਉਹ ਪੂਰਾ ਫ਼ਾਇਦਾ ਲੈ ਸਕਣ?
4 ਸਬਤ ਦੇ ਸਾਲਾਂ ਦੌਰਾਨ ਜਦੋਂ ਇਜ਼ਰਾਈਲੀ ਪਰਿਵਾਰ ਡੇਰਿਆਂ ਦਾ ਪਰਬ ਮਨਾਉਣ ਵੇਲੇ ਕਾਨੂੰਨ ਸੁਣਨ ਲਈ ਇਕੱਠੇ ਹੁੰਦੇ ਸਨ, ਤਾਂ ਉਨ੍ਹਾਂ ਦੇ ਨਾਲ ਉਨ੍ਹਾਂ ਦੇ ‘ਨਿਆਣੇ’ ਹੁੰਦੇ ਸਨ ਤਾਂਕਿ ‘ਉਹ ਸੁਣ ਅਤੇ ਸਿੱਖ ਸਕਣ।’ (ਬਿਵ. 31:12) ਸਾਨੂੰ ਦੇਖ ਕੇ ਕਿੰਨਾ ਹੌਸਲਾ ਮਿਲਦਾ ਹੈ ਜਦੋਂ ਸੰਮੇਲਨ ਦੌਰਾਨ ਅਸੀਂ ਪਰਿਵਾਰਾਂ ਨੂੰ ਇਕੱਠੇ ਬੈਠੇ ਤੇ ਨਿਆਣਿਆਂ ਨੂੰ ਧਿਆਨ ਨਾਲ ਪ੍ਰੋਗ੍ਰਾਮ ਸੁਣਦਿਆਂ ਦੇਖਦੇ ਹਾਂ! ਕਿਉਂ ਨਾ ਹਰ ਸ਼ਾਮ ਨੂੰ ਇਕੱਠੇ ਹੋ ਕੇ ਪ੍ਰੋਗ੍ਰਾਮ ਦੀਆਂ ਉਨ੍ਹਾਂ ਗੱਲਾਂ ਉੱਤੇ ਚਰਚਾ ਕਰੋ ਜਿਹੜੀਆਂ ਤੁਹਾਨੂੰ ਵਧੀਆ ਲੱਗੀਆਂ। “ਬਾਲਕ ਦੇ ਮਨ ਵਿੱਚ ਮੂਰਖਤਾਈ ਬੱਧੀ ਹੋਈ ਹੁੰਦੀ ਹੈ,” ਇਸ ਲਈ ਚੰਗਾ ਹੋਵੇਗਾ ਕਿ ਮਾਪੇ ਦੁਪਹਿਰ ਦੇ ਖਾਣੇ ਦੌਰਾਨ ਅਤੇ ਹੋਟਲ ਵਿਚ ਆਪਣਿਆਂ ਬੱਚਿਆ ਦੀ ਨਿਗਰਾਨੀ ਕਰਨ ਤੇ ਉਨ੍ਹਾਂ ਨੂੰ ਇੱਧਰ-ਉੱਧਰ ਭੱਜਣ ਨਾ ਦੇਣ। ਇਸ ਦੇ ਨਾਲ-ਨਾਲ ਉਨ੍ਹਾਂ ਨੂੰ ਆਪਣੇ ਨੌਜਵਾਨਾਂ ʼਤੇ ਵੀ ਨਿਗਾਹ ਰੱਖਣੀ ਚਾਹੀਦੀ ਹੈ।—ਕਹਾ. 22:15; 29:15.
5. ਹੋਟਲ ਵਿਚ ਰਹਿੰਦਿਆਂ ਸਾਡੇ ਚਾਲ-ਚਲਣ ਕਰਕੇ ਸੱਚਾਈ ਦੀ ਸ਼ੋਭਾ ਕਿਵੇਂ ਵਧਦੀ ਹੈ?
5 ਸਾਡਾ ਚੰਗਾ ਚਾਲ-ਚਲਣ ਸੱਚਾਈ ਦੀ ਸ਼ੋਭਾ ਵਧਾਉਂਦਾ ਹੈ: ਸੰਮੇਲਨ ਵਾਲੇ ਸ਼ਹਿਰ ਵਿਚ ਸਾਡੇ ਚੰਗੇ ਚਾਲ-ਚਲਣ ਕਰਕੇ ਪਰਮੇਸ਼ੁਰ ਦੀ ਵਡਿਆਈ ਹੁੰਦੀ ਹੈ। (ਤੀਤੁ. 2:10) ਹੋਟਲ ਵਿਚ ਕੰਮ ਕਰਨ ਵਾਲੇ ਇਸ ਗੱਲ ਨੂੰ ਨੋਟ ਕਰਦੇ ਹਨ ਕਿ ਅਸੀਂ ਹੋਟਲ ਦੇ ਕਾਨੂੰਨਾਂ ਨੂੰ ਮੰਨਦੇ ਹਾਂ ਅਤੇ ਸਟਾਫ਼ ਨਾਲ ਧੀਰਜ ਤੇ ਸਲੀਕੇ ਨਾਲ ਪੇਸ਼ ਆਉਂਦੇ ਹਾਂ। (ਕੁਲੁ. 4:6) ਪਿੱਛਲੇ ਸਾਲ ਜਦੋਂ ਬ੍ਰਾਂਚ ਆਫ਼ਿਸ ਦੇ ਨੁਮਾਇੰਦਿਆਂ ਨੇ ਹੋਟਲ ਦੇ ਮਾਲਕ ਨਾਲ ਕਮਰਿਆਂ ਦੀ ਕੀਮਤ ਬਾਰੇ ਗੱਲ ਬਾਤ ਕੀਤੀ, ਤਾਂ ਉੱਥੇ ਦੀ ਡਾਇਰੈਕਟਰ ਨੇ ਕਿਹਾ: “ਸਾਨੂੰ ਬਹੁਤ ਖ਼ੁਸ਼ੀ ਹੁੰਦੀ ਹੈ ਜਦੋਂ ਤੁਹਾਡੇ ਲੋਕ ਹੋਟਲ ਵਿਚ ਆ ਕੇ ਰਹਿੰਦੇ ਹਨ ਕਿਉਂਕਿ ਉਹ ਬਹੁਤ ਚੰਗੇ ਹਨ। ਉਹ ਹਰ ਵਕਤ ਸਾਡੇ ਸਟਾਫ਼ ਨਾਲ ਤਮੀਜ਼ ਨਾਲ ਪੇਸ਼ ਆਉਂਦੇ ਹਨ ਅਤੇ ਹੋਟਲ ਦੀਆਂ ਸਹੂਲਤਾਂ ਦੀ ਕਦਰ ਕਰਦੇ ਹਨ।”
6. ਸੰਮੇਲਨ ਵਾਲੇ ਸ਼ਹਿਰ ਵਿਚ ਅਸੀਂ ਆਪਣੇ ਕੱਪੜਿਆਂ ਰਾਹੀਂ ਸੱਚਾਈ ਦੀ ਕਿਵੇਂ ਗਵਾਹੀ ਦੇ ਸਕਦੇ ਹਾਂ?
6 ਅਸੀਂ ਸੰਮੇਲਨ ਦਾ ਬੈਜ ਇਸ ਕਰਕੇ ਨਹੀਂ ਲਾਉਂਦੇ ਕਿ ਲੋਕਾਂ ਨੂੰ ਪਤਾ ਲੱਗੇ ਕਿ ਅਸੀਂ ਕੌਣ ਹਾਂ ਜਾਂ ਦੂਸਰੇ ਭੈਣ-ਭਰਾ ਸਾਨੂੰ ਪਛਾਣ ਸਕਣ, ਸਗੋਂ ਇਸ ਕਰਕੇ ਲਾਉਂਦੇ ਹਾਂ ਤਾਂਕਿ ਬਾਹਰਲੇ ਲੋਕਾਂ ਨੂੰ ਗਵਾਹੀ ਮਿਲੇ। ਸੰਮੇਲਨ ਵਾਲੇ ਸ਼ਹਿਰ ਵਿਚ ਲੋਕ ਦੇਖਦੇ ਹਨ ਕਿ ਜਿਨ੍ਹਾਂ ਲੋਕਾਂ ਨੇ ਬੈਜ ਲਾਏ ਹੋਏ ਹਨ ਉਨ੍ਹਾਂ ਦੇ ਕੱਪੜੇ ਸਾਫ਼-ਸੁਥਰੇ ਤੇ ਸਲੀਕੇ ਵਾਲੇ ਹਨ। ਉਨ੍ਹਾਂ ਦੇ ਕੱਪੜੇ ਦੁਨੀਆਂ ਦੇ ਲੋਕਾਂ ਵਾਂਗ ਭੜਕੀਲੇ ਤੇ ਜਿਸਮ ਦਿਖਾਉਣ ਵਾਲੇ ਨਹੀਂ ਹਨ। (1 ਤਿਮੋ. 2:9, 10) ਇਸ ਲਈ ਜ਼ਰੂਰੀ ਹੈ ਕਿ ਅਸੀਂ ਸੰਮੇਲਨ ਵਾਲੇ ਸ਼ਹਿਰ ਵਿਚ ਆਪਣੇ ਕੱਪੜਿਆਂ ਤੇ ਹਾਰ-ਸ਼ਿੰਗਾਰ ਵੱਲ ਧਿਆਨ ਦੇਈਏ। ਜਦੋਂ ਅਸੀਂ ਹੋਟਲ ਵਿਚ ਆਉਂਦੇ ਹਾਂ, ਤਾਂ ਸਾਨੂੰ ਟੀ-ਸ਼ਰਟਾਂ ਅਤੇ ਨਿੱਕਰਾਂ ਨਹੀਂ ਪਾਉਣੀਆਂ ਚਾਹੀਦੀਆਂ। ਅਜਿਹੇ ਕੱਪੜੇ ਗਵਾਹਾਂ ਨੂੰ ਨਹੀਂ ਫੱਬਦੇ। ਭਾਵੇਂ ਕਿ ਸਾਡਾ ਜ਼ਿਲ੍ਹਾ ਸੰਮੇਲਨ ਖੁੱਲ੍ਹੇ ਸਟੇਡੀਅਮ ਵਿਚ ਹੋਵੇ ਫਿਰ ਵੀ ਸਾਡੇ ਕੱਪੜੇ ਸਲੀਕੇ ਵਾਲੇ ਹੋਣੇ ਚਾਹੀਦੇ ਹਨ। ਜੇ ਅਸੀਂ ਪ੍ਰੋਗ੍ਰਾਮ ਤੋਂ ਬਾਅਦ ਕਿਸੇ ਰੈਸਟੋਰੈਂਟ ਵਿਚ ਖਾਣ ਲਈ ਜਾਣਾ ਚਾਹੁੰਦੇ ਹਾਂ, ਤਾਂ ਸਾਨੂੰ ਯਾਦ ਰੱਖਣਾ ਚਾਹੀਦਾ ਹੈ ਕਿ ਅਸੀਂ ਹਾਲੇ ਵੀ ਯਹੋਵਾਹ ਦੇ ਸੇਵਕ ਹਾਂ। ਇਸ ਕਰਕੇ ਸਾਡੇ ਕੱਪੜੇ ਸਲੀਕੇ ਵਾਲੇ ਹੋਣੇ ਚਾਹੀਦੇ ਹਨ।
7. ਸੰਮੇਲਨ ਦੌਰਾਨ ਅਸੀਂ ਮਸੀਹੀ ਏਕਤਾ ਦਾ ਆਨੰਦ ਕਿਵੇਂ ਮਾਣ ਸਕਦੇ ਹਾਂ?
7 ਹਰ ਸਾਲ ਤਿਉਹਾਰਾਂ ਦੌਰਾਨ ਇਜ਼ਰਾਈਲੀ ਲੋਕ ਦੁਨੀਆਂ ਭਰ ਦੇ ਸਾਰੇ ਦੇਸ਼ਾਂ ਤੋਂ ਆਏ ਯਹੋਵਾਹ ਦੇ ਸੇਵਕਾਂ ਨਾਲ ਸੰਗਤੀ ਦਾ ਆਨੰਦ ਮਾਣਦੇ ਸਨ। ਇਸ ਦੇ ਨਾਲ ਉਨ੍ਹਾਂ ਦੀ ਏਕਤਾ ਵਧਦੀ ਸੀ। (ਰਸੂ. 2:1, 5) ਜ਼ਿਲ੍ਹਾ ਸੰਮੇਲਨਾਂ ਦੌਰਾਨ ਸਾਡਾ ਮਸੀਹੀ ਭਾਈਚਾਰਾ ਤੇ ਏਕਤਾ ਦੇਖੀ ਜਾ ਸਕਦੀ ਹੈ। ਦੇਖਣ ਵਾਲਿਆਂ ਉੱਤੇ ਅਜਿਹੇ ਮਾਹੌਲ ਦਾ ਕਾਫ਼ੀ ਅਸਰ ਪੈਂਦਾ ਹੈ। (ਜ਼ਬੂ. 133:1) ਦੁਪਹਿਰ ਦੇ ਖਾਣੇ ਵੇਲੇ ਬਾਹਰ ਜਾ ਕੇ ਕੁਝ ਖ਼ਰੀਦਣ ਦੀ ਬਜਾਇ ਆਪਣੇ ਨਾਲ ਹਲਕਾ-ਫੁਲਕਾ ਖਾਣਾ ਲਿਆਓ ਤਾਂਕਿ ਤੁਸੀਂ ਹਾਲ ਵਿਚ ਭੈਣਾਂ-ਭਰਾਵਾਂ ਨਾਲ ਸੰਗਤ ਕਰ ਸਕੋ!
8. ਆਪਣੇ ਹਾਲਾਤਾਂ ਅਨੁਸਾਰ ਸਾਨੂੰ ਵਲੰਟੀਅਰ ਦੇ ਤੌਰ ਤੇ ਕੰਮ ਕਿਉਂ ਕਰਨਾ ਚਾਹੀਦਾ ਹੈ?
8 ਬਾਹਰਲੇ ਲੋਕ ਸਾਡੇ ਸੰਮੇਲਨ ਦੀਆਂ ਤਿਆਰੀਆਂ ਵੱਲ ਦੇਖ ਕੇ ਹੈਰਾਨ ਹੁੰਦੇ ਹਨ ਖ਼ਾਸ ਕਰਕੇ ਜਦੋਂ ਉਨ੍ਹਾਂ ਨੂੰ ਪਤਾ ਲੱਗਦਾ ਹੈ ਕਿ ਸਾਰਾ ਕੰਮ ਵਲੰਟੀਅਰਾਂ ਰਾਹੀਂ ਕੀਤਾ ਜਾਂਦਾ ਹੈ। ਕੀ ਤੁਸੀਂ ਇਸ ਕੰਮ ਲਈ “ਆਪਣੇ ਆਪ ਨੂੰ ਖੁਸ਼ੀ ਨਾਲ ਪੇਸ਼” ਕਰ ਸਕਦੇ ਹੋ? (ਜ਼ਬੂ. 110:3) ਆਪਣੇ ਬੱਚਿਆਂ ਨੂੰ ਦੂਜਿਆਂ ਦੀ ਮਦਦ ਕਰਨੀ ਸਿਖਾਉਣ ਲਈ ਪੂਰਾ ਪਰਿਵਾਰ ਵਲੰਟੀਅਰਾਂ ਦੇ ਤੌਰ ਤੇ ਕੰਮ ਕਰਦਾ ਹੈ। ਜੇ ਤੁਸੀਂ ਸ਼ਰਮਾਉਂਦੇ ਹੋ, ਤਾਂ ਭੈਣਾਂ-ਭਰਾਵਾਂ ਨੂੰ ਜਾਣਨ ਦਾ ਇਕ ਤਰੀਕਾ ਹੈ ਕਿ ਤੁਸੀਂ ਸੰਮੇਲਨ ਵਿਚ ਕਿਸੇ ਨਾ ਕਿਸੇ ਕੰਮ ਵਿਚ ਹੱਥ ਵਟਾਓ। ਇਕ ਭੈਣ ਨੇ ਕਿਹਾ: “ਆਪਣੇ ਪਰਿਵਾਰ ਅਤੇ ਕੁਝ ਦੋਸਤਾਂ ਤੋਂ ਸਿਵਾਇ ਮੈਂ ਉੱਥੇ ਜ਼ਿਆਦਾਤਰ ਭੈਣਾਂ-ਭਰਾਵਾਂ ਨੂੰ ਨਹੀਂ ਜਾਣਦੀ ਸੀ। ਪਰ ਜਦ ਮੈਂ ਸਫ਼ਾਈ ਕਰਨ ਵਿਚ ਹੱਥ ਵਟਾਇਆ, ਤਾਂ ਮੈਂ ਬਹੁਤ ਸਾਰੇ ਭੈਣ-ਭਰਾਵਾਂ ਨੂੰ ਮਿਲੀ ਤੇ ਮੈਨੂੰ ਬਹੁਤ ਮਜ਼ਾ ਆਇਆ!” ਸੰਮੇਲਨ ਦੌਰਾਨ ਹੋਰਨਾਂ ਭੈਣਾਂ-ਭਰਾਵਾਂ ਨਾਲ ਕੰਮ ਕਰ ਕੇ ਸਾਨੂੰ ਖ਼ੁਸ਼ੀ ਮਿਲਦੀ ਹੈ। (2 ਕੁਰਿੰ. 6:12, 13) ਜੇ ਤੁਸੀਂ ਕਦੇ ਸੰਮੇਲਨ ਵਿਚ ਵਲੰਟੀਅਰ ਦੇ ਤੌਰ ਤੇ ਕੰਮ ਨਹੀਂ ਕੀਤਾ, ਤਾਂ ਫਿਰ ਬਜ਼ੁਰਗਾਂ ਨੂੰ ਪੁੱਛੋ ਕਿ ਤੁਸੀਂ ਕਿਵੇਂ ਮਦਦ ਕਰ ਸਕਦੇ ਹੋ।
9. ਅਸੀਂ ਹੋਰਨਾਂ ਨੂੰ ਸੰਮੇਲਨ ਤੇ ਆਉਣ ਦਾ ਕਿਵੇਂ ਸੱਦਾ ਦੇ ਸਕਦੇ ਹਾਂ?
9 ਹੋਰਨਾਂ ਨੂੰ ਸੱਚਾਈ ਸੁਣਨ ਲਈ ਸੱਦਾ ਦਿਓ: ਸੰਮੇਲਨ ਸ਼ੁਰੂ ਹੋਣ ਤੋਂ ਤਿੰਨ ਹਫ਼ਤੇ ਪਹਿਲਾਂ ਅਸੀਂ ਲੋਕਾਂ ਨੂੰ ਸੱਦਾ ਦੇਣ ਦੀ ਮੁਹਿੰਮ ਵਿਚ ਪਹਿਲਾਂ ਵਾਂਗ ਹਿੱਸਾ ਲਵਾਂਗੇ। ਮੰਡਲੀਆਂ ਵੱਧ ਤੋਂ ਵੱਧ ਲੋਕਾਂ ਨੂੰ ਸੱਦਾ ਦੇਣ ਦੀ ਕੋਸ਼ਿਸ਼ ਕਰਨਗੀਆਂ। (“ਅਸੀਂ ਸੱਦਾ-ਪੱਤਰ ਕਿਸ ਤਰ੍ਹਾਂ ਪੇਸ਼ ਕਰਾਂਗੇ?” ਨਾਂ ਦੀ ਡੱਬੀ ਦੇਖੋ) ਮੁਹਿੰਮ ਦੇ ਮਗਰੋਂ ਬਚੇ ਹੋਏ ਸੱਦਾ-ਪੱਤਰਾਂ ਨੂੰ ਸੰਮੇਲਨ ਉੱਤੇ ਲੈ ਆਓ। ਸੰਮੇਲਨ ਦੇ ਸ਼ਹਿਰ ਵਿਚ ਡੈਲੀਗੇਟ ਇਨ੍ਹਾਂ ਸੱਦਾ-ਪੱਤਰਾਂ ਨੂੰ ਵੰਡ ਸਕਦੇ ਹਨ।
10. ਕੁਝ ਤਜਰਬੇ ਦੱਸੋ ਜਿਨ੍ਹਾਂ ਤੋਂ ਸਾਬਤ ਹੁੰਦਾ ਹੈ ਕਿ ਹਰ ਸਾਲ ਹੋਣ ਵਾਲੀ ਮੁਹਿੰਮ ਦੇ ਵਧੀਆ ਨਤੀਜੇ ਨਿਕਲਦੇ ਹਨ।
10 ਕੀ ਲੋਕ ਇਸ ਸਾਲਾਨਾ ਮੁਹਿੰਮ ਪ੍ਰਤੀ ਹੁੰਗਾਰਾ ਭਰਦੇ ਹਨ? ਇਕ ਸੰਮੇਲਨ ਤੇ ਇਕ ਅਟੈਂਡੈਂਟ ਨੇ ਇਕ ਜੋੜੇ ਦੀ ਸੀਟ ਲੱਭਣ ਵਿਚ ਮਦਦ ਕੀਤੀ। ਜੋੜੇ ਨੇ ਉਸ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਇਹ ਸੱਦਾ-ਪੱਤਰ ਮਿਲਿਆ ਸੀ ਤੇ “ਇਸ ਵਿਚ ਲਿਖੀਆਂ ਗੱਲਾਂ ਵਧੀਆ ਲੱਗੀਆਂ।” ਉਹ ਇੱਥੇ ਹਾਜ਼ਰ ਹੋਣ ਲਈ 320 ਕਿਲੋਮੀਟਰ ਤੋਂ ਜ਼ਿਆਦਾ ਸਫ਼ਰ ਕਰ ਕੇ ਆਏ ਹਨ! ਇਕ ਹੋਰ ਤਜਰਬੇ ʼਤੇ ਗੌਰ ਕਰੋ। ਇਕ ਭੈਣ ਘਰ-ਘਰ ਸੱਦਾ-ਪੱਤਰ ਵੰਡ ਰਹੀ ਸੀ। ਉਸ ਭੈਣ ਨੇ ਉਸ ਆਦਮੀ ਨੂੰ ਸੰਮੇਲਨ ʼਤੇ ਆਉਣ ਦਾ ਸੱਦਾ ਦਿੱਤਾ ਜਿਸ ਨੇ ਉਸ ਦੀ ਗੱਲ ਵਿਚ ਦਿਲਚਸਪੀ ਦਿਖਾਈ। ਉਸ ਨੇ ਸੱਦਾ-ਪੱਤਰ ਵਿਚ ਦਿੱਤੀ ਜਾਣਕਾਰੀ ਉਸ ਨਾਲ ਸਾਂਝੀ ਕੀਤੀ। ਕੁਝ ਦਿਨਾਂ ਬਾਅਦ ਸੰਮੇਲਨ ਵਿਚ ਉਸ ਨੇ ਉਸ ਆਦਮੀ ਨੂੰ ਸੰਮੇਲਨ ਵਿਚ ਆਪਣੇ ਇਕ ਦੋਸਤ ਨਾਲ ਦੇਖਿਆ ਜਿਹੜੇ ਨਵੇਂ ਰੀਲੀਜ਼ ਹੋਏ ਪ੍ਰਕਾਸ਼ਨ ਲਈ ਜਾ ਰਹੇ ਸਨ!
11. ਸਾਲਾਨਾ ਜ਼ਿਲ੍ਹਾ ਸੰਮੇਲਨਾਂ ਵਿਚ ਹਾਜ਼ਰ ਹੋਣਾ ਕਿਉਂ ਜ਼ਰੂਰੀ ਹੈ?
11 ਹਰ ਸਾਲ ਹੋਣ ਵਾਲੇ ਤਿਉਹਾਰ ਯਹੋਵਾਹ ਵੱਲੋਂ ਪਿਆਰ ਦਾ ਸਬੂਤ ਸਨ ਜੋ ਇਜ਼ਰਾਈਲੀਆਂ ਦੀ “ਉਸ ਦੀ ਉਪਾਸਨਾ ਸਿਧਿਆਈ ਅਤੇ ਸਚਿਆਈ ਨਾਲ” ਕਰਨ ਵਿਚ ਮਦਦ ਕਰਦੇ ਸਨ। (ਯਹੋ. 24:14) ਇਸੇ ਤਰ੍ਹਾਂ ਹਰ ਸਾਲ ਜ਼ਿਲ੍ਹਾ ਸੰਮੇਲਨਾਂ ਤੇ ਹਾਜ਼ਰ ਹੋਣ ਨਾਲ ਸਾਡੀ ਮਦਦ ਹੁੰਦੀ ਹੈ ਕਿ ਅਸੀਂ “ਸੱਚਾਈ ਦੇ ਰਾਹ ਉੱਤੇ ਚੱਲ” ਸਕੀਏ। ਇਹ ਸੰਮੇਲਨ ਸਾਡੀ ਭਗਤੀ ਦਾ ਅਹਿਮ ਹਿੱਸਾ ਵੀ ਹਨ। (3 ਯੂਹੰ. 3) ਅਸੀਂ ਆਸ ਕਰਦੇ ਹਾਂ ਕਿ ਸੰਮੇਲਨ ਵਿਚ ਹਾਜ਼ਰ ਹੋਣ ਲਈ ਤੁਸੀਂ ਜੋ ਵੀ ਤਿਆਰੀਆਂ ਕਰਦੇ ਹੋ ਉਸ ʼਤੇ ਯਹੋਵਾਹ ਬਰਕਤ ਪਾਵੇ ਤਾਂਕਿ ਤੁਸੀਂ ਇਸ ਤੋਂ ਪੂਰਾ ਫ਼ਾਇਦਾ ਲੈ ਸਕੋ!
[ਸਫ਼ਾ 5 ਉੱਤੇ ਸੁਰਖੀ]
ਸੰਮੇਲਨ ਵਾਲੇ ਸ਼ਹਿਰ ਵਿਚ ਸਾਡੇ ਚੰਗੇ ਚਾਲ-ਚਲਣ ਕਰਕੇ ਸੱਚਾਈ ਦੀ ਸ਼ੋਭਾ ਵਧਦੀ ਹੈ
[ਸਫ਼ਾ 5 ਉੱਤੇ ਸੁਰਖੀ]
ਸੰਮੇਲਨ ਸ਼ੁਰੂ ਹੋਣ ਤੋਂ ਤਿੰਨ ਹਫ਼ਤੇ ਪਹਿਲਾਂ ਅਸੀਂ ਲੋਕਾਂ ਨੂੰ ਸੱਦਾ ਦੇਣ ਦੀ ਮੁਹਿੰਮ ਵਿਚ ਪਹਿਲਾਂ ਵਾਂਗ ਹਿੱਸਾ ਲਵਾਂਗੇ
[ਸਫ਼ੇ 6, 7 ਉੱਤੇ ਡੱਬੀ]
2012 ਸੰਮੇਲਨ ਸੰਬੰਧੀ ਕੁਝ ਯਾਦ ਰੱਖਣ ਵਾਲੀਆਂ ਗੱਲਾਂ
◼ ਪ੍ਰੋਗ੍ਰਾਮ ਦਾ ਸਮਾਂ: ਤਿੰਨੇ ਦਿਨ ਪ੍ਰੋਗ੍ਰਾਮ ਸਵੇਰੇ 9:20 ਤੇ ਸ਼ੁਰੂ ਹੋਵੇਗਾ। ਹਾਲ ਸਵੇਰੇ 8:00 ਵਜੇ ਤੋਂ ਖੁੱਲ੍ਹਾ ਹੋਵੇਗਾ। ਪ੍ਰੋਗ੍ਰਾਮ ਸ਼ੁਰੂ ਹੋਣ ਤੋਂ ਕੁਝ ਮਿੰਟ ਪਹਿਲਾਂ ਜਦੋਂ ਸੰਗੀਤ ਲਗਾਇਆ ਜਾਵੇਗਾ ਸਾਰਿਆਂ ਨੂੰ ਆਪਣੀਆਂ ਸੀਟਾਂ ʼਤੇ ਬੈਠ ਜਾਣਾ ਚਾਹੀਦਾ ਹੈ ਤਾਂਕਿ ਪ੍ਰੋਗ੍ਰਾਮ ਵਧੀਆ ਤਰੀਕੇ ਨਾਲ ਸ਼ੁਰੂ ਕੀਤਾ ਜਾਵੇ। ਸ਼ੁੱਕਰਵਾਰ ਤੇ ਸ਼ਨੀਵਾਰ ਨੂੰ ਪ੍ਰੋਗ੍ਰਾਮ ਸ਼ਾਮ ਨੂੰ 4:55 ਤੇ ਅਤੇ ਐਤਵਾਰ ਨੂੰ 3:40 ਤੇ ਖ਼ਤਮ ਹੋਵੇਗਾ।
◼ ਪਾਰਕਿੰਗ: ਜਿਨ੍ਹਾਂ ਸੰਮੇਲਨ ਥਾਵਾਂ ʼਤੇ ਪਾਰਕਿੰਗ ਕਰਨ ਦਾ ਸਾਨੂੰ ਅਧਿਕਾਰ ਮਿਲਿਆ ਹੈ, ਉੱਥੇ ਮੁਫ਼ਤ ਵਿਚ ਗੱਡੀਆਂ ਖੜ੍ਹੀਆਂ ਕੀਤੀਆਂ ਜਾ ਸਕਦੀਆਂ ਹਨ। ਪਹਿਲਾਂ ਆਉਣ ਵਾਲਿਆਂ ਨੂੰ ਤਰਜੀਹ ਦਿੱਤੀ ਜਾਵੇਗੀ। ਪਾਰਕਿੰਗ ਵਾਸਤੇ ਜਗ੍ਹਾ ਘੱਟ ਹੋਣ ਕਰਕੇ ਚੰਗਾ ਹੋਵੇਗਾ ਕਿ ਤੁਸੀਂ ਆਪੋ-ਆਪਣੀ ਗੱਡੀ ਵਿਚ ਆਉਣ ਦੀ ਬਜਾਇ ਇਕੱਠੇ ਹੋ ਕੇ ਗੱਡੀਆਂ ਵਿਚ ਆਓ।
◼ ਸੀਟਾਂ: ਆਪਣੇ ਘਰ ਦਿਆਂ ਲਈ, ਆਪਣੇ ਨਾਲ ਸਫ਼ਰ ਕਰਨ ਵਾਲਿਆਂ ਲਈ ਜਾਂ ਆਪਣੀਆਂ ਬਾਈਬਲ ਸਟੱਡੀਆਂ ਲਈ ਹੀ ਸੀਟਾਂ ਰੱਖੋ।—1 ਕੁਰਿੰ. 13:5.
◼ ਦੁਪਹਿਰ ਦਾ ਖਾਣਾ: ਬਾਹਰ ਜਾ ਕੇ ਖਾਣ ਦੀ ਬਜਾਇ ਹਲਕਾ-ਫੁਲਕਾ ਖਾਣਾ ਨਾਲ ਲੈ ਕੇ ਆਓ। ਤੁਸੀਂ ਆਪਣੇ ਨਾਲ ਛੋਟੇ ਬੈਗ ਲਿਆ ਸਕਦੇ ਹੋ ਜੋ ਸੀਟਾਂ ਹੇਠ ਰੱਖੇ ਜਾ ਸਕਣ। ਸੰਮੇਲਨ ਵਾਲੀ ਥਾਂ ʼਤੇ ਵੱਡੇ-ਵੱਡੇ ਡੱਬੇ ਅਤੇ ਕੱਚ ਦੀਆਂ ਚੀਜ਼ਾਂ ਲਿਆਉਣ ਦੀ ਇਜਾਜ਼ਤ ਨਹੀਂ।
◼ ਦਾਨ: ਅਸੀਂ ਸੰਮੇਲਨ ਵਿਚ ਆਪਣੀ ਖ਼ੁਸ਼ੀ ਨਾਲ ਦਾਨ ਦੇ ਕੇ ਸੰਮੇਲਨ ਦੇ ਇੰਤਜ਼ਾਮਾਂ ਲਈ ਆਪਣੀ ਸ਼ੁਕਰਗੁਜ਼ਾਰੀ ਜ਼ਾਹਰ ਕਰ ਸਕਦੇ ਹਾਂ। ਜੇ ਸੰਮੇਲਨ ਵਿਚ ਤੁਸੀਂ ਚੈੱਕ ਰਾਹੀਂ ਦਾਨ ਦੇਣਾ ਚਾਹੁੰਦੇ ਹੋ, ਤਾਂ “The Watch Tower Bible and Tract Society of India” ਦੇ ਨਾਂ ਤੇ ਚੈੱਕ ਬਣਾਓ।
◼ ਦੁਰਘਟਨਾ ਤੇ ਐਮਰਜੈਂਸੀ: ਜੇ ਹਾਲ ਵਿਚ ਕਿਸੇ ਦੇ ਸੱਟ-ਚੋਟ ਲੱਗ ਜਾਵੇ, ਤਾਂ ਕਿਸੇ ਅਟੈਂਡੰਟ ਨੂੰ ਬੁਲਾਓ ਜੋ ਤੁਰੰਤ ਫ਼ਸਟ ਏਡ ਵਿਭਾਗ ਨੂੰ ਸੂਚਿਤ ਕਰੇਗਾ। ਹਾਲ ਵਿਚ ਡਾਕਟਰੀ ਸਹਾਇਤਾ ਪ੍ਰਦਾਨ ਕਰਨ ਵਾਲੇ ਕਾਬਲ ਭੈਣ-ਭਰਾ ਉਸ ਵਿਅਕਤੀ ਦੀ ਹਾਲਤ ਨੂੰ ਦੇਖ ਕੇ ਲੋੜੀਂਦੀ ਮਦਦ ਦੇਣਗੇ। ਜੇ ਲੋੜ ਹੋਵੇ, ਤਾਂ ਫ਼ਸਟ ਏਡ ਵਿਚ ਸਾਡੇ ਭੈਣ-ਭਰਾ ਐਂਬੂਲੈਂਸ ਨੂੰ ਸੱਦਣਗੇ। ਇਵੇਂ ਕਰਨ ਨਾਲ ਐਮਰਜੈਂਸੀ ਸੇਵਾਵਾਂ ਵਾਲਿਆਂ ਨੂੰ ਲੋੜੋਂ ਵਧ ਫ਼ੋਨ ਕਾਲ ਨਹੀਂ ਜਾਣਗੇ।
◼ ਦਵਾਈਆਂ: ਜੇ ਤੁਹਾਨੂੰ ਦਵਾਈਆਂ ਦੀ ਲੋੜ ਹੈ, ਤਾਂ ਕਿਰਪਾ ਕਰ ਕੇ ਇਹ ਆਪਣੇ ਨਾਲ ਲੈ ਕੇ ਆਓ ਕਿਉਂਕਿ ਸੰਮੇਲਨ ʼਤੇ ਇਨ੍ਹਾਂ ਦਾ ਕੋਈ ਪ੍ਰਬੰਧ ਨਹੀਂ ਹੈ। ਸ਼ੂਗਰ ਦੇ ਮਰੀਜ਼ ਟੀਕੇ ਲਗਾਉਣ ਤੋਂ ਬਾਅਦ ਸਰਿੰਜਾਂ ਨੂੰ ਸੰਮੇਲਨ ਅਤੇ ਹੋਟਲ ਦੇ ਕੂੜੇ-ਦਾਨਾਂ ਵਿਚ ਨਾ ਸੁੱਟਣ। ਸਰਿੰਜਾਂ ਨੂੰ ਸਹੀ ਜਗ੍ਹਾ ਸੁੱਟੋ।
◼ ਜੁੱਤੀਆਂ: ਹਰ ਸਾਲ ਉੱਚੀ ਅੱਡੀ ਵਾਲੀਆਂ ਜਾਂ ਤਿਲਕਵੀਆਂ ਜੁੱਤੀਆਂ ਪਾਉਣ ਕਰਕੇ ਕਈ ਸੱਟਾਂ ਲੱਗਦੀਆਂ ਹਨ। ਅਜਿਹੀ ਜੁੱਤੀ ਪਹਿਨੋ ਜਿਸ ਨਾਲ ਤੁਸੀਂ ਸੌਖਿਆਂ ਹੀ ਪੌੜੀਆਂ ਅਤੇ ਰੈਂਪ ਚੜ੍ਹ ਸਕਦੇ ਹੋ।
◼ ਘੱਟ ਸੁਣਨ ਵਾਲਿਆਂ ਲਈ ਇੰਤਜ਼ਾਮ: ਸੰਮੇਲਨ ਦੀਆਂ ਕਈ ਥਾਵਾਂ ਤੇ ਪ੍ਰੋਗ੍ਰਾਮ ਸੈਨਤ ਭਾਸ਼ਾ ਵਿਚ ਪੇਸ਼ ਕੀਤਾ ਜਾਵੇਗਾ।
◼ ਬਪਤਿਸਮਾ: ਸ਼ਨੀਵਾਰ ਸਵੇਰ ਨੂੰ ਬਪਤਿਸਮੇ ਦੇ ਭਾਸ਼ਣ ਤੋਂ ਪਹਿਲਾਂ, ਬਪਤਿਸਮੇ ਦੇ ਉਮੀਦਵਾਰਾਂ ਨੂੰ ਠਹਿਰਾਈ ਹੋਈ ਜਗ੍ਹਾ ʼਤੇ ਬੈਠੇ ਹੋਣਾ ਚਾਹੀਦਾ ਹੈ। ਹਰੇਕ ਨੂੰ ਆਪੋ-ਆਪਣਾ ਤੌਲੀਆ ਅਤੇ ਢੁਕਵੇਂ ਕੱਪੜੇ ਲਿਆਉਣੇ ਚਾਹੀਦੇ ਹਨ। ਬਪਤਿਸਮੇ ਦੇ ਉਮੀਦਵਾਰਾਂ ਲਈ ਪਲੇਟਫਾਰਮ ਦੇ ਸਾਮ੍ਹਣੇ ਸੀਟਾਂ ਰੱਖੀਆਂ ਜਾਣਗੀਆਂ। ਜੇ ਬੈਠਣ ਦੀ ਜਗ੍ਹਾ ਵਿਚ ਕੋਈ ਵੀ ਬਦਲੀ ਹੋਵੇਗੀ, ਤਾਂ ਇਸ ਬਾਰੇ ਦੱਸਿਆ ਜਾਵੇਗਾ ਅਤੇ ਅਟੈਂਡੰਟਾਂ ਨਾਲੇ ਸੂਚਨਾ ਵਿਭਾਗ ਨੂੰ ਇਸ ਬਾਰੇ ਪਤਾ ਹੋਵੇਗਾ।
◼ ਸੈਂਟ: ਕੁਝ ਸੰਮੇਲਨ ਬੰਦ ਹਾਲਾਂ ਵਿਚ ਹੁੰਦੇ ਹਨ ਜਿੱਥੇ ਏ. ਸੀ. ਲੱਗੇ ਹੁੰਦੇ ਹਨ। ਇਸ ਲਈ ਚੰਗਾ ਹੋਵੇਗਾ ਜੇ ਅਸੀਂ ਸੈਂਟ ਦੀ ਘੱਟ ਵਰਤੋਂ ਕਰੀਏ ਕਿਉਂਕਿ ਇਸ ਨਾਲ ਉਨ੍ਹਾਂ ਭੈਣਾਂ-ਭਰਾਵਾਂ ਨੂੰ ਦਿੱਕਤ ਹੁੰਦੀ ਹੈ ਜੋ ਸਾਹ ਦੀਆਂ ਬੀਮਾਰੀਆਂ ਤੋਂ ਪੀੜਿਤ ਹਨ।—1 ਕੁਰਿੰ. 10:24.
◼ S-43 ਫਾਰਮ: ਜਦੋਂ ਅਸੀਂ ਸੰਮੇਲਨ ਵਾਲੇ ਸ਼ਹਿਰ ਵਿਚ ਕਿਸੇ ਨੂੰ ਗਵਾਹੀ ਦਿੰਦੇ ਹਾਂ ਅਤੇ ਉਹ ਵਿਅਕਤੀ ਹੋਰ ਜਾਣਨਾ ਚਾਹੁੰਦਾ ਹੈ, ਤਾਂ ਸਾਨੂੰ S-43 ਫਾਰਮ ਭਰਨਾ ਚਾਹੀਦਾ ਹੈ। ਪਬਲੀਸ਼ਰਾਂ ਨੂੰ ਸੰਮੇਲਨ ਵਿਚ ਆਪਣੇ ਨਾਲ ਇਕ-ਦੋ ਫਾਰਮ ਲਿਆਉਣੇ ਚਾਹੀਦੇ ਹਨ। ਇਹ ਫਾਰਮ ਭਰ ਕੇ ਬੁੱਕ ਰੂਮ ਵਿਭਾਗ ਨੂੰ ਦਿਓ ਜਾਂ ਸੰਮੇਲਨ ਤੋਂ ਵਾਪਸ ਆ ਕੇ ਆਪਣੀ ਮੰਡਲੀ ਦੇ ਸੈਕਟਰੀ ਨੂੰ ਦਿਓ।—ਮਈ 2011 ਦੀ ਸਾਡੀ ਰਾਜ ਸੇਵਕਾਈ ਦਾ ਸਫ਼ਾ 3 ਦੇਖੋ।
◼ ਰੈਸਟੋਰੈਂਟ: ਰੈਸਟੋਰੈਂਟਾਂ ਅਤੇ ਹੋਟਲਾਂ ਵਿਚ ਆਪਣਾ ਚਾਲ-ਚਲਣ ਚੰਗਾ ਰੱਖ ਕੇ ਯਹੋਵਾਹ ਦਾ ਨਾਂ ਵਡਿਆਓ। ਕਈ ਥਾਵਾਂ ਉੱਤੇ ਗਾਹਕਾਂ ਤੋਂ ਆਸ ਰੱਖੀ ਜਾਂਦੀ ਹੈ ਕਿ ਉਹ ਸਰਵਿਸ ਦੇ ਹਿਸਾਬ ਨਾਲ ਵੇਟਰਾਂ ਨੂੰ ਟਿੱਪ ਦੇਣ।
◼ ਹੋਟਲ:
(1) ਕਿਰਪਾ ਕਰ ਕੇ ਲੋੜ ਨਾਲੋਂ ਵੱਧ ਕਮਰੇ ਬੁੱਕ ਨਾ ਕਰੋ। ਇਕ ਕਮਰੇ ਵਿਚ ਜਿੰਨੇ ਵਿਅਕਤੀਆਂ ਨੂੰ ਰਹਿਣ ਦੀ ਇਜਾਜ਼ਤ ਹੈ, ਉਸ ਤੋਂ ਜ਼ਿਆਦਾ ਵਿਅਕਤੀ ਨਾ ਰਹਿਣ।
(2) ਜੇ ਜਾਇਜ਼ ਕਾਰਨਾਂ ਕਰਕੇ ਕਮਰਾ ਕੈਂਸਲ ਕਰਨਾ ਪਵੇ, ਤਾਂ ਹੋਟਲ ਵਾਲਿਆਂ ਨੂੰ ਤੁਰੰਤ ਦੱਸ ਦਿਓ।—ਮੱਤੀ 5:37.
(3) ਯਾਦ ਰੱਖੋ ਕਿ ਜੇ ਤੁਸੀਂ ਹੋਟਲ ਵਿਚ ਚੈੱਕ-ਇਨ ਕਰਨ ਲਈ ਕਿਰਾਇਆ ਭਰਦੇ ਸਮੇਂ ਡੈਬਿੱਟ ਜਾਂ ਕ੍ਰੈਡਿਟ ਕਾਰਡ ਵਰਤਦੇ ਹੋ, ਤਾਂ ਆਮ ਤੌਰ ਤੇ ਤੁਹਾਡੇ ਅਕਾਊਂਟ ਵਿੱਚੋਂ ਕਿਰਾਏ ਤੋਂ ਇਲਾਵਾ ਵਾਧੂ ਪੈਸੇ ਸਿਕਉਰਿਟੀ ਵਜੋਂ ਰੱਖੇ ਜਾਂਦੇ ਹਨ। ਜੇ ਹੋਟਲ ਵਿਚ ਰਹਿੰਦਿਆਂ ਤੁਹਾਡੇ ਤੋਂ ਕੋਈ ਨੁਕਸਾਨ ਹੋ ਜਾਵੇ, ਤਾਂ ਨੁਕਸਾਨ ਦਾ ਬਿਲ ਇਨ੍ਹਾਂ ਵਾਧੂ ਪੈਸਿਆਂ ਵਿੱਚੋਂ ਭਰਿਆ ਜਾਂਦਾ ਹੈ। ਜਦੋਂ ਤਕ ਹੋਟਲ ਦਾ ਹਿਸਾਬ-ਕਿਤਾਬ ਪੂਰਾ ਨਹੀਂ ਹੋ ਜਾਂਦਾ, ਤੁਸੀਂ ਉਹ ਪੈਸੇ ਨਹੀਂ ਵਰਤ ਸਕਦੇ।
(4) ਉਦੋਂ ਹੀ ਸਾਮਾਨ ਢੋਣ ਵਾਲੀ ਟ੍ਰਾਲੀ ਲਓ ਜਦੋਂ ਤੁਸੀਂ ਸਾਮਾਨ ਲੈ ਜਾਣ ਲਈ ਤਿਆਰ ਹੁੰਦੇ ਹੋ ਅਤੇ ਇਸਤੇਮਾਲ ਕਰਨ ਤੋਂ ਬਾਅਦ ਤੁਰੰਤ ਵਾਪਸ ਕਰ ਦਿਓ ਤਾਂਕਿ ਦੂਸਰੇ ਉਸ ਨੂੰ ਇਸਤੇਮਾਲ ਕਰ ਸਕਣ।
(5) ਹੋਟਲ ਦੇ ਕਰਮਚਾਰੀਆਂ ਨੂੰ ਟਿੱਪ ਦਿਓ ਜਦੋਂ ਉਹ ਤੁਹਾਡਾ ਸਮਾਨ ਚੁੱਕਦੇ ਹਨ ਅਤੇ ਕਮਰਾ ਸਾਫ਼ ਕਰਨ ਵਾਲੇ ਕਰਮਚਾਰੀ ਨੂੰ ਰੋਜ਼ ਟਿੱਪ ਦਿਓ।
(6) ਜੇ ਹੋਟਲ ਦੇ ਕਮਰੇ ਵਿਚ ਖਾਣਾ ਪਕਾਉਣ ਦੀ ਇਜਾਜ਼ਤ ਨਹੀਂ ਹੈ, ਤਾਂ ਉੱਥੇ ਖਾਣਾ ਨਾ ਪਕਾਓ।
(7) ਹੋਟਲ ਵਿਚ ਰਹਿੰਦਿਆਂ ਜੇ ਹੋਟਲ ਵਾਲੇ ਮੁਫ਼ਤ ਵਿਚ ਸਵੇਰ ਦਾ ਨਾਸ਼ਤਾ, ਚਾਹ-ਕੌਫ਼ੀ ਜਾਂ ਬਰਫ਼ ਦਿੰਦੇ ਹਨ, ਤਾਂ ਇਨ੍ਹਾਂ ਚੀਜ਼ਾਂ ਦਾ ਨਾਜਾਇਜ਼ ਫ਼ਾਇਦਾ ਨਾ ਉਠਾਓ।
(8) ਹੋਟਲ ਦੇ ਕਰਮਚਾਰੀਆਂ ਨਾਲ ਪੇਸ਼ ਆਉਂਦੇ ਸਮੇਂ ਹਰ ਵੇਲੇ ਪਰਮੇਸ਼ੁਰੀ ਗੁਣ ਦਿਖਾਓ। ਉੱਥੇ ਹੋਰ ਬਹੁਤ ਸਾਰੇ ਲੋਕ ਹਨ ਜਿਨ੍ਹਾਂ ਦੀ ਉਹ ਦੇਖ-ਭਾਲ ਕਰਦੇ ਹਨ। ਉਹ ਕਦਰ ਕਰਨਗੇ ਜੇ ਅਸੀਂ ਪਿਆਰ, ਧੀਰਜ ਤੇ ਸਮਝਦਾਰੀ ਨਾਲ ਪੇਸ਼ ਆਵਾਂਗੇ।
(9) ਮਾਪਿਆਂ ਨੂੰ ਹੋਟਲ ਵਿਚ, ਉੱਥੇ ਦੇ ਸਵਿਮਿੰਗ ਪੂਲ, ਲਾਬੀ, ਕਸਰਤ ਵਾਲੇ ਕਮਰੇ ਅਤੇ ਹੋਰ ਥਾਵਾਂ ʼਤੇ ਆਪਣੇ ਬੱਚਿਆਂ ਉੱਤੇ ਹਰ ਵੇਲੇ ਨਿਗਾਹ ਰੱਖਣੀ ਚਾਹੀਦੀ ਹੈ।
(10) ਹੋਟਲਾਂ ਦੀ ਲਿਸਟ ਉੱਤੇ ਇਕ ਦਿਨ ਦਾ ਪੂਰਾ ਕਿਰਾਇਆ ਦੱਸਿਆ ਜਾਂਦਾ ਹੈ। ਇਸ ਵਿਚ ਟੈਕਸ ਸ਼ਾਮਲ ਨਹੀਂ ਹੁੰਦਾ। ਜੇ ਤੁਹਾਡੇ ਤੋਂ ਉਨ੍ਹਾਂ ਚੀਜ਼ਾਂ ਦੇ ਪੈਸੇ ਮੰਗੇ ਜਾਣ ਜੋ ਤੁਸੀਂ ਮੰਗੀਆਂ ਜਾਂ ਵਰਤੀਆਂ ਨਹੀਂ, ਤਾਂ ਪੈਸੇ ਨਾ ਦਿਓ ਅਤੇ ਜਲਦੀ ਤੋਂ ਜਲਦੀ ਰੂਮਿੰਗ ਡਿਪਾਰਟਮੈਂਟ ਨੂੰ ਦੱਸੋ।
(11) ਜੇ ਤੁਹਾਨੂੰ ਆਪਣੇ ਹੋਟਲ ਦੇ ਕਮਰੇ ਨੂੰ ਲੈ ਕੇ ਕੋਈ ਸਮੱਸਿਆ ਆਉਂਦੀ ਹੈ, ਤਾਂ ਸੰਮੇਲਨ ਦੌਰਾਨ ਰੂਮਿੰਗ ਡਿਪਾਰਟਮੈਂਟ ਨੂੰ ਇਸ ਬਾਰੇ ਜ਼ਰੂਰ ਦੱਸੋ।
◼ ਵਲੰਟੀਅਰ ਸੇਵਾ: ਜੇ ਤੁਸੀਂ ਮਦਦ ਕਰਨੀ ਚਾਹੁੰਦੇ ਹੋ, ਤਾਂ ਵਲੰਟੀਅਰ ਸੇਵਾ ਵਿਭਾਗ ਵਿਚ ਜਾ ਕੇ ਇਸ ਬਾਰੇ ਪੁੱਛੋ। 16 ਸਾਲ ਦੀ ਉਮਰ ਤੋਂ ਛੋਟੇ ਬੱਚੇ ਆਪਣੇ ਮਾਤਾ-ਪਿਤਾ ਜਾਂ ਉਨ੍ਹਾਂ ਦੀ ਇਜਾਜ਼ਤ ਨਾਲ ਕਿਸੇ ਦੂਜੇ ਜ਼ਿੰਮੇਵਾਰ ਵਿਅਕਤੀ ਨਾਲ ਕੰਮ ਕਰ ਸਕਦੇ ਹਨ।
[ਸਫ਼ਾ 6 ਉੱਤੇ ਡੱਬੀ]
ਅਸੀਂ ਸੱਦਾ-ਪੱਤਰ ਕਿਸ ਤਰ੍ਹਾਂ ਪੇਸ਼ ਕਰਾਂਗੇ?
ਆਪਣੇ ਇਲਾਕੇ ਵਿਚ ਸਾਰਿਆਂ ਨੂੰ ਸੱਦਾ-ਪੱਤਰ ਵੰਡ ਸਕਣ ਲਈ ਸਾਨੂੰ ਬਹੁਤ ਕੁਝ ਕਹਿਣ ਦੀ ਲੋੜ ਨਹੀਂ। ਅਸੀਂ ਇਵੇਂ ਕੁਝ ਕਹਿ ਸਕਦੇ ਹਾਂ: “ਨਮਸਤੇ। ਇਹ ਸੱਦਾ-ਪੱਤਰ ਸਾਰੀ ਦੁਨੀਆਂ ਵਿਚ ਵੰਡਿਆ ਜਾ ਰਿਹਾ ਹੈ। ਇਹ ਤੁਹਾਡੀ ਕਾਪੀ ਹੈ। ਪ੍ਰੋਗ੍ਰਾਮ ਦੀ ਸਾਰੀ ਜਾਣਕਾਰੀ ਇਸ ਵਿਚ ਦਿੱਤੀ ਗਈ ਹੈ।” ਜੋਸ਼ ਨਾਲ ਬੋਲੋ। ਜੇ ਠੀਕ ਲੱਗੇ, ਤਾਂ ਸ਼ਨੀਵਾਰ-ਐਤਵਾਰ ਨੂੰ ਸੱਦਾ-ਪੱਤਰ ਵੰਡਦੇ ਸਮੇਂ ਰਸਾਲੇ ਵੀ ਪੇਸ਼ ਕਰੋ।