ਤਣਾਅ ਤੋਂ ਰਾਹਤ

ਤਣਾਅ ਕਿਉਂ ਹੁੰਦਾ ਹੈ?

ਇਕ ਜਾਣੇ-ਪਛਾਣੇ ਮੇਓ ਨਾਂ ਦੇ ਕਲਿਨਿਕ ਦੀ ਰਿਪੋਰਟ ਮੁਤਾਬਕ, “ਬਹੁਤ ਸਾਰੇ ਲੋਕਾਂ ਵਿਚ ਤਣਾਅ ਵਧਦਾ ਜਾ ਰਿਹਾ ਹੈ। ਅੱਜ ਜ਼ਿੰਦਗੀ ਵਿਚ ਬਹੁਤ ਸਾਰੇ ਬਦਲਾਅ ਹੁੰਦੇ ਹਨ ਅਤੇ ਕਿਸੇ ਵੀ ਵੇਲੇ ਕੁਝ ਵੀ ਹੋ ਸਕਦਾ ਹੈ।” ਜ਼ਰਾ ਕੁਝ ਗੱਲਾਂ ʼਤੇ ਗੌਰ ਕਰੋ ਜਿਨ੍ਹਾਂ ਕਰਕੇ ਤਣਾਅ ਹੋ ਸਕਦਾ ਹੈ:

ਤਲਾਕ
ਕਿਸੇ ਪਿਆਰੇ ਦੀ ਮੌਤ
ਗੰਭੀਰ ਬੀਮਾਰੀ
ਭਿਆਨਕ ਐਕਸੀਡੈਂਟ
ਅਪਰਾਧ
ਰੋਜ਼ਮੱਰਾ ਦੀ ਭੱਜ-ਦੌੜ
ਕੁਦਰਤੀ ਤੇ ਇਨਸਾਨਾਂ ਵੱਲੋਂ ਲਿਆਂਦੀਆਂ ਆਫ਼ਤਾਂ
ਸਕੂਲ ਜਾਂ ਕੰਮ ਦੀ ਥਾਂ ʼਤੇ ਦਬਾਅ
ਕੰਮ ਅਤੇ ਪੈਸੇ-ਧੇਲੇ ਦੀ ਚਿੰਤਾ

ਬਚਪਨ ਵਿਚ ਤਣਾਅ

ਅੱਜ-ਕੱਲ੍ਹ ਬੱਚਿਆਂ ਨੂੰ ਵੀ ਤਣਾਅ ਹੋਣਾ ਆਮ ਗੱਲ ਹੋ ਗਈ ਹੈ। ਕਈ ਬੱਚਿਆਂ ਨੂੰ ਸਕੂਲ ਵਿਚ ਡਰਾਇਆ-ਧਮਕਾਇਆ ਜਾਂਦਾ ਜਾਂ ਘਰਦਿਆਂ ਵੱਲੋਂ ਨਜ਼ਰਅੰਦਾਜ਼ ਕੀਤਾ ਜਾਂਦਾ ਹੈ। ਹੋਰ ਬੱਚਿਆਂ ਨੂੰ ਮਾਰਿਆ-ਕੁੱਟਿਆ ਜਾਂਦਾ ਹੈ, ਉਨ੍ਹਾਂ ਦਾ ਮਾਨਸਿਕ ਸ਼ੋਸ਼ਣ ਕੀਤਾ ਜਾਂਦਾ ਹੈ ਜਾਂ ਉਨ੍ਹਾਂ ਨਾਲ ਬਦਫ਼ੈਲੀ ਕੀਤੀ ਜਾਂਦੀ ਹੈ। ਬਹੁਤ ਸਾਰਿਆਂ ਨੂੰ ਪੇਪਰਾਂ ਅਤੇ ਨੰਬਰਾਂ ਦੀ ਚਿੰਤਾ ਹੁੰਦੀ ਹੈ। ਕਈ ਬੱਚੇ ਤਲਾਕ ਕਰਕੇ ਆਪਣੇ ਪਰਿਵਾਰਾਂ ਨੂੰ ਟੁੱਟਦਾ ਦੇਖਦੇ ਹਨ। ਤਣਾਅ ਵਿਚ ਰਹਿਣ ਵਾਲੇ ਬੱਚਿਆਂ ਨੂੰ ਸ਼ਾਇਦ ਡਰਾਉਣੇ ਸੁਪਨੇ ਆਉਣ, ਉਹ ਗੱਲਾਂ ਯਾਦ ਨਾ ਰੱਖ ਪਾਉਣ, ਡਿਪਰੈਸ਼ਨ ਵਿਚ ਚਲੇ ਜਾਣ ਜਾਂ ਦੂਜਿਆਂ ਨਾਲ ਘੁਲਣਾ-ਮਿਲਣਾ ਬੰਦ ਕਰ ਦੇਣ। ਕੁਝ ਜਣਿਆਂ ਲਈ ਆਪਣੇ ਜਜ਼ਬਾਤਾਂ ʼਤੇ ਕਾਬੂ ਪਾਉਣਾ ਔਖਾ ਹੋ ਸਕਦਾ ਹੈ। ਤਣਾਅ ਵਿਚ ਰਹਿਣ ਵਾਲੇ ਬੱਚਿਆਂ ਨੂੰ ਜਲਦੀ ਤੋਂ ਜਲਦੀ ਮਦਦ ਦੀ ਲੋੜ ਹੁੰਦੀ ਹੈ।